Te Meʼa ʼAē Ka Fai e Te Puleʼaga ʼo Te ʼAtua
Te Meʼa ʼAē Ka Fai e Te Puleʼaga ʼo Te ʼAtua
“Ke hoko mai tou puleʼaga. Ke fai tou finegalo ʼi te kele, ohage ko selo.”—Mateo 6:10, MN.
1. ʼE faka ʼuhiga feafeaʼi anai ia te hoko mai ʼo te Puleʼaga ʼo te ʼAtua?
ʼI TE akoʼi age e Sesu ki tana ʼu tisipulo ke nātou faikole ki te Puleʼaga ʼo te ʼAtua, neʼe ina ʼiloʼi ko te hoko mai ʼo te Puleʼaga ʼaia ʼe ina fakagata anai te pule ʼāteaina ʼa te tagata mai te ʼAtua, talu mai ni sēkulō. Lolotoga te temi ʼaia, neʼe mole fakahoko te finegalo ʼo te ʼAtua ki te kele katoa. (Pesalemo 147:19, 20) Kae hili pe te fakatuʼu ʼo te Puleʼaga ʼi selo, ʼe tonu ke fakahoko te finegalo ʼo te ʼAtua ʼi te potu fuli pe. Kua ōvi mai te temi ʼaē ka hoko ai te fetogi fakaofoofo ʼa te pule fakatagata e te Puleʼaga ʼi selo.
2. ʼE fakaʼiloga feafeaʼi anai te fetogi pule mai te temi pule ʼo te tagata ki te temi pule ʼo te Puleʼaga?
2 Ko te fetogi ʼaia ʼe fakaʼiloga anai ʼaki te temi ʼaē neʼe fakahigoaʼi e Sesu ko te “mamahi lahi, nee heeki mo hoko he mea feia talu mai te kamataʼaga o te malama-nei o aù mai ki te aho-nei, pea e mole toe i ai anai he mea feia.” (Mateo 24:21) ʼE mole tala mai e te Tohi-Tapu te loaloaga ʼo te temi ʼaia, kae ʼe kovi ʼaupito anai te ʼu malaʼia ʼaē ka hoko ʼi te lakaga ʼaia, ʼo mole hona fakatatau talu mai te tuʼu ʼo te malamanei. ʼI te kamataʼaga ʼo te mamahi lahi, ʼe hoko anai te meʼa fakapunamaʼuli ki te hahaʼi tokolahi ʼo te kele: ko te fakaʼauha ʼo te ʼu lotu hala fuli. ʼE mole punamaʼuli ai anai te kau Fakamoʼoni ʼa Sehova, koteʼuhi neʼe kua nātou ʼiloʼi ʼe hoko anai te faʼahi ʼaia. (Apokalipesi 17:1, 15-17; 18:1-24) ʼE fakaʼosi te mamahi lahi ʼi Halamaketone mokā laliki anai e te Puleʼaga ʼo te ʼAtua te tuʼu katoa ʼa Satana.—Taniela 2:44; Apokalipesi 16:14, 16.
3. ʼE fakamatalatala feafeaʼi e Selemia te ikuʼaga ʼo te hahaʼi talagataʼa?
3 Koteā te faka ʼuhiga ʼo te ʼu palalau ʼaenī kia “natou e mole natou iloi te Atua, pea mo natou e mole fakalogo ki te Evaselio” ʼo ʼuhiga mo tona Puleʼaga ʼi selo ʼaē ʼe takitaki e Kilisito? (2 Tesalonika 1:6-9) ʼE ʼui fēnei mai e te lea faka polofeta ʼa te Tohi-Tapu: “Koʼeni! Ko te malaʼia ʼe ʼalu mai te puleʼaga ki te tahi puleʼaga, pea ko te toe afā lahi ʼe malaga anai mai te ʼu potu taupotu ʼo te kele. Pea ʼe mahino ia ko te hahaʼi ʼaē ka matehi e Sehova ʼi te ʼaho ʼaia, ʼe leta anai mai te tahi potu taupotu ʼo te kele ʼo aʼu ki te tahi potu taupotu ʼo te kele. ʼE mole fai anai he fetāgihi maʼa nātou ʼaia, ʼe mole tae anai te hahaʼi ʼaia, pea ʼe mole tanu anai nātou. ʼE nātou liliu anai ohage ko he meʼa fakagako kele ʼi te fuga kele.”—Selemia 25:32, 33.
