1, 2. ʼE loto e te ʼAtua ke feafeaʼi ia te atolasio ʼa tana hahaʼi, tupulaga mo matutuʼa?

KO KOE koa ko he tupulaga? Kapau koia, ʼe feala hau tui papau, ʼe ke maʼuhiga ʼi te kokelekasio fakamalamanei ʼa Sehova. ʼE lahi te ʼu fenua ʼe kaugā malie ai ia te kau tupulaga ʼae kua natou papitema. Pea ʼe ko he meʼa fakalotomalohi hatatou sisio ki te kaugā malie ʼa te kau tupulaga ʼae kua natou fakatotonu ke natou tauhi kia Sehova.

² ʼI tou ʼuhiga tupulaga, ʼe mahino ia, ʼe ke fiafia ʼi te fakatahi mo ʼihi kau tupulaga. Pea ʼe ke fia fakatahi mo ʼou kaumeʼa ʼo tou taʼiake. Kaʼe ʼe loto e Sehova ke tou atolasio fakatahi kia te ia mo ʼotatou tehina mo tuagaʼane fuli. ʼE loto e Sehova ke logotahi ia tana hahaʼi, tatau aipe pe ʼe natou taʼu fia, peʼe kotea ʼonatou haʼuʼaga. Neʼe tohi e te apositolo ko Paulo, ʼe ko te finegalo ʼo te ʼAtua ke “fakamauli te tagata fuli, pea ke natou kaku ki te iloi katoa o te mooni.” (1 Timoteo 2:3, 4) ʼE fakamatala ia Apokalipisi 7:9, ko natou ʼae ʼe atolasio ki te ʼAtua, ʼe natou omai mai “te u puleaga fuli, mo te u faahiga fuli, mo te u hahai fuli, mo te u lea fuli.”

3, 4. (1) Kotea te aga ʼae ʼe maʼu e te tokolahi ʼo te kau tupulaga ia ʼaho nei? (2) Ia Efeso 4:25, kotea ʼae ʼe ui e Paulo ʼo ʼuhiga mo te kokelekasio?

 ³ ʼE kehekehe ia te kau tupulaga ʼae ʼe tauhi kia Sehova pea mo te kau tupulaga ʼae ʼe mole tauhi kia te ia. Ko te tokolahi ʼae ʼe mole tauhi kia Sehova, ʼe natou tokakaga pe kia natou pea mo te ʼu meʼa ʼae ʼe natou loto ki ai. Neʼe ui e te kau faifekumi, ia ʼaho nei kua lelesili age ia te manatu ʼa te kau tupulaga kia natou totonu. ʼE ha ʼi tanatou faʼahiga faipalalau pea mo tanatou faʼahiga faiteuteu, ʼe mole natou fakaʼapaʼapa ki te hahaʼi, kaʼe tafitō ki te hahaʼi matutuʼa.

⁴ ʼI te potu fuli pe, kua tou sisio ki te taʼi aga ʼaia, koia ʼae ʼe tonu ai ke tou faiga malohi moʼo tekeʼi te aga ʼaia pea ke leleiʼia tatou e Sehova. Maʼia ʼi te temi ʼo te kau apositolo, ko Paulo neʼe ina fakatokaga ia te kau Kilisitiano ʼo ʼuhiga mo te aga ʼaia. Neʼe ina fakahigoaʼi ko “te laumalie ae e gaue nei i te u foha o te logogataa.” (Lau ia Efeso 2:1-3.) Kaʼe ʼe ko he meʼa fakalotomalohi moka tou sisio ki te mole feia ʼa te kau tupulaga ʼo te kokelekasio. ʼE natou fia tauhi fakatahi kia Sehova mo ʼonatou tehina mo tuagaʼane. Pea ʼe natou mahino, ʼe hage ia te kokelekasio ko te sino mo ʼona koga kehekehe ʼae ʼe gaue fakatahi. Ohage ko tona tohi e Paulo, ‘ko tatou ko te ʼu koga sino ʼo te sino ʼe tahi.’ (Efeso 4:25) Pea kua ovi mai ia te fakaʼosi ʼo te malama ʼa Satana, koia ʼe maʼuhiga ai ke tou logotahi mo ʼotatou tehina mo tuagaʼane. ʼE tokoni mai anai ia te ʼu faʼifaʼitaki Fakatohi-tapu ʼae ka tou vakaʼi, ke tou mahino pe koʼe ʼe tonu ke tou fepipikiʼaki, ko tona fakaʼuhiga, ke tou logotahi.

