Tou Faʼa Kātaki ʼo Fakatalitali Ki Te ʼAho ʼo Sehova
Tou Faʼa Kātaki ʼo Fakatalitali Ki Te ʼAho ʼo Sehova
“Fakatahiʼi ki takotou tui . . . te faʼa kātaki.”—2 Petelo 1:5, 6.
1, 2. Koteā te faka ʼuhiga ʼo te faʼa kātaki, pea he koʼē ʼe ʼaoga ki te kau Kilisitiano ke natou maʼu ia te kalitātē ʼaia?
KUA ovi mai te ʼaho lahi ʼo Sehova. (Soele 1:15; Sofonia 1:14) ʼI totatou ʼuhiga Kilisitiano ʼe tou fia nofo agatonu ki te ʼAtua, ʼo tou fakatalitali fakafiafia ki te temi ʼaia ʼaē kā faka lakatonuʼi ai anai ia te pule faʼitaliha ʼa Sehova. Kae ʼi te temi nei ʼuhi ko tatatou tui, ʼe fehiʼaʼinaʼi ai tātou, mo laukoviʼi, mo fakataga, pea mo matehi. (Mateo 5:10-12; 10:22; Fakahā 2:10) Koia ʼe tonu ai ke tou faʼa kātaki, ko tona faka ʼuhiga ʼe tou ʼūtakiʼi te fakafeagai mai ʼa te hahaʼi. ʼE fakaloto mālohiʼi fēnei tātou e te ʼapositolo ko Petelo: “Fakatahiʼi ki takotou tui . . . te faʼa kātaki.” (2 Petelo 1:5, 6) ʼE ʼaoga ke tou faʼa kātaki, he neʼe ʼui fēnei e Sesu: “Ko ʼaē kā faʼa kātaki anai ʼo kaku ki te fakaʼosi, ʼe ko ia ia ʼaē kā maʼuli anai.”—Mateo 24:13.
2 ʼE tou mahaki foki, pea mo lotomamahi mokā mate he tahi neʼe tou ʼofa mamahi ai pea mo ʼihi age fihifihia. ʼE fiafia anai ia Satana mo kapau ʼe vaivai tatatou tui! (Luka 22:31, 32) ʼAki te tokoni ʼa Sehova, ʼe tou lava kātakiʼi te ʼu fihifihia kehekehe. (1 Petelo 5:6-11) Tou vakaʼi age muʼa te ʼu hisitolia ʼo ʼihi, ʼe hā mai ai ʼe tou lava faʼa kātaki pea mo tui mālohi ʼo fakatalitali ki te ʼaho ʼo Sehova.
Neʼe Mole Natou Tuku Tanatou Tauhi Ki Te ʼAtua ʼUhi Ko Te Mahaki
3, 4. Tuku mai he faʼifaʼitaki ʼe hā ai, ʼe feala hatatou tauhi agatonu kiā Sehova logolā te mahaki.
3 Ko te ʼAtua ʼe mole ina fakamālōlō fakamilakulo ia tātou iā ʼaho nei, kae ʼe ina foaki mai ia te mālohi ke tou kātakiʼi totatou mahaki. (Pesalemo 41:1-3) Neʼe ʼui fēnei e Sharon: “ ʼE au manatuʼi, neʼe kua hagē pē toku hekaʼaga toho ko hoku kaumeʼa ʼi te ʼaho fuli. ʼUhi heʼe talu mai taku tupu, neʼe mole au lava gaoʼi ohagē ko te tamaliki fuli ʼuhi ʼaē neʼe palalisia te tahi faʼahi ʼo toku ʼulu.” ʼI te temi ʼaē neʼe ʼiloʼi ai e Sharon ia Sehova pea mo tana ʼu fakapapau ʼo ʼuhiga mo he maʼuli haohaoa, neʼe ina maʼu ai leva te ʼamanaki ki te kā haʼu. Logolā te faigataʼa ʼo tana palalau pea mo tana haʼele, kae neʼe fiafia ʼi tana minisitelio. Kua hili nei kiai taʼu e 15, neʼe ina ʼui fēnei: “Tatau aipē peʼe ʼāsili kovi age toku mahaki, kae ʼe au falala aipē ki te ʼAtua pea ko taku ʼu felōgoi ʼaē mo ia ʼe ina puipui au. ʼI meʼa fakafiafia taku kau ki te hahaʼi ʼa Sehova pea mo maʼu tana tokoni!”
