1, 2. (1) Kotea ʼae ʼe fakamaʼua e Sehova ki tana hahaʼi? (2) Ko te ʼu fehuʼi fea ʼae ka tali ki ai ia te alatike ʼaeni?

NEʼE takitaki e te ʼAtua ia te apositolo ko Petelo ke ina fakaʼaogaʼi he ʼu palalau neʼe toʼo mai te tohi ʼo Levitiko pea mo fakamahino ki te kau Kilisitiano ʼe tonu ke natou maʼoniʼoni ohage ko te kau Iselaele. (Lau ia 1 Petelo 1:14-16.) Ko Sehova ʼae ʼe “Maonioni,” ʼe ina fakamaʼua ki te kau Kilisitiano fakanofo pea mo te ‘tahi ʼu ovi’ ke natou faiga malohi ke natou maʼoniʼoni ʼi tonatou maʼuli katoa.—Soane 10:16.

² ʼI te alatike ʼaeni, ʼe tou vakaʼi anai ia he ʼu pelesepeto neʼe toʼo mai te tohi ʼo Levitiko, ʼe tokoni mai ke tou akoʼi te ʼu lekula maʼoniʼoni ʼa te ʼAtua pea mo maʼuliʼi. ʼE tou toe tali anai ki te ʼu fehuʼi ʼaeni: Kotea ia tatatou faʼahiga manatu ʼo ʼuhiga mo te talagataʼa ki te ʼu lao ʼa Sehova? Kotea ia te ʼu ako ʼe tou maʼu mai te tohi ʼo Levitiko ʼo ʼuhiga mo tatatou lagolago ki te pule faʼitaliha ʼa Sehova? Kotea ʼae ʼe feala ke tou ako mai te ʼu sakilifisio ʼae neʼe momoli e te kau Iselaele?

3, 4. (1) He koʼe ʼe mole tonu ki te kau Kilisitiano ke natou talagataʼa ki te ʼu lao pea mo te ʼu pelesepeto Fakatohi-tapu? (2) He koʼe ʼe mole tonu ke tou lagavaka pea mo tou nonofo mo hotatou ita?

³ Kapau ʼe tou loto ke fiafia ia Sehova kia tatou, ʼe tonu ke tou  fakalogo ki ʼana lao pea mo ʼana pelesepeto. Ia ʼaho nei, ʼe mole tou nonofo ʼi te Lao ʼa Moisese, kaʼe ʼaki te Lao ʼaia ʼe feala hatatou mahino ki te meʼa ʼae ʼe loto ki ai ia Sehova pea mo ʼae ʼe fehiʼa ki ai. Ohage la, neʼe ina ui fenei age ki te kau Iselaele: “ʼE mole tonu anai ke ke lagavaka, peʼe ke taupau hou ita ki te ʼu foha ʼo tau hahaʼi; pea ʼe tonu ke ke ʼofa ki tou hoa ohage pe ko koe totonu. Ko au Sehova.”—Levitiko 19:18, MN.

⁴ ʼE mole loto e Sehova ke tou lagavaka pea mo tou nonofo mo hotatou ita. (Loma 12:19) Kapau ʼe mole tou fia fakalogo ki te ʼu lao pea mo te ʼu pelesepeto ʼa te ʼAtua, ʼe fiafia anai ia Satana koteʼuhi ʼe tou ʼulihi ia te huafa ʼo te ʼAtua. Maʼia pe ʼe fai mai e he tahi he meʼa ʼe kovi, kaʼe ʼe mole tonu ke tou iita. ʼE ui ʼi te Tohi-Tapu ʼe ko tatou ko “he u ipu kele,” ʼe ʼai ai he ʼu koloa. Ko te koloa ʼaia ʼe ko te minisitelio. (2 Kolinito 4:1, 7) Ko te ita ʼe hage ko he meʼa ʼe kona. Koia la ʼae ʼe mole tou fia fakatahiʼi ia te ita pea mo te ʼu koloa maʼuhiga ʼi he ipu ʼe tahi.

