1, 2. He ko ʼe ʼe tou fia vakaʼi te Pesalemo 45?

ʼI TE Pesalemo 45, ʼe fakamatala ai te ʼu aluʼaga fakaofoofo ʼaeni: Ko he hau taulekaleka ʼe lele ʼi tana hosi moʼo tauʼi te moʼoni pea mo te faitotonu. ʼE malo ʼi ʼona fili, pea hili tana malo fakaʼosi, ʼe ʼohoana mo he fafine finemui. Pea ko te hau ʼaia ʼe manatuʼi anai mo fakamaʼuhigaʼi ʼo talu ai.

² Kaʼe ko te Pesalemo 45 ʼe mole ko he hisitolia fakaofoofo pe ia pea mo hona ikuʼaga fakafiafia. ʼE maʼuhiga te ʼu aluʼaga ʼae ʼe talanoa ai koteʼuhi ʼe ʼi ai tona fua ki totatou maʼuli ʼi te temi nei mo te ka haʼu. Koia tou vakavakaʼi fakalelei te pesalemo ʼaia.

3, 4. (1) Kotea te meʼa lelei ʼae neʼe faitohi ki ai te tagata faipesalemo, pea ʼe malave feafeaʼi ki totatou loto? (2) Kotea ia te logo ʼae ʼe tou fakamafola ʼo ʼuhiga mo he “hau”? Pea ʼe liliu feafeaʼi totatou ʼalelo ko he peni?

³ Lau ia Pesalemo 45:2. Ko te ʼu “palalau fakalaukau” ʼe fakaʼuhiga ki ni meʼa lelei ohage pe ko tona fakaliliu ʼi te Tohi-Tapu Traduction du monde nouveau. Pea ko te ʼu meʼa lelei ʼaia ʼae ʼe “mapuna” ʼi te loto ʼo te tagata faipesalemo, ʼe ko te ʼu logo ʼo ʼuhiga mo he hau. Ko te kupu Fakahepeleo ʼae ʼe fakaliliu ʼaki te  kupu “mapuna,” ʼe fakaʼuhiga ki he vai ʼe lolotoga pula. ʼI te logo ʼa te tagata faipesalemo ki te ʼu logo ʼaia, neʼe hage pe tona loto ʼe pula, ko tona fakaʼuhiga neʼe lahi ʼaupito tona fiafia. Neʼe toe hage ai tona ʼalelo ko “te peni a he tagata maau.”

⁴ Kaʼe kotea tona fakaʼuhiga kia tatou? Ko te logo lelei ʼo te Puleʼaga Fakamesia ʼe ko he meʼa lelei ia ʼe malave ki totatou loto. Neʼe liliu te logo ʼo te Puleʼaga ʼo lelei tafitō ʼi te taʼu 1914. Kotea tona tupuʼaga? Koteʼuhi talu mai te taʼu ʼaia, ko te puleʼaga kua tuʼu moʼoni mo takitaki ʼi te lagi. Pea ʼe ko te logo lelei la ʼaia ʼo te Puleʼaga ʼae ʼe tou fakamafola “i te malamanei katoa, ke fakamooni ki te u puleaga fuli.” (Mat. 24:14) ʼE mole koa la malave kia tatou ia te logo ʼaia ʼo te Puleʼaga? ʼE tou faʼafai koa ʼi te fakamafola ʼo te logo lelei ʼo te Puleʼaga? Ohage pe ko te tagata faipesalemo, ʼe ko hatatou hiva ʼo ʼuhiga mo he “hau.” ʼE tou fakamafola te logo ʼae ko Sesu kua Pule nei ʼi te Puleʼaga Fakamesia ʼi te lagi. ʼE tou fakaafe te hahaʼi fuli, maʼia mo te kau takitaki ʼo te malamanei ke natou tali te Puleʼaga ʼo Sesu. (Pes. 2:1, 2, 4-12) Pea ko totatou ʼalelo ʼe hage ia ko “te peni a he tagata maau,” moka tou fakaʼaogaʼi te Tohi-Tapu ʼi tatatou gaue faifakamafola.

5. (1) He ko ʼe neʼe “tupulaga” ia Sesu? (2) Neʼe feafeaʼi te ʼu palalau ʼa Sesu ʼi tana faifakamafola, pea ʼe feafeaʼi hatatou faʼifaʼitakiʼi ia ia?

⁵ Lau ia Pesalemo 45:3. ʼE mole lahi te talanoa ʼi te Tohi-Tapu ki te ʼuhiga tagata ʼo Sesu. ʼE mahino papau ia neʼe “tupulaga” koteʼuhi neʼe haohaoa. Kaʼe kia Sehova neʼe tupulaga moʼoni ia ʼuhi ko tana agatonu. Neʼe toe fakamafola foki e Sesu te logo ʼo te Puleʼaga ʼaki ni palalau maliē pea mo malave loto. (Luka 4:22; Soa. 7:46) ʼE tou faiga malohi koa ke tou faʼifaʼitakiʼi ia Sesu ʼi tatatou gaue faifakamafola?—Kol. 4:6.

6. Neʼe tapuakinaʼi feafeaʼi e te ʼAtua ia Sesu ʼo talu ai?

⁶ Neʼe agatonu ia Sesu mo ʼofa lahi ki tana Tamai, koia ʼae neʼe tapuakina ai e Sehova ia tana minisitelio pea mo fakapale ia ia hili tana foaki tona maʼuli ko he sakilifisio. Neʼe tohi fenei e te apositolo ko Paulo ʼo ʼuhiga mo Sesu: “Nee ina tali ke mauli i te fakavaivai, pea nee liliu ia o fakalogo o kaku ki te mate, ki te mate foki i te [pou fakamamahi]. Koia foki ae nee hiki fakaalialiki ai ia e te Atua, pea nee ina foaki age kia ia te higoa ae e maoluga pau i te higoa fuli pe, koteuhi i te higoa o Sesu ke hu ifo te tuli fuli i te lagi, mo te kele, pea mo te lalo kele, pea ke fakaha e te alelo fuli ko Sesu-Kilisito ko te Aliki, ki te kololia o te Atua te Tamai.” (Filp. 2:8-11) Neʼe tapuakina e Sehova ia Sesu ʼo talu ai ʼaki tana fakatuʼuake ia ia ki te maʼuli tuputupua.—Loma 6:9.

7. Neʼe fakanofo feafeaʼi e te ʼAtua ia Sesu ke lahi age ʼi ʼona “kaumea”?

⁷ Lau ia Pesalemo 45:7, 8. Neʼe ʼofa lahi ia Sesu ki te faitotonu pea mo fehiʼa kia faʼahi fuli neʼe feala ke fakalainoa ai tana Tamai, koia ʼae neʼe fakanofo ai e Sehova ia ia ke Hau ʼi te Puleʼaga Fakamesia. Neʼe fakanofo ia Sesu ʼaki te “lolo o te fiafia” ʼo lahi age ʼi ʼona “kaumea,” ia te ʼu hau ʼo Suta ʼae neʼe ko te hakoga pe la ʼo Tavite. ʼO feafeaʼi? ʼUluaki, neʼe fakanofo tonu e Sehova ia Sesu. Lua, neʼe fakanofo Sesu ko he Hau  pea mo Pelepitelo Lahi. (Pes. 2:2; Hep. 5:5, 6) Tolu, neʼe mole fakanofo ia Sesu mo he moʼi lolo ohage ko te ʼu hau Iselaele kaʼe ʼaki te laumalie maʼoniʼoni. Pea tahi, ʼe pule mai te lagi kaʼe mole ʼi te kele.

8. He ko ʼe ʼe tou lava tui papau ʼe faitotonu te puleʼaga ʼo Sesu? He ko ʼe ʼe tou ui ko Sesu ʼae ʼe tonu ke Hau?

⁸ ʼI te taʼu 1914, neʼe fakanofo e Sehova ia tona ʼAlo ko te Hau Fakamesia ʼi selo. Ko te “tokotoko” ʼo te puleʼaga ʼo Sesu ʼe ko te ‘tokotoko o te faitotonu,’ koia ʼe feala ai ke tou tui papau ʼe faitotonu tuʼumaʼu anai ia tana takitaki. Ko Sesu ʼae ʼe tonu ke Hau koteʼuhi neʼe fakanofo ia ia e Sehova ko he Hau. Pea ʼe tuʼu anai ʼo “heegata” ia te puleʼaga ʼo Sesu. ʼE mole tou fiameʼameʼa koa la ʼi tatatou tauhi kia Sehova ʼi te takitaki ʼa te Hau ʼae neʼe ina fakanofo?

9, 10. (1) Ko ʼanafea ʼae neʼe fakamaʼu ai e Kilisito tana heleta pea neʼe ina fakaʼaogaʼi feafeaʼi? (2) ʼE fakaʼaogaʼi feafeaʼi anai e Kilisito ia tana heleta ʼi te ka haʼu?

