Ko Te Tokoni Ki Te Hahaʼi Siaina ʼi Mekesike

“KO TE ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea, ʼo nātou ʼui fēnei: ‘ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.’ ” (Sakalia 8:23) Ko te lea faka polofeta taulekaleka ʼaia ʼe hoko nei ʼi te malamanei kātoa. Ko te hahaʼi “mai te ʼu lea kehekehe ʼo te ʼu puleʼaga” ʼe nātou lagolago ki te kau Iselaele fakalaumālie moʼo fai tanatou tauhi ʼaē kiā Sehova ʼAtua. ʼE tōkakaga ʼaupito ia te kau Fakamoʼoni ʼa Sehova ki te fakahoko ʼo te lea faka polofeta ʼaia. Koia, tokolahi iā nātou ʼe nātou ako te tahi lea ke feala hanatou faka mafola ʼi te malamanei kātoa.

Pea ʼi Mekesike, ko te kau Fakamoʼoni ʼa Sehova ʼe nātou fai ia te faʼahi ʼaia. ʼE fakafuafua ʼi Mekesike ko te toko 30 000 hahaʼi ʼe nātou lea Faka Siaina. ʼI te taʼu 2003, ko te ʼAho Fakamanatu ʼo te mate ʼo Kilisito ʼaē neʼe fai ʼi te kolo ko Mexico neʼe kau ai te toko 15 kau Siaina. Koia maʼa te kau Fakamoʼoni ʼo te kolo taulaga, ʼe nātou mahino ko te telituale ʼaē ʼe nonofo ai te kau Siaina, ʼe nātou maʼu ai anai ni hahaʼi ʼe fia logo ki te ʼu meʼa fakalaumālie. Ke feala he gāueʼi fakalelei ʼo te telituale ʼaē ʼe nonofo ai te hahaʼi Siaina, neʼe fai te fakatuʼutuʼu ʼo ʼuhiga mo te kau Fakamoʼoni ʼaē ʼi Mekesike, ke nātou akoako lolotoga māhina e tolu, te ʼu kiʼi faʼahiga faifai palalau ʼi te lea faka Mandarin. Pea ko te kau Fakamoʼoni e toko 25 neʼe nātou kau ki te ako ʼaia. ʼE ʼiloga te faka maʼuhigaʼi e te hahaʼi Siaina ia te ako ʼaia, heʼe ʼi te ʼosi ʼo te ako, pea ʼi te fono ʼaē neʼe tufa ai te ʼu pepa ki te kau ako, neʼe nofo ai te tagata fakafofoga ʼo te hahaʼi ʼaē ʼe lea faka Mandarin ʼi te kolo ʼo Mexico. Ko te faleako lea Faka Siaina ʼi te kolo ʼaia, neʼe ina fakaafe te toko tolu ʼo te ʼu tamaliki ako ke nātou ʼoloki te tahi fenua moʼo fakaloloto tanatou ako ia te lea Faka Siaina.

ʼI te ako ʼaia, neʼe tonu ke nātou gāueʼi atu aipe tanatou ako ia te lea. ʼI tanatou ʼosi ako ia te ʼu kupu tāfito ʼo te lea, neʼe foimo faka mafola atu aipe te kau ako ʼi te lea Faka Siaina ʼi te ʼu matani gāue ʼo te tisitilike ʼo Mexico. Ko te ʼu ako Tohi-Tapu e 21 neʼe kamata fai e te kau ako faʼafai. Neʼe fai te ʼu ako ʼaki te kaupepa lahi Koteā ʼAē ʼe Fakamaʼua Mai e Te ʼAtua? ʼi te lea Faka Siaina ʼaki tona fakaliliu ʼi te ʼu mataʼi tohi Loma, ʼe ko te Pinyin.

Neʼe feafeaʼi ki te kau Fakamoʼoni hanatou fai he ʼu ako Tohi-Tapu kae neʼe kei nātou foʼofoʼou ʼi te ako ʼo te lea Faka Siaina? ʼI te kamata, neʼe nātou ʼui pe: “Qing Du [ʼE feala la hau lau]” pea mo fakahā age he palakalafe, ʼosi pea fai age te fehuʼi. ʼI te ʼosi lau pea mo tali ki te fehuʼi ʼi te lea Faka Siaina, neʼe nātou ʼui age: “Shei shei [mālo]” pea mo ʼui age “Hen Hao [ʼE lelei ʼosi].”