5. Kotea ʼae ʼe tou ako mai te fakamatala ʼo Alone ʼi te mate ʼo ʼona foha? (Vakaʼi te ʼuluaki pāki.)

⁵ Ia Levitiko 10:1-11, ʼe tou maʼu ai he aluʼaga neʼe hoko neʼe fakatupu lotomamahi kia Alone pea mo tona famili. Neʼe tauteaʼi e Sehova ia te ʼu foha ʼo Alone, ia Natape pea mo Apiu ʼaki he afi neʼe haʼu mai te lagi. Pea neʼe ui age e te ʼAtua kia Alone pea mo tona famili ke ʼaua naʼa natou fakaha honatou lotomamahi. Pea neʼe ko he ʼahiʼahiʼi lahi ʼaia ʼo tanatou tui. ʼE kotou fakaha koa ʼe kotou maʼoniʼoni ʼaki takotou mole fakatahi mo natou ʼo tokotou famili peʼe ko he tahi pe ia natou ʼae neʼe kua fakamavae?—Lau ia 1 Kolinito 5:11.

6, 7. (1) Kotea ʼae ʼe tonu ke tou manatu ki ai, ʼi muʼa ʼo hakita fili ke kita kau peʼe kailoa ki he fai ʼohoana ʼi te ʼekelesia? (Vakaʼi te kiʼi nota.) (2) ʼE feafeaʼi hatatou fakamahino ki he tahi ʼe mole feala hatatou kau ki he fai ʼohoana ʼi te ʼekelesia?

⁶ ʼE mole ʼahiʼahiʼi anai tatou ohage ko Alone mo tona famili. Kaʼe ʼe feafeaʼi anai moka ʼe fakaafe kotou ki he fai ʼohoana ʼo hokotou famili ʼi te ʼekelesia? ʼE mole ʼi ai he lao ʼi te Tohi-Tapu ʼe ina tapuʼi mai ke tou kau ki ai, kaʼe ʼe ʼi ai te ʼu pelesepeto ʼe feala ke tokoni mai ke tou toʼo he tonu ʼe lelei. *

⁷ ʼE tou fia fakafiafiaʼi ia Sehova pea mo nofo maʼoniʼoni. Kaʼe ʼe lagi mole mahino  anai ki ai totatou famili. (1 Petelo 4:3, 4) ʼE mole tou loto ke natou iita mai kia tatou, koia ʼe tonu ai ke tou palalau fakahagatonu kia natou ʼaki he agalelei. Kapau ʼe feala, kotou palalau mo natou ʼi muʼa ʼo te hoko ʼo te faʼahi ʼaia. ʼE feala hatatou fakamalo age ki tana fakaafe tatou ki tana fai ʼohoana pea mo tou ui age ʼe tou fakaʼamu ke fiafia ʼi te ʼaho ʼaia. Pea ʼe mole tou loto ke ita ʼo toe feia mo natou ʼae neʼe fakaafe ʼi takita mole kau ki te toʼotoʼoga fakalotu. ʼI tatatou fai ia te faʼahi ʼaia, ʼe tou fakaʼapaʼapa ai ki te ʼu faʼahi ʼae ʼe tou tui ki ai.

8. ʼE fakamaʼuhigaʼi feafeaʼi ʼi te tohi ʼo Levitiko ia te pule faʼitaliha ʼa Sehova?

⁸ ʼE fakamaʼuhigaʼi ʼi te tohi ʼo Levitiko ia te pule faʼitaliha ʼa Sehova. ʼE ha tuʼa 30 tupu ʼi ai ko te lao ʼe haʼu mai te ʼAtua. Neʼe iloʼi e Moisese ia te faʼahi ʼaia pea neʼe ina fai ʼo hage ko tona fakatotonu age e Sehova. (Levitiko 8:4, 5) Ohage ko Moisese, ʼe tonu ke tou fai tuʼumaʼu ia te ʼu meʼa ʼae ʼe loto ki ai ia Sehova, totatou Tuʼi Aliki. ʼE moʼoni ʼe tokoni mai anai ia te kautahi ʼa te ʼAtua, kaʼe ʼe feala pe ke ʼahiʼahiʼi tatatou tui moka ʼe tou to tokotahi. Pea neʼe ko te faʼahi ʼaia neʼe hoko kia Sesu ʼi te toafa. (Luka 4:1-13) Kapau e tou falala ki te ʼAtua pea mo lagolago ki tana pule faʼitaliha, ʼe mole he tahi anai ʼe ina lava fakakinauʼi tatou ke tou talagataʼa. Pea, e mole tou matataku anai.—Taaga Lea 29:25.

9. He koʼe ʼe fehiʼa te ʼu puleʼaga fuli ki te hahaʼi ʼa te ʼAtua?

⁹ ʼE maʼua ke fakatagaʼi te hahaʼi ʼa te ʼAtua ʼi te kele katoa. Pea neʼe ko te faʼahi ʼaia neʼe ui e Sesu ki ʼana tisipulo: “Pea e tuku anai koutou ke fakatagai, pea e tamatei anai koutou, pea e fehiainai anai koutou e te u puleaga fuli, o tupu ko toku huafa.” (Mateo 24:9) Tatau aipe pe ʼe fehiʼa te hahaʼi kia tatou, kaʼe ʼe tonu ke hoko atu ia tatatou faifakamafola pea mo tou nonofo maʼoniʼoni ʼi tatatou aga. ʼE tonu ke tou agatonu pea mo maʼa ʼi te faʼahi fakasino. Pea ʼe tou fakaʼapaʼapa ki te ʼu lao fakapuleʼaga. Kaʼe he koʼe koa ʼe fehiʼa ia te hahaʼi kia tatou? (Loma 13:1-7) Koteʼuhi ʼe tou fakalogo ʼateaina pe kia Sehova totatou Tuʼi Aliki. ʼE “ko ia tokotahi pe” ʼae ʼe tou tauhi ki ai pea ʼe mole tou fia talagataʼa ki ʼana lao pea mo ʼana pelesepeto.—Mateo 4:10.

10. Kotea ʼae neʼe fakamaʼua ki he tahi ʼi te ʼu tehina ʼae neʼe mole nonofo agatonu?

¹⁰ ʼE mole tou kau ki te malamanei, koia ʼae ʼe mole tou kau ai ki te ʼu tau pea mo te ʼu faʼahi fakapolitike. (Lau ia Soane 15:18-21; Esaia 2:4.) Ko ʼihi Kilisitiano neʼe mole natou nonofo agatonu. Tokolahi ia natou neʼe fakahemala pea mo toe liliu mai kia Sehova. (Pesalemo 51:19) Kaʼe tokosiʼi, neʼe mole natou fakahemala. Ohage la, lolotoga te Lua Tau Fakamalanei, tokolahi te ʼu tehina neʼe pilisoniʼi ʼi Hongrie, kaʼe neʼe mole natou fai he hala. Neʼe fakatahiʼi e te hahaʼi ʼo te puleʼaga ia te toko 160 ʼi te ʼu tehina ʼaia, heʼeki taʼu 45, pea mo fakakinauʼi natou ke kau ki te solia. Neʼe fakafisi ia te tokolahi, kaʼe ko te toko hiva neʼe natou tali ki ai. Hili ki ai taʼu ʼe lua, ko he tahi ia natou ʼae neʼe mole nonofo agatonu, neʼe fakamaʼua age ke ina matematehi ia te kau fakamoʼoni agatonu. Pea neʼe tonu kia ia  ʼaia ke ina matehi ia tona tehina totonu. Kaʼe meʼa lelei neʼe mole hoko ia te faʼahi ʼaia.

11, 12. Kotea ʼae ʼe feala ke tou ako ʼi te ʼu sakilifisio ʼae neʼe momoli e te kau Iselaele ʼo te temi muʼa?

¹¹ Neʼe fakamahino ʼi te lao pe ʼe ko te faʼahiga sakilifisio fea ʼae neʼe tonu ke momoli e te kau Iselaele. (Levitiko 9:1-4, 15-21) Neʼe tonu ke heʼe mele ia te ʼu sakilifisio, he neʼe ina fakata ia te sakilifisio faitotonu ʼa Sesu. Pea neʼe tonu ke natou fakaʼapaʼapa ki te ʼu faʼahiga sakilifisio ʼae neʼe tonu ke natou fai. ʼE fakaha ia Levitiko 12:6 pe ʼe kotea ʼae ʼe tonu ke fai ʼe he faʼe ʼe ʼosi fanau. ʼE ui fenei ai: “Pea ka osi anai te u aho o tona fakamaa, tatau pe ki te tama pee ko te taahine, pea e ina ave anai ia ki te tagata faisakilifisio i te matapa o te falela tapu, he akeno tau tahi ki te failaulau, pea mo he lupe pee ko he kulukulu, ki te sakilifisio o te fakamolemole.” ʼE tou mahino pe ʼe kotea ʼae ʼe loto e Sehova ke tou fai. Kaʼe ʼe ha ʼi te lao ʼaia ʼe ʼofa pea mo lotomahino ia Sehova. Ohage la, kapau neʼe mole lava foaki ʼe he faʼe ia he akeno, neʼe feala pe ke ina foaki ia ni kulukulu ʼe lua peʼe ko ni lupe ʼe lua. (Levitiko 12:8) Tatau aipe pe neʼe masiva he tahi, kaʼe neʼe ʼofa ia Sehova pea mo ina leleiʼia ia ia ohage pe ko natou ʼae ʼe natou foaki ia te ʼu meʼa ʼofa totogi kovi. Kotea ʼae ʼe tou taʼofi mai ai?

¹² Neʼe fakalotomalohiʼi e te apositolo ko Paulo ia te kau Kilisitiano ke natou momoli ki te ʼAtua ia he ʼu “sakilifisio o te fakavikiviki.” (Hepeleo 13:15) ʼE tou momoli ia he ʼu sakilifisio fakavikiviki moka ʼe tou palalau ki ʼihi ʼo ʼuhiga mo te huafa ʼo Sehova. Ko te ʼu tehina mo tuagaʼane ʼae ʼe tuli ʼe natou fakaʼaogaʼi ia te lea ʼa te kau tuli moʼo fakavikiviki ki te ʼAtua. Ko te kau Kilisitiano ʼae ʼe mole kei natou lava olo ʼo faifakamafola, ʼe natou fakavikiviki kia Sehova ʼaki hanatou fai he ʼu tohi, peʼe natou faitelefoni, pea mo faifakamafola kia natou ʼae ʼe olo age ʼo fakasiosio natou. Ko tatatou fakavikiviki ʼae kia sehova, ʼe mulimuli pe ki ʼotatou fealagia, kaʼe ʼe feala pe ke tou foaki ia te meʼa ʼae ʼe lelei ʼaupito.—Loma 12:1; 2 Timoteo 2:15.

13. He koʼe ʼe maʼuhiga ke tou fai ia tatatou pepa tanaki?

¹³ ʼE tou fia foaki kia Sehova ia he ʼu sakilifisio fakavikiviki koteʼuhi ʼe tou ʼoʼofa ia te ia. (Mateo 22:37, 38) ʼE feafeaʼi la moka kole mai ke tou tohi tatatou pepa tanaki ʼo tatatou gaue faifakamafola ʼi te mahina? ʼE maʼua ke tou fai he ʼe tou fakaha ai ʼe tou pipiki ki te ʼAtua. (2 Petelo 1:7) Kaʼe ʼe mole fakaʼuhiga leva ke kita gaue ʼi te faifakamafola ʼuhi pe ke lahi ia tokita ʼu hola ʼae ka tohi ʼi te pepa tanaki. Kapau ko he tehina ʼe mole feala ke gaue lahi ʼi te faifakamafola ʼuhi ʼae he ʼe kua matuʼa peʼe mahaki, ʼe feala pe hana tohi minuta ʼe 15 ʼi tana pepa tanaki. ʼE fiafia ia Sehova moka ʼe sio ʼe ina lava fai ia te faʼahi ʼaia. ʼE iloʼi e Sehova ʼe ʼofa fakamalotoloto ia te ʼu tehina mo te ʼu tuagaʼane pea mo natou fia fakamoʼoni ki ai. Ko ʼihi kau Iselaele ʼo te temi muʼa neʼe masisiva kaʼe neʼe natou lava foaki ia he meʼa ʼofa ki te ʼAtua. ʼO toe feia pe ia ʼaho nei, ko natou ʼae ʼe mole lahi ia tanatou gaue, ʼe feala pe ke natou tohi ʼi tanatou pepa tanaki pea mo natou fiafia ai. ʼE kau  ia tatatou pepa tanaki ki te tanaki fakamalamanei. ʼE feala ai ki te kautahi ke natou fai he ʼu fakatuʼutuʼu ki te ʼu koga meʼa ʼae ʼe ʼaoga ki ai he tokoni. Koia e tou tohi ai ʼotatou hola moka tou gaue ʼi te minisitelio.

14. He koʼe ʼe tonu ke tou fakasiosio ia tatatou faʼahiga ako?

¹⁴ Hili tatatou vakavakaʼi ia te ʼu ako ʼae neʼe tou maʼu ʼi te tohi ʼo Levitiko, kua tou mahino leva pe ko ʼe ʼe kau ia te tohi ʼaia ki te Folafola ʼa te ʼAtua. (2 Timoteo 3:16) Kua kotou fakatotonu malohi koa ke kotou maʼoniʼoni? ʼE loto e Sehova ke tou foaki age kia te ia ia te meʼa ʼae ʼe lelei tukupau pea ʼe tāu ia mo ia. Kua lagi tou fia fakaloloto ia tatatou ako ia te Tohi-Tapu katoa. (Lau ia Taaga Lea 2:1-5.) Kotou vakaʼi ʼi te faikole takotou faʼahiga ako. Kotou fai ia te ʼu fehuʼi ʼaeni: ‘ ʼE au foaki koa kia Sehova ia te meʼa ʼae ʼe lelei? Peʼe faigataʼa koa ia takita tuputupu ʼi te faʼahi fakalaumalie ʼuhi ko te televisio, peʼe ko te ʼu gaoʼi viteo, peʼe ko te faigaoʼi pea mo te ʼu fakafiafia?’ Kapau ko ia, pea ʼe tonu ke tou fakakaukauʼi lelei ia te faʼahi ʼae neʼe ui e Paulo ʼi te tohi ʼo Hepeleo.

15, 16. He koʼe neʼe fakahagatonu ia Paulo ʼi tana faitohi ki te kau Kilisitiano Hepeleo?

¹⁵ Neʼe palalau fakahagatonu ia Paulo ʼi tana faitohi ʼae ki te kau Kilisitiano Hepeleo. (Lau ia Hepeleo 5:7, 11-14.) Neʼe ina ui fenei age: “Kua koutou liliu o piko i te fia mahino,” peʼe kua koutou liliu ʼo logogataʼa. He koʼe neʼe palalau fakahagatonu feia? Ohage pe ko Sehova, neʼe ʼofa ia Paulo kia natou pea neʼe tuʼania he neʼe natou faiga ke natou maʼuʼuli ʼaki pe te huʼa pipi, ko tona fakaʼuhiga neʼe mole natou  fakaloloto ia tanatou mahino ki te Tohi-Tapu. ʼE moʼoni ʼe maʼuhiga ke tou mahino ki te Tohi-Tapu, kaʼe kapau ʼe tou fia tuputupu ʼi te moʼoni, ʼe toe maʼuhiga foki ke tou kai ki te “magisi fefeka,” ʼae ko te ʼu akonaki loloto ʼo te Tohi-Tapu.

¹⁶ ʼO mole ui ke natou liliu ko he kau faiako, kaʼe neʼe kei ʼaoga ki te kau Hepeleo ke akoʼi natou. Kotea tona tupuʼaga? He neʼe mole natou kai ia te “magisi fefeka.” Tou lagaʼi ia te ʼu fehuʼi ʼaeni: “ʼE au leleiʼia koa ia te akoʼi ʼo te ʼu akonaki loloto ʼo te Tohi-Tapu, peʼe kailoa? ʼE au fai tuʼumaʼu koa taku ako Tohi-Tapu?” ʼE mole gata pe ki tatatou faifakamafola ki te hahaʼi, kaʼe ʼe tonu ke tou akoʼi ia natou pea mo fai ni tisipulo.—Mateo 28:19, 20.

17, 18. (1) He koʼe ʼe tonu ke tou kai tuʼumaʼu ki te “magisi fefeka”? (2) He koʼe ʼe maʼuhiga ke tou fakakaukauʼi ia te fakaʼaogaʼi ʼo te kava ʼi muʼa ʼo te olo ki te ʼu fono?

¹⁷ ʼE mole fakakinauʼi tatou e Sehova ke tou akoʼi ia te Tohi-Tapu. Maʼia pe ʼe faigataʼa kia tatou te akoʼi ʼo te Tohi-Tapu, kaʼe ʼe tonu ke hoko atu ia tatatou kai ki te “magisi fefeka,” tatau aipe pe ʼe kua tou fualoa ʼi te moʼoni peʼe kailoa. ʼE maʼuhiga ʼaupito mo kapau ʼe tou fia nonofo maʼa.

¹⁸ Kapau ʼe tou fia maʼoniʼoni, ʼe tonu ke tou akoʼi fakalelei ia te Tohi-Tapu pea mo fai fakalelei ia te ʼu meʼa ʼae ʼe kole mai e te ʼAtua. Neʼe mamate te ʼu foha ʼo Alone, ia Natape mo Apiu, ʼuhi ʼae neʼe nā momoli “he afi kehe,” he neʼe nā konahihia. (Levitiko 10:1, 2) Kotou tokagaʼi te faʼahi ʼae neʼe ui e te ʼAtua kia Alone. (Lau ia Levitiko 10:8-11.) Ko tona fakaʼuhiga koa ʼe mole tonu ke tou inu hatatou moʼi kava ʼi muʼa ʼo tatatou olo ki te fono? Kotou fakakaukauʼi te ʼu puani ʼaeni: ʼE mole kei tou mulimuli ki te Lao ʼa Moisese. (Loma 10:4) ʼI ʼihi fenua, ko ʼotatou tehina ʼe natou inu fakapotopoto hanatou moʼi kava moka natou kakai, ʼi muʼa ʼo hanatou olo ki te fono. Ko ipu ʼe fa neʼe fakaʼaogaʼi ʼi te Pasikate. ʼI te fakatuʼu e Sesu ia te ʼAho Fakamanatu, neʼe ina ui age ki ʼana apositolo ke natou inu te vino he neʼe ina fakata ia tona taʼataʼa. (Mateo 26:27) ʼE tauteaʼi ʼi te Tohi-Tapu ia te inu kava fakavale pea mo te konahia. (1 Kolinito 6:10; 1 Timoteo 3:8) ʼUhi ko tonatou leʼo ʼo loto, tokolahi te kau Kilisitiano ʼe mole natou inu hanatou moʼi kava ʼi muʼa ʼo tanatou olo ki te ʼu fono peʼe ki te gaue faifakamafola. Pea ʼe kehekehe ia te ʼu aluʼaga ʼo te ʼu fenua. Kaʼe ko te faʼahi ʼae ʼe maʼuhiga, ko te kau Kilisitiano ʼe natou fakakehekeheʼi ia te “mea fakalotu” mai te “mea fakamalama.” ʼI tanatou fai ia te faʼahi ʼaia ʼe feala hanatou nonofo maʼa pea mo fakafiafiaʼi ia Sehova.

19. (1) Kotea ʼae ʼe feala ke tou fai ke maʼuhiga age ia tatatou ako fakafamili pea mo tatatou ako takitokotahi? (2) ʼE feafeaʼi hatatou fakaha kua tou fakatotonu malohi ke tou nonofo maʼa?

¹⁹ ʼE lahi ia te ʼu pelesepeto Fakatohi-tapu ʼe feala ke tou maʼu mo kapau ʼe tou fai he ʼu fekumi ʼi te Folafola ʼa te ʼAtua. Tou fakaʼaogaʼi ia te ʼu meʼa gaue ʼae ʼe foaki mai e te kautahi moʼo fai ia te ako fakafamili pea mo tatatou ako takitokotahi. Kotou kumi ke kotou iloʼi lelei ia Sehova. Kotou fakaovi kia te ia. (Sakopo 4:8) Kotou faikole ki te ʼAtua ohage ko tona hivaʼi e te tagata faipesalemo: “Avahi oku mata, o tupu ke au sio ki te u mea matalelei o au lao.” (Pesalemo 119:18) ʼAua naʼa kotou talagataʼa ki te ʼu lao pea mo te ʼu pelesepeto ʼa te Tohi-Tapu. Kotou fakalogo ki te ʼu lao ʼa “te Maʼoniʼoni,” ia Sehova. Kotou faʼafai ʼi “te gaue maʼoniʼoni ʼo te logo lelei ʼa te ʼAtua.” (1 Petelo 1:15; Loma 15:16) ʼE ʼaoga ke tou nonofo maʼa lolotoga te ʼu ʼaho fakamuli ʼaeni. Koia tou nonofo maʼa ʼi tatatou aga pea mo tou lagolago ki te pule faʼitaliha ʼa Sehova.