⁹ Lau ia Pesalemo 45:4. ʼE fakatotonu e Sehova ki te Hau ke ina fakamaʼu tana heleta ki tona fahaʼi. Neʼe ina fakagafua ai kia Sesu ke alu ʼo tauʼi ia natou ʼae ʼe fakafeagai ki te pule ʼa te ʼAtua pea mo ina fakaʼauha natou. (Pes. 110:2) Ko Sesu ʼe ko he Tagata Tau pea mo he Hau ʼe mole feala ke malo ai he tahi, koia ʼae neʼe fakahigoa ai ia ia ko te “tagata tau loto toa.” Neʼe ina fakamaʼu tana heleta ʼi te taʼu 1914, ʼi tana malo ʼae ia Satana mo tana kau temonio pea mo tana li ifo natou mai te lagi ki te kele.—Apk. 12:7-9.

¹⁰ Neʼe ko te kamataʼaga pe ʼaia ʼo te malo ʼa te Hau. Kaʼe ʼe tonu ke ina “fakaʼosi tana malo.” (Apk. 6:2, MN) Neʼe fakatotonu e Sehova ke fakaʼauha te ʼu koga fuli ʼo te malama ʼa Satana pea mo pulihi ʼana fakahala mo ʼae ʼo tana kau temonio. ʼUluaki, ʼe pulihi anai ia Papilone Lahi, ia te kautahi fakamalamanei ʼo te ʼu lotu hala. ʼE fakaʼaogaʼi anai e Sehova te ʼu takitaki fakapolitike moʼo fakaʼauha te “fafine faifeauaki” agakovi ʼaia. (Apk. 17:16, 17) ʼOsi ʼaia, ʼe pulihi anai e Kilisito te ʼu puleʼaga fuli ʼo te malama ʼa Satana. Pea ko Sesu ʼae neʼe fakahigoa ko “te aselo o te vanu,” ʼe ina fakaʼosi anai leva tana malo ʼaki tana li ia Satana mo tana kau temonio ki te vanu. (Apk. 9:1, 11; 20:1-3) Tou vakaʼi pe neʼe fakakikite feafeaʼi te ʼu aluʼaga fakaofoofo ʼaia ʼi te Pesalemo 45.

11. ʼE tauʼi feafeaʼi e Kilisito ia te “mooni”?

¹¹ Lau ia Pesalemo 45:5. ʼE mole tau te Hau ke ina maʼu ni fenua peʼe ke ina fakapopulaʼi ia te hahaʼi. Kaʼe ʼe tau, he ʼe ʼi ai ʼona tupuʼaga lelei. ʼE ina tauʼi “te mooni, mo te agamalu, mo te faitotonu.” Ko Sehova tokotahi pe ʼae ʼe tonu ke pule ʼi te ʼatulaulau. Pea ʼe ko te “mooni” maʼuhiga ʼaia ʼae ʼe tonu ke tauʼi. ʼI te temi ʼae neʼe fakafeagai ai Satana, neʼe ina ui ʼe mole tonu ke pule ia Sehova. Talu mai ai mo te fakafihiʼi ʼo te moʼoni tafitō ʼaia e te kau temonio mo te hahaʼi. Kua hoko mai te temi ʼae ke alu ai te Hau fakanofo ʼa Sehova ʼo tau pea mo fakamoʼoni ai ko Sehova pe ʼae ʼe tonu ke pule.

12. ʼE tauʼi feafeaʼi e te Hau ia te “agamalu”?

¹² ʼE toe maʼu foki e te Hau te “agamalu” peʼe agavaivai. Tuʼumaʼu pe ko Sesu ʼe ko he faʼifaʼitaki lelei ʼaupito ʼo te agavaivai pea mo te fakalogo ki tana Tamai. (Esa. 50:4, 5; Soa. 5:19) Koia ʼe tonu ai ki te ʼu kaugana fuli ʼa te Hau ke natou faʼifaʼitakiʼi ia ia ʼo natou fakalogo ʼaki he agavaivai kia Sehova ʼi tona ʼuhiga Pule kia meʼa fuli. Pea ko natou pe ʼae ʼe natou fai te faʼahi ʼaia ʼae ka natou maʼuʼuli anai ʼi te malama foʼou ʼa te ʼAtua.—Sakl. 14:16, 17.

13. ʼE tauʼi feafeaʼi e Kilisito ia te “faitotonu”?

 ¹³ ʼE toe tauʼi e Kilisito ia te “faitotonu.” Ko te faitotonu ʼaia ʼe ʼa te ʼAtua, peʼe ko te ʼu lekula ʼa Sehova ʼo ʼuhiga mo te meʼa lelei pea mo ʼae ʼe kovi. (Loma 3:21; Tet. 32:4) Neʼe fakakikite fenei e Esaia ʼo ʼuhiga mo Sesu Kilisito: “E pule anai te hau i te faitotonu.” (Esa. 32:1) Lolotoga tana takitaki, ʼe fakatuʼu anai e Sesu he “lagi foou” mo he “kele foou” ʼae ʼe maʼu ai anai te faitotonu. (2 Pet. 3:13) Ko tona fakaʼuhiga, ko natou fuli ʼae ka maʼuʼuli ʼi te malama foʼou ʼaia, ʼe natou mulimuli anai ki te ʼu lekula ʼa Sehova.—Esa. 11:1-5.

14. ʼE fakahoko feafeaʼi anai e te nima mataʼu ʼo Kilisito “ni gaue lalahi”? (Vakaʼi te ʼuluaki pakī.)

¹⁴ ʼI te kamata lele ʼa te Hau ʼi te hosi hina, ʼe fakamaʼu ʼi tona fahaʼi ia he heleta. (Pes. 45:4) Pea ina toʼo leva ia te heleta ʼi tona nima mataʼu moʼona fakaʼaogaʼi. Neʼe fakakikite fenei e te tagata faipesalemo ʼo ʼuhiga mo Sesu: “Ke ha tou nima matau i ni gaue lalahi.” (Pes. 45:5) ʼI te temi ʼae ka haʼu ai ia Sesu Kilisito ʼo fakaʼauha te malama ʼa Satana ʼi Halamaketone, ʼe ina fakahoko anai “ni gaue lalahi” moʼo fakafeagai ki ʼona fili. ʼE mole tou iloʼi papau pe ʼe fakaʼauha feafeaʼi anai e te Hau ia te malama ʼa Satana. Kaʼe tatau aipe pe kotea te meʼa ka fakahoko e Sesu, ʼe fakamataku anai kia natou ʼae ʼe mole fakalogo ki te ʼu fakatokaga ʼa te ʼAtua pea mo ʼae ʼe mole natou tali te takitaki ʼa te Hau. (Lau ia Pesalemo 2:11, 12.) ʼI tana lea fakapolofeta ʼo ʼuhiga mo te fakaʼosi, neʼe ui e Sesu “e pogia anai te hahai i te mataku lahi osi i te talitali ki te mea ka hoko anai ki te kele; koteuhi e lului anai te u malohi o te lagi.” Neʼe ina toe ui fenei: “Pea e natou sisio anai ki te Foha o te tagata e haele mai i he ao mo he mafimafi pea mo he kololia lahi.”—Luka 21:26, 27.

15, 16. Ko ai anai ka kau ʼi te foʼi kautau ʼae ʼe mulimuli ia Kilisito ʼi te tau?

¹⁵ ʼE tala ʼi te tohi ʼo Apokalipisi, ko te Hau ʼe haʼu mo “he mafimafi pea mo he kololia lahi” ke malo ʼi te ʼu fili ʼo te ʼAtua. ʼE ui fenei ai: “Nee au sio leva kua ava te lagi, pea koeni, nee ha leva he hosi hina. Ko ae nee heka ai e higoa ko Agatonu mo Mooni, pea e ina fakamaaui, pea e tau ia ia i te faitotonu. Pea nee muli leva ia ia te atu fua tau ae i te lagi, mo ni hosi hina, kua teu aki te kie mauhiga, mo hina, mo maa. Pea nee ulu mai tona gutu he heleta lau veliveli, ke tamatei ai te u puleaga: E ina taki anai natou aki he tokotoko ukamea; pea e ina malamalaki anai te fuai vite i te tatauaga vino o te hauhau kakaha o te Atua Mafimafi.”—Apk. 19:11, 14, 15.

¹⁶ Ko ai anai ka kau ʼi te “atu fua tau” ʼi te lagi ʼae ʼe mulimuli ia Sesu ʼi te tau? Neʼe tau fakatahi te kau ʼaselo mo Sesu ʼi tana ʼuluaki fakamaʼu tana heleta pea mo ina kapu ia Satana mo tana kau temonio mai te lagi. (Apk. 12:7-9) Koia ʼe matatonu te ui ʼae ko te kau ʼaselo maʼoniʼoni ʼe kau anai ki te foʼi kautau ʼa Kilisito ʼi te tau ʼo Halamaketone. Ko ai anai ka toe kau ʼi te foʼi kautau ʼa Kilisito? Neʼe fakapapau fenei e Sesu ki ʼona tehina fakanofo: “Ki ae e malo anai, pea e ina fai anai aku gaue o kaku ki te fakaosi, e au foaki anai kia ia te pule ae nee au mau mai taku Tamai: E au foaki anai kia ia te pule ki te atu puleaga. E ina taki anai natou aki he tokotoko ukamea, pea e ina ta anai natou ke mafaafaa o hage ko ni ipu kele.” (Apk. 2:26, 27) Koia ko te ʼu tehina fakanofo ʼa Kilisito ʼae neʼe fakatuʼuake ʼi selo, ʼe natou toe kau anai mo natou ki te foʼi kautau ʼi te lagi. Pea ʼe nonofo anai te kau fakanofo ia tafa ʼo  Sesu ʼi te temi ʼae ka ina fakahoko ai anai “ni gaue lalahi” moʼo fakaʼauha te ʼu puleʼaga.

