Tou Maʼuli ʼi Te Manavasiʼi Kiā Sehova
Tou Maʼuli ʼi Te Manavasiʼi Kiā Sehova
“Kotou manavasiʼi kiā Sehova, koutou kau māʼoniʼoni, heʼe mole hala mo he meʼa iā nātou ʼaē ʼe natou manavasiʼi kiā te ia.”—Pesalemo 34:9.
1, 2. (a) Koteā te ʼu manatu kehe e maʼu e te Keletiate ʼo ʼuhiga mo te manavasiʼi ki te ʼAtua? (b) Koteā te ʼu fehuʼi ʼaē kā tou vakaʼi anai?
KO TE kau minisi ʼo te Keletiate ʼaē ʼe natou akoʼi ki te hahaʼi ʼe tonu ke natou mātataku ki te ʼAtua, ʼi te agamāhani ʼe mole fakatafito te akonaki ʼaia ki te Tohi-Tapu, heʼe natou ʼui ko te ʼAtua ʼe ina fakatūʼā te kau agahala ʼi he ʼifeli heʼegata. ʼE fakafeagai te akonaki ʼaia ki te ʼu meʼa ʼaē ʼe akoʼi mai ʼi te Tohi-Tapu ʼo ʼuhiga mo Sehova ʼe ko te ʼAtua ʼofa pea mo faitotonu. (Senesi 3:19; Teutalonome 32:4; Loma 6:23; 1 Soane 4:8) Ko ʼihi minisi ʼo te Keletiate ʼe natou akoʼi nātou te tahi age akonaki. ʼE mole natou fakahā ʼi he temi ʼe tonu ke kita manavasiʼi ki te ʼAtua. Kae ʼe natou akoʼi ko te ʼAtua ʼe ina tali pea mo fakagafua te faʼahiga maʼuli ʼaē ʼe fai e te hahaʼi, kae ko te akonaki ʼaia ʼe mole akoʼi mai ʼi te Tohi-Tapu.—Kalate 5:19-21.
2 ʼI tona fakahagatonu, ʼe fakaloto mālohiʼi mai ʼi te Tohi-Tapu ke tou manavasiʼi ki te ʼAtua. (Apokalipesi 14:7) ʼE malaga ai te ʼu fehuʼi ʼi te akonaki faka Tohi-Tapu ʼaia. He koʼē koa ʼe loto e he ʼAtua ʼofa ke tou manavasiʼi age kiā te ia? Ko te faʼahiga manavasiʼi fea ʼaē ʼe fakamaʼua mai e te ʼAtua? ʼE lava fua lelei feafeaʼi kiā tātou ia te manavasiʼi ki te ʼAtua? ʼE tou vakaʼi anai te ʼu fehuʼi ʼaia mokā tou hoko atu tatatou vakaʼi ia te Pesalemo 34.
Te Tupuʼaga Ke Tou Manavasiʼi Ai Ki Te ʼAtua
3. (a) Koteā takotou manatu ʼo ʼuhiga mo te fakatotonu ʼaē ke tou manavasiʼi ki te ʼAtua? (b) He koʼē ʼe fiafia ia nātou ʼaē ʼe manavasiʼi kiā Sehova?
