E Feafeaʼi He Fakaōvi Ki Te ʼAtua?

ʼE ʼui fēnei ia Sakopo 4⁠:8: “Koutou fakakovi ki te Atua pea e fakaovi atu anai kia koutou.” ʼI te loto ʼaē e Sehova ke felogoi lelei te tagata mo ia, neʼe ina momoli mai kia tatou tona ʼAlo ʼulu tokotahi.

MOʼO tali ki te ʼofa lahi ʼaia, neʼe tohi fēnei e te ʼapositolo ko Soane: “E tou ofa, koteuhi nee uluaki ofa [te ʼAtua] kia tatou.” (1 Soane 4⁠:19) Kae ʼe ʼi ai te ʼu meʼa ʼe tonu ke tou fai mo kapau ʼe tou fia fakaōvi takitokotahi ki te ʼAtua. Ohage ko te meʼa ʼaē neʼe tou vakaʼi ʼi te ʼuluaki alatike, ʼe tonu ke tou mulimuli ki te ʼu puani e fā ʼo ʼuhiga mo te felogoi ʼaē mo he tahi. Tou vakaʼi age muʼa te ʼu meʼa ʼaia.

Koutou Tokagaʼi Te ʼu Kalitate Taulekaleka ʼa Te ʼAtua

ʼE lahi te ʼu kalitate taulekaleka ʼa te ʼAtua, pea ʼi tona ʼu kalitate maʼuhiga ʼaia, ʼe ʼi ai te ʼofa, mo te poto, mo te faitotonu pea mo te mālohi. ʼE hā tāfito tona poto pea mo tona mālohi ʼi te ʼatulaulau pea mo te kele, mai te ʼu galaxies ʼo aʼu ki te ʼu kiʼi atomes. ʼE tohi fēnei e te tagata fai Pesalemo: “ ʼE kalagaʼi e te lagi te kolōlia ʼo te ʼAtua; pea ko te lagi ʼe ina fakahā te gāue ʼo tona ʼu nima.”​—⁠Pesalemo 19⁠:1; Loma 1⁠:⁠20.

ʼE toe ʼiloga te ʼofa ʼa te ʼAtua ʼi te ʼu meʼa ʼaē neʼe ina fakatupu. Ohage la, ko te faʼahiga faʼu ʼo totatou sino, ʼe hā ʼaki ai ʼe loto te ʼAtua ke tou leleiʼia te maʼuli. Neʼe ina faka fealagia ke tou sisio ki te ʼu lanu, ke tou kano leleiʼia te ʼu meʼa kai, ke tou lava mamanu ki he ʼu meʼa, pea mo leleiʼia te musika, ke tou kakata, ke tou leleiʼia te ʼu meʼa matalelei, pea neʼe ina toe foaki mai te tahi ʼu fealagia pea mo te ʼu agaaga ʼe mole faʼa maʼuhiga ki te maʼuli. ʼIo, ko te ʼAtua ʼe manavaʼofa, mo agalelei pea mo ʼofa​—⁠pea ko te ʼu kalitate ʼaia ʼe ʼalutahi moʼoni mo tona ʼuhiga ‘ ʼAtua fiafia.’​—⁠1 Timoteo 1⁠:11; Gaue 20⁠:⁠35.

ʼE faka kolōliaʼi ia Sehova, koteʼuhi ko tana pule pea mo te lagolago ʼo tana kau ʼaselo, ʼe fakatafito ʼuluaki ki te ʼofa. (1 Soane 4⁠:⁠8) Ei, ko Sehova ʼe ko te Tuʼi ʼo te ʼAtulaulau, pea ko tana aga ʼaē ki te hahaʼi, tāfito tana ʼu kaugana agatonu, ʼe hage ko te aga ʼa he tāmai ʼofa ki hana fānau. (Mateo 5⁠:45) Ko meʼa fuli ʼaē ʼe ina foaki ʼe fua lelei kia nātou. (Loma 8⁠:​38, 39) Ohage ko te meʼa ʼaē neʼe tou talanoa kiai, neʼe ina toe foaki mai kia tatou te maʼuli ʼo tona ʼAlo ʼulu tokotahi. Ei, ʼe tou maʼuʼuli pea mo ʼamanaki ki te maʼuli heʼegata, ʼuhi ko te ʼofa ʼa te ʼAtua.​—⁠Soane 3⁠:⁠16.

