1-3. Ko te ʼu fihifihia fea ʼae ʼe tau mo te ʼu taumatuʼa? (Vakaʼi te ʼuluaki pāki.)

ʼE UI fenei e te tagata ʼohoana fiafia talu mai taʼu ʼe 38: “ ʼE feala hakotou maʼu te tapuakina ʼa Sehova, mo kapau ʼe kotou faiga fakamalotoloto pea mo kotou fakaha ʼe kotou loto ke fua lelei ia tokotou maʼuli fakataumatuʼa.” ʼE moʼoni, ʼe feala ki te ʼu taumatuʼa ke natou maʼuli fiafia fakatahi pea mo natou felagolagoʼaki ʼi te ʼu temi faigataʼa.—Taaga Lea 18:22, MN.

² ʼI te agamahani, ʼe tau ia te ʼu taumatuʼa mo te ʼu fihifihia peʼe ko te ʼu “mamahi i te sino” ʼae ʼe ui ʼi te Tohi-Tapu. (1 Kolinito 7:28) Kotea tona tupuʼaga? Ko te ʼu fihifihia ʼae ʼe tau mo te ʼu taumatuʼa ʼi te ʼaho fuli, ʼe feala ke fakatupu lotomamahi. ʼE toe agahala mo te ʼu tagata pea mo te ʼu fafine ʼohoana, koia ʼae ʼi ʼihi temi ʼe natou fefakalotomamahiʼaki pea ʼe mole kei natou fepalalauleleiʼaki. (Sakopo 3:2, 5, 8) Tokolahi te ʼu taumatuʼa, ʼe natou maʼumaʼua ʼaupito ʼi ʼanatou gaue pea ʼe natou toe maʼu fanau. Pea ʼe toe faigataʼa hanatou maʼu he temi feʼauga moʼo fakamalohiʼi ia tonatou maʼuli fakataumatuʼa, ʼuhi ko te gaue kinakina pea mo te gaʼegaʼe. ʼAki ia te ʼu fihifihia fakapaʼaga, te mahaki peʼe ko ʼihi atu ʼu faigataʼaʼia, ʼe feala ke  vaivai ai tanatou feʼofaʼofani pea mo tanatou fefakaʼapaʼapaʼaki. Pea ko te nofo ʼohoana ʼae ʼe hage mai ʼe malohi, ʼe feala ia ke maumauʼi ʼaki ia “te u gaue o te kakano,” ohage ko te ʼu aga heʼe ʼaoga, te aga fakalialia, te loto fehiʼa, te ke, te maheka, te ita pea mo te ʼu fihi.—Kalate 5:19-21.

³ Kua toe ʼaʼasili kovi age ia “te u aho fakamuli” ʼaeni, koteʼuhi ʼe manatu pe te hahaʼi kia natou totonu pea ʼe mole natou fakaʼapaʼapa ki te ʼAtua. Ko te taʼi aga ʼaia, ʼe ko he kafo kona ki te maʼuli fakataumatuʼa. (2 Timoteo 3:1-4) Pea tahi, ʼe fakatotonu e totatou fili kakā ke ina maumauʼi ia te ʼu maʼuli fakataumatuʼa. Koia ʼae neʼe fakatokagaʼi fenei ai tatou e te apositolo ko Petelo: “Ko tokotou fili, te tiapolo, e taka o hage ko he laione gugulu, o kumi pe ko ai ae e ina kai anai.”—1 Petelo 5:8; Apokalipisi 12:12.

4. ʼE feala ke tologa pea mo fiafia feafeaʼi ia te nofo ʼohoana?