Te Fakaʼosi ʼo Te Agakovi
4. He koʼe koa ʼe hoki faka lākatonuʼi ia Sehova ʼi te fakaʼosi ʼo te tuʼu agakovi ʼaenī?
4 Lolotoga te ʼu taʼu ʼe lauʼi afe, neʼe tuku e Sehova ke hoholo te agakovi, neʼe ina tuku he temi feʼauga ke sio ai te hahaʼi faitotonu ʼe kovi te takitaki ʼa te tagata. Ohage la, ʼe ʼui e te tohi, ʼi te 20 sēkulō pe, ko te toko 150 miliona tupu hahaʼi neʼe mamate ʼi te ʼu tau, ʼi te ʼu agatuʼu ki te ʼu puleʼaga, pea mo ʼihi maveuveu fakafenua. Neʼe ʼiloga lelei te agamālohi ʼa te tagata lolotoga te Lua Tau Faka Malamanei, ʼaē neʼe mamate ai te toko 50 miliona hahaʼi, tokolahi ia nātou neʼe hoko ki ai te mate fakalialia ʼi te ʼu lotoʼā fakamamahi ʼa te kau Nasi. Ohage ko te meʼa neʼe fakakikite e te Tohi-Tapu, ʼi totatou temi ‘ ʼe fakaʼāsili kovi te hahaʼi agakovi pea mo te hahaʼi kākā.’ (2 Timoteo 3:1-5, 13) ʼI te temi nei, kua mafola te ʼu felāveʼi fakasino heʼeʼaoga, te agamālohi, te aga fakahehema, pea mo te fehiʼa ki te ʼu pelesepeto ʼa te ʼAtua. Koia, ʼe lākatonu katoa ia Sehova mokā ina fakagata anai te tuʼu agakovi ʼaenī.
5, 6. Koutou fakamatala te agakovi ʼa te Kanaane ʼāfea.
5 ʼE tatau te ʼaluʼaga ʼo te temi nei pea mo te ʼaluʼaga ʼaē neʼe hoko ʼi Kanaane kua hili nei kiai taʼu e 3 500. ʼE ʼui fēnei e te Tohi-Tapu: “Ko meʼa fuli ʼaē ʼe fakalialia kiai Sehova pea mo fehiʼa kiai, neʼe nātou fai maʼa tanatou ʼu ʼatua, koteʼuhi māʼia mo tonatou ʼu foha pea mo tonatou ʼu ʼofafine, ʼe nātou tautau tutu ʼi te afi maʼa tanatou ʼu ʼatua.” (Teutalonome 12:31) Neʼe fakahā fēnei e Sehova ki te puleʼaga ʼo Iselaele: “ ʼUhi ko te agakovi ʼo te ʼu puleʼaga ʼaia ʼaē ko Sehova tou ʼAtua ʼe ina kapu nātou ʼi ʼou muʼa.” (Teutalonome 9:5) Neʼe tohi fēnei e te tagata fai hisitolia ʼo te Tohi-Tapu ko Henry H. Halley: “Ko te tauhi kia Paale, mo Asitolete, pea mo ʼihi ʼatua ʼo Kanaane, neʼe fai ʼaki te ʼu aga fakalialia ʼaupito; neʼe nātou fai tanatou ʼu aga fakalialia ʼi tonatou ʼu fale lotu.”