4 Ko te ʼapositolo ko Paulo neʼe ina fakaloto mālohiʼi ia te kau Kilisitiano ʼi Tesalonika ke natou “fai he ʼu palalau fakafīmālie ki te ʼu nefesi lotovaivai.” (1 Tesalonika 5:14) ʼE feala ke lotomamahi he tahi mo kapau neʼe mole hoko he meʼa neʼe fakaʼamu mamahi kiai. ʼI te taʼu 1993, neʼe ʼui fēnei e Sharon: “Neʼe hagē kiā au mole kei ʼi ai hoku mālohi, . . . lolotoga taʼu e tolu neʼe au lotomamahi ʼaupitō ai. . . . Neʼe au maʼu te fakafīmālie pea mo te ʼu tokoni mai te kau tagata ʼāfea. . . . ʼAki Te Tule Leʼo, ko Sehova neʼe ʼofa ʼo fakamahino mai pe koteā ia te lotomamahi ʼaupitō. ʼEī, ʼe tokaga ia ki tana ʼu kaugana pea mo mahino ki te ʼu meʼa ʼaē ʼi ʼotatou loto.” (1 Petelo 5:6, 7) Iā ʼaho nei ʼe kei tauhi agatonu pē ia Sharon ki te ʼAtua pea mo fakatalitali ki te ʼaho lahi ʼo Sehova.
5. Ko te fakamoʼoni fea ʼe hā mai ai ʼe feala ki te kau Kilisitiano ke natou kātakiʼi he maʼuli hoha ʼaupitō?
5 Ko ʼihi Kilisitiano ʼe natou maʼuli hoha ʼaupitō ʼuhi ko te ʼu fihifihia ʼaē neʼe tau mo nātou ʼi muʼa atu. Neʼe sio ia Harley ki te fakamataku ʼo te Lua Tau Faka Mālamanei pea neʼe moe valemuna ki te ʼu tau. Lolotoga tana moe, neʼe kalaga fēnei: “Kotou tōkakaga!” ʼI tana ʼala ake neʼe tafekakava. Kae neʼe ina tuku tona maʼuli ke takitaki e te ʼAtua, pea ʼaki te temi neʼe mole kei fai putuputu leva tana ʼu moe valemuna.
6. Koteā ʼaē neʼe fai e te Kilisitiano moʼo tauʼi tona lotohoha?
6 Ko te Kilisitiano neʼe tau mo te mahaki ʼe higoa ko te trouble bipolaire, neʼe faigataʼa ʼaupitō ki ai hana kau ki te fai faka mafola ʼi te ʼu ʼapi. Kae neʼe faʼafai pē ʼi te gāue ʼaia, koteʼuhi neʼe mahino kiā ia ko te minisitelio ʼe ina haofaki anai ia ia pea mo nātou ʼaē ʼe natou tali lelei anai. (1 Timoteo 4:16) ʼI ʼihi temi neʼe mole feala pē lā hana fisifisi ki te matapā, kae neʼe ina ʼui fēnei: “ ’Faifai pē, pea kua lava lolomi toku loto hoha, neʼe au ʼalu ʼo fisifisi ki te tahi matapā, pea au hoko atu ki te tahi matapā. ʼI taku haga kau aipē ki te minisitelio, neʼe au liliu ʼo mālohi ʼi te faʼahi fakalaumālie.” Ko te kau ʼa te tehina ki te ʼu fono neʼe ko he tahi ʼaia meʼa faigataʼa, kae neʼe ina ʼiloʼi papau ia te maʼuhiga ʼaē ke fakatahi mo tona ʼu tehina mo tuagaʼane. Koia, neʼe faiga aipē ke ʼalu ʼo kau ki te ʼu fono.—Hepeleo 10:24, 25.
7. Logolā ko ʼihi ʼe natou mātataku ʼi te palalau ʼi muʼa ʼo te kaugamālie peʼe mo kau ki he fono, kae ʼe feafeaʼi tanatou fakahā ia tanatou faʼa kātaki?
7 Ko ʼihi Kilisitiano ʼe natou maʼuli tuʼania, ko tona faka ʼuhiga ʼe natou tuʼaniaʼi ʼaupitō he ʼu ʼaluʼaga peʼe ko he ʼu meʼa. Ohagē lā, ʼe lagi natou mātataku ʼi te palalau ʼi muʼa ʼo te kaugamālie peʼe ki te kau ki he fono. Kotou fakafuafua age muʼa, ʼe ko he meʼa faigataʼa kiā nātou he fai ʼo hanatou tali ʼi te ʼu fono peʼe ko hanatou kiʼi akonaki pea mo fai palalau ʼi te Ako Faka Teokalatike! Kae ʼe natou faʼa kātaki aipē, pea ʼe tou lotomālohi ʼaupitō ʼi tanatou ʼomai ki te ʼu fono pea mo kau kiai.
8. Ko te tokoni fea ʼe lelei moʼo tekeʼi he lotomamahi?
8 Kapau ʼe lahi he mālōlō pea mo he moe ʼa he tahi, pea ʼe lagi tokoni anai ki ai ke ina kātakiʼi tona lotomamahi. ʼE lagi ʼaoga anai ki ai he faitoʼo faka tōketā. Kae ko te tokoni lelei ki ai, ʼe ko tana falala ki te ʼAtua ʼaki te faikole. ʼE ʼui iā Pesalemo 55:22: “Tuku tau kavega kiā Sehova totonu, pea ko ia totonu ʼe lagolago anai kiā te koe. ʼE mole ina fakagafua anai ke tūkia ia ia ʼaē ʼe faitotonu.” Kae iā meʼa fuli, kotou “falala kiā Sehova ʼaki [tokotou] loto kātoa.”—Tāʼaga Lea 3:5, 6.
Tou Faʼa Kātaki He Lotomamahi Mokā Mate He Tahi ʼe Tou ʼOfa Mamahi Ai
9-11. (a) Koteā ʼaē ʼe lava tokoni mai kiā tātou ke tou kātakiʼi te lotomamahi mokā mate he tahi neʼe tou ʼofa ai? (b) ʼE tokoni feafeaʼi mai kiā tātou ia te faʼifaʼitaki ʼa Ana ke tou kātakiʼi te lotomamahi mokā mate he tahi neʼe tou ʼofa ai?
9 Kā māvete he fāmili ʼuhi ko te mate, ʼe feala ke liliu te faʼahi ʼaia ko he meʼa fakatupu lotomamahi ʼaupitō. Neʼe tagiʼi e Apalahamo te mate ʼo tona ʼohoana ʼofaina ko Sala. (Senesi 23:2) Māʼiapē lā mo te tagata haohaoa ko Sesu neʼe “tagi” ʼi te temi ʼaē neʼe mate ai tona kaumeʼa ko Lasalo. (Soane 11:35) Koia ʼe tou lotomamahi fuli mokā mate he tahi neʼe tou ʼofa mamahi ki ai. Kae ʼe ʼiloʼi e te kau Kilisitiano ʼe ʼi ai anai te fakatuʼuake. (Gāue 24:15) Koia, ʼe mole natou “lotomamahi ohagē ko nātou ʼaē ʼe mole hanatou ʼamanaki.”—1 Tesalonika 4:13.
10 ʼE feafeaʼi hatatou tekeʼi te lotomamahi mokā mate he tahi neʼe tou ʼofa ai? Lagi ʼe lelei ke tou toʼo he fakatā moʼo tali ki te fehuʼi ʼaia. ʼI te agamāhani ʼe mole tou tagiʼi fualoa hotatou kaumeʼa neʼe folau, heʼe tou ʼiloʼi pē ʼe tou toe fesioʼaki anai mokā toe liliu mai. ʼE tonu ke tou toe faka ʼuhiga fēia mokā mate he Kilisitiano agatonu, ʼe feala ai anai ke siʼisiʼi totatou mamahi heʼe tou ʼiloʼi ʼe toe fakatuʼuake anai ia.—Tagata Tānaki 7:1.
