Te ʼu Fehuʼi ʼa Te Kau Lautohi

Koteā te manatu ʼa he Kilisitiano ʼo ʼuhiga mo te kapu manu pea mo te gelu?

ʼE mole tauteaʼi ʼi te Tohi-Tapu ia te kapu manu peʼe ko te gelu. (Teutalonome 14:4, 5, 9, 20; Mateo 17:27; Soane 21:6) Kae ʼe lahi te ʼu pelesepeto faka Tohi-Tapu ʼe tonu ke tokagaʼi e te ʼu Kilisitiano ʼaē ʼe kapu manu pea mo fai gelu.

Neʼe fakagafua e te ʼAtua kiā Noe pea mo tona hōloga ke natou matehi te ʼu manu maʼa natou kai, kae neʼe tonu ke natou fakahali te toto ʼo te manu ʼi muʼa ʼo tona kai. (Senesi 9:3, 4) Neʼe fakahā lelei ʼi te fakatotonu ʼaia ia te maʼua ʼaē ke fakaʼapaʼapa te tagata ki te maʼuli ʼaē neʼe foaki age e te ʼAtua ki te manu. Koia, ʼe mole tonu ke matehi e te ʼu Kilisitiano te ʼu manu ʼuhi pē ko he faigaoʼi, peʼe ko hanatou fakafiafia, pea mo natou meʼa noaʼi ia te maʼuhiga ʼo te maʼuli.—Tāʼaga Lea 12:10.

ʼE ʼi ai te tahi faʼahi ʼe pipiki ki tatatou aga ʼo ʼuhiga mo te kapu manu pea mo te gelu. Ko te kau ʼapositolo ʼaē neʼe ko he ʼu tagata tautai, neʼe lagi natou fiafia he neʼe lahi te ʼu ika ʼaē neʼe natou maʼu ʼi tanatou gelu. Kae ʼe mole ʼui mai neʼe natou laupisi ʼo ʼuhiga mo tanatou popoto ʼi te gelu peʼe ko te kapu manu, pe neʼe natou gelu peʼe kapu manu moʼo fakataupiepie mo ʼihi, peʼe natou fia fakahā ko nātou ko te ʼu tagata, peʼe ko te fia maʼu he fiafia ʼi te kapu manu, te tau mo te ʼu manu, peʼe ko te matehi ʼo te ʼu manu.—Pesalemo 11:5; Kalate 5:26.

Koia, ʼe feala ke tou fai te ʼu fehuʼi ʼaenī: ‘ ʼE au tuku koa he faʼifaʼitaki lelei ʼo ʼuhiga mo te fakaʼapaʼapa ki te manatu ʼa Sehova ʼo ʼuhiga mo te maʼuli? Ko te ʼu meʼa ʼaē ʼe au manatu kiai pea mo fai palalau tāfito kiai, ʼe ko te kapu manu pē koa pea mo te gelu? ʼE hā koa ʼi toku maʼuli ʼe au leleiʼia tāfito ia te kapu manu, peʼe hā koa ko au ko he minisi ʼa te ʼAtua? ʼI taku ʼalu ʼaē ʼo kapu manu peʼe gelu, ʼe tupu ai koa haku fakakaumeʼa mo he ʼu hahaʼi ʼe mole tui kiā Sehova, peʼe tupu ai koa haku mole kei tokaga ki toku fāmili?’—Luka 6:45.

Ko ʼihi ʼaē ʼe natou kapu manu peʼe gelu moʼo taupau ʼaki ʼonatou maʼuli, ʼe lagi natou manatu ʼe mole ko he meʼa kovi ia mo kapau ʼe natou fakatōtō ʼi te ʼu faʼahi fakalaumālie lolotoga te ʼu temi ʼaē ʼe lelei ai te kapu manu peʼe ko te fai gelu. Kae ʼe tou fakahā tatatou tui pea mo tatatou falala ki te ʼAtua mokā ʼe tou fakamuʼamuʼa tuʼumaʼu pē tana ʼu gāue. (Mateo 6:33) Tahi ʼaē meʼa, ʼe fakalogo te kau Kilisitiano ki te ʼu lao fuli ʼa “Sesale” ʼo ʼuhiga mo te kapu manu pea mo te gelu, tatau aipē peʼe fakafefeka e te puleʼaga ia te ʼu lao ʼo ʼuhiga mo te ʼu faʼahi ʼaia.—Mateo 22:21; Loma 13:1.

Moʼo mulimuli ki te manatu ʼa Sehova ʼo ʼuhiga mo te kapu manu pea mo te gelu, neʼe ʼaoga ki ʼihi ke natou fetogi tanatou manatu ʼo ʼuhiga mo tana ʼu lēkula. (Efesi 4:22-24) ʼI te tahi age faʼahi, ʼe tonu ke tou fakaʼapaʼapa ki te ʼu tonu ʼaē ʼe fai e ʼihi ʼo mulimuli ki tonatou leʼo ʼo loto. ʼE ʼalutahi mo te tokoni ʼaenī ʼa te ʼapositolo ko Paulo: “ ʼAua naʼa tou toe fefakamāuʼiʼaki ia tātou, kae ke tou fai ia te fakatotonu ʼaenī: ke mole tou fai he meʼa ke tūkia ai he tehina.” (Loma 14:13) Ko te fakahā ʼo te ʼofa ʼaē ʼe mole manatu pē kiā kita pea mo te fakaʼapaʼapa, ʼe lagolago ai ki te tokalelei ʼi te kōkelekāsio, pea mo fiafia ai totatou Tupuʼaga, ia te Matapuna ʼo te maʼuli fuapē.—1 Kolonito 8:13. a

[Kiʼi nota]