1. He ko ʼe ʼe tonu ke tou falala katoa ki te Folafola ʼa te ʼAtua?

 KE FEALA ki he tahi ʼe ina ako te Tohi-Tapu hana faifakamafola, ʼe tonu ke ina fakaha ʼe tui ko te Tohi-Tapu ʼe ko te Folafola ʼa te ʼAtua. Pea ʼe tonu kia tatou fuli ke tou fakaha ʼi tatatou aga pea mo ʼatatou palalau ʼe tou falala ki te Tohi-Tapu. Moka tou falala katoa ki te Tohi-Tapu pea mo popoto ʼi tona fakaʼaogaʼi ʼi te minisitelio, pea ʼe feala ai ke tou tokoni ki ʼihi ke natou iloʼi ia Sehova pea mo maʼu ia te maʼuli heʼe gata.

2. He ko ʼe ʼe tonu ke tou nonofo maʼu ʼi te ʼu meʼa ʼae neʼe tou ako?

² Neʼe fakaha lelei e te apositolo ko Paulo ʼe maʼuhiga ʼaupito te Folafola ʼa te ʼAtua. Neʼe faitohi fenei kia Timoteo: “Ke ke nofo mau i te u mea nee ke ako.” Ko “te u mea” ʼae neʼe ako e Timoteo neʼe ko te ʼu moʼoni ʼo te Tohi-Tapu ʼae neʼe tupu ai tana tui ki te logo lelei. Ko te ʼu faʼahi ʼae ʼe tou ako ʼi te Tohi-Tapu ʼe feala ke toe malohi age ai mo tatatou tui. ʼE feala ke tokoni mai te Tohi-Tapu ke tou maʼu “te poto, o uhiga mo te haofaki.” (2 Tim. 3:14, 15) Pea ko te ʼu palalau ʼa Paulo ʼae ʼe hoa ki ai ʼe ha ai ko te Tohi-Tapu ʼe haʼu mai te ʼAtua. Kaʼe kotea ʼe feala ke tou toe ako mai te ʼu palalau ʼae ia 2 Timoteo 3:16? (Lau. a) ʼE lahi te ʼu faʼahi ʼo ʼuhiga mo te vaega ʼaia ka tou talanoa anai ki ai pea ʼe tou falala ai anai ko te ʼu akonaki fuli ʼa Sehova ʼe “totonu.”—Pes. 119:128.

3-5. (1) Kotea ʼae neʼe hoko hili te akonaki ʼa Petelo ki te kauga malie ʼi te Penikosite, pea kotea tona tupuʼaga? (2) He ko ʼe neʼe tali e te tokolahi ʼi Tesalonika te moʼoni? (3) Kotea ʼae ʼe tokagaʼi e te hahaʼi ia ʼaho nei ʼo ʼuhiga mo tatatou faifakamafola?

³ Neʼe ui fenei e Sesu ki te puleʼaga ʼo Iselaele: “E au fekaui atu kia koutou ni polofeta, ni tagata poto pea mo ni  sekelipa [pe tagata faiakonaki].” (Mat. 23:34) Neʼe palalau ia Sesu ʼo ʼuhiga mo ʼana kau tisipulo. Neʼe ina akoʼi kia natou ke natou fakaʼaogaʼi te Tohi-Tapu ʼi tanatou minisitelio. ʼI te Penikosite ʼo te taʼu 33 H.T.S., b neʼe fai e te apositolo ko Petelo he akonaki ki te kauga malie ʼi Selusalemi. Neʼe ina fakaʼaogaʼi ni vaega mai te Koga Tohi-Tapu Fakahepeleo. ʼI te logo ʼae ʼa te hahaʼi ki te fakamahino ʼa Petelo ia te ʼu vaega ʼaia, neʼe lotomamahi ai te tokolahi ʼuhi ko te ʼu meʼa kovi ʼae neʼe natou fai. Neʼe natou fakahemala mai ʼanatou agahala pea mo kole ki te ʼAtua tana fakamolemole. Pea ʼi te ʼaho ʼaia neʼe teitei ko te toko tolu afe neʼe liliu ko he kau Kilisitiano.—Gaue 2:37-41.