11 Ko te falala kātoa ki “te ʼAtua ʼo te loto fakafīmālie fuli” ʼe tokoni mai anai kiā tātou ke tou kātakiʼi te lotomamahi mokā mate he tahi neʼe tou ʼofa ai. (2 Kolonito 1:3, 4) ʼE tonu foki mo tātou ke tou faʼifaʼitakiʼi te fafine vītua ko Ana ʼi te ʼuluaki sēkulō. Neʼe liliu ko he fafine vītua hili pē taʼu e fitu ki tana ʼohoana. Kae ʼi tona taʼu 84, neʼe kei kaugana pē kiā Sehova ʼaki te tauhi taputapu ʼi te fale lotu. (Luka 2:36-38) Ko te taʼi tauhi ʼaia mo tona loto kātoa ki te ʼAtua, neʼe lagi tokoni kiā te ia ke ina tekeʼi te lotomamahi pea mo tana maʼuli tokotahi. Ko te kau tuʼumaʼu ki te ʼu gāue faka Kilisitiano, ʼaē ko te faka mafola ʼo te Puleʼaga, ʼe lava tokoni mai kiā tātou ke tou kātakiʼi te lotomamahi mokā mate he tahi neʼe tou ʼofa ai.
Te Faʼahiga Fakatokatoka ʼo Te ʼu Fihifihia Kehekehe
12. Ko te ʼu fihifihia fea ʼo te maʼuli faka fāmili neʼe kātakiʼi e ʼihi Kilisitiano?
12 Ko ʼihi Kilisitiano ʼe tonu ke natou kātakiʼi te ʼu fihifihia ʼo te maʼuli faka fāmili. Ohagē lā, kapau ko he tahi ʼi te taumātuʼa ʼe tono, ʼe lahi anai tona ʼu fua kovi ki te fāmili! ʼI te lotomamahi ʼaupitō ʼo ia ʼaē neʼe agatonu, ʼe lagi mole kei mamoe pea mo tagi tuʼumaʼu pē. Māʼiapē lā mo te fai ʼo he ʼu kihiʼi gāue kua fakatupu lotovaivai, ʼo hoko ai te ʼu lakahala peʼe ko he ʼu fihifihia. Ko ia ʼaē neʼe agatonu ʼe lagi mole kei mākai, kua sino kovi, pea kua lotovaivai ʼaupitō. ʼE lagi kua faigataʼa tana kau ki te ʼu gāue faka Kilisitiano. Pea ʼe feala ke malave ʼaupitō ia te faʼahi ki te fānau!
13, 14. (a) Koteā te fakaloto mālohi ʼe tou maʼu mai te faikole ʼa Salomone ʼi te fakatapu ʼo te fale lotu? (b) He koʼē ʼe tonu ke tou kole ia te laumālie māʼoniʼoni?
13 Kā tou tau mo te ʼu taʼi fihifihia ʼaia, ʼe foaki mai e Sehova ia te tokoni ʼaē ʼe ʼaoga kiā tātou. (Pesalemo 94:19) ʼE logo ia te ʼAtua ki te ʼu faikole ʼo tana ʼu kaugana, pea ʼe hā te faʼahi ʼaia ʼi te faikole ʼaē neʼe fai e te Hau ko Salomone ʼi te fakatapu ʼo te fale lotu ʼa Sehova. Neʼe faikole fēnei ia Salomone ki te ʼAtua: “Pe koteā te faikole, pe koteā te tagi ʼe fai atu anai e he tagata peʼe ko tau hahaʼi kātoa ʼo Iselaele, heʼe natou tahi ʼiloʼi pē anai ia te mamahi ʼi tona loto, pea mo hiki atu anai ʼonatou nima ki tou ʼapi, ko koe, ʼofa ʼo fagono mai te lagi, tou nofoʼaga, heʼe ke ʼiloʼi tona loto (heʼe ko koe pē ʼe ke ʼiloʼi lelei te loto ʼo tou ʼu foha fuli); ke natou manavasiʼi kiā te koe ʼi te ʼaho fuli ʼo tonatou maʼuli ʼi te fuga kele ʼaē neʼe ke foaki age ki tamatou ʼu kui.”—1 Hau 8:38-40.
14 ʼE ʼaoga tāfito ke tou haga kole ia te laumālie māʼoniʼoni. (Mateo 7:7-11) ʼI te fua ʼo te laumālie, ʼe ʼi ai te ʼu kalitātē ohagē ko te fiafia pea mo te tokalelei. (Kalate 5:22, 23) ʼE tou loto fīmālie mokā tou logoʼi neʼe tali mai e tatatou Tamai ʼe ʼi selō ia tatatou ʼu kole, kua tou fiafia kae mole kei tou lotomamahi, pea kua tou tokalelei kae mole kei tou loto hoha!