3 ʼE tuha mo Sehova ke tou manavasiʼi kiā te ia, heʼe ko ia te Tupuʼaga pea mo te Pule Faʼitaliha ʼo te ʼatulaulau. (1 Petelo 2:17) Kae ko te taʼi manavasiʼi ʼaia, ʼe mole faka ʼuhiga ko he mataku fakavale ki he ʼatua agakovi. ʼE ko he manavasiʼi fakaʼapaʼapa ʼuhi ko te ʼuhiga ʼo Sehova. ʼE toe pipiki foki mo te manavasiʼi ʼaē naʼa tou fakamamahiʼi te loto ʼo te ʼAtua. Ko te manavasiʼi fakaʼatua ʼe fakaʼaliʼaliki pea mo māʼoluga, kae ʼe mole fakaloto mamahi peʼe mo fakamataku. Ko Sehova, “te ʼAtua fiafia,” ʼe loto ke maʼuli fiafia ia te tagata ʼaē neʼe ina fakatupu. (1 Timoteo 1:11, MN ) Kae ke hoko te faʼahi ʼaia, ʼe tonu ke ʼalutahi totatou maʼuli mo te ʼu lēkula ʼa te ʼAtua. Ki te tokolahi, ko tona faka ʼuhiga ʼe ko he fetogi ʼo tonatou maʼuli. Ko nātou ʼaē ʼe ʼaoga ke natou fai he ʼu fetogi ʼi tonatou maʼuli, ʼe natou fakamoʼoni ki te ʼu palalau ʼaenī ʼa te tagata fai pesalemo ko Tavite: “Kotou ʼahiʼahiʼi pea mo kotou vakaʼi ko Sehova ʼe lelei; fiafia te tagata mālohi ʼaē ʼe hola kiā te ia. Kotou manavasiʼi kiā Sehova, kotou kau māʼoniʼoni, heʼe mole hala mo he meʼa ia nātou ʼaē ʼe natou manavasiʼi kiā te ia.” (Pesalemo 34:8, 9) ʼI tanatou felōgoi lelei mo te ʼAtua, ko nātou fuli ʼaē ʼe manavasiʼi kiā Sehova ʼe mole natou hala mo he meʼa maʼuhiga ʼe tologa.
4. Ko te fakapapau fea neʼe foaki e Tavite pea mo Sesu?
4 Kotou fakatokagaʼi tona hoko ʼi te temi ʼo Tavite, neʼe faka maʼuhigaʼi e Tavite tana hahaʼi ʼi tana faka higoaʼi ia nātou ko te “kau māʼoniʼoni.” Neʼe natou kau ki te puleʼaga māʼoniʼoni ʼa te ʼAtua. Neʼe natou tali foki ke tuʼutāmaki tonatou maʼuli ʼi tanatou muliʼi ia Tavite. Logolā tanatou feholaki mai te Hau ko Saulo, kae neʼe falala ia Tavite ko Sehova ʼe haga tokaga age anai ki te ʼu meʼa ʼaē ʼe ʼaoga tāfito kiā nātou. Neʼe tohi fēnei e Tavite: “Ko te ʼu laione mui neʼe natou fakaʼofaʼofa pea mo natou fia kakai; kae ko nātou ʼaē ʼe natou kumi ia Sehova, ko nātou ʼaia ʼe mole natou masiva anai ʼi he meʼa.” (Pesalemo 34:10) Neʼe foaki e Sesu te fakapapau fēia ki tana ʼu tisipulo.—Mateo 6:33.
5. (a) Neʼe feafeaʼi te maʼuli ʼo te ʼu tisipulo tokolahi ʼa Sesu? (b) Koteā te tokoni ʼaē neʼe foaki e Sesu ʼo ʼuhiga mo te manavasiʼi?
5 Tokolahi iā nātou ʼaē neʼe fakalogo kiā Sesu neʼe ko te kau Sutea fakaʼofaʼofa pea mo māsisiva. Koia ʼaē “nee fonu [ai Sesu] i te ofa kia natou, koteuhi kua natou fakaofaofa pea mo ogosia o hage he u ovi e mole honatou tauhiovi.” (Mateo 9:36) ʼE lototoʼa anai koa te taʼi hahaʼi fakaʼofaʼofa ʼaia ʼo mulimuli iā Sesu? Ke natou muli ia Sesu, neʼe tonu ke natou maʼuliʼi te manavasiʼi kiā Sehova kae mole ki te tagata. Neʼe ʼui fēnei e Sesu: “ ʼAua naʼa kotou manavasiʼi kiā nātou ʼaē ʼe natou matehi te sino, pea ʼosi ia pea ʼe mole feala ke natou toe fai atu he tahi meʼa. Kae ʼe au fakahā atu anai kiā koutou pe ko ai ʼaē ʼe tonu ke kotou manavasiʼi ki ai: Kotou manavasiʼi kiā ia ʼaē ʼi tana ʼosi matehi, ʼe feala ke ina lī ki te Seʼeni. ʼIo, ʼe au tala atu kiā koutou, ke kotou manavasiʼi kiā Ia ʼaia. ʼE mole koa lā fakatau he ʼu pasele e nima ki he ʼu foʼi piesi paʼaga e lua ʼe mole faʼa maʼuhiga? Kae ʼe mole he tahi iā nātou ʼaia ʼe galo iā muʼa ʼo te ʼAtua. Kae māʼia mo te ʼu fuluʼi ʼulu ʼo tokotou ʼulu kua ʼosi kātoa ʼi te lau. ʼAua naʼa kotou manavasiʼi; ʼe kotou maʼuhiga lahi ake koutou ʼi he faga pasele tokolahi.”—Luka 12:4-7, MN.