Neʼe foaki mai e Sesu te fakasiosio lahi ʼo ʼuhiga mo te ʼulugaaga ʼa te ʼAtua, koteʼuhi neʼe ina faʼifaʼitakiʼi lelei tana Tāmai. (Soane 14⁠:​9-11) Neʼe katoa tona loto faka sakilifisio, mo tana fakaʼapaʼapa, pea mo tana lototokaga. ʼI te tahi ʼaluʼaga, neʼe ʼave kia Sesu te tagata tuli pea mo faigataʼa tana palalau. Neʼe lagi ufiufi te tagata ʼaia ʼi te lotolotoiga ʼo te kaugamālie. Kae ʼe lelei hatatou tokagaʼi, neʼe toʼo kehe e Sesu te tagata ʼaia ʼo ʼave ki te koga meʼa lāvaki pea ina fakamālōlōʼi ai ia ia. (Maleko 7⁠:​32-35) ʼE koutou leleiʼia koa te hahaʼi ʼaē ʼe nātou mahino ki te ʼu meʼa ʼaē ʼi ʼokotou loto pea mo fakaʼapaʼapa atu? Kapau koia, pea ʼe koutou fakaōvi anai kia Sehova pea mo Sesu ʼo talu ai, ʼo koutou ako ke lahi age takotou mahino kia nāua.

Koutou Fakakaukauʼi Te ʼu Kalitate ʼa Te ʼAtua

ʼE feala ki he tahi ke ʼi ai hona ʼu kalitate taulekaleka, kae ʼe tonu ke tou ʼiloʼi papau te agaaga ʼa te tagata ʼaia ke feala hatatou felogoi mo ia. ʼE toe feiā ʼo ʼuhiga mo Sehova. Ko te metitasioʼi ʼo tona ʼu kalitate ʼe ko he tahi faʼahi maʼuhiga ʼaia moʼo fakaōvi kia te ia. Ko te Hau ko Tavite, ko he tagata neʼe ʼofa moʼoni kia Sehova pea neʼe ko ‘he tagata neʼe leleiʼia e [te] loto [ʼo Sehova],’ pea neʼe ina ʼui fēnei: “Neʼe ʼau manatuʼi te ʼu ʼaho ki muʼa atu; neʼe ʼau metitasio ki tau ʼu gāue fuli; ʼaki he lotolelei neʼe ʼau fia tokagaʼi tuʼumaʼu te ʼu gāue ʼo tou ʼu nima.”​—⁠Gaue 13⁠:22; Pesalemo 143⁠:⁠5.

 Ka koutou mamata ki te ʼu mātaga ʼo te kele peʼe koutou lau te Folafola ʼa te ʼAtua, ia te Tohi-Tapu, ʼe koutou hage koa ko Tavite, ʼo metitasioʼi te ʼu meʼa ʼaē ʼe koutou sisio kiai pea mo lau? Koutou fakakaukauʼi muʼa he tama neʼe ina maʼu hana tohi mai tana tāmai pea ʼe ʼofa ki ai. Koteā anai tana manatu ʼo ʼuhiga mo te tohi ʼaia? ʼE mahino papau ia ʼe mole ina lau pe anai pea mo tuku ki te puha. Kae ʼe ina lau fakalelei anai te tohi ʼaia, ke mahino ki te ʼu meʼa fuli ʼaē ʼe tohi ai. Pea ʼe toe tatau ʼosi pe mo te Folafola ʼa te ʼAtua, ʼe tonu ke maʼuhiga te tohi ʼaia kia tatou, ohage ko tona ʼui e te tagata fai Pesalemo ʼi tana hiva fēnei: “ ʼE ʼau manako ki tau lao! ʼI te ʼaho fuli pe ʼe ʼau manatu kiai.”​—⁠Pesalemo 119⁠:⁠97.