15. Koteā te ʼu vaega faka Tohi-Tapu ʼaē ʼe fakasiʼisiʼi ai totatou tuʼania?
15 ʼE lahi tatatou tuʼania mo kapau ʼe tonu ke tou kātakiʼi he lotomamahi lahi. Kae ʼe feala ke tou fakasiʼisiʼi he tahi age ʼu tuʼania ʼaki te ʼu palalau ʼaenī ʼa Sesu: “Tuku takotou hoha ki tokotou nefesi, pe koteā anai he meʼa ke kotou kai pe ko he meʼa ke kotou ʼinu, peʼe ki tokotou sino, pe koteā anai he meʼa ke kotou kofuʼi. . . . Ke kotou haga kumi muʼa te puleʼaga pea mo [te] faitotonu [ʼa te ʼAtua], pea ʼe toe foaki atu anai mo te ʼu meʼa fuli ʼaia kiā koutou.” (Mateo 6:25, 33, 34) ʼE fakaloto mālohiʼi tātou e te ʼapositolo ko Petelo ke tou ‘tuku ki te ʼAtua ia tatatou ʼu tuʼania fuli, heʼe tokaga ia kiā tātou.’ (1 Petelo 5:6, 7) ʼE tonu ke tou fai he ʼu fakatuʼutuʼu moʼo fakatokatoka he fihifihia. Kae kā neʼe kua tou fai te meʼa ʼaē neʼe tou lavaʼi, tou faikole ke tou maʼu ai he fakafīmālie ki totatou loto hoha. Neʼe hiva fēnei ia te tagata fai pesalemo: “Tuku tou maʼuli kiā Sehova, pea ke ke falala kiā te ia, pea ʼe ina fakahoko totonu anai.”—Pesalemo 37:5.
16, 17. (a) He koʼē ʼe mole feala hatatou ʼāteaina ʼosi mai te loto tuʼania? (b) Koteā ʼaē kā tou maʼu anai mo kapau ʼe tou fakaʼaogaʼi ia te koga tohi ʼo Filipe 4:6, 7?
16 Neʼe tohi fēnei e Paulo: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4:6, 7) ʼE mahino ia, ko te hōloga heʼe haohaoa ʼo Atama ʼe mole feala hanatou ʼāteaina ʼosi mai te loto tuʼania. (Loma 5:12) Ko te ʼu ʼohoana Itite ʼo Esau “neʼe ko te ʼu matapuna fakaloto mamahi ki te ʼatamai” ʼo Isaake pea mo Lepeka ia te ʼu mātuʼa tauhi ʼAtua ʼa Esau. (Senesi 26:34, 35) Lagi ko te mahaki neʼe ko he tahi age meʼa fakatupu tuʼania ki te ʼu Kilisitiano ohagē ko Timoteo pea mo Tolofime. (1 Timoteo 5:23; 2 Timoteo 4:20) Neʼe nofo tuʼania ia Paulo ʼo ʼuhiga mo tona ʼu tehina mo tuagaʼane ʼi te tui. (2 Kolonito 11:28) Kae ko “Ia . . . ʼaē ʼe fagono ki te faikole” ʼe fakalogo tuʼumaʼu ia kiā nātou ʼaē ʼe ʼofa kiā te ia.—Pesalemo 65:2.
17 Kapau ʼe tou fakatalitali ki te ʼaho ʼo Sehova, ʼe tou maʼu ia te tokoni pea mo te fakaloto fīmālie mai “te ʼAtua ʼo te tokalelei.” (Filipe 4:9) Ko Sehova ʼe “manavaʼofa pea mo lotoʼofa,” ʼe “agalelei pea mo fakamolemole gafua,” pea ʼe ina “manatuʼi ko tātou ʼe tou efu.” (Ekesote 34:6; Pesalemo 86:5; 103:13, 14) Koia, tou haga fakahā ki ai tatatou ʼu tagi,’ heʼe tou maʼu ai anai ia “te tokalelei ʼo te ʼAtua,” ia te fīmālie ʼaē ʼe ‘fakalaka age ʼi te mālohi ʼo te tagata.