⁴ Neʼe fakamoʼoni fenei ia te tagata ʼohoana ʼi Saponia: “Neʼe au lotomamahi ʼuhi ko te lahi ʼo te ʼu aluʼaga faigataʼa fakapaʼaga ʼae neʼe au tau mo ia. Pea neʼe mole kei au felogoʼi mo toku ʼohoana, koia neʼe toe lotomamahi ai mo ia ʼuhi ko te aluʼaga ʼaia. ʼE mole faʼa fualoa ki ai, neʼe tau mo te mahaki kovi. ʼI ʼihi temi, neʼe ma ke ʼuhi ko te ʼu aluʼaga faigataʼa ʼaia.” ʼE moʼoni, ʼe ʼi ai anai te ʼu fihifihia ʼi te maʼuli fakataumatuʼa, kaʼe ʼe feala pe hatatou tauʼi. ʼAki te tokoni ʼa Sehova, ʼe feala ke maʼu e te ʼu taumatuʼa ia he ʼu felogoʼi malohi mo fiafia. (Lau ia Pesalemo 127:1.) Tou vakaʼi ia aluʼaga ʼe nima ʼe feala ai ke malohi pea mo tologa ia te nofo ʼohoana. ʼE tou toe vakaʼi anai pe koʼe ʼe maʼuhiga ia te ʼofa, moʼo taupau ia he maʼuli fakataumatuʼa ʼe tologa.

5, 6. Kotea ʼae ʼe feala ke fai e te ʼu taumatuʼa ke natou tokagaʼi ia Sehova ʼi tonatou maʼuli fakataumatuʼa?

⁵ Moka agatonu pea mo fakalogo ia he taumatuʼa kia Sehova, ʼe ko he fakatafitoʼaga  malohi anai ki tonā maʼuli fakataumatuʼa. (Lau ia Ekelesiasi 4:12.) ʼE tokagaʼi e te ʼu taumatuʼa ia te ʼAtua ʼi tonatou maʼuli fakataumatuʼa, mo kapau ʼe natou mulimuli ki tana takitaki ʼofa. ʼE ui fenei ʼi te Tohi-Tapu: “ ʼE logo anai ʼou taliga ki he folafola ʼe haʼu mai ʼou tuʼa, ʼo ui fenei: ‘Koʼeni te ala. Kotou haʼele ai,’ pe ʼe tonu ke kotou olo ki te faʼahi mataʼu peʼe tonu ke kotou olo ki te faʼahi hema.” (Isaia 30:20, 21, MN) Ia ʼaho nei, ʼe “logo” ia te ʼu taumatuʼa ki te folafola ʼa Sehova moka natou lau fakatahi ia te Tohi-Tapu. (Pesalemo 1:1-3) ʼE toe malohi age anai ia tonatou maʼuli fakataumatuʼa moka ʼe natou fai tuʼumaʼu hanatou ako fakafamili ʼe fiafia pea mo fakalotomalohi. Pea moka faikole fakatahi te ʼu taumatuʼa ʼi te ʼaho fuli, ʼe feala ai ke natou tauʼi ia te ʼu ʼohofi ʼa te malama ʼa Satana ʼi tonatou maʼuli fakataumatuʼa.

⁶ ʼE ui fenei e Gerhard mai Siamani: “Neʼe taʼomia toma fiafia ʼuhi ko ʼoma fihifihia pea mo tamā femahinohalaʼaki. Kaʼe ʼaki te ʼu tokoni ʼae ʼe haʼu mai te Folafola ʼa te ʼAtua, neʼe ma maʼu ai ia te kataki fualoa pea mo te lotofakamolemole.” ʼE ina toe ui, ʼe maʼuhiga ia te ʼu kalitate ʼaia ke fiafia ia he maʼuli fakataumatuʼa. Koia moka faiga malohi ia he taumatuʼa ke nā tokagaʼi ia te ʼAtua ʼi tonā maʼuli ʼaki tanā tauhi fakatahi ʼae kia te ia, ʼe nā nonofo ovi ai kia Sehova pea mo malohi ai ʼana felogoʼi.

7. ʼE tonu ke feafeaʼi ia te aga ʼa he tagata ki tona ʼohoana?

⁷ Ko te faʼahiga fakahoko e te tagata ʼohoana ia tona ʼuhiga pule ʼi tona famili, ʼe feala ai ke tologa mo fiafia ia tona maʼuli fakataumatuʼa. ʼE ui fenei ʼi te Tohi-Tapu: “Ko Kilisito ko te pule aia o te tagata fuli; ko te tagata ko te pule aia o te fafine.” (1 Kolinito 11:3) Kotea tona fakaʼuhiga? ʼE tonu ke hage te aga ʼa te ʼu tagata ki ʼonatou ʼohoana ko te aga ʼa Sesu ki ʼana tisipulo. Neʼe mole agakovi peʼe aga fefeka ʼi he temi. Kaʼe neʼe lotoʼofa tuʼumaʼu pe ia Sesu, mo agalelei, mo agafakapotopoto, mo agamalū pea mo agavaivai.—Mateo 11:28-30.