Tou Taupau He Felogoi Lelei

Ko he felogoi lelei ʼe ko te koga maʼuhiga ʼaia ʼo he vāhaʼa lelei. Ko tona faka ʼuhiga ʼe ko he fai palalau pea mo he fakalogo​—⁠pea ʼe mole fai ʼaki pe te ʼatamai kae ʼaki te loto. ʼE tou palalau ki te Tupuʼaga ʼaki te faikole, ʼaē ko he felogoi fakahagatonu ʼe tou fai ki te ʼAtua ʼi tatatou tauhi. ʼE fiafia ia Sehova ʼi te ʼu faikole ʼa te hahaʼi ʼaē ʼe ʼoʼofa pea mo tauhi age kia te ia, pea mo nātou fakamoʼoni ʼe ko Sesu Kilisito Te pule ʼaē ʼe ina fakafofoga ia ia.​—⁠Pesalemo 65⁠:2; Soane 14⁠:​6, 14.

ʼI te temi muʼa, neʼe palalau te ʼAtua ki te tagata ʼi te ʼu faʼahiga ʼaluʼaga kehekehe, ohage la ʼi he ʼu meʼa neʼe hā, ʼi he ʼu misi, pea mo he ʼu ʼaselo. Kae ʼi te temi nei, ʼe ina fai ʼaki tana Folafola ia te Tohi-Tapu. (2 Timoteo 3⁠:16) ʼE lahi te ʼu lelei ʼo te Folafola. ʼE feala ke tou lau ʼi te temi fuli pe. Ohage ko he tohi neʼe fai mai e he tahi, ʼe feala ke tou vakaʼi tuʼumaʼu pe. Pea ʼe mole maʼu ai he ʼu fakamatala fakakākā ohage ko te ʼu meʼa ʼaē ʼe feala ke hoko mokā tou fai fakamatala. Koia koutou faka ʼuhiga te Tohi-Tapu ohage ko he ʼu tuʼuga tohi mai takotou Tāmai ʼofa ʼaē ʼi selo, pea ʼaki te ʼu tohi ʼaia ʼe feala hana palalau atu kia koutou ʼi te ʼaho fuli pe.​—⁠Mateo 4⁠:⁠4.

Ohage la, ʼe fakahā mai e te Tohi-Tapu te manatu ʼa Sehova ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. ʼE ina fakahā mai tana fakatuʼutuʼu ʼo ʼuhiga mo te malamanei pea mo te kele. Pea ʼe ina fakahā mai tana ʼu felogoi pea mo te ʼu hahaʼi tokolahi pea mo te ʼu puleʼaga, mai tana ʼu kaugana agatonu ʼo aʼu ki tona ʼu fili. ʼAki te ʼu fakamatala ʼaia ʼo tona vāhaʼa mo te tagata, ʼe fakahā lelei mai e Sehova tona ʼulugaaga. ʼE ina fakahā mai tona ʼofa, tona fiafia, tona lotomamahi, tona ʼita, tona manavaʼofa, tona lototokaga​—⁠ei, tana ʼu manatu pea mo te ʼu meʼa ʼaē ʼi tona loto, pea mo te tupuʼaga tāfito ʼaē ʼe ina maʼu ai te ʼu kalitate ʼaia​—⁠ke mahino gafua ki te tagata.​—⁠Pesalemo 78⁠:​3-7.