6 Neʼe fakahā e Halley te kovi ʼaupito ʼo tanatou agakovi, koteʼuhi ʼi te tahi koga meʼa, neʼe maʼu e te hahaʼi kumi mātaga “te ʼu tuʼuga ipu kele lalahi ʼe tuku ʼi loto te ʼu toega sino ʼo te ʼu tamaliki ʼaē neʼe sakilifisioʼi kia Paale.” Neʼe ina ʼui fēnei: “Ko te koga meʼa katoa neʼe ko te tānuma ʼo te tamaliki kei meamea. . . . Ko te tauhi ʼaē neʼe fai e te hahaʼi Kanaane, neʼe nātou fai ʼaki te ʼu aga heʼeʼaoga, ohage ko he naunau faka lotu, ia muʼa ʼo tanatou ʼu ʼatua; pea mo nātou matehi tanatou fānau ʼuluaki tupu, ko he sakilifisio ki te ʼu ʼatua ʼaia. ʼE ʼiloga mai ʼi hona ʼuhiga lahi, neʼe liliu te fenua katoa ko he faʼahiga Sotoma mo Komola. . . . Neʼe tonu koa ke maʼuli fualoa he ʼu hahaʼi feiā neʼe nātou fai he ʼu aga fakalialia pea mo aga fakapō? . . . ʼE feʼekeʼaki te hahaʼi kumi mātaga ʼaia neʼe nātou keli te ʼu toega fenua ʼo te ʼu kolo Kanaane, pe koʼe neʼe mole fakaʼauha tautonu nātou e te ʼAtua.”
ʼE Nātou Maʼu Te Kele
7, 8. ʼE fakamaʼa feafeaʼi anai e te ʼAtua ia te kele?
7 Ohage ko te fakamaʼa e te ʼAtua ia Kanaane, ʼe ina fakamaʼa anai te kele katoa pea ina foaki anai ki te hahaʼi ʼaē ʼe nātou fai tona finegalo. “Ko te hahaʼi agatonu ʼe nātou nonofo anai ʼi te kele, pea ko nātou ʼaē ʼe mole hanatou lākahala ʼe nātou nonofo ai anai. ʼO ʼuhiga mo te hahaʼi agakovi, ʼe toʼo anai ia nātou ʼi te kele.” (Tāʼaga Lea 2:21, 22) Pea ʼe ʼui fēnei e te tagata fai pesalemo: “Kei toe he kiʼi temi siʼipe, pea pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37:10, 11) ʼE toʼo anai mo Satana, “ke aua naa ina toe fakahalai te u puleaga o kaku ki te katoa o taù e afe.” (Apokalipesi 20:1-3) Ei, “e fakamole te malama-nei mo tana u holi; kae kia ia ae e ina fai te finegalo o te Atua e mauli o talu ai.”—1 Soane 2:17.
8 ʼI tana fakamatala fakanounou te ʼamanaki maʼuhiga ʼaē ka maʼu e te hahaʼi ʼaē ʼe nātou fia maʼuʼuli ʼo heʼegata ʼi te kele, neʼe ʼui fēnei e Sesu: “Manuʼia ia nātou ʼaē ʼe agamālū, heʼe nātou maʼu anai te kele.” (Mateo 5:5, MN ) Neʼe hage pe ia neʼe talanoa kia Pesalemo 37:29, ʼaē neʼe fakakikite fēnei ai: “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” Neʼe ʼiloʼi e Sesu neʼe fakatuʼutuʼu e Sehova maʼa te kau faitotonu ke nātou maʼuʼuli ʼo heʼegata ʼi he kele ʼe liliu anai ko he palatiso. ʼE ʼui fēnei e Sehova: “Ko ʼau ʼaē neʼe ʼau fai te kele, mo te tagata pea mo te ʼu manu ʼaē ʼe ʼi te fuga kele, ʼaki toku mālohi lahi . . . pea neʼe ʼau foaki age kia ia ʼaē neʼe matatonu ki ʼoku mata.”—Selemia 27:5.