6. (a) Ko te ʼu palalau fea ʼa Sesu neʼe lotomālohi ai te kau Kilisitiano? (b) He koʼē neʼe tuku e Sesu ia he faʼifaʼitaki lelei ʼo ʼuhiga mo te fakahā ʼo te manavasiʼi ki te ʼAtua?
6 Kā gaohi koviʼi e te ʼu fili ia te hahaʼi ʼaē ʼe manavasiʼi kiā Sehova ke tuku tanatou tauhi ki te ʼAtua, ʼe tonu ke natou manatuʼi te tokoni ʼaenī ʼa Sesu: “Ko ʼaē ʼe ina fakahā tana fakatahi mo au iā muʼa ʼo te tagata, ʼe toe fakahā anai e te Foha ʼo te tagata tana fakatahi mo ia iā muʼa ʼo te kau ʼāselo ʼa te ʼAtua. Kae ko ʼaē ʼe fakafisi kiā te au iā muʼa ʼo te tagata, ʼe au fakafisi anai kiā te ia iā muʼa ʼo te kau ʼāselo ʼa te ʼAtua.” (Luka 12:8, 9, MN ) Neʼe lotomālohi te kau Kilisitiano ʼaki te ʼu palalau ʼaia, tāfito ia nātou ʼo te ʼu fenua ʼaē ʼe tapuʼi ai te tauhi moʼoni. Ko nātou ʼo te ʼu fenua ʼaia ʼe natou haga fakavikiviki aipē ia Sehova, ʼo fai fakafufū tanatou ʼu fono pea mo tanatou fai faka mafola. (Gaue 5:29) Neʼe tuku e Sesu ia te faʼifaʼitaki lelei ʼi te fakahā ʼo te “manavasiʼi ki te ʼAtua.” (Hepeleo 5:7, MN ) ʼO ʼuhiga mo ia, neʼe fakakikite fēnei ʼi te Folafola faka polofetā: “ ʼE nofo anai te laumālie ʼo Sehova iā te ia, te laumālie ʼo te . . . manavasiʼi kiā Sehova; pea ʼe fiafia anai ʼi te manavasiʼi kiā Sehova.” (Isaia 11:2, 3) Koia, neʼe tuha mo Sesu ke ina akoʼi mai kiā tātou ia te ʼu lelei ʼo te manavasiʼi ki te ʼAtua.
7. (a) ʼE tali feafeaʼi e te kau Kilisitiano ia te fakaafe ʼe tatau mo ʼaē ʼa Tavite? (b) ʼE lava muliʼi feafeaʼi e te ʼu mātuʼa ia te faʼifaʼitaki lelei ʼa Tavite?
7 Ko nātou fuli ʼaē ʼe natou muliʼi te faʼifaʼitaki ʼa Sesu pea mo fakalogo ki tana faiakonaki, ʼe natou tali ki te fakaafe ʼe hagē ko te fakaafe ʼaē neʼe fai e Tavite: “Kotou ʼomai, ʼu foha, kotou fagono mai kiā te au; ʼe au akoʼi atu anai kiā koutou te manavasiʼi kiā Sehova.” (Pesalemo 34:11) Neʼe faigafua kiā Tavite hana ʼui ʼo ʼuhiga mo tana ʼu hahaʼi ʼe ko tona “ ʼu foha” koteʼuhi neʼe natou leleiʼia tana takitaki. Pea ko Tavite neʼe ina foaki te tokoni fakalaumālie kiā nātou ʼaē neʼe manavasiʼi ki te ʼAtua ke feala hanatou logo tahi pea mo maʼu te ʼofa ʼo te ʼAtua. ʼE ko he faʼifaʼitaki lelei ki te ʼu mātuʼa Kilisitiano! Neʼe tuku e Sehova kiā nātou te tuʼulaga pule ʼo ʼuhiga mo tonatou ʼu foha pea mo ʼofafine ke natou “haga akoʼi age kiā nātou te akonaki pea mo te ʼu fakatokaga ʼa Sehova.” (Efeso 6:4, MN ) ʼI tanatou palalau ʼi te ʼaho fuli mo tanatou ʼu fānau ki te ʼu manatu fakalaumālie pea mo fai tanatou ʼu ako Tohi-Tapu, ʼe tokoni ai te ʼu mātuʼa ki tanatou ʼu fānau ke natou fiafia ʼi tanatou manavasiʼi ʼaē kiā Sehova.—Teutalonome 6:6, 7.
Te Faʼahiga Maʼuliʼi ʼo Te Manavasiʼi Ki Te ʼAtua
8, 9. (a) He koʼē ʼe lelei mokā tou fakahā ʼi tota maʼuli ʼe tou manavasiʼi ki te ʼAtua? (b) Koteā ʼaē ʼe pipiki ki te puipui ʼo totatou ʼalelo?
8 Ohagē ko te ʼu manatu kua tou vakaʼi, ko te manavasiʼi kiā Sehova ʼe mole ina pulihi totatou loto fiafia. Neʼe fehuʼi fēnei e Tavite: “Ko ai te tagata ʼaē ʼe fakafiafia ki te maʼuli, ʼe loto ke lahi tona ʼu ʼaho ke sio ki te meʼa ʼaē ʼe lelei?” (Pesalemo 34:12) ʼE mahino ia, ko te manavasiʼi kiā Sehova ʼe ko te faʼahi maʼuhiga moʼo maʼu he maʼuli fualoa pea mo sio ki te meʼa ʼaē ʼe lelei. ʼE faigafua te ʼui ʼaē: “ ʼE au manavasiʼi ki te ʼAtua.” Kae mole faigafua hona fakahā ʼi tata aga. Koia, neʼe fakahā ai e Tavite peʼe feafeaʼi hatatou lava fakahā ia te manavasiʼi ki te ʼAtua ʼi totatou maʼuli.
9 “Puipui tou ʼalelo mai te meʼa ʼaē ʼe kovi, pea mo tou ʼu laugutu mai te lea kākā.” (Pesalemo 34:13) Neʼe takitaki e te laumālie māʼoniʼoni ia te ʼapositolo ko Petelo ke talanoa ki te ʼu palalau ʼaia ʼo te Pesalemo 34 ʼi tana ʼosi tokoniʼi te kau Kilisitiano ke natou fetokagaʼaki ʼi te ʼofa faka tautēhina. (1 Petelo 3:8-12) Ko te puipui ʼo totatou ʼalelo mai te meʼa ʼaē ʼe kovi, ko tona faka ʼuhiga ke ʼaua naʼa tou faka mafola he ʼu fatufatu. Kae ʼe tou faiga tuʼumaʼu anai ke tou fakaloto mālohi niʼihi mokā tou palalau mo nātou. Tahi ʼaē, ʼe tou faiga anai ke tou lototoʼa pea mo palalau ki te moʼoni.—Efeso 4:25, 29, 31; Sakopo 5:16.
10. (a) Fakamahino te faka ʼuhiga ʼo te ʼui ʼaē ke tou maliu mai te meʼa ʼaē ʼe kovi. (b) Koteā ʼaē ʼe pipiki ki te fai ʼo te meʼa ʼaē ʼe lelei?
10 “Ke ke maliu mai te meʼa ʼaē ʼe kovi, pea mo ke fai te meʼa ʼaē ʼe lelei; ke ke kumi te tokalelei, pea mo ke muliʼi.” (Pesalemo 34:14) ʼE tou tekeʼi te ʼu meʼa ʼaē ʼe tauteaʼi e te ʼAtua, ohagē ko te ʼu felāveʼi fakasino heʼeʼaoga, mo te kaihaʼa, mo te ʼu meʼa fakatemonio, mo te agamālohi, mo te konahia, pea mo te fakaʼaogaʼi ʼo te toloke. ʼE tou toe tekeʼi foki te ʼu fakafiafia ʼaē ʼe fai ai te ʼu aga fakalialia ʼaia. (Efeso 5:10-12) Kae ʼe tou fakaʼaogaʼi totatou temi ki te fai ʼo te meʼa ʼaē ʼe lelei. Ko te meʼa lelei ʼaupitō ʼe tou lava fai, ko tata kau tuʼumaʼu ki te faka mafola ʼo te Puleʼaga pea mo te fai ʼo ni ʼu tisipulo, pea mo tokoni ki te hahaʼi ke natou maʼu ia te haofaki. (Mateo 24:14; 28:19, 20) ʼE toe pipiki kiai, te teuteuʼi ʼo te ʼu fono pea mo kau kiai, mo te foaki fakaʼofa ʼo he paʼaga moʼo lagolago ki te gāue faka mālamanei, mo te tokoni ki te ʼu gāue ʼo tatatou ʼu Fale ʼo Te Puleʼaga, pea mo tou tōkakaga ki te ʼu meʼa ʼaē ʼe ʼaoga ki te kau Kilisitiano fakaʼofaʼofa.
11. (a) Neʼe maʼuliʼi feafeaʼi e Tavite te ʼu meʼa ʼaē neʼe ina ʼui ʼo ʼuhiga mo te tokalelei? (b) Koteā ʼaē ʼe kotou lava fai moʼo ‘muliʼi te tokalelei’ ʼi te kōkelekāsio?
11 Neʼe tuku e Tavite ia te faʼifaʼitaki lelei ʼi tana muliʼi ia te tokalelei. Tuʼa lua neʼe ina maʼu te ʼu faigamālie ke ina matehi ai Saulo. Kae ʼi te ʼu faigamālie ʼaia, neʼe mole ina fai he agamālohi, pea ki muli age neʼe palalau fakaʼapaʼapa ki te hau, ʼaki tana ʼamanaki ʼaē ʼe hoko ai anai he fakatokatoka. (1 Samuele 24:8-11; 26:17-20) Koteā ʼaē ʼe lava fai iā ʼaho nei mokā hoko he fihifihia ʼe lava puli ai te tokalelei ʼo te kōkelekāsio? ʼE tonu ke tou “kumi te tokalelei, pea mo [tou] muliʼi.” Koia, kapau ʼe tou fakatokagaʼi ʼe mole tou felōgoi lelei mo hota tehina, tou fakalogo ki te tokoni ʼaenī ʼa Sesu: “Alu mua o fakatokatoka mo tou tehina.” ʼOsi ʼaia pea tou hoko atu ʼihi faʼahi ʼo te tauhi moʼoni.—Mateo 5:23, 24; Efeso 4:26.
ʼE Tou Maʼu Te ʼu Fakapale Lahi ʼi Tatatou Manavasiʼi Ki Te ʼAtua
12, 13. (a) Koteā te ʼu tapuakina ʼe maʼu ʼi te temi nei e te hahaʼi ʼaē ʼe manavasiʼi ki te ʼAtua? (b) Koteā te fakapale lahi kā vave maʼu anai e te ʼu kaugana agatonu ʼa Sehova?
12 “Ko te ʼu mata ʼo Sehova ʼe tuku ki te kau agatonu, pea ko ʼona taliga ʼe logo ki tanatou pāui ke haofaki ia nātou.” (Pesalemo 34:15) ʼE hā ʼi te fakamatala ʼo te ʼu felōgoi ʼa te ʼAtua mo Tavite, ʼe moʼoni te ʼu palalau ʼaia. Iā ʼaho nei, ʼe tou fiafia ʼaupitō pea mo maʼuli tokalelei heʼe tou ʼiloʼi ko Sehova ʼe tokaga mai kiā tātou. ʼE tou falala ʼe ina foaki tuʼumaʼu mai anai te ʼu meʼa ʼaē ʼe ʼaoga kiā tātou, tatau aipē mo kapau ʼe tou tau mo he mamahi lahi. ʼE tou ʼiloʼi kua vave pē, ohagē ko tona fakakikite, ko te kau ʼatolasio moʼoni fuli ʼe natou tau anai mo te ʼohofi ʼa Koke ʼo Makoke pea mo te “ ʼaho . . . fakamanavahē ʼo Sehova.” (Soele 2:11, 31; Esekiele 38:14-18, 21-23) Logolā te ʼaluʼaga ʼe tau mo tātou, kae ʼe hoko moʼoni anai te ʼu palalau ʼaenī ʼa Tavite ʼo ʼuhiga mo tātou: “Neʼe natou kalaga pea ko Sehova totonu neʼe fagono ia, pea neʼe ina haofaki ia nātou mai tonatou ʼu mamahi fuli.”—Pesalemo 34:17.
13 ʼI meʼa fakafiafia ʼi te temi ʼaia hatatou sio anai ko Sehova ʼe ina faka kolōliaʼi tona huafa lahi! ʼE fonu age anai totatou loto ʼi he manavasiʼi lahi, pea ʼe fakaufiufi anai ia te fakaʼauha ʼo te kau fili fuli. “Ko te fofoga ʼo Sehova ʼe fakafeagai kiā nātou ʼaē ʼe agakovi, ke ina taʼaki ʼi te kele te manatu ʼo ʼuhiga mo nātou.” (Pesalemo 34:16) ʼI fakapale taulekaleka anai kā tou maʼu ʼi te ʼāteaina lahi ʼaia ʼi te mālama foʼou pea mo faitotonu ʼa te ʼAtua!
Te ʼu Fakapapau ʼa Sehova ʼe Tokoni Mai Ke Tou Faʼa Kātaki
14. Koteā ʼaē kā tokoni mai anai ke tou faʼa kātaki logolā te ʼu malaʼia?
14 Lolotoga te temi ʼaia, ʼe tonu ke kita faʼa kātaki mokā ʼe fia hoko atu tatatou fia fakalogo kiā Sehova ʼi he mālama fakahehema pea mo agakovi. Ko te manavasiʼi ki te ʼAtua ʼe ko he tokoni lahi ʼi tatatou tuputupu ʼi te fakalogo. ʼUhi heʼe tou māʼuʼuli nei ʼi te ʼu temi maʼuhiga ʼaupitō, ko ʼihi kaugana ʼa Sehova ʼe mole natou fiafia ʼuhi ʼe natou tau mo te ʼu fihifihia lahi ʼo mamahi ai ʼonatou loto pea mo ʼonatou ʼatamai. Kae ʼe feala ke natou tui papau mo kapau ʼe natou haga kiā Sehova, ʼe tokoni age anai kiā nātou ke natou faʼa kātaki. ʼE fakaloto fīmālie moʼoni te ʼu palalau ʼaenī ʼa Tavite: “Ko Sehova ʼe ovi kiā nātou ʼaē ʼe lavea tonatou loto pea ʼe ina haofaki ia nātou ʼaē ʼe mafasia tonatou ʼatamai.” (Pesalemo 34:18) Ko he fakaloto mālohi kiā tātou, neʼe toe ʼui fēnei e Tavite: “ ʼE lahi te ʼu malaʼia ʼo te tagata agatonu, kae ʼe haofaki e Sehova ia ia mai te ʼu malaʼia fuli ʼaia.” (Pesalemo 34:19) Ko Sehova ʼe ina maʼu te mālohi feʼauga moʼo faka ʼāteaina tātou logolā te ʼu tuʼuga malaʼia ʼaē ʼe lava tau mo tātou.
15, 16. (a) Koteā te malaʼia ʼaē neʼe logo kiai ia Tavite ʼi te ʼosi pē ʼo tana tohi te Pesalemo 34? (b) Koteā ʼaē kā tokoni mai anai ke tou kātakiʼi te ʼu ʼahiʼahi?
15 ʼI te ʼosi pē ʼo tana tohi te Pesalemo 34, neʼe logo ia Tavite ki te malaʼia ʼaē neʼe tō ki te hahaʼi ʼo Nope, ʼi te temi ʼaē neʼe ʼohofiʼi ai nātou e Saulo pea mo te tokolahi ʼo te kau pelepitelō. ʼI toe lotomamahi lagi neʼe ina maʼu ʼi tana manatuʼi neʼe hoko te faʼahi ʼaia ʼuhi ko tana ʼalu ki Nope ʼo tupu ai te ʼita lahi ʼa Saulo! (1 Samuele 22:13, 18-21) Neʼe mole toe lotolotolua ia Tavite ʼi te kumi tokoni kiā Sehova, pea ʼe mahino papau neʼe loto fīmālie ʼi tana mahino ʼi te kā haʼu ʼe fakatuʼuake anai “te kau faitotonu.”—Gaue 24:15, MN.
16 Iā ʼaho nei, ko te ʼamanaki ʼo te fakatuʼuake ʼe ina fakaloto mālohiʼi foki mo tātou. ʼE tou ʼiloʼi ʼe mole he meʼa ʼe fai e totatou ʼu fili ʼe ina lava fakamamahiʼi tātou ʼo talu ai. (Mateo 10:28) Neʼe fakahā e Tavite te falala ʼaia ʼaki te ʼu palalau ʼaenī: “ ʼE ina taupau te ʼu hui fuli ʼo [te tagata agatonu]; ʼe mole fasi anai he hui.” (Pesalemo 34:20) Neʼe hoko moʼoni te ʼu palalau ʼo te vaega ʼaia iā Sesu. Logolā ko Sesu neʼe gaohi koviʼi ʼi te mate, kae neʼe mole hona hui neʼe “fasiʼi.” (Soane 19:36, MN ) ʼE toe fakapapau mai ʼi te Pesalemo 34:20, pe koteā pē te fihifihia ʼe tau mo te kau Kilisitiano fakanofo pea mo te “tahi ʼu ovi,” kae ʼe mole natou mamahi anai ʼo talu ai. ʼE mole fasiʼi anai honatou hui.—Soane 10:16, MN.
17. Ko te malaʼia fea ʼaē kā ʼamanaki hoko kiā nātou ʼaē ʼe fehihiʼa ki te hahaʼi ʼa Sehova kae mole natou fakahemala mai tanatou aga ʼaē ʼe kovi?
17 Kae ʼe mole tatau mo te meʼa ʼaē kā hoko ki te kau agakovi. Kua vave pē anai tanatou utu ia te ʼu agakovi ʼaē neʼe natou tō. “Ko te malaʼia ʼe ina matehi anai te agakovi; pea ko nātou ʼaē ʼe natou fehiʼa ki te tagata faitotonu ʼe natou lakahala anai.” (Pesalemo 34:21) Ko nātou ʼaē ʼe natou haga fakafeagai ki te hahaʼi ʼa te ʼAtua ʼe lahi anai tonatou ʼu malaʼia. ʼI te hā ʼo Sesu Kilisito, ʼe natou “tali anai te fakatūʼā ʼaē neʼe fai ʼi te fakamāu, te fakaʼauha heʼegata.”—2 Tesalonika 1:9, MN.