8. Kotea ʼae ʼe tonu ke fai e he tagata ke ʼofainaʼi pea mo fakaʼapaʼapaʼi e tona ʼohoana?

⁸ ʼE mole ʼaoga ke fakamaʼua e te ʼu tagata ʼohoana Kilisitiano ke fakaʼapaʼapa age ʼonatou ʼohoana. Kaʼe ʼe natou haga fakaha ia tanatou tokaga kia natou, pea ʼe natou “fakaapaapa” kia natou ohage ko he ʼu “ipu fakaeteete lahi.” (1 Petelo 3:7) Ka fai e te ʼu tagata ʼohoana he ʼu palalau fakaʼapaʼapa pea mo lotomanavaʼofa ki ʼonatou ʼohoana, ʼi muʼa ʼo te hahaʼi peʼe ʼi tonatou loto fale, ʼe natou fakaha ai ʼe maʼuhiga kia natou ʼonatou ʼohoana. (Taaga Lea 31:28) Moka fakaha e he tagata ʼi tana aga ia tona ʼofa ʼae ki tona ʼohoana, ʼe toe ʼofa mo fakaʼapaʼapa anai ia tona ʼohoana kia ia. Pea ʼe tapuakina anai e Sehova ia tonā maʼuli fakataumatuʼa.

9. ʼE feala ke fakaha feafeaʼi e he fafine ʼohoana ia tana fakalogo?

⁹ Ko te ʼofa moʼoni kia Sehova ʼae ʼe fakatafito ki ʼana pelesepeto, ʼe tokoni mai anai ke tou agavaivai “i lalo o te nima mafimafi o te Atua.” (1 Petelo 5:6) ʼE ko he faʼahi maʼuhiga moka ʼe lagolago ia he fafine ki tona ʼohoana, koteʼuhi ʼe ina fakaha ai ia tana fakaʼapaʼapa ki te ʼuhiga pule ʼa Sehova. ʼE ui fenei ʼi te Tohi-Tapu: “U fafine ohoana, kotou fakalogo ki okotou ohoana, koteuhi e lelei te mea aia i te Aliki.” (Kolose 3:18) ʼE mahino ia, ʼe feala ke mole  leleiʼia e he fafine ʼohoana ia te ʼu tonu fuli ʼae ʼe fai e tona ʼohoana. Kaʼe ʼe fia fakalogo mo lagolago anai ia te fafine ki tona ʼohoana mo kapau ʼe mole fakafeagai ʼana tonu ki te ʼu lao ʼa te ʼAtua.—1 Petelo 3:1.

10. He koʼe ʼe maʼuhiga ia te fakalogo ʼaki te ʼofa?

¹⁰ Neʼe foaki e Sehova ki te ʼu fafine ʼohoana ia he gaue maʼuhiga ʼi tonatou kiʼi famili. Ko he fafine ʼohoana, ʼe ko te “hoa” ʼaia ʼo tona ʼohoana. (Malakia 2:14) Pea ka fai e he taumatuʼa ia he ʼu tonu ʼo ʼuhiga mo tonā kiʼi famili, ʼe fakaha anai e te fafine ia tana manatu pea mo te ʼu meʼa ʼae ʼi tona loto ʼaki he aga fakaʼapaʼapa kaʼe ʼe ina fakaha aipe ia tana fakalogo. Pea ko te tagata ʼae ʼe fakapotopoto, ʼe fagono lelei anai ki te ʼu palalau ʼo tona ʼohoana. (Taaga Lea 31:10-31) Ko te fakalogo ʼae ʼe fai ʼaki te ʼofa, ʼe tupu ai ia te fiafia, mo te tokalelei pea mo te logotahi ʼi te maʼuli fakafamili. Koia ʼe feala ai ki te ʼu taumatuʼa ke natou fiafia, koteʼuhi ʼe natou iloʼi ʼe leleiʼia natou e te ʼAtua.—Efeso 5:22.