18. Ohagē ko tona tuʼu iā Sopo 42:5, ʼe feafeaʼi hatatou lava “sio” ki te ʼAtua?
18 Kā tali mai e te ʼAtua ʼatatou faikole, ʼe tou ʼiloʼi ai ko te ʼAtua ʼe nofo mo tātou. ʼI te ʼosi kātakiʼi e Sopo tona ʼu ʼahiʼahi, neʼe ina ʼui fēnei: “Neʼe au logo ki te talanoa ʼo ʼuhiga mo koe [Sehova], kae ʼi te temi nei ʼe sio toku mata kiā te koe.” (Sopo 42:5) ʼAki tatatou mahino, mo tatatou tui, pea mo totatou loto fakafetaʼi, ʼe tou lava fakahā ia tatatou ʼu felōgoi ʼaē mo te ʼAtua pea mo tou lava “sio” lelei kiā te ia. ʼAki te taʼi felōgoi ʼaia, ʼe tou maʼu ai ia he loto pea mo he ʼatamai tokalelei.
19. Koteā ʼaē kā hoko anai mo kapau ʼe tou ‘tuku kiā Sehova ia tatatou ʼu tuʼania fuli’?
19 Kapau ʼe tou ‘tuku kiā Sehova ia tatatou ʼu tuʼania fuli,’ ʼe feala ai leva hatatou kātakiʼi te ʼu ʼahiʼahi ʼaki he loto ʼe tokalelei, ʼe ina puipui totatou loto pea mo totatou ʼatamai. ʼI totatou loto, ʼe mole tou hoha, mole tou tuʼania, pea mo punamaʼuli. ʼE mole hoha anai totatou ʼatamai peʼe tou tuʼania lā.
20, 21. (a) Ko te meʼa ʼaē neʼe hoko kiā Setefano ʼe ko he fakamoʼoni ʼo te tokalelei fea ʼaē ʼe tou maʼu mokā fakatagaʼi ia tātou? (b) Tuku mai he faʼifaʼitaki ʼo ʼuhiga mo te tokalelei ʼaē ʼe maʼu e ʼihi mokā natou kātakiʼi he ʼu fihifihia.
20 ʼI te temi ʼaē neʼe kātakiʼi ai e te tisipulo ko Setefano te ʼahiʼahi ʼo ʼuhiga mo tana tui, neʼe ina maʼu te tokalelei. ʼI muʼa ʼo tana fai faka mafola fakaʼosi, ko nātou fuli ʼaē neʼe nonofo ʼi te Sanetualio neʼe natou “sio ki tona fofoga neʼe hagē ko he ʼāselo.” (Gāue 6:15) Neʼe tokalelei ʼona fofoga ohagē ko he ʼāselo, he faifekau ʼa te ʼAtua. ʼI te ʼosi fakahā e Setefano tanatou lagolago ʼaē ki te fakapōgi ʼo Sesu, neʼe ‘lavea te loto ʼo te ʼu tuʼi fakamāu pea mo makiki ʼonatou nifo ʼo ʼuhiga mo ia.’ Kae ko Setefano ʼaē neʼe “fonu ʼi te laumālie māʼoniʼoni,” neʼe “sio ki te lagi pea neʼe sio ki te kolōlia ʼo te ʼAtua pea mo Sesu ʼaē ʼe tuʼu ʼi te toʼomataʼu ʼo te ʼAtua.” ʼI te kua lotomālohi ʼa Setefano ʼi te meʼa ʼaia neʼe sio kiai, neʼe nofo agatonu ʼo aʼu ki te mate. (Gāue 7:52-60) Logolā ʼe mole kei tou sisio ki he ʼu meʼa fēia, kae kā fakatagaʼi tātou pea ʼe tou maʼu ia te tokalelei ʼaē ʼe foaki mai e te ʼAtua.
