ʼE Koutou Fia ʼIloʼi Koa He Tahi ʼu Lotu?

“NEʼE ʼau kau ki te ʼu fono faka Kilisitiano teitei taʼu katoa, pea neʼe ʼau fiafia ʼi te fakahāhā ki te hahaʼi ia te Puleʼaga ʼo te ʼAtua,” ko te ʼui ʼaia ʼa Miguel, ko te Fakamoʼoni ʼa Sehova ʼi te temi nei ʼi te Potu Saute ʼo Amelika. “Kae neʼe ʼau kamata fakalogo ki te ʼu polokalama faka lotu ʼi te lātio pea mo sioʼi te ʼu tagata fai faka mafola lotu ʼi te televisio. ʼI taku manatu ʼe tokoni anai te ʼu polokalama ʼaia kia ʼau ke ʼau mahino ki te hahaʼi ʼaē ʼe kau ʼi te tahi ʼu lotu. Neʼe mahino kia ʼau ko tanatou ʼu akonaki ʼe mole ʼalutahi mo te Tohi-Tapu, kae neʼe ʼau fia ʼiloʼi meʼa fuli.”

ʼI te fenua ʼaia, neʼe faʼafai ia Jorge moʼo akoʼi te tauhi moʼoni ki te hahaʼi. Kae ʼi te tahi moʼi temi, neʼe toe hage ia ko Miguel, neʼe ina kamata fakalogo te ʼu polokalama faka lotu ʼi te lātio pea mo te televisio. Neʼe ina tau ʼui fēnei: “ ʼE tonu ke koutou ʼiloʼi te manatu ʼa te hahaʼi.” ʼI te fehuʼi age ʼaē pe koteā te ʼu tuʼutāmaki ʼaē ʼe feala ke hoko mokā kita fakalogo ki te taʼi ʼu akonaki hala ʼaia, neʼe ina tali fēnei: “ ʼE mole feala ki he meʼa ke ina maumauʼi te tui ʼa he tahi ʼe ina ʼiloʼi te moʼoni ʼo te Tohi-Tapu.” Ko te ʼu faʼifaʼitaki ʼaenī, ʼe nā lagaʼi te fehuʼi maʼuhiga, ʼE ko he aga fakapotopoto koa hakita fakalogo ki he ʼu akonaki ʼa niʼihi?

Tou Tali Te Lotu Faka Kilisitiano Moʼoni

ʼI te ʼosi mate ʼa te kau ʼapositolo, neʼe ʼulihi te tauhi maʼa he neʼe tuputupu te ʼu faʼahiga lotu ʼaē neʼe ʼui ʼe ko he ʼu Lotu Faka Kilisitiano. ʼI tana ʼiloʼi ʼaē ʼe hoko anai te faʼahi ʼaia, neʼe fakahā e Sesu peʼe feafeaʼi hakita ʼiloʼi te ʼu faʼahiga tauhi hala faka Kilisitiano ʼaia mai te tauhi faka Kilisitiano moʼoni. ʼUluaki, neʼe ina fai te fakatokaga ʼaenī: “Koutou tokaga ki te kau polofeta lohi, e natou omai kia koutou mo onatou kofu fakaʼakeno, kae ko he u lupo kaikai i onatou loto.” Neʼe ina toe ʼui fēnei: “E Koutou iloi anai natou i onatou fua.” (Mateo 7⁠:​15-23) Ko te kau tisipulo moʼoni ʼa Sesu ʼe nātou maʼuliʼi te ʼu meʼa ʼaē neʼe ina akonaki, pea ʼe ʼiloʼi gafua nātou ʼaki tonatou ʼu fua lelei. Ohage ko Sesu, ʼe nātou ʼaʼahi te hahaʼi moʼo fakamahino kia nātou te Puleʼaga ʼo te ʼAtua  ʼaē ʼe talanoa kiai te Tohi-Tapu. ʼE nātou mulimuli ki te faʼifaʼitaki ʼa Sesu, ʼo nātou fakamamaʼo mai te ʼu fihi faka politike pea mo faka sosiale. ʼE nātou fakamoʼoni ko te Tohi-Tapu ʼe ko te Folafola ʼa te ʼAtua, pea ʼe nātou faka ʼuhiga ʼe ko te moʼoni. ʼE nātou fakahā te huafa ʼo te ʼAtua. Pea ʼi tanatou faiga ʼaē ke nātou maʼuliʼi te ʼofa ʼaē ʼe akoʼi age e te ʼAtua, ʼe mole nātou kau ki te ʼu tau. Pea ʼe nātou aga fakatautehina.​—⁠Luka 4⁠:43; 10⁠:​1-9; Soane 13⁠:​34, 35; 17⁠:​16, 17, 26.

ʼAki te Tohi-Tapu ʼe feala hakita ‘sio ki te kehekehe ʼo te tagata faitotonu pea mo te tagata agakovi, te kehekehe ʼo te tagata ʼaē ʼe kaugana ki te ʼAtua pea mo te tagata ʼaē ʼe mole kaugana kia te ia.’ (Malakia 3⁠:18) Ia ʼaho nei, ko te kau atolasio moʼoni ʼe nātou logo tahi ʼi tanatou ʼu manatu pea mo tanatou ʼu aga, ohage pe ko te kau Kilisitiano ʼo te ʼuluaki sēkulō. (Efeso 4⁠:​4-6) Kapau kua koutou ʼiloʼi ia te kau Kilisitiano moʼoni, he koʼe koa ʼe koutou fia kumi pea mo fia ʼiloʼi te ʼu akonaki ʼa he tahi ʼu lotu?

Koutou Tokaga Ki Te Kau Faiakonaki Loi

ʼE fakahā mai e te Tohi-Tapu tatau aipe pe kua tou ako te moʼoni ʼo te Tohi-Tapu, kae ʼe feala pe hakita tuʼutāmaki ʼi te faʼahi fakalaumālie mai te ