Te ʼu Fehuʼi ʼa Te Kau Lautohi

ʼE mole talanoa ʼi te Tohi-Tapu ʼo ʼuhiga mo te hiki ʼo te ʼu ʼipu, kae he koʼē koa ʼe tonu ki te kau Fakamoʼoni ʼa Sehova ke mole natou fai ia te aga ʼaia?

Ko te hiki ʼo he ʼipu vino (peʼe ko he tahi age kava) ʼe ko he aga ʼe fai talu mai fualoa pea kua mafola, logolā te kehekehe ʼo tona ʼu faʼahiga faka ʼuhiga ʼi te ʼu fenua. ʼI ʼihi temi, ko te hahaʼi ʼaē ʼe natou hiki tonatou ʼu ʼipu, ʼe natou fakaʼī tonatou ʼu ʼipu. ʼI te agamāhani, ko he tahi ʼe ina fakaʼī tona ʼipu ki he ʼipu ʼo he tahi, ʼe ina kole peʼe loto ke maʼuli fiafia he tahi, ke maʼuli mālōlō, ke maʼuli fualoa, peʼe ko he tahi age meʼa lelei. Ko nātou ʼaē ʼe kau ki te aga ʼaia, ʼe lagi natou palalau leʼo lahi moʼo lagolago ki te faʼahi ʼaia, peʼe natou hiki tonatou ʼu ʼipu pea mo ʼinu te vino. Ki te tokolahi, ʼe lagi ko he agaʼi fenua ʼe mole kovi peʼe ko he aga fakaʼapaʼapa, kae ʼe ʼi ai te ʼu tupuʼaga ʼo te mole kau ʼa te kau Fakamoʼoni ʼa Sehova ki te ʼu hiki ʼipu ʼaia.

ʼE mole faka ʼuhiga anai ʼe mole loto e te kau Kilisitiano ke maʼuli fiafia pea mo hao he tahi mai te mahaki. ʼI tana tohi ki te ʼu kōkelekāsio, ko te kolesi pule ʼo te ʼuluaki sēkulō neʼe ina fakaʼosi ʼaki te palalau ʼaenī “ke kotou maʼuli haohaoa.” (Gaue 15:29, MN ) Pea ko ʼihi ʼi te kau ʼatolasio moʼoni neʼe natou ʼui fēnei ki te ʼu hau: “Ke maʼuli te ʼaliki ki he ʼu temi ʼe mole ʼiloʼi hona gataʼaga” peʼe “ke maʼuli te hau ki he ʼu temi ʼe mole ʼiloʼi hona gataʼaga.”—1 Hau 1:31; Nehemia 2:3.

ʼE haʼu maifea te agaʼi fenua ʼo te hiki ʼo te ʼu ʼipu? ʼI Te Tule Leʼo (Fakafalani) ʼo te ʼaho 1 ʼo Novepeli 1968, neʼe ʼui fēnei e te tohi The Encyclopædia Britannica (1910), Tohi 13 pāsina 121: “ ʼE lagi ko te agaʼi fenua ʼaē ke ʼinu ‘ ʼo hiki te ʼipu’ maʼa te hahaʼi maʼuli, ʼe haʼu mai te ʼu toʼotoʼoga faka lotu faka pagani, ʼaē neʼe ʼiʼinu ai te hahaʼi maʼa te ʼu ʼatua pea mo te kau mate. ʼI te taumafa, ko te kau Keleka pea mo te kau Loma neʼe natou liligi te ʼu huʼa vai maʼa tanatou ʼu ʼatua, pea ʼi te ʼu fakafiafia neʼe natou hiki tonatou ʼu ʼipu mo ʼinu maʼa te ʼu ʼatua pea mo te kau mate.” ʼE toe ʼui pē ʼi te tohi ʼaia: “Ko te agaʼi fenua ʼo te hiki ʼo te ʼu ʼipu maʼa te hahaʼi maʼuli neʼe pipiki ki te ʼu toʼotoʼoga faka sākilifisio ʼaia ʼaē neʼe natou ʼiʼinu ai.”

ʼE kei fai koa te agaʼi fenua ʼaia? ʼE ʼui fēnei ʼi te International Handbook on Alcohol and Culture 1995: “[Ko te hiki ʼo te ʼu ʼipu] ʼe lagi ko he aga mai te liligi sākilifisio ʼo he ʼu huʼa vai ʼi te temi muʼa, neʼe ko he huʼa vai taputapu neʼe momoli ki he ʼu ʼatua: ko te huʼa toto peʼe ko he huʼa vino neʼe liligi moʼo kole ʼaki he meʼa ʼe kita loto kiai, mo he faikole neʼe fakanounou ʼaki te ʼu kupuʼi palalau ‘maʼuli fualoa!’ peʼe ‘manūʼia!’ ”

Kae ʼe mole faka ʼuhiga leva ʼe tapuʼi ki he tahi ʼe tauhi ki te ʼAtua moʼoni hana fakaʼaogaʼi he ʼu meʼa, peʼe ko he aga ʼe haʼu mai te lotu hala ʼi te temi fuli. Ohagē lā ko te ʼu kelenatini. ʼE ʼui fēnei ʼi te encyclopédie faka Tohi-Tapu: “Neʼe toe faka ʼuhigaʼi foki ʼi te ʼu lotu pagani te kelenatini ko he meʼa taputapu.” Kae neʼe ʼui e te ʼAtua ke tui ʼi te tapaʼi kofu ʼo te pelepitelō lahi he ʼu kelenatini, pea neʼe teuteuʼi te ʼu pou kapa ʼo te fale lotu ʼo Salomone ʼaki te ʼu kelenatini. (Ekesote 28:33; 2 Hau 25:17) Tahi ʼaē, ʼi te tahi temi ko te mama ʼohoana neʼe ʼi ai tona ʼu faka ʼuhiga faka lotu. Kae tokolahi te hahaʼi iā ʼaho nei ʼe mole natou ʼiloʼi te faʼahi ʼaia, ʼo natou ʼui pē ko te mama ʼohoana ʼe ko he fakamoʼoni kua ʼohoana he tahi.

ʼE feafeaʼi ki te fakaʼaogaʼi ʼo te vino ʼi he ʼu toʼotoʼoga faka lotu? Ohagē lā, ʼi te tahi ʼaho ko te kau ʼatolasio ʼo Paale ʼo Sikemi neʼe natou “ ʼulu ki te ʼapi ʼo tonatou ʼatua pea natou kakai mo ʼiʼinu pea mo pāui te kovi kiā Apimeleke” te foha ʼo Seteone. (Kau Tuʼi Fakamāu 9:22-28) ʼI takotou manatu ko he kaugana agatonu ʼa Sehova, ʼe kau anai koa ki te ʼinu ʼaia, lagi ʼo fetapa ki he mālohi fakapulipuli moʼo fakafeagai kiā Apimeleke? ʼI tana fakamatala te temi ʼaē neʼe fakafeagai ai te tokolahi ʼi Iselaele kiā Sehova,  neʼe ʼui fēnei e Amosi: “ ʼE natou fāliki ʼo momoe kiai ʼi te ʼu ʼaletale fuli; pea ko te vino ʼa te hahaʼi ʼaē neʼe fakatūʼā, ʼe nātou ʼinu ʼi te fale ʼo tonatou ʼu ʼatua.” (Amosi 2:8) ʼE kau anai koa he kaugana moʼoni ki te ʼu aga ʼaia, peʼe ko te huaʼi ʼo te vino ʼi muʼa ʼo te ʼu ʼatua peʼe ko te ʼiʼinu ʼo fakahaga ki te ʼu ʼatua ʼaia? (Selemia 7:18) Ko he kaugana moʼoni ʼe ina hiki anai koa tona ʼipu vino pea mo kole tokoni ki he ʼatua peʼe ko he tapuakina ʼo ʼuhiga mo te kā haʼu ʼo he tahi?