17. (1) Kotea ʼae ʼe fakata e te hosi hina ʼae ʼe heka ai ia Kilisito? (2) Kotea ʼae ʼe fakata e te heleta mo te nahau?

¹⁷ Lau ia Pesalemo 45:6. Ko te Hau ʼe heka ʼi te hosi hina pea ko te hosi hina ʼaia ʼe ina fakata ia he tau ʼe maʼa pea mo faitotonu kia mata ʼo Sehova. (Apk. 6:2, MN; 19:11) ʼO hilifaki ki te heleta, ʼe toe maʼu e te Hau ia he nahau. Pea ʼe fakata e te heleta mo te nahau ia te ʼu faʼahiga fai ʼae ka fakaʼaogaʼi anai e Kilisito moʼo fakaʼauha ʼona fili.

18. Kotea ʼae ka hoko anai moka fakaʼaogaʼi e Kilisito ʼana “kaui nahau”?

¹⁸ ʼAki tana fakaʼaogaʼi ni palalau fakatuketuke, neʼe fakakikite fenei e te tagata faipesalemo ʼo ʼuhiga mo te Hau: “E masila au kaui nahau; e higa anai ki lalo ni puleaga i ou vae; e natou pupuhi anai te u mafu o te u fili o te hau.” ʼE ʼi ai anai he toe maumau ʼi te malamanei katoa. Neʼe fakakikite fenei ʼi te lea fakapolofeta ʼa Selemia: “Ko natou ae e tamatei anai e [Sehova] i te aho aia e tanaki anai mai ae potu ki ae potu o te kele.” (Sel. 25:33) ʼE toe ui fenei ʼi te tahi lea fakapolofeta ki te aluʼaga pe ʼaia: “Nee au sio leva ki he aselo ae nee tuu i te laa. Pea nee paui leva ia ia i he leo lahi ki te u manulele fuli ae nee lele i te lagi, o ui: Koutou omai, koutou maopopo mai ki te katoaga lahi a te Atua, o tupu ke kotou kai te kakano o te u hau, mo te kakano o te u pule solia, mo te kakano o te kau lalahi, mo te kakano o te u hosi pea mo natou ae e heheka i ai, mo te kakano o te u tagata fuli, ateaina mo popula, liliki mo lalahi.”—Apk. 19:17, 18.

19. ʼE fakaʼosi feafeaʼi anai e Kilisito ia tana malo?

¹⁹ Hili tana fakaʼauha te malama agakovi ʼa Satana, ʼe “malo” anai ia te Hau taulekaleka ko Sesu Kilisito. (Pes. 45:5) ʼE ina fakaʼosi anai tana malo ʼaki tana li ia Satana mo tana kau temonio ki te vanu. ʼE natou nonofo anai ʼi te vanu lolotoga te ʼafio ʼa Sesu mo te toko 144 000 ia taʼu ʼe afe ʼi te lagi. (Apk. 20:2, 3) ʼI te temi ʼae ka pilisoni ai te Tevolo mo tana kau temonio ʼi te vanu, ʼe hage pe anai ia kua natou mamate koteʼuhi ʼe mole toe feala anai hanatou fai he meʼa ʼe kovi. Pea ʼe feala anai ki te hahaʼi fuli ʼi te kele ke natou fiafia ʼi te takitaki ʼa te Hau koteʼuhi ʼe mole kei lava fakahalaʼi anai natou e Satana mo tana kau temonio. ʼI muʼa ʼo te liliu ʼo te kele katoa ko he palatiso, ʼe ʼi ai anai te tahi tupuʼaga ke natou fiafia fakatahi ai mo te Hau pea mo te toko 144 000. ʼE hoki tou talanoa anai ki te aluʼaga fakaofoofo ʼaia ʼi te alatike ʼae ka hoa mai.