Ko He Mālama Foʼou Taulekaleka
9. Ko te faʼahiga mālama feafeaʼi ʼaē ka fakatuʼu anai e te Puleʼaga ʼo te ʼAtua?
9 ʼI te hili ʼo Halamaketone, ʼe fakatuʼu anai e te Puleʼaga ʼo te ʼAtua he “kele foʼou” ʼe “nofo ai te faitotonu.” (2 Petelo 3:13, MN ) ʼE ko he ʼāteaina fakaofoofo anai ʼaē ka maʼu e nātou ka hāo ʼi Halamaketone, ʼi te pulihi ʼo te tuʼu ʼo te ʼu faʼahiga meʼa agakovi pea mo taʼomia ʼaenī! ʼE ko he meʼa fakafimālie anai kia nātou hanatou hū ki te mālama foʼou pea mo faitotonu ʼaē ʼe takitaki e te Puleʼaga ʼi selo, ʼaki te ʼu tapuakina taulekaleka pea mo te maʼuli heʼegata ʼaē ka nātou maʼu!—Apokalipesi 7:9-17.
10. Koteā te ʼu meʼa kovi ʼaē ʼe mole toe maʼu anai ʼi te temi pule ʼo te Puleʼaga?
10 ʼE mole toe tuʼania anai te hahaʼi naʼa hoko he tau, he fakapō, peʼe ko he pakupaku, peʼe ko he ʼu manu fekai. “ ʼE ʼau fai anai mo [taku hahaʼi] he fuakava ʼo ʼuhiga mo te tokalelei, pea ʼe pulihi moʼoni anai ʼi te fenua te manu fekai . . . Pea ko te ʼakau ʼo te gāueʼaga ʼe tonu anai ke ina foaki mai tona fua, pea ko te kele ʼe ina foaki mai anai tana ʼu meʼa ʼaʼana, pea ʼe nātou nonofo anai ʼi tonatou kele ʼi te tokalelei.” “ ʼE tonu anai ke nātou tuki tanatou ʼu heletā ke liliu ko he ʼu huo pea ko ʼanatou ʼu tao ke liliu ko he ʼu pipi moʼo pakimaga. ʼE mole nātou hiki anai tanatou ʼu heletā, ko he puleʼaga ki he tahi puleʼaga, pea ʼe mole nātou toe ako anai te tau. Pea ʼe nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamatakuʼi ia nātou.”—Esekiele 34:25-28; Mikea 4:3, 4.
11. He koʼe koa ʼe tou lava falala ʼe fakagata anai te ʼu mahaki fakasino?
11 ʼE pulihi anai te mahaki, te mamahi pea māʼia mo te mate. “ ʼE mole he tahi ʼe ina ʼui anai: ‘ ʼE ʼau mahaki.’ Ko te hahaʼi ʼaē ʼe nonofo ʼi te fenua, ko nātou ʼaia ʼaē ka fakamolemole anai tanatou agahala.” (Isaia 33:24) “[Ko te ʼAtua] e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea. . . . ‘Koeni, e au fai ia mea foou fuape.’ ” (Apokalipesi 21:4, 5) ʼI te temi ʼaē neʼe kei nofo ai ʼi te kele, neʼe fakahāhā lelei e Sesu tana lava fai ʼo te ʼu meʼa ʼaia ʼaki te mālohi ʼaē neʼe foaki age e te ʼAtua. ʼAki te lagolago ʼo te laumālie maʼoniʼoni, neʼe fagona ia Sesu ʼi te fenua katoa moʼo fakamālōlō te hahaʼi ketu pea mo faitoʼo te kau mahaki.—Mateo 15:30, 31.
12. Koteā te ʼamanaki ki te kau mate?
12 Neʼe mole gata aipe te gāue ʼa Sesu. Neʼe ina fakatuʼuake te kau mate. Neʼe malave feafeaʼi te faʼahi ʼaia ki te kau agavaivai? ʼI tana fakatuʼuake te kiʼi taʼahine ʼe taʼu 12, ko tana ʼu mātuʼa ‘neʼe nā ʼofolele ʼaupito.’ (Maleko 5:42) Neʼe ko he tahi ʼaia faʼifaʼitaki ʼo te gāue ʼaē ka fai anai e Sesu ʼi te kele ʼaki te Puleʼaga, heʼe ʼi te temi ʼaia “ ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:15, MN ) Koutou fakafuafua age muʼa te ʼofolele lahi ʼa te hahaʼi mokā fakatuʼuake faka kūtuga anai te kau mate pea mo nātou toe fakatahi mo te ʼu hahaʼi ʼaē neʼe nātou ʼoʼofa ai! ʼE mahino ia ʼe fai ai anai he ako lahi ʼaki te takitaki ʼo te Puleʼaga, pea ʼe “fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”—Isaia 11:9.