ʼI ʼihi temi, ko te kau ʼatolasio ʼa Sehova neʼe natou hiki ʼonatou nima pea mo kole ke hoko he ikuʼaga lelei. Neʼe natou hiki ʼonatou nima ki te ʼAtua moʼoni. ʼE tou lau fēnei: “Neʼe tuʼu Salomone ʼi muʼa ʼo te ʼaletale ʼo Sehova, . . . pea neʼe ina folahi tona ʼu ʼalofi nima ki te lagi; pea mo ʼui māʼana: ‘Ê Sehova te ʼAtua ʼo Iselaele, ʼe mole ʼi ai he tahi age ʼAtua ohagē ko koe . . . pea ke ke fagono mai tou nofoʼaga, te lagi, pea ʼe tonu ke ke fagono pea mo fakamolemole.’ ” (1 Hau 8:22, 23, 30) ʼO toe fēia, “neʼe fakafetaʼi ia Esitalasi kiā Sehova . . . pea neʼe tali fēnei te hahaʼi kātoa: ‘Ameni! Ameni!’ ʼo natou hiki tonatou ʼu nima. Pea natou punou mo tulolo ʼi muʼa ʼo Sehova.” (Nehemia 8:6; 1 Timoteo 2:8) ʼE mahino ia, neʼe mole hiki e te kau agatonu ʼaia ʼonatou nima ki te lagi ke natou maʼu he tapuakina mai he ʼatua ʼo te faigamālie.—Isaia 65:11.

Tokolahi iā ʼaho nei ʼe natou hiki tonatou ʼu ʼipu, lagi mole natou ʼiloʼi ʼi tanatou fai te aga ʼaia ʼe natou lolotoga kole he meʼa peʼe ko he tapuakina ki he ʼatua, pea ʼe mole natou lava fakamahino pe koʼē ʼe natou hiki tonatou ʼu ʼipu ki te lagi. Kae ʼe mole tonu leva ke ʼui e te kau Kilisitiano moʼoni ʼe tonu ke natou faʼifaʼitaki tanatou aga, ʼuhi pē heʼe mole manatu te hahaʼi ki he faʼahi fēia.

Kua mahino lelei ʼi ʼihi ʼaluʼaga ʼo te maʼuli, ʼe mole mulimuli te kau Fakamoʼoni ʼa Sehova ki he ʼu aga ʼe fai māhani e te hahaʼi. Ohagē lā, tokolahi te hahaʼi ʼe natou fai te ʼu aga fakaʼapaʼapa ʼi muʼa ʼo te fuka; kae maʼa natou ʼe mole natou faka ʼuhiga ko he ʼu toʼotoʼoga ki te tauhi. Ko te kau Kilisitiano moʼoni ʼe mole natou fakafihiʼi te ʼu taʼi toʼotoʼoga ʼaia, kae ʼe mole natou lagolago kiai. Kā ʼiloʼi e te kau Fakamoʼoni ʼa Sehova te ʼu temi ʼaē ʼe hoko ai te ʼu toʼotoʼoga ʼaia, pea ʼe natou aga fakaʼeteʼete naʼa lave kovi tanatou aga ki te hahaʼi. Koia, ʼe natou fakatotonu ai ke mole natou lagolago ki he ʼu aga ʼe hā ʼe natou lagolago fakavale ki he fenua, ʼaē ko he ʼu aga ʼe fakafeagai ki te Tohi-Tapu. (Ekesote 20:4, 5; 1 Soane 5:21) Iā ʼaho nei, tokolahi ʼe lagi mole natou faka ʼuhiga ko he toʼotoʼoga faka lotu ia te hiki ʼo te ʼu ʼipu. Kae ʼe ʼi ai te ʼu tupuʼaga tāfito ʼo te mole lagolago ʼa te kau Kilisitiano ki te hiki ʼo te ʼu ʼipu, ʼuhi heʼe ʼi ai tona ʼu haʼuʼaga faka lotu pea māʼia lā mo te temi nei ʼe lava faka ʼuhiga ko he kole tapuakina ki te ‘lagi,’ ʼe hagē ʼe tou kumi tokoni ki he mālohi fakapulipuli.—Ekesote 23:2.