21 Tou vakaʼi age muʼa te ʼu manatu ʼa ʼihi Kilisitiano neʼe fakamamahiʼi ʼo aʼu ki te mate e te kau Nasi lolotoga te Lua Tau Faka Mālamanei. Neʼe ʼui fēnei e te tahi Kilisitiano ʼo ʼuhiga mo tona fakamāu: “Kua fakatūʼā au ki te mate. Neʼe au fakalogo, pea ʼosi ʼaia neʼe au ʼui fēnei, ‘Nofo agatonu ʼo aʼu ki te mate,’ pea mo au fai ʼihi age ʼu palalau ʼo totatou ʼAliki, kua ʼosi leva. Kae ʼe mole au hoha ki te faʼahi ʼaia. ʼE tokalelei pea mo fīmālie toku loto!” Ko he tūpulaga Kilisitiano neʼe tuʼusi tona kiā, neʼe ina ʼui fēnei ʼi tana tohi ki tana ʼu mātuʼa: “Kua fakalaka te māʼupō. ʼE kei feala noa pē haku toe fetogi ʼo taku manatu. Kae ʼe au toe maʼu anai koa ia te fiafia ʼi te kele nei mokā au ʼosi fakafisi ki toku ʼAliki? Kailoa ia. ʼI te temi nei, kua kotou ʼiloʼi papau ʼe au mavae ʼi te mālamanei, ʼe au fiafia pea mo tokalelei.” ʼE hā lelei mai, ko Sehova ʼe tokoni ki tana ʼu kaugana agatonu.
ʼE Feala Hakotou Faʼa Kātaki!
22, 23. Koteā ʼaē ʼe kotou lava tui papau kiai ʼi takotou faʼa kātaki ʼo fakatalitali ki te ʼaho ʼo Sehova?
22 ʼE lagi mole heʼeki kotou tau mo he ʼu fihifihia ohagē ko te ʼu fihifihia ʼaenī neʼe tou talanoa kiai. Kae ko Sopo ʼaē neʼe manavasiʼi ki te ʼAtua neʼe sio tonu ʼi tana ʼui ʼaenī: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.” (Sopo 14:1) Lagi ko koutou ko he tamai peʼe ko he faʼē ʼe kotou gāue kinakina moʼo foaki he takitaki fakalaumālie ki takotou fānau. Pea lagi ʼi te faleako ʼe natou tau mo he ʼu fihifihia, kae ʼe kotou fiafia ʼi tanatou nofo agatonu kiā Sehova pea mo tana ʼu pelesepeto faitotonu! ʼE lagi kotou tau mo he ʼu fihifihia pea mo he ʼu fakahala ʼi takotou gāue. Kae ko te ʼu ʼaluʼaga ʼaia pea mo ʼihi age ʼaluʼaga, ʼe kotou lava kātakiʼi heʼe ko ‘Sehova ʼe tokaga kiā koutou ʼi te ʼaho fuli ʼo ʼamo takotou kavega.’—Pesalemo 68:19.
23 ʼE lagi ʼi takotou manatu ʼe kotou hagē pē ko te hahaʼi fuli, kae kotou manatuʼi ko Sehova ʼe mole ina galoʼi anai ʼi he temi ia takotou gāue pea mo te ʼofa ʼaē neʼe kotou fakahā ki tona huafa māʼoniʼoni. (Hepeleo 6:10) ʼAki tana tokoni, ʼe kotou lava kātakiʼi te ʼu ʼahiʼahi ʼaē ʼe fai atu ki takotou tui. Koia ʼi takotou ʼu faikole pea mo takotou ʼu fakatuʼutuʼu, kotou haga fai ia te finegalo ʼo te ʼAtua. Pea ʼe feala ai leva hakotou falala ki te tapuakina pea mo te tokoni ʼa te ʼAtua, ʼi takotou faʼa kātaki ʼo fakatalitali ki te ʼaho ʼo Sehova.
ʼE Kotou Tali Feafeaʼi Anai?
• He koʼē ʼe ʼaoga ki te kau Kilisitiano ke natou faʼa kātaki?
• Koteā ʼaē ʼe lava tokoni mai kiā tātou ke tou kātakiʼi te mahaki pea mo te lotomamahi mokā mate he tahi neʼe tou ʼofa ai?
• ʼE tokoni feafeaʼi mai te faikole ke tou kātakiʼi te ʼu ʼahiʼahi?
• He koʼē ʼe feala ke tou faʼa kātaki ʼo fakatalitali ki te ʼaho ʼo Sehova?
[Fehuʼi]
[Paki ʼo te pasina 15]
Kapau ʼe tou falala kiā Sehova, pea ʼe tou kātakiʼi totatou lotomamahi mokā mate he tahi neʼe tou ʼofa ai