Kua Fakatonuhia Te Pule Faʼitaliha ʼa Sehova
13. ʼE hā feafeaʼi anai te faitotonu ʼo te fai pule ʼa te ʼAtua?
13 ʼI te fakaʼosi ʼo te ʼu taʼu e afe ʼo te takitaki ʼo te Puleʼaga, ʼe haohaoa anai te fakakaukau pea mo te sino ʼo te tagata. ʼE liliu anai te kele ko he ʼōloto faka malamanei ʼo Eteni, ko he palatiso. ʼE maʼu ai anai ia te tokalelei, mo te fiafia, mo te fīmālie pea mo he sosiete fakatagata agaʼofa. Neʼe mole heʼeki hoko he meʼa feiā ʼi te hisitolia ʼo te tagata. Koia ʼe kehekehe ʼaupito anai te ʼu taʼu ʼe lauʼi afe ʼaē neʼe fakaʼofaʼofa ai te takitaki ʼa te tagata, pea mo te takitaki lelei ʼaē ka fakahoko anai ia taʼu e afe e te Puleʼaga ʼo te ʼAtua ʼaē ʼi selo! ʼE hā lelei anai ko te pule ʼa te ʼAtua ʼaki tona Puleʼaga, ʼe māʼoluga ʼaupito age ia potu fuli pe. ʼE fakatonuhia katoa anai tona pule faʼitaliha, te maʼua ʼaē ke takitaki tatou e te ʼAtua.
14. Koteā ʼaē ka hoko ki te kau agatuʼu mokā hili te ʼu taʼu e afe?
14 ʼI te fakaʼosi ʼo te ʼu taʼu e afe, ʼe tuku anai e Sehova te hahaʼi ʼaē kua haohaoa, ke nātou fakaʼaogaʼi tonatou loto faʼitaliha moʼo filifili peʼe ko ai ʼaē ʼe nātou fia tauhi ki ai. ʼE fakahā mai e te Tohi-Tapu “e fakaʼateaina anai Satana i tona pilisoni.” ʼE ina toe faigaʼi anai ke ina fakahalaʼi te hahaʼi, pea ko ʼihi ʼe nātou filifili anai te faʼifaʼitaliha mai te ʼAtua. Moʼo tāʼofi ‘naʼa toe hoko tuʼa lua te mamahi,’ ʼe molehi anai e Sehova ia Satana, mo tana kau temonio, pea mo nātou fuli ʼaē ka agatuʼu anai ki Tona pule faʼitaliha. ʼE mole he tahi ʼe ina lava ʼui anai ʼo ʼuhiga mo nātou ʼaē ka tauteaʼi ʼi te lakaga ʼaia, neʼe mole maʼu honatou faigamālie, pe neʼe tupu tanatou aga kovi ʼuhi ko tonatou ʼuhiga heʼe haohaoa. Kailoa ia, ʼe nātou haohaoa anai ohage ko Atama mo Eva, ʼaē neʼe nā filifili ʼaki tonā loto katoa ke nā agatuʼu ki te pule faitotonu ʼa Sehova.—Apokalipesi 20:7-10; Naume 1:9.
15. ʼE feafeaʼi anai te ʼu felogoi ʼa te kau agatonu mo Sehova?