5, 6. Kotea ʼae ʼe tou ako mai ia Lote pea mo tona famili?

⁵ ʼI te temi muʼa, neʼe katakiʼi e te hahaʼi ʼa Sehova ia he ʼu aluʼaga fakatupu tuʼutamaki. Neʼe puipui natou e Sehova ʼi te temi ʼae neʼe natou logotahi ai pea mo fetokoniʼaki ai. ʼE feala kia tatou fuli, tupulaga mo matutuʼa, ke tou taʼofi ia he ʼu ako mai te ʼu faʼifaʼitaki Fakatohi-tapu. Tou vakaʼi pe ʼe kotea ʼae neʼe hoko kia Lote.

⁶ Neʼe tuʼutamakiʼia ia Lote pea mo tona famili. Neʼe ʼamanaki fakaʼauha e Sehova ia te kolo ʼae neʼe natou maʼuʼuli ai, ia Sotoma. Neʼe ina fekauʼi ia te ʼu ʼaselo moʼo fakatokaga kia Lote ke mavae ʼi te kolo ʼaia pea ke hola ki te ʼu moʼuga. Neʼe nā ui fenei age kia Lote: “Hola ke ke mauli.” (Senesi 19:12-22) Neʼe fakalogo ia Lote mo ʼona ʼofafine  ki te ʼu fakatotonu. Kaʼe meʼa fakaʼofaʼofa foki koteʼuhi neʼe mole fakalogo te famili katoa ʼo Lote. Neʼe fakatotonu e Lote ki te ʼu tagata ʼae neʼe tonu ke ʼohoana mo ʼona ʼofafine ke nā mavae ʼi te kolo, kaʼe kia naua neʼe hage pe ia ko he matuʼa ʼe “palalau fakahuahua.” Neʼe nā meʼa noaʼi ia Lote, koia neʼe nā mamate ai ʼi te temi ʼae neʼe fakaʼauha ai ia te kolo. (Senesi 19:14) Neʼe ko Lote pe mo ʼona ʼofafine ʼae neʼe hao, koteʼuhi neʼe natou fakalogo pea neʼe natou nonofo fakatahi.

7. Neʼe tokoni feafeaʼi ia Sehova ki te hahaʼi logotahi ʼae neʼe mavae mai Esipito?

⁷ ʼE toe feala foki ke tou ako mai te faʼifaʼitaki ʼa te kau Iselaele ʼi te temi ʼae neʼe natou mavae ai mai Esipito. Neʼe mole natou faʼufaʼu ni kutuga, ʼo natou tahi fili ia tona ala ki te Kele ʼo Te Fakapapau. Kaʼe neʼe natou fagona fakatahi ohage he kutuga ʼe logotahi. Pea ʼi te temi ʼae neʼe vaheʼi lua ai e Sehova ia te ʼu vai ʼo te Tai Kula, neʼe mole ko Moisese tokotahi pe ʼae neʼe fakalaka ai, peʼe ko ia mo ʼihi kau Iselaele pe. Kaʼe neʼe ko te puleʼaga katoa mo Moisese ʼae neʼe fakalaka ai, pea neʼe puipui natou e Sehova. (Ekesote 14:21, 22, 29, 30) Maʼia mo te tokolahi ia natou ʼae neʼe mole ko he kau Iselaele, neʼe natou filifili ke natou tauhi kia Sehova pea mo mavae mai Esipito mo natou. Neʼe nonofo fakatahi ia te hahaʼi fuli. (Ekesote 12:38) ʼE mahino ia, ʼe ko he agavale mo ka na pau la neʼe filifili e he kiʼi kutuga, ohage la ko he kau tupulaga, ke natou toʼo he tahi age ala koteʼuhi ʼi tanatou manatu, ʼe ko te ala ʼaia ʼae ʼe lelei. Pea ko he tahi pe ʼae neʼe ina toʼo te ala ʼae ʼe loto ki ai, neʼe mole puipui ia ia e Sehova.—1 Kolinito 10:1.

8. ʼI te temi ʼo Sosafate, neʼe logotahi feafeaʼi ia te hahaʼi ʼa te ʼAtua?