18. ʼE tonu ke faka ʼuhiga feafeaʼi te kua totogi ʼaē ʼo te “toe hahaʼi tokolahi,” pea koteā anai kā natou maʼu ʼi te kā haʼu?
18 ʼE fakaʼosi te Pesalemo ʼa Tavite ʼaki te ʼu palalau fakaloto mālohi ʼaenī: “ ʼE totogi e Sehova te nefesi ʼo tana ʼu kaugana; pea ʼe mole he tahi iā nātou ʼe hola kiā te ia ʼe faka lakahala anai.” (Pesalemo 34:22) ʼI te vave fakaʼosi ʼo tona ʼu taʼu hau e 40, neʼe ʼui fēnei e te Hau ko Tavite: “[Ko te ʼAtua] neʼe ina totogi toku nefesi mai te ʼu mamahi fuli.” (1 Hau 1:29) Ohagē ko Tavite, ko te hahaʼi ʼaē ʼe manavasiʼi kiā Sehova kua vave pē anai tanatou toe lava sisio ki muli pea mo fakafiafia ʼi tonatou totogi mai te hala fuapē, ʼaē neʼe natou maʼu mai te agahala pea mo natou ʼāteaina mai tonatou ʼu ʼahiʼahi fuli pē. ʼE teitei pē ki te kau Kilisitiano fakanofo fuli kua nātou maʼu tonatou fakapale ʼaē ʼi selō. Ko “te toe hahaʼi tokolahi” mai te ʼu puleʼaga kehekehe kua fakatahi ʼi te temi nei mo te toe ʼaia ʼo te kau fakanofo ʼo te ʼu tehina ʼo Sesu ʼi te tauhi ki te ʼAtua, pea ʼe natou maʼa ʼi tanatou tutuʼu iā muʼa ʼo Sehova. Neʼe lava te faʼahi ʼaia, ʼuhi he neʼe natou tui ki te mālohi ʼo te totogi ʼo te taʼataʼa ʼo Sesu. Lolotoga te ʼAfio ʼo Te ʼu Taʼu e Afe ʼo Kilisito, ʼe ʼaoga anai kiā nātou te ʼu lelei fuli ʼo te sākilifisio faitotogi, ʼo feala ai hanatou aʼu ki te maʼuli haohaoa.—Apokalipesi 7:9, 14, 17, MN; 21:3-5.
19. Koteā ʼaē kua fakatotonu kiai te “toe hahaʼi tokolahi” ke natou fai?
19 He koʼē ʼe maʼu anai te ʼu tapuakina fuli ʼaia e te “toe hahaʼi tokolahi” ʼo te ʼu kaugana ʼa te ʼAtua? Koteʼuhi kua natou fakatotonu ke natou haga manavasiʼi kiā Sehova, ʼo tauhi kiā te ia ʼaki he manavasiʼi lahi pea mo he fakalogo fakapoipoi. ʼIo, ko te manavasiʼi kiā Sehova ʼi te temi nei, ʼe ina fakafiafia te maʼuli pea mo tokoni mai kiā tātou ke tou “mau te mauli mooni”—te maʼuli heʼegata ʼi te mālama foʼou ʼa te ʼAtua.—1 Timoteo 6:12, 18, 19; Apokalipesi 15:3, 4.
ʼE Kei Kotou Manatuʼi Koa?
• He koʼē koa ʼe tonu ke tou manavasiʼi ki te ʼAtua, koteā te faka ʼuhiga ʼo te manavasiʼi kiā te ia?
• ʼE malave feafeaʼi ki tatatou aga ia te manavasiʼi ki te ʼAtua?
• Koteā te ʼu fakapale ʼe maʼu ʼi tatatou manavasiʼi ki te ʼAtua?
• Ko te ʼu fakapapau fea ʼe tokoni mai ke tou faʼa kātaki?
[Fehuʼi]
[Paki ʼo te pasina 24]
Ko te hahaʼi ʼaē ʼe manavasiʼi kiā Sehova, ʼe natou aga fakaʼeteʼete ʼi te temi ʼaē ʼe tapuʼi tanatou tauhi