⁴ ʼE feala ke tou toe ako mai te faʼifaʼitaki ʼa te apositolo ko Paulo, ʼae neʼe ina fakamafola te logo lelei ʼi tuʼa atu ʼo te kolo ko Selusalemi. ʼI te kolo ko Tesalonika ʼi Masetonia, neʼe palalau ki te kau Sutea ʼae neʼe atolasio ʼi te sinakoka. Lolotoga Sapato ʼe tolu, “nee palalau ia mo natou ki te u mea o te tohi tapu” moʼo fakamoʼoni neʼe tonu ke mamahi pea mo fakatuʼuake ia Kilisito. Neʼe liliu ʼihi ʼi te kau Sutea ʼaia ʼo tui pea toe feia mo he kauga malie ʼo te kau Keleka.—Gaue 17:1-4.

⁵ Tokolahi ia ʼaho nei ʼe natou tokagaʼi tatatou lava fakaʼaogaʼi te Tohi-Tapu moʼo fakamoʼoni te ʼu faʼahi ʼae ʼe tou akoʼi. ʼI te ʼosi lau e totatou tuagaʼane ʼi Suisi te vaega Tohi-Tapu, neʼe fehuʼi age e te tagata peʼe kau ʼi te lotu fea. Neʼe tali age e te tuagaʼane ko ia mo tona tehina ʼe ko he ʼu Fakamoʼoni ʼa Sehova. Neʼe ui e te tagata neʼe tonu pe ke ina iloʼi koteʼuhi ʼe ko te kau Fakamoʼoni pe ʼa Sehova ʼae ʼe olo age ki tona ʼapi pea mo lau te Tohi-Tapu.

6, 7. (1) ʼE lava fakaʼaogaʼi lelei feafeaʼi e natou ʼae ʼe faiakonaki ʼi te kokelekasio ia te Tohi-Tapu? (2) He ko ʼe ʼe maʼuhiga ke fakaʼaogaʼi lelei te Tohi-Tapu lolotoga te fai ʼo he ako Tohi-Tapu?

⁶ ʼE feafeaʼi hatatou lava fakaʼaogaʼi lelei te Tohi-Tapu moka tou faiakonaki? Kapau neʼe hinoʼi koutou ke kotou fai he ʼu akonaki peʼe ko ʼihi koga ʼo te fono, kotou fakaʼaogaʼi te ʼu vaega tafitō. ʼAua naʼa kotou fakaha ki te nofoʼaki te ʼu manatu tafitō ʼo te ʼu vaega peʼe kotou lau ʼi he laupepa, kaʼe ke kotou lau ʼi takotou Tohi-Tapu. Kotou fakaafe te nofoʼaki ke natou mulimuli mo natou ʼi tanatou Tohi-Tapu. Kotou fakamahino te ʼu vaega pea mo fakaha peʼe lava tokoni feafeaʼi te ʼu vaega ʼaia ke natou felogoʼi lelei age mo Sehova. Kotou fakaʼaogaʼi te temi moʼo palalau ki te Folafola ʼa te ʼAtua, kaʼe mole kotou fai he ʼu fakata ʼe faigataʼa ki te hahaʼi hanatou mahino ki ai peʼe ko he ʼu fakamatala ke natou kokolo ai.

⁷ Kotea ʼae ʼe tonu ke tou manatuʼi moka tou fai he ʼu ako Tohi-Tapu? Moka tou fai he ako, ʼe mole tonu ke tou fakalaka ʼi te ʼu vaega ʼo te tohi kaʼe mole tou lau. Kotou kole ke ina lau te ʼu vaega Tohi-Tapu. Ka kotou fakamahino te ʼu vaega, ʼe mole ko koutou pe ʼae ʼe tonu ke palalau kaʼe ʼe lelei ke kotou tuku ke ina fakaha atu tana manatu. ʼE feala ke tou fai ni fehuʼi ke mahino ai kia ia peʼe kotea ʼae ʼe akoʼi ʼi te Tohi-Tapu kaʼe mole tou ui age peʼe kotea ʼae ʼe tonu ke tui ki ai peʼe ke feafeaʼi tana aga. c

8. Kotea ʼae neʼe tonu ke tauʼi e Paulo?

⁸ Ko te kau tagata ʼafeā ʼo te kokelekasio ʼe ko tonatou maʼua ke natou fakatonutonuʼi, peʼe akonakiʼi ia natou ʼae ʼe agahala. (1 Tim. 5:20; Tito 1:13) Kaʼe ʼe toe ʼaoga foki ke tou fakatonutonuʼi ia tatou totonu. Ko Paulo neʼe ko he Kilisitiano neʼe ina tuku he faʼifaʼitaki lelei pea neʼe ina maʼu he leʼo ʼo loto ʼe maʼa. (2 Tim. 1:3) Kaʼe neʼe tonu ke ina tauʼi ʼona vaivaiʼaga. Neʼe ina ui fenei: “E au sio i oku kogasino ki he tahi age lao ae e tau fakafehagai ki te lao o toku atamai, pea e ina fakapopulai au i te lao o te agahala.” ʼE tou talanoa anai ki te ʼu faʼahi neʼe tonu ke fai e Paulo ke feala ai hana tauʼi ʼona vaivaiʼaga.—Lau ia Loma 7:21-25.

9, 10. (1) Neʼe kotea he ʼu vaivaiʼaga neʼe lagi maʼu e Paulo? (2) Neʼe lagi tauʼi feafeaʼi e Paulo ʼona vaivaiʼaga?

 ⁹ Neʼe mole fakaha e Paulo peʼe kotea ʼona vaivaiʼaga, kaʼe neʼe ina ui neʼe “pauu,” ko tona fakaʼuhiga neʼe aga fefeka mo heʼe fakaʼapaʼapa. (1 Tim. 1:13) ʼI muʼa ʼo tana liliu ko he Kilisitiano, neʼe ina gaohi koviʼi te kau Kilisitiano. Neʼe ina ui neʼe “ita fakavale kia natou.” (Gaue 26:11) Neʼe ina ako ke ina lolomi tona ita, kaʼe neʼe lagi kei faiga malohi ke ina lolomi tona loto pea mo ʼana palalau. (Gaue 15:36-39) Kotea ʼae neʼe tokoni kia ia?

¹⁰ ʼI tana ʼuluaki tohi ki te kau Kolinito, neʼe fakamahino e Paulo te ʼu faʼahi ʼae neʼe ina fai moʼo fakatonutonuʼi ia ia totonu. (Lau ia 1 Kolinito 9:26, 27.) Neʼe ina tauʼi malohi ʼona vaivaiʼaga. ʼE mahino ia neʼe ina kumi te ʼu tokoni ʼi te Tohi-Tapu, mo faikole kia Sehova ke tokoni ki ai ke ina maʼuliʼi, pea mo faiga malohi ke mulimuli ki ai. d ʼE ʼaoga tana faʼifaʼitaki kia tatou heʼe tou toe tauʼi mo tatou ʼotatou vaivaiʼaga.

11. ʼE feafeaʼi hatatou “fakasiosio” tuʼumaʼu ia tatou totonu peʼe kei tou haʼele ʼi te moʼoni?

¹¹ ʼE mole tonu ʼi he temi ke tou manatu kua feala hatatou tuku tatatou tauʼi ʼotatou vaivaiʼaga. ʼE ʼaoga ke tou “fakasiosio” tuʼumaʼu ia tatou totonu ke tou iloʼi peʼe kei tou haʼele ʼi te moʼoni. (2 Ko. 13:5) Moka tou lau te ʼu vaega ohage ko Kolose 3:5-10, pea ʼe feala ke tou fai te ʼu fehuʼi ʼaeni: “ ʼE au faiga malohi koa ke au tauʼi ʼoku vaivaiʼaga? Pe kua au kamata leleiʼia koa te ʼu meʼa ʼae ʼe mole leleiʼia e Sehova? Ohage la moka ʼasi fakapunamaʼuli mai he ʼu pakī heʼe ʼaoga ʼi te Neti, ʼe au foimo matehi koa? Peʼe au haga kumi koa he tahi ʼu pakī feia ʼi te Neti?” Kapau ʼe tou fakakaukauʼi peʼe feafeaʼi hatatou maʼuliʼi te ʼu tokoni ʼo te Folafola ʼa te ʼAtua, pea ʼe feala ai ke “tou alaala pea tou fakapotopoto.”—1 Tes. 5:6-8.

12, 13. (1) Kotea te fakaʼuhiga ʼo te fakatokatoka ʼo te ʼu meʼa? ʼE feafeaʼi hatatou faʼifaʼitakiʼi ia Sesu ʼi te faʼahi ʼaia? (2) Kapau ʼe ʼaoga ke tou fakatokatoka mo he tahi, ko te faʼahiga palalau fea ʼae ʼe tonu ke tou tekeʼi?

¹² Moka talanoa ʼi te Tohi-Tapu ʼo ʼuhiga mo te “fakatokatoka ʼo te ʼu meʼa,” ko tona fakaʼuhiga, ke fakatonutonu he aluʼaga. ʼI ʼihi temi ʼe tonu ke tou fakatokatoka he aluʼaga moka neʼe mahino hala he tahi ki hatatou palalau peʼe ki he meʼa neʼe tou fai. Ohage la ko te kau takitaki lotu Sutea neʼe natou meo he neʼe agalelei ia Sesu mo “te kau popelikano [pe ko te kau tanaki tukuhau] pea mo te kau agahala.” Neʼe fakatonutonuʼi fenei natou e Sesu: “E mole ko natou ae e malolo e aoga ki ai te toketa, kae ko te kau mahaki. Kotou olo, pea kotou ako te uhiga o te mea aeni: E mau toku fiafia i te manavaofa, kae mole i ni sakilifisio.” (Mat. 9:11-13) Neʼe ina toe fakatonutonuʼi te manatu ʼa te hahaʼi ʼo ʼuhiga mo te ʼuhiga moʼoni ʼa te ʼAtua. ʼAki he faʼa kataki mo he agalelei, neʼe ina akoʼi ki te hahaʼi ko Sehova ʼe ko he “Atua manavaofa mo lotoofa, mo kataki fualoa, mo mau koloa i te agalelei mo te agatonu.” (Eke. 34:6) Pea neʼe tokolahi te kau agavaivai neʼe natou tui ai ki te logo lelei.

¹³ ʼE tonu ke tou faʼifaʼitakiʼi ia Sesu moka tou tokoni ki ʼihi. Ko te fakatotonu ia 2 Timoteo 3:16, MN, ʼe mole fakaʼuhiga leva ke fefeka ʼatatou palalau moka tou fakatokatoka mo he tahi. ʼE mole fakagafua mai ʼi te Tohi-Tapu ke tou palalau ki he tahi kaʼe mole tou tokagaʼi te ʼu meʼa ʼae ʼi tona loto. Kapau ʼe fefeka fau tatatou valokiʼi ia ia, pea ʼe feala ke hage ʼatatou palalau ko “he heleta.” ʼE tou fakalotomamahiʼi anai ia ia kaʼe neʼe mole tou tokoni tatou ki ai.—Taag. 12:18.

14-16. (1) ʼE lava fakatokatoka feafeaʼi e he tagata ʼafeā he aluʼaga moka kole tokoni ʼihi ki ʼonatou fihifihia? (2) He ko ʼe ʼe maʼuhiga ki te ʼu matuʼā ke natou fakaʼaoga te Tohi-Tapu moʼo fakatokatoka he aluʼaga ʼi tonatou famili?

¹⁴ ʼE feafeaʼi hatatou lava faʼa kataki mo  agalelei moka tou fakaʼaogaʼi te Tohi-Tapu moʼo fakatokatoka he ʼu aluʼaga? Ohage la ko he taumatuʼa ʼe fihi tuʼumaʼu. ʼE nā kole tokoni ki he tagata ʼafeā. ʼE mole kau anai ia mo he tahi ia naua, pea ʼe mole ina fakaha anai tana manatu ʼa ia totonu. Kaʼe ʼe ina fakaʼaogaʼi anai te Tohi-Tapu moʼo tokoni kia naua ke nā mahino peʼe feafeaʼi hanā tuku tanā fihi. ʼE feala ke ina fakaʼaogaʼi te ʼu tokoni ʼaoga ʼae ʼe tuʼu ʼi te kapite 3 ʼo te tohi Te Kalavi ʼo Te Manuʼia Faka Famili. ʼI tanatou faipalalau ki te ʼu tokoni ʼaoga ʼaia, ʼe mahino ai ki te tagata ʼohoana pea mo tona ʼohoana ʼe ʼaoga ke nā fai ni fetogi. Hili ki ai he temi, ʼe fehuʼi anai e te tagata ʼafeā peʼe kua nā felogoʼi lelei, pea ʼe feala anai ke toe fai tokoni moka ʼe ʼaoga.

 ¹⁵ ʼE lava fakatokatoka feafeaʼi e ni matuʼā he aluʼaga moʼo tokoni ki tanatou fanau? Ohage la kapau ʼe ʼi ai he kaumeʼa foʼou ʼo takotou taʼahine. Kaʼe kia koutou ʼe mole ko he kaumeʼa lelei. ʼUluaki, ʼe tonu ke lahi te ʼu faʼahi ʼae ke kotou iloʼi ʼo ʼuhiga mo ia. Kaʼe kapau ʼe kei kotou tuʼania ʼo ʼuhiga mo takotou taʼahine, pea ʼe feala ke kotou faipalalau mo ia. ʼE feala ke kotou fakaʼaogaʼi te ʼu tokoni ʼaoga ʼo te Tohi-Tapu ʼi te tohi Les jeunes sʼinterrogent — Réponses pratiques, volume 2. Pea ʼe tonu ke lahi te temi ʼae ʼe kotou fakatahi ai mo ia. ʼE feala ke kotou tokagaʼi tana aga ʼi te faifakamafola peʼe ʼi ʼakotou fakatahi fakafamili. Kapau ʼe kotou faʼa kataki mo agalelei moka kotou palalau ki takotou taʼahine, pea ʼe ina iloʼi ai anai ʼe kotou ʼofa mo fia tokaga ki ai. ʼE ina fia mulimuli anai ki ʼakotou tokoni ʼo ʼuhiga mo ʼona kaumeʼa, pea ʼe lelei anai te ʼu meʼa ʼae ʼe ina filifili ʼi tona maʼuli.

¹⁶ Ko ai ʼae ʼe feala ke toe ʼaoga ki ai tatatou tokoni? ʼAki he faʼa kataki mo he agalelei ʼe feala ke tou fakalotomalohiʼi natou ʼae ʼe tuʼania ki tonatou maʼuli malolō, peʼe lotovaivai ʼuhi he mole kei natou gaue, peʼe faigataʼa hanatou tali he manatu ʼe akoʼi ʼi te Tohi-Tapu. Kapau ʼe tou fakaʼaoga te Folafola ʼa te ʼAtua moʼo fakatokatoka te ʼu meʼa, pea ʼe fua lelei kia tatou fuli.

17. He ko ʼe ʼe tonu ke tou tali ʼaki he loto fakafetaʼi moka akonakiʼi tatou?

¹⁷ ʼE ui ʼi te Tohi-Tapu ʼi te agamahani ʼe mole tou leleiʼia moka akonakiʼi tatou, peʼe faigataʼa kia tatou tona tali. Kaʼe kapau ʼe tou tali totatou akonakiʼi mo fakalogo, pea ʼe feala ke tou liliu ʼo faitotonu. (Hep. 12:11) Tokolahi te kau Kilisitiano ʼae neʼe lalahi ake ʼi te moʼoni, ʼe natou ui ko tonatou akonakiʼi e ʼanatou matuʼā neʼe tokoni kia natou. Pea moka akonakiʼi tatou e Sehova ʼaki te kau tagata ʼafeā, ʼe feala ai ke tou nonofo ʼi te ala ʼo te maʼuli.—Taag. 4:13.

18, 19. (1) He ko ʼe ʼe maʼuhiga te tokoni ia Taaga Lea 18:13 ki te kau tagata ʼafeā ʼae ʼe natou akonakiʼi ʼihi? (2) Kotea anai tona fua moka ʼe agamalu te kau tagata ʼafeā pea mo fakaha te ʼofa ʼi tanatou akonakiʼi he tahi neʼe agahala?

¹⁸ ʼE fakahoko feafeaʼi e te kau tagata ʼafeā mo te ʼu matuʼā tanatou akonakiʼi ʼihi ke fua lelei? ʼE fakaha mai e Sehova ʼe ʼaoga ke tou akonakiʼi ʼihi “ ʼi te faitotonu.” (2 Tim. 3:16, MN) Ko tona fakaʼuhiga ʼe tonu ke tou mulimuli ki te ʼu tokoni ʼaoga ʼo te Tohi-Tapu moka tou akonakiʼi ʼihi. Ohage la ko te tokoni ʼaoga ʼaeni ia Taaga Lea 18:13: “Ko ia ae e tali palalau kae nee mole fakalogo mua e ina fakaha tona vale pea e ina kai tona ufiufi.” Koia moka tala e he tahi ki te kau tagata ʼafeā neʼe agahala mamafa he tehina, pea ʼe tonu ke natou kumi ke natou iloʼi te ʼu faʼahi fuli ʼi muʼa ʼo hanatou akonakiʼi te tehina ʼaia. (Tet. 13:14) Pea ʼe feala ai leva ke natou akonakiʼi te tehina “ ʼi te faitotonu.”

¹⁹ ʼE toe akoʼi ʼi te Tohi-Tapu ki te kau tagata ʼafeā ke natou akonakiʼi ʼihi “i te agamalu.” (Lau ia 2 Timoteo 2:24-26.) ʼE moʼoni, moka neʼe agahala he tahi pea ʼe feala ke lau kovi ai te hahaʼi ʼo ʼuhiga mo Sehova peʼe ke lotomamahi ai ʼihi. Kaʼe kapau ʼe ita he tagata ʼafeā ʼi tana akonakiʼi ia ia, pea ʼe mole tokoni anai ki ai. Kaʼe kapau ʼe ina faʼifaʼitakiʼi ia te ʼAtua mo palalau ʼaki he agalelei, pea ʼe lagi fakahemala anai ia.—Loma 2:4.

20. Kotea te ʼu tokoni ʼaoga ʼe tonu ke maʼuliʼi e te ʼu matuʼā moka natou akonakiʼi tanatou fanau?

²⁰ ʼE tonu mo te ʼu matuʼā ke natou maʼuliʼi te ʼu tokoni ʼaoga ʼo te Tohi-Tapu moka natou akonakiʼi tanatou fanau. (Efe. 6:4) Ohage la kotea ʼae ʼe tonu ke fai e he tamai moka tala age e he tahi neʼe fai e tona foha he meʼa kovi? ʼE tonu ki te tamai ke ina kumi ke ina iloʼi te ʼu faʼahi fuli ʼi muʼa ʼo hana fakatuʼā tona foha. Pea ʼe mole tonu ki he tahi ʼo he famili Kilisitiano ke liliu ʼo ita mo agamalohi. Ko Sehova “e fonu . . . i te manavaofa pea mo te lotoofa,” pea ʼe tonu ki te ʼu matuʼā ke natou faʼifaʼitakiʼi ia ia moka natou akonakiʼi tanatou fanau.—Sakp. 5:11.

21, 22. Ia Pesalemo 119:97-104, ko te ʼu kupu fea ʼae ʼe natou fakaha takotou manatu ʼo ʼuhiga mo te Folafola ʼa Sehova?

²¹ ʼI te temi muʼa, neʼe fakaha e te kaugana ʼa ʼAtua te tupuʼaga ʼo tana ʼofa ki te lao ʼa Sehova. (Lau ia Pesalemo 119:97-104.) ʼAki tana ako te Tohi-Tapu, neʼe liliu ai ʼo poto, mo maʼu te fakasiosio tonu pea mo te mahino. ʼI tana mulimuli ki te ʼu tokoni ʼaoga ʼo te Tohi-Tapu, neʼe mole ina fai ai he aga ʼe kovi ohage ko tona fai e te tokolahi. Neʼe ina leleiʼia ʼaupito te ako ʼo te Tohi-Tapu pea neʼe fua lelei kia ia tana mulimuli ki ai. Neʼe ina fakatotonu ke mulimuli ki te lao ʼa te ʼAtua ʼi tona maʼuli katoa.

²² ʼE toe maʼuhiga koa kia koutou te Tohi-Tapu? ʼE feala ke malohi ai takotou tui ʼe fakahoko anai e te ʼAtua tana fakatuʼutuʼu. ʼE maʼu ai te ʼu tokoni ʼa Sehova ʼae ʼe tokoni mai ke mole tou agahala pea ke tou mamate ai. ʼE feala ke kotou fakaʼaoga te Tohi-Tapu moʼo tokoni ki ʼihi ke natou haga haʼele ʼi te ala ʼo te maʼuli pea mo nonofo ai. ʼE tonu ke tou haga fakaʼaoga te Tohi-Tapu ʼi te ʼu aluʼaga fuli ʼaia pea mo tou haga tauhi kia Sehova, totatou ʼAtua poto mo ʼofa.