11. He koʼe ʼe maʼuhiga ia te lotofakamolemole?

¹¹ Ke tologa ia he nofo ʼohoana, ʼe tonu ki te ʼu taumatuʼa ke natou ako ke natou fefakamolemoleʼaki. Moka ʼe “haga fekatakiʼaki pea mo fefakamolemoleʼaki ia he ʼu taumatuʼa ʼaki he lotolelei,” ʼe natou fakamalohiʼi ai ʼanatou felogoʼi. (Kolose 3:13, MN) Kaʼe kapau ʼe nā manatuʼi tuʼumaʼu ia te ʼu lakahala ʼae neʼe fai ʼi muʼa atu pea mo fakaʼaogaʼi ʼi ʼanā ke, ʼe vaivai ai tonā maʼuli fakataumatuʼa. Ohage la, ʼe feala ke mole kei malohi ia he ʼapi ʼuhi ko te ʼu makafaʼafaʼa ʼi te ʼu kaupa. ʼO toe feia pe, ʼe feala ke faigataʼa ki he taumatuʼa hanā fefakamolemoleʼaki pea mo faifaitahi ʼuhi ko te ʼu lotomamahi mo te ita. Kaʼe ʼe malohi age anai ia he nofo ʼohoana mo kapau ʼe fefakamolemoleʼaki ia he taumatuʼa, ohage pe ko te fakamolemole ʼae ʼa Sehova kia naua.—Mikea 7:18, 19.

12. ʼE ʼuʼufi feafeaʼi e te ʼofa “ni agahala lahi”?

¹² Ko te ʼofa moʼoni, “e mole mahalohalo ia, [peʼe mole ina tokagaʼi te kovi ʼae neʼe fai age].” ʼI tona fakahagatonu, “e uufi e te ofa ni agahala lahi.” (1 Kolinito 13:4, 5; lau ia 1 Petelo 4:8.) Koia kapau ʼe tou ʼoʼofa ki ʼihi, ʼe mole he tuʼakoi anai ʼo tatatou lotofakamolemole. Neʼe fehuʼi e te apositolo ko Petelo kia Sesu pe ʼe tonu ke tuʼa fia ia tana fakamolemole ki he tahi. Pea neʼe tali fenei ia Sesu: “E kaku ki te tua fitugofulu ma fitu.” (Mateo 18:21, 22) Kotea te fakaʼuhiga ʼo te ʼu palalau ʼa Sesu? Ko tona fakaʼuhiga, ki he Kilisitiano, ʼe mole he tuʼakoi ki tana fakamolemole ʼae ki ʼihi.—Taaga Lea 10:12. * (Vakaʼi te kiʼi nota.)

13. ʼE tou lava maʼu feafeaʼi ia te lotofakamolemole?

¹³ ʼE ui fenei e Annette mai Siamani: “Kapau ʼe mole fia fefakamolemoleʼaki ia he taumatuʼa, ʼe nā logoʼi ai ia te ita mo te mahalohalo. Pea ʼe feala ke ina maumauʼi ia tonā maʼuli fakataumatuʼa. Kaʼe moka ʼe kotou lotofakamolemole, ʼe malohi ai ia tokotou maʼuli fakataumatuʼa pea mo ʼakotou felogoʼi.” Kotou fakaha ia takotou lotofakafetaʼi. Pea kotou fakamamahani ʼi te vikiʼi ʼo tokotou ʼohoana. ʼAki takotou fai ia te ʼu faʼahi ʼaia, ʼe feala ai anai ke kotou maʼu ia te lotofakamolemole. (Kolose 3:15) Koia ʼe kotou maʼu anai ia he fakakaukau ʼe  tokalelei, mo te logotahi pea mo te ʼofa ʼo te ʼAtua.—Loma 14:19.

14, 15. Kotea ia te Lekula Iloa? Pea ʼe feafeaʼi hatatou maʼuliʼi ke malohi ai ia totatou maʼuli fakataumatuʼa?