Kapau neʼe koutou lau he koga tohi ʼo te Folafola ʼa te ʼAtua, pea ʼe lava feafeaʼi hona fua lelei kia koutou? Kae tāfito, ʼe lava feafeaʼi hakotou fakaōvi ki te ʼAtua? ʼUluaki, koutou fakakaukauʼi te meʼa ʼaē neʼe koutou lau pea mo ako ʼo ʼuhiga mo te ʼAtua, ʼo koutou faigaʼi ke malave te manatu ʼaia ki tokotou loto. ʼOsi ʼaia pea ʼi te faikole, koutou fakahā kia Sehova takotou manatu pea mo te ʼu meʼa ʼaē ʼi tokotou loto ʼo ʼuhiga mo te ʼu manatu ʼaē neʼe koutou vakaʼi, pea ʼe koutou faiga feafeaʼi anai ke lelei kia koutou. Koʼena la te faka ʼuhiga ʼo te felogoi. ʼE moʼoni, kapau ʼe koutou fakakaukauʼi he tahi ʼu meʼa, ʼe feala pe ke koutou palalau ki te ʼu meʼa ʼaia ʼi takotou faikole.

Koutou Fai Fakatahi He ʼu Gāue Mo Te ʼAtua

ʼE ʼui e te Tohi-Tapu ʼo ʼuhiga mo te ʼu tagata kua matutuʼa neʼe agatonu, neʼe nātou haʼele mo te ʼAtua, pe neʼe nātou haʼele ʼi muʼa ʼo te ʼAtua moʼoni. (Senesi 6⁠:9; 1 Hau 8⁠:25) Koteā tona faka ʼuhiga? ʼE mahino mai neʼe nātou maʼuli ʼi te ʼaho fuli ohage pe neʼe nātou maʼuli tahi mo te ʼAtua. ʼI tona fakahagatonu, neʼe nātou agahala. Kae neʼe nātou ʼoʼofa ki te ʼu lao pea mo te ʼu pelesepeto ʼa te ʼAtua, pea neʼe nātou maʼuʼuli ʼo mulimuli pe ki te fakatuʼutuʼu ʼa te ʼAtua. ʼE ʼofa ia Sehova ki te faʼahiga hahaʼi ʼaia, pea ʼe tokaga kia nātou, ohage ko tona fakahā ia Pesalemo 32⁠:8: “ ʼE ʼau fakaliliu anai  koe ko he tahi ʼe fakasiosio tonu, pea ʼe ʼau akoʼi anai koe ʼi te ala ʼaē ʼe tonu ke ke haʼele ai. ʼE ʼau tokoniʼi anai koe, ʼo sio maʼu toku mata kia te koe.”

ʼE feala pe mo koutou, ke liliu ia Sehova ko hokotou kaumeʼa​—⁠ko he tahi ʼe haʼele mo koutou, ʼe tokaga kia koutou, pea mo ina foaki atu he ʼu tokoni ohage pe ko he tāmai. Neʼe fakamatalatala e te polofeta ko Isaia ia Sehova ohage ko he tahi “ ʼe ina akoʼi [koutou] ke ʼaoga kia [koutou], ia Ia ʼaē ʼe ina taki [koutou] ʼi te ala ʼaē ʼe tonu ke [koutou] haʼele ai.” (Isaia 48⁠:17) Kapau ʼe tou maʼuliʼi te ʼu meʼa ʼaia, pea ʼe tou hage ko Tavite, ʼo tou logoʼi ko Sehova ʼe nofo mo tatou “ ʼi [totatou] toʼomataʼu.”​—⁠Pesalemo 16⁠:⁠8.

Ko Te Huafa ʼo Te ʼAtua​—⁠ʼE Ina Faka Maʼuhigaʼi Tona ʼu Kalitate

ʼE lahi te ʼu lotu pea mo te ʼu tuʼuga Tohi-Tapu neʼe fakaliliu, neʼe mole nātou fakaʼaogaʼi pea mo fakahā te huafa ʼo te ʼAtua. (Pesalemo 83⁠:18) Kae, ʼi te ʼu tohi faka Hepeleo ʼāfea, ko te huafa ʼo Sehova ʼe teitei hā tuʼa 7 000! (ʼI meʼa fakaʼofaʼofa, he ko te tokolahi ʼo te kau fakaliliu Tohi-Tapu neʼe nātou molehi te huafa ʼo te ʼAtua, kae neʼe nātou taupau te  ʼu higoa ʼo te ʼatu ʼu ʼatua loi ʼaē ʼe talanoa kiai te ʼu tohi faka Hepeleo, ohage la ko Paale, mo Bel, mo Mérodach, pea mo Satana!)