15 ʼI te tahi faʼahi, ko te kaugamālie ʼo te hahaʼi ʼe lagi nātou filifili anai ke nātou lagolago ki te pule faʼitaliha ʼa Sehova. ʼAki te fakaʼauha katoa ʼo te kau agatuʼu, ʼe tutuʼu anai te kau faitotonu ia muʼa ʼo Sehova, he neʼe nātou nonofo agatonu ʼi te ʼahiʼahi fakamuli. ʼE liliu anai te kau agatonu ʼaia ko he ʼu foha pea mo he ʼu ʼofafine ʼa Sehova. ʼE nātou toe maʼu anai te ʼu felogoi lelei ʼaē neʼe maʼu e Atama mo Eva ʼi muʼa ʼo tanā agatuʼu ki te ʼAtua. Koia, ʼe fakahoko anai ia Loma 8:21 (MN ): “Ko te ʼu meʼa ʼaē neʼe fakatupu ʼe toe faka ʼāteaina anai nātou mai te popūla ki te maumau pea ʼe nātou maʼu anai te ʼāteaina faka kolōlia ʼo te fānau ʼa te ʼAtua.” ʼE fakakikite fēnei e te polofeta ko Isaia: “ ʼE fakaʼauha moʼoni anai [e te ʼAtua] te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe.”—Isaia 25:8.
Ko Te ʼAmanaki ʼo Te Maʼuli Heʼegata
16. He koʼe koa ʼe lelei hakita fakatalitali ki te fakapale ʼo te maʼuli heʼegata?
16 ʼE maʼu anai e te kau agatonu he ʼu fakatuʼutuʼu fakaofoofo, heʼe foaki lahi age anai e te ʼAtua he ʼu lelei fakalaumālie pea mo he ʼu lelei fakasino! Neʼe ʼui tonu e te tagata fai pesalemo: “ ʼE ke avahi tou nima pea ʼe ke fafaga te loto ʼo te meʼa maʼuli fuli pe.” (Pesalemo 145:16) ʼE fakaloto mālohiʼi e Sehova te hahaʼi ʼaē ʼe kau ki te kalasi fakakelekele, ke nātou fakapipiki ki tanatou tui kia te ia, te ʼamanaki ʼaia ʼe nātou maʼuʼuli anai ʼi te Palatiso. Logope la ʼe maʼuhiga ʼaupito te pule faʼitaliha ʼa Sehova, kae ʼe ina fakapale te hahaʼi ʼaē ʼe tauhi age kia te ia. ʼI te Tohi-Tapu katoa, ʼe pipiki tuʼumaʼu te agatonu ki te ʼAtua pea mo te ʼamanaki ki te maʼuli heʼegata, koteʼuhi ʼe ko he ʼu koga maʼuhiga ʼo te tui ʼa he Kilisitiano ki te ʼAtua. “Ko ʼaē ʼe fakaōvi ki te ʼAtua ʼe tonu ke tui ko ia, pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.”—Hepeleo 11:6, MN.
17. Neʼe fakahā feafeaʼi e Sesu te ʼaoga ʼo te ʼamanaki kia tatou?
17 Neʼe ʼui fēnei e Sesu: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼI henī neʼe ina fakapikipiki tahi te ʼiloʼi ʼo te ʼAtua mo tana ʼu fakatuʼutuʼu ʼaki te fakapale ʼaē ʼe maʼu ai. Ohage la, ʼi te kole age e te tagata agakovi kia Sesu ke ina manatuʼi ia ia mokā hū anai ki tona Puleʼaga, neʼe ʼui fēnei age e Sesu: “E ke fakatahi anai mo au i Palatiso.” (Luka 23:43) Neʼe mole ina ʼui age ki te tagata ke ina maʼu te tui tatau aipe peʼe mole ina maʼu he fakapale. Neʼe ina ʼiloʼi ʼe loto e Sehova ke maʼu e tana ʼu kaugana te ʼamanaki ki he maʼuli heʼegata ʼi palatiso fakakelekele, moʼo tokoni age kia nātou mokā nātou tau mo he ʼu ʼahiʼahi kehekehe ʼi te mālama ʼaenī. Koia, ko te fakatalitali ki te fakapale ʼe ko he tokoni maʼuhiga ki he Kilisitiano ke faʼa kātaki.
Te Ka Haʼu ʼo Te Puleʼaga
18, 19. Koteā anai ka hoko ki te Hau pea mo te Puleʼaga ʼi te fakaʼosi ʼo tonatou temi ʼAfio lolotoga Taʼu e Afe?