⁸ ʼI te temi ʼo te Hau ko Sosafate, neʼe haʼu ia he foʼi kautau malohi moʼo ʼohofiʼi ia te hahaʼi ʼa te ʼAtua. (2 Koloniko 20:1, 2) Kotea ʼae neʼe fai te kau Iselaele ʼi tonatou ʼa takai e te foʼi kautau fakamataku ʼaia? Neʼe natou tuku ia tanatou falala kia Sehova pea neʼe natou kole ia tana takitaki. (Lau ia 2 Koloniko 20:3, 4.) Neʼe mole faigaʼi e te kau Iselaele ke natou tahi maʼu hana puleʼaki, kaʼe neʼe natou fakatahitahi fuli. ʼE ui fenei ʼi te Tohi-Tapu: “Nee tuu ia Suta katoa ia mua o [Sehova], mo onatou mokopuna fuli, mo onatou ohoana mo onatou foha.” (2 Koloniko 20:13) Neʼe ko te puleʼaga katoa, tupulaga mo matutuʼa, ʼae neʼe falala kia Sehova pea neʼe natou mulimuli ki te ʼu fakatotonu ʼae neʼe fai age. Neʼe natou nonofo fakatahi pea neʼe puipui natou e Sehova mai ʼonatou fili. (2 Koloniko 20:20-27) ʼE ko he faʼifaʼitaki lelei ʼaia ʼo ʼuhiga mo te tauʼi ʼo te fakafeagai ʼi totatou ʼuhiga hahaʼi ʼa te ʼAtua.

9. Kotea ʼae ʼe feala ke tou ako mai te kau Kilisitiano ʼi te temi ʼo te kau apositolo?

⁹ ʼI te temi ʼo te kau apositolo, neʼe tauhi fakatahi ia te kau Kilisitiano kia Sehova ʼi te tokalelei pea mo te logotahi. Ohage la, ʼi te liliu ʼa he kau Sutea ʼe tokolahi pea mo ʼihi ʼae neʼe mole ko he kau Sutea ko he kau Kilisitiano, neʼe natou muliʼi fuli te ʼu akonaki ʼa te kau apositolo. Neʼe natou fakatahitahi tuʼumaʼu, ʼo natou kakai fakatahi pea mo faikole fakatahi. (Gaue 2:42) Pea ʼi te temi ʼae neʼe fakatagaʼi ai ia te kau Kilisitiano, neʼe natou nonofo fakatahi. ʼI te temi ʼaia, neʼe ʼaoga lahi ai ke natou fetokoniʼaki. (Gaue 4:23, 24) Koia moka fakatagaʼi tatou, ʼe tonu ke tou fakatahi pea mo felagolagoʼaki.

10. Ko te temi fea ʼae ʼe ʼaoga ai anai ke tou nonofo fakatahi?

¹⁰ Kua ovi mai pe ia te temi faigataʼa ʼaupito ʼi te hisitolia ʼo te tagata. ʼE ui e te  polofeta ko Soele ʼo ʼuhiga mo te temi ʼaia, ko he “aho o te u fakapouli mo te pouli gaogao.” (Soele 2:1, 2; Sofoni 1:14) ʼI te temi ʼaia, ʼe ʼaoga anai ki te hahaʼi ʼa te ʼAtua ke natou nonofo fakatahi. Tou manatuʼi ia te ʼu palalau ʼaeni ʼa Sesu: “Ko te puleaga fuli pe e mavaevae o fakafehagai kia ia totonu, e maumaui.”—Mateo 12:25.

11. Kotea ʼae ʼe feala ke ako e te hahaʼi ʼa te ʼAtua mai ia Pesalemo 122:3, 4? (Vakaʼi te ʼuluaki pāki.)

¹¹ ʼE tonu anai ke feafeaʼi ia tatatou logotahi? ʼE feala hatatou taʼofi he ako mai te faʼahiga faʼu ʼo te ʼu fale ʼi te Selusalemi ʼafeā. Ko ʼonatou fale neʼe feoviʼaki, koia neʼe ui ai e te tagata faipesalemo ko he kolo ʼe “pipiki fakatahi ona koga fuli.” Koia neʼe logoʼi e te hahaʼi ia te fimalie ʼuhi ko tanatou feoviʼaki, pea neʼe faigafua ai hanatou fetokoniʼaki mo fepuipuiʼaki. ʼAki ia te feoviʼaki ʼo te ʼu fale, neʼe lagi manatuʼi e te tagata faipesalemo ia te temi ʼae neʼe fakatahitahi ai te ʼu telepi ʼo Iselaele ohage ko he puleʼaga ʼe tahi, moʼo tauhi kia Sehova. (Lau ia Pesalemo 122:3, 4.) ʼI te temi nei pea mo te ʼu ʼaho faigataʼa ʼae ka hoko mai, ʼe maʼuhiga ki te hahaʼi ʼa Sehova ke natou haga “pipiki fakatahi” ʼi te logotahi.