¹⁴ ʼE mahino ia, ʼe kotou loto ke fakamaʼuhigaʼi mo fakaʼapaʼapaʼi koutou. Pea ʼe kotou leleiʼia moka fagono atu ʼihi, mo natou tokagaʼi ʼakotou manatu. Kaʼe neʼe heʼeki kotou logo koa la ki he tahi ʼe ina ui, “ ʼE au toe liufaki anai kia ia te meʼa ʼae neʼe ina fai mai”? ʼI ʼihi temi, ʼe feala ke tou ui ʼe moʼoni te faʼahi ʼaia. Kaʼe ʼe ui fenei mai ʼi te Tohi-Tapu: “Aua naa ke ui: E au fai anai kia ia o hage ko tana fai mai kia au.” (Taaga Lea 24:29) Neʼe akoʼi e Sesu ki te hahaʼi ia te faʼahiga fakatokatoka ʼo te ʼu aluʼaga faigataʼa. ʼE fakahigoaʼi ia te faʼahi ʼaia ko te Lekula Iloa. Pea neʼe ui fenei e Sesu: “Ko te mea ae e kotou loto ke fai e te tagata kia koutou, koutou fai ia ia [peʼe kotou fai feia] kia natou.” (Luka 6:31) Neʼe fia ui e Sesu ke tou fai ki te hahaʼi ia te meʼa ʼae ʼe tou loto ke natou fai mai kia tatou. Ko tona fakaʼuhiga, ʼe tonu ke tou foaki ki totatou ʼohoana ia te meʼa ʼae ʼe tou loto ke ina foaki mai.

¹⁵ Moka fetokagaʼaki moʼoni ia he taumatuʼa ki te ʼu meʼa ʼae ʼi ʼonā loto, ʼe nā fakamalohiʼi ai ʼanā felogoʼi. ʼE ui fenei e te tagata ʼohoana ʼi Afelika Saute: “Neʼe ma faigaʼi ke ma maʼuliʼi ia te Lekula Iloa. ʼE moʼoni, ʼi ʼihi temi ʼe ma iita ai, kaʼe ʼe ma faiga malohi ke ma fefakaʼapaʼapaʼaki pea mo fefakamaʼuhigaʼaki.”

16. Kotea ʼae ʼe mole tonu ke fai e he tagata pea mo he fafine ʼohoana?

¹⁶ ʼAua takotou fakaha ia te ʼu vaivaiʼaga ʼo tokotou ʼohoana ki ʼihi, peʼe kotou talanoa tuʼumaʼu ki tana ʼu aga ʼae ʼe fakatupu itaita, tatau aipe pe kotou palalau fakahuahua. Kotou manatuʼi, ko te nofo ʼohoana ʼe mole ko he fakataupiepie ke ui ai ʼe malohi age he tahi ʼi he tahi, peʼe ko ai ʼae ka kalaga leʼo lahi, peʼe ko ai ʼae ʼe ina fai he ʼu palalau ʼe fakatupu lotomamahi ʼaupito. ʼE moʼoni, ʼe tou agahala fuli pea ʼi ʼihi temi ʼe tou fakatupu ita ki niʼihi. Kaʼe ʼe mole ʼi ai he tupuʼaga lelei ke fefakalainoaʼaki ia he taumatuʼa, ke nā fefakalotomamahiʼaki ʼaki ʼanā palalau, ke nā fehumuhumukiʼaki peʼe ke nā fuhu.—Lau ia Taaga Lea 17:27; 31:26.

17. ʼE feala ke maʼuliʼi feafeaʼi e te ʼu tagata ʼohoana ia te Lekula Iloa?