18 Mai tona ʼaluʼaga ʼaē ko te Puleʼaga neʼe ko he fakatuʼutuʼu neʼe fakaʼaogaʼi e Sehova moʼo fakaliliu ʼo te kele pea mo te hahaʼi ke nātou haohaoa, pea mo nātou fakatokatoka mo ia, koteā anai te gāue ʼa te Hau ko Sesu Kilisito pea mo te toko 144 000 hau mo pelepitelo mokā hili ia te ʼu Taʼu e Afe? “Pea i te fakaosi leva, moka ina tuku anai te puleagahau ki te Atua, te Tamai, i te hili o tana maumauʼi te lagiaki katoa mo te pule fuli pea mo te malohi fuape. Koteuhi e maua ke pule fakahau o kaku ki tana tuku ki ona lalo vae ona fili fuape.”—1 Kolonito 15:24, 25.
19 Kapau ʼe toe tuku age e Kilisito te Puleʼaga ki te ʼAtua, pea ʼe tonu ke tou mahino feafeaʼi ki te ʼu vaega faka Tohi-Tapu ʼaē ʼe ʼui ai ʼe heʼegata te puleʼaga ʼaia? ʼE heʼegata mai tona ʼaluʼaga ʼaē ko te ʼu meʼa ʼaē ʼe fakahoko e te Puleʼaga ʼaia ʼe heʼegata anai ia. ʼE faka maʼuhigaʼi anai ia Kilisito ʼuhi ko tana gāue moʼo faka lākatonuʼi te pule faʼitaliha ʼa te ʼAtua. Kae ʼe fakaʼosi anai mo tona ʼuhiga Tagata Faitotogi, mai tona ʼaluʼaga ʼaē kua pulihi katoa te agahala pea mo te mate, pea kua toe totogi mo te malamanei. Tahi ʼaē meʼa, kua ʼosi katoa anai te ʼAfio ia Taʼu e Afe ʼo te Puleʼaga; pea ʼe mole toe ʼaoga anai ke ʼi ai he tahi puleʼaga moʼo faka felogoi ia Sehova pea mo te hahaʼi talagafua. Koia “ko te ʼAtua ʼe liliu anai ko meʼa fuape maʼa te hahaʼi fuape.”—1 Kolonito 15:28, MN.
20. ʼE tou lava ʼiloʼi feafeaʼi ia te ka haʼu ʼa Kilisito pea mo tana ʼu kaugā hau e toko 144 000?
20 Koteā ʼaē ka fai anai e Kilisito pea mo tana ʼu kaugā hau mokā hili anai tanatou ʼAfio ia Taʼu e Afe? ʼE mole fakahā mai e te Tohi-Tapu he meʼa ʼo ʼuhiga mo te potu ʼaia. Kae ʼe mahino papau ia, ʼe foaki age anai e Sehova he tahi ʼu pilivilesio ke nātou fai ki te ʼu meʼa ʼaē neʼe ina fakatupu. ʼOfa pe kia tatou fuli ke tou lagolago ki te pule faʼitaliha ʼa Sehova pea mo tou tui papau ki te maʼuli heʼegata, ke feala ʼi te ka haʼu ke tou maʼuʼuli moʼo sio ki te ʼu meʼa ʼaē neʼe fakatuʼutuʼu e Sehova maʼa te Hau pea mo tana ʼu kaugā hau mo pelepitelo, ʼo feiā pe mo tana ʼatulaulau katoa!
Te ʼu Fehuʼi Fakamanatu
• Koteā te fetogi pule ʼaē ka ʼamanaki hoko?
• ʼE fakamāuʼi feafeaʼi anai e te ʼAtua ia te kau agakovi pea mo te kau agatonu?
• ʼE feafeaʼi anai te ʼu ʼaluʼaga ʼo te mālama foʼou?
• ʼE feafeaʼi anai te fakatonuhia katoa ʼo te pule faʼitaliha ʼa Sehova?
[Fehuʼi]
[Paki ʼo te pasina 17]
“ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu”
[Paki ʼo te pasina 18]
ʼE toe felogoi lelei anai te kau agatonu mo Sehova