Neʼe kamata te ako Tohi-Tapu mo te fafine neʼe lau e Kilisitiano. ʼI te ʼosi ʼo te tolu ako, neʼe fia ʼiloʼi e te tuagaʼane Fakamoʼoni peʼe neʼe  mahino lelei te fafine ki te ʼu meʼa ʼaē neʼe ina ako. Koia neʼe kaugā ʼolo ai leva mo te tēhina ʼe lea Faka Siaina. ʼI te fehuʼi age ʼaē e te tēhina ki te fafine peʼe ʼi ai hana tahi ʼu fehuʼi, neʼe fehuʼi age e te fafine: “Ke feala haku papitema, ʼe tonu koa ke au poto ʼi te kaugā?”

Ki muli age, neʼe fakatuʼu te ako tohi ʼe kau ai te toko 9 ʼe lea Faka Siaina pea mo te toko 23 kau Fakamoʼoni Mekesike. ʼI te nofoʼaki ʼaia, neʼe kau ai te tōketā Siaina, ʼaē neʼe foaki age e tana fafine mahaki tana ʼu Tule Leʼo pea mo te ʼu Réveillez-vous ! ʼi te lea faka Sepania. Kae ʼuhi ko tana mole poto ʼi te lau ʼo te lea faka Sepania, neʼe ʼi ai te tahi neʼe ina fakaliliu age maʼa ia. Pea ʼi tana mahino ʼaē ʼe talanoa te ʼu nusipepa ki te Tohi-Tapu, neʼe ina kole leva ki te fafine mahaki peʼe feala la hana maʼu he ʼu nusipepa ʼi te lea Faka Siaina. Neʼe maʼu e te fafine tana ʼu tohi Faka Siaina, pea ko te filiale ʼa te kau Fakamoʼoni ʼa Sehova ʼo Mekesike, neʼe nātou fai te ʼu fakatuʼutuʼu ke ʼalu he Fakamoʼoni ʼe lea Faka Siaina ʼo ʼaʼahi te tōketā. Ko tana faʼē ʼi Siaina ʼe nofo mo tana Tohi-Tapu, pea ko te tōketā neʼe fiafia ʼi te lau ʼo te Tohi-Tapu. ʼI tana ʼamanaki haʼu ki Mekesike, neʼe ʼui age e tana faʼē ke ina haga lau ia te Tohi-Tapu. Koia, neʼe faikole ai ke ina maʼu he tahi ʼe tokoni anai kiā ia ke ina ako he tahi age ʼu meʼa ʼo ʼuhiga mo te ʼAtua ʼo te Tohi-Tapu. Neʼe ʼui fēnei e te tōketā: “Neʼe tali e te ʼAtua taku faikole!”

ʼI te ako tohi ʼaia, neʼe kau ai mo te kiʼi famili Siaina ʼe nātou lue tonatou kogafale ki te fafine Mekesike neʼe ina ako te Tohi-Tapu mo te kau Fakamoʼoni ʼa Sehova. Logola te mahino veliveli ʼa te famili Siaina ki te lea faka Sepania, kae neʼe nātou kau ki te ʼu fai palalau faka Tohi-Tapu ʼa te fafine. ʼAki te temi, neʼe kole e te famili ki te Fakamoʼoni ʼaē ʼe ina fai te ako peʼe feala la ke ina foaki age hanatou ʼu tohi faka Tohi-Tapu ʼi te lea Faka Siaina. Mole tuai pea kamata te ako Tohi-Tapu ʼi te lea Faka Siaina mo te kiʼi famili. Mole fualoa, pea neʼe fakahā e te famili tanatou kua fia kau ki te fai faka mafola mo tonatou ʼu tēhina pea mo fia foaki tonatou maʼuli kiā Sehova.

ʼIo, ko te lea Faka Siaina ʼe faigataʼa, kae ʼi te ʼu ʼaluʼaga ʼaē neʼe tou vakaʼi ʼi te alatike, ʼaki te tokoni ʼa te hahaʼi ʼa Sehova, tokolahi te kau matāpule ʼi Mekesike , ʼe kau ai te hahaʼi ʼe lea Faka Siaina, kua nātou ʼiloʼi te finegalo ʼa te ʼAtua, ohage ko tona fai ʼi ʼihi fenua ʼo te kele.

[Paki ʼo te pasina 17]

Ko te kalasi ʼe ina ako te lea Faka Siaina ʼi te kolo ko Mexico

[Paki ʼo te pasina 18]

Ko te Fakamoʼoni Mekesike ʼe ina fai te ako Tohi-Tapu ʼi te lea Faka Siaina

[Paki ʼo te pasina 18]

Ko te fai faka mafola ʼi te minisitelio ʼi te telituale Siaina ʼi te kolo ko Mexico