Pea maʼa ʼihi, ko te mole fakaʼaogaʼi ʼo te huafa ʼo te ʼAtua ʼe ko he meʼa noa ia. Kae koutou fakakaukauʼi age muʼa: ʼE faigataʼa koa peʼe faigafua age hakita ʼofa pea mo felogoi fakalelei mo he tahi ʼe mole ʼi ai hona higoa? Ko te ʼu taʼi higoa faka tuʼulaga ʼaē ko ʼAtua pea mo ʼAliki (ʼaē ʼe toe fakaʼaogaʼi ki te ʼu ʼatua loi) ʼe feala ke faka maʼuhigaʼi ai te mālohi ʼo Sehova, tona ʼuhiga pule, peʼe ko tona tuʼulaga, kae ko tona huafa totonu ʼe ina faka ʼuhigaʼi tāfito ia ia. (Ekesote 3⁠:15; 1 Kolonito 8⁠:​5, 6) Ko te huafa ʼo te ʼAtua moʼoni ʼe ina faka maʼuhigaʼi tona ʼu kalitate pea mo tona ʼu agaaga. Neʼe ʼui fēnei e te tagata fai teolosia ko Walter Lowrie: “Ko he tagata ʼe mole ina ʼiloʼi te huafa ʼo te ʼAtua, ʼe mole ina ʼiloʼi lelei ia ko te ʼAtua ʼe ko he tahi ʼe maʼuli moʼoni.”

Tou vakaʼi te faʼifaʼitaki ʼa Maria, ko te fafine ʼi Ositalalia neʼe tauhi lelei ki te lotu Katolika. ʼI tana ʼuluaki felāveʼi mo te kau Fakamoʼoni ʼa Sehova, neʼe tali lelei e Maria ke fakahā age e te kau Fakamoʼoni te huafa ʼo te ʼAtua ʼi te Tohi-Tapu. Neʼe koteā tana manatu? “ ʼI taku hoki sio ʼaē ki te huafa ʼo te ʼAtua ʼi te Tohi-Tapu, neʼe ʼau lotomamahi. Neʼe ʼau maʼu te fakaloto mālohi ʼi te ʼatamai mālama ʼaē kua ʼau maʼu ʼi te temi nei, pea mo taku fakaʼaogaʼi te huafa ʼo te ʼAtua.” Neʼe hoko atu te ako ʼa Maria ia te Tohi-Tapu, pea ko te meʼa ʼaē neʼe hoki hoko ʼi tona maʼuli, ko tana ʼiloʼi ʼaē ko Sehova ʼe ko he tahi ʼe maʼuli moʼoni, pea kua feala ai leva ke ina fakatuputupu hana ʼu felogoi tologa pea mo ia.

Ei, ʼe feala ke tou “fakaōvi ki te ʼAtua,” logola ʼe mole tou sio mata kia te ia. ʼE feala ke tou ‘sio’ ʼi totatou ʼatamai pea mo totatou loto ki tona ʼulugaaga taulekaleka, pea mo tou fakatuputupu totatou ʼofa ʼaē kia te ia. Ko te taʼi ʼofa ʼaia ʼe “ko he noʼo haohaoa ia ki te logo tahi.”​—⁠Kolose 3⁠:⁠14, MN.

[Paki ʼo te pasina 7]

Ko te metitasio ki te ʼu fakatupu ʼa Sehova, ʼe ko he tahi ʼaia meʼa ke tou fakaōvi kia te ia