¹⁷ ʼI ʼihi agaʼi fenua, ʼe gaohi koviʼi peʼe ta e te hahaʼi tagata ia tonatou ʼohoana moʼo fakaha ia tonatou malohi. Kaʼe ʼe ui fenei ʼi te Tohi-Tapu: “Ko ia ae e ita tuai e lelei age i te tagata toa, pea ko ia ae e loto lolomi e lelei age i ae e malo i he kolo.” (Taaga Lea 16:32) Ke maʼu e he tahi ia te lotololomi ʼa Sesu Kilisito, ia te tagata lahi tokotahi ʼo te ʼu temi fuli, ʼe ʼaoga ke ina maʼu ia he toe malohi. Ko te tagata ʼae ʼe ina gaohi koviʼi peʼe ina ta ia tona ʼohoana, ʼe ko he tagata vaivai ia pea ʼe ina maumauʼi anai ʼana felogoʼi ʼae mo Sehova. Neʼe ui fenei e te tagata faipesalemo ko Tavite, ʼae neʼe ko he tagata malohi mo lototoʼa: “Ke koutou tete [peʼe hoha], pea ke aua naa koutou agahala; Ke kotou palalau i okotou loto i okotou moeaga, pea ke koutou fakalologo.”—Pesalemo 4:5.

18. He koʼe ʼe maʼuhiga ia te fakaha tuʼumaʼu ʼo te ʼofa?

¹⁸ Lau ia 1 Kolinito 13:4-7. Ko te ʼofa ʼe ko te kalitate maʼuhiga ʼaupito ʼaia ʼi te maʼuli fakataumatuʼa. ʼE ui fenei ʼi te Tohi-Tapu: “Kotou kofu ni manatuloto [peʼe ʼofa mamahi] o te manavaofa, mo te agalelei, mo te fakamalalo, mo te agavaivai, pea mo te kataki. Kae i oluga o te u mea fuli aia, kotou kofu te ofa, ae ko te hai o te lelei pau.” (Kolose 3:12, 14) ʼE ʼaoga ke fakaha e te ʼu taumatuʼa ia te ʼofa moʼoni pea mo faʼifaʼitakiʼi ia Sesu Kilisito, ʼae neʼe lotolelei ke ina sakilifisioʼi ia tona maʼuli maʼa ʼihi. Kapau ʼe fakatafito ia te nofo ʼohoana ki te taʼi ʼofa ʼaia, pea ʼe malohi anai ia, logo la te ʼu aga ʼae ʼe fakatupu ita, he mahaki kovi, he fihifihia fakapaʼaga pea mo te ʼu fihifihia ʼae mo te ʼu matuʼā ʼo tokotou ʼohoana.

19, 20. (1) ʼE feala ke tou maʼu feafeaʼi ia he maʼuli fakataumatuʼa ʼe tologa mo fiafia? (2) Kotea ʼae ka tou talanoa anai ki ai ʼi te alatike ʼae ka hoa mai?

¹⁹ Ke fiafia ia te nofo ʼohoana, ʼe ʼaoga ki ai ia te ʼofa, mo te nofo agatonu pea mo he ʼu faiga fakamalotoloto. Moka hoko he ʼu faigataʼaʼia, ʼe mole tonu ke liakī e te tagata peʼe ko te fafine ʼohoana ia tona maʼuli fakataumatuʼa. ʼE tonu ke nā faiga fakamalotoloto fakatahi ke lelei age ʼanā felogoʼi. Pea ʼe tonu ki te ʼu taumatuʼa ʼae ʼe ʼoʼofa ia Sehova mo nā feʼofaʼofani, ke nā fakatotonu ke nā fakatokatoka ʼonā fihifihia, koteʼuhi “ko te ofa e mole puli i he aho.”—1 Kolinito 13:8; Mateo 19:5, 6; Hepeleo 13:4.

²⁰ ʼE mole faigafua ʼi te ʼu “temi faigataa” ʼaeni, ke tologa pea mo ke fiafia ai ia te nofo ʼohoana. (2 Timoteo 3:1) Kaʼe ʼaki te tokoni ʼa Sehova, ʼe ko he faʼahi ia ʼe feala. ʼE tonu foki ke tauʼi e te ʼu taumatuʼa ia te manako fakavale ʼa te hahaʼi ʼo te malama ki te ʼu felaveʼi fakasino heʼeʼaoga. ʼI te alatike ʼae ka hoa mai, ʼe tou vakaʼi anai pe ʼe lava taupau feafeaʼi e te ʼu taumatuʼa ia tonatou maʼuli fakataumatuʼa ke malohi.