12. Kotea ʼae ka tokoni mai anai ke tou hao ʼi te temi ʼae ka ʼohofiʼi ai e Koke ia te hahaʼi ʼa Sehova?

¹² He koʼe ko tatatou logotahi ʼe maʼuhiga anai ki te ka haʼu? ʼE fakakikite ʼi te kapite 38 ʼo Esekiele, ko “Koke, i te fenua o Makoke” ʼe ina ʼohofi anai ia te hahaʼi ʼa Sehova. ʼI te temi ʼaia, ʼe mole tonu anai ke tou tuku he meʼa ke ina vaeluaʼi tatou. Pea ʼe ko he toe faihala lahi hatatou manatu ʼe puipui anai tatou e te malama ʼa Satana. Kaʼe ʼe ʼaoga anai ke tou pipiki ki ʼotatou tehina mo tuagaʼane. ʼE moʼoni, ʼe mole tou hao pe anai ʼuhi he ʼe tou kau ki he kutuga. ʼE tonu kia tatou takitokotahi, ke tou falala kia Sehova pea mo fakalogo kia te ia. ʼOsi ʼaia, ko Sehova mo Sesu, ʼe nā taki anai tatou lolotoga te ʼohofi ʼaia ke tou tau haohaoa ki te malama foʼou. (Soele 2:32; Mateo 28:20) Kaʼe ʼe tonu ke tou faifaitahi mo te hahaʼi ʼa te ʼAtua. ʼI tau manatu la, ʼe haofaki anai koa e Sehova ia natou ʼae ʼe natou filifili te ala ʼae ʼe natou loto ki ai?—Mikea 2:12.

13. Kotea ia te ʼu ako ʼe feala ke maʼu e te kau tupulaga mai te ʼu faʼifaʼitaki ʼae neʼe tou talanoa ki ai?

¹³ Kapau ko koe ko he tupulaga, ʼe ke mahino koa ko tau nofo ovi ki te ʼu tehina mo tuagaʼane ʼe ko he agafakapotopoto ʼaia? Tekeʼi tau fia fakatahi tuʼumaʼu mo natou ʼae ʼe kotou taʼiake tahi, peʼe ko tau fia fakamamaʼo mai te hahaʼi fuli. Kua ovi mai pe te temi ʼae ʼe ʼaoga ai kia tatou fuli, tupulaga mo matutuʼa, ke tou felagolagoʼaki. Fakamalohiʼi tau fakakaumeʼa ʼae mo ʼou tehina mo tuagaʼane ʼi te temi nei, pea mo ke fiafia ʼi te tauhi fakatahi mo natou kia Sehova. ʼI te ka haʼu, ko tau fakatahi ʼae mo te hahaʼi ʼa Sehova, ʼe ina haofaki anai ia tou maʼuli.

14, 15. (1) He koʼe ʼe akoʼi tatou e Sehova ke tou logotahi? (2) Ko te tokoni fea ʼae ʼe foaki mai e Sehova ke feala ai hatatou logotahi?

¹⁴ ʼE lolotoga tokoni mai ia Sehova ke tou tauhi kia te ia “i he loto e tahi” mo ʼotatou tehina mo tuagaʼane. (Sofoni 3:8, 9) ʼE  ina akoʼi tatou ki te temi ʼae ka ina fakatahiʼi ai “te u mea fuli ia Kilisito.” (Lau ia Efeso 1:9, 10.) Ko te finegalo ʼo Sehova, ʼe ko te fakatahiʼi ʼo natou fuli ʼae ʼi selo mo te kele ke natou tauhi kia te ia ohage ko he foʼi famili ʼe tahi. Pea ʼe mahino papau ia, ʼe fakahoko anai e Sehova ia te faʼahi ʼaia. ʼU tupulaga, ʼe feala hakotou kau ki te foʼi famili ʼaia ʼo talu ai. ʼE kotou fia fakatahi koa ki te kautahi ʼa Sehova?

¹⁵ ʼE lolotoga akoʼi tatou e Sehova ke tou logotahi ʼi te temi nei, ke feala hatatou maʼuli tokalelei ʼi te malama foʼou. ʼAki he faʼa kataki, ʼe ina akoʼi tatou ke tou “fetokagaaki,” mo “feofaofani i he ofa fakatautehina,” mo ‘fefakalotofimalieʼaki,’ pea mo “felagalagaʼaki.” (1 Kolinito 12:25; Loma 12:10; 1 Tesalonika 4:18; 5:11, MN) ʼE iloʼi e Sehova ʼe tou agahala fuli, koia ʼae ʼe faigataʼa tuʼumaʼu ai hatatou logotahi. Ko te tupuʼaga la ʼaia ʼo tana ui mai ʼae ke tou haga “fefakamolemoleaki.”—Efeso 4:32.

16, 17. (1) Kotea ia he tahi tupuʼaga ʼo ʼatatou fono? (2) Kotea ʼae ʼe feala ke ako e te kau tupulaga mai te faʼifaʼitaki ʼa Sesu?

¹⁶ ʼE toe foaki mai e Sehova ia te ʼu fono ke tokoni mai ke tou pipiki ki ʼotatou tehina mo tuagaʼane. ʼE fakamanatuʼi mai ia Hepeleo 10:24, 25 ia he tahi tupuʼaga ʼo tatatou fakatahi, ke tou fefakalotomalohiʼaki moʼo fai ia te meʼa ʼae ʼe lelei. Pea ʼe ʼaoga lahi anai kia tatou ʼatatou fono, koteʼuhi kua ovi mai ia te ʼaho ʼo Sehova.

¹⁷ Ko Sesu ʼe ko he faʼifaʼitaki lelei kia tatou, koteʼuhi neʼe fiafia ʼi te fakatahi pea mo te hahaʼi ʼa Sehova. ʼI tona taʼu 12, neʼe kau ia ia mo ʼana matuʼā ki he fakatahi lahi ʼi te fale lotu. ʼI te tahi ʼaho, neʼe mole maʼu ia ia e ʼana matuʼā. Neʼe ina tuku koa ʼana matuʼā kaʼe alu ʼo fakatahi mo ʼihi kau tupulaga? Kailoa ia. ʼI te maʼu ʼo Sesu e ʼana matuʼā, neʼe lolotoga faipalalau ia mo te kau faiako ki te Tohi-Tapu, ʼi te fale lotu.—Luka 2:45-47.

18. ʼE lava feafeaʼi ki te faikole ke ina fakamalohiʼi ia tatatou logotahi?

¹⁸ ʼE toe feala foki hatatou fakamalohiʼi ia tatatou logotahi ʼaki tatatou faikole maʼa te ʼu tehina mo tuagaʼane pea mo kole kia Sehova ke tokoni kia natou. Moka tou faikole ʼo ʼuhiga mo ʼotatou tehina mo tuagaʼane, ʼe tou fakaha ai ʼe tou tokakaga kia natou. ʼE maʼuhiga ke tou ʼoʼofa ki ʼotatou tehina mo tuagaʼane, mo fakalotomalohiʼi  natou ʼi te ʼu fono pea mo faikole maʼa natou. ʼU tupulaga, neʼe kua kotou faigaʼi koa ke kotou fai ia te ʼu faʼahi ʼaia, ke feala ai hakotou liliu ko he ʼu kaumeʼa lelei ʼo natou ʼo tokotou kokelekasio. Ke tou hao mai te fakaʼosi, ʼe tonu anai ke tou nonofo ovi ki ʼotatou tehina mo tuagaʼane, kaʼe mole ki te malama ʼa Satana.

19-21. (1) Kotea ʼae ʼe tonu ke tou fai ʼuhi he ʼe tou kau ki “ni koga sino e pipiki tahi”? Tuku mai he ʼu faʼifaʼitaki. (2) Kotea ʼae ʼe ke ako mai te fetokoniʼaki ʼo ʼotatou tehina mo tuagaʼane lolotoga te ʼu tuʼutamaki fakanatula?

¹⁹ ʼE lahi ia te ʼu faʼifaʼitaki ʼe ha ai ko te hahaʼi ʼa Sehova ia ʼaho nei, ʼe natou hage “ko ni kogasino e pipiki tahi.” (Loma 12:5) Moka hoko he ʼu tuʼutamaki fakanatula ki ʼotatou tehina mo tuagaʼane, ʼe tou kaugā mamahi pea mo fia tokoni kia natou. ʼI Tesepeli 2011, neʼe to he afā ʼi te motu ko Mindanao, ʼi Philippines. ʼI te po ʼe tahi, ko ʼapi ʼe 40 000 tupu neʼe lofia ʼo kau ai mo te ʼu ʼapi ʼo ʼotatou tehina mo tuagaʼane. Ko te filiale neʼe ina fakaha, neʼe muʼa mai ia te tokoni ʼa te ʼu tehina mo tuagaʼane ʼo te tahi ʼu fenua ʼi te tau mai ʼo te komite tokoni ʼo te fenua.

²⁰ ʼI Saponia, ko ʼotatou tehina mo tuagaʼane neʼe tau mo he mamahi lahi, ʼuhi he neʼe galulu te kele, pea neʼe hake he peau ʼi te potu esite ʼo te fenua. Tokolahi neʼe puli fuli ʼanatou meʼa. Ohage la, ko Yoshiko neʼe mole kei ʼi ai hona ʼapi. Neʼe maʼuli mamaʼo mai te Fale Fono ia teitei kilometa ʼe 40. ʼE ina ui fenei: “Ki muli age, neʼe matou punamaʼuli ʼi tamatou iloʼi ʼae neʼe kumi matou e te taupau ʼo te siliko pea mo te tahi tehina, ʼi te ʼaho ake ʼo te mafuike.” ʼAki he malimali, neʼe ina toe ui fenei: “Neʼe matou leleiʼia ia tamatou maʼu ia he tokoni fakalaumalie lahi mai te kokelekasio. Pea neʼe matou toe maʼu te ʼu mafana, mo te ʼu sulie, mo te ʼu kato pea mo te ʼu mutuʼi meʼa moe.” Ko he tahi ʼo te komite tokoni, ʼe ina ui fenei: “Ko te ʼu tehina mo tuagaʼane ʼo Saponia katoa, neʼe natou faifaitahi pea mo fetokoniʼaki. Neʼe ʼomai foki ʼihi tehina mai Amelika ʼo tokoni kia natou. ʼI te fehuʼi age ʼae pe koʼe neʼe natou folau mai mamaʼo, neʼe natou tali, ‘ʼE matou logotahi mo te ʼu tehina mo tuagaʼane ʼo Saponia pea ʼe ʼaoga kia natou ia he tokoni.’ ” ʼE ke fiameʼameʼa koa ʼi tau kau ki he kautahi ʼe feʼofaʼofani moʼoni ai te hahaʼi? Fakakaukauʼi age muʼa ia te fiafia lahi ʼa Sehova ʼi tana sio ki te taʼi logotahi ʼaia.

²¹ Kapau ʼe tou ako ke tou felagolagoʼaki ʼi te temi nei, ʼe tou teuteu anai ke tou tauʼi fakatahi ia te ʼu aluʼaga faigataʼa ʼo te ka haʼu. Tatau aipe pe ʼe mole kei tou maʼu logo ʼo ʼuhiga mo ʼotatou tehina mo tuagaʼane ʼae ʼi te tahi ʼu fenua, kaʼe ʼe tou haga logotahi pe anai mo te ʼu tehina mo tuagaʼane ʼo totatou fenua. Ko Fumiko, ko he tuagaʼane mai Saponia neʼe hao mai te afā lahi, ʼe ina ui fenei: “Kua ovi mai ia te fakaʼosi. ʼE tonu ke tou haga hoko atu ia tatatou tokoni ki ʼotatou tehina mo tuagaʼane ʼo kaku ki te temi ʼae ʼe mole kei ʼi ai anai he ʼu tuʼutamaki fakanatula.”

22. ʼE tokoni feafeaʼi mai anai ia tatatou logotahi ʼi te ka haʼu?

²² Ke ke teuteu ʼi te temi nei ki te ʼaho ʼo Sehova, ʼo ke faiga malohi ke ke logotahi mo ʼou tehina mo tuagaʼane. ʼI te temi ʼae ka fakaʼauha ai ia te malama agakovi ʼa Satana, ʼe ina haofaki anai ia tana hahaʼi ohage ko te temi muʼa. (Esaia 52:9, 10) Pe ʼe kei ke tupulaga peʼe kua ke matuʼa, ʼe tonu ke ke logotahi mo te hahaʼi ʼa te ʼAtua ke haofaki ai koe. ʼI te alatike ʼae ka hoa mai, ʼe tou talanoa anai pe koʼe ʼe tonu ke tou lotofakafetaʼi ki te ʼu meʼa ʼae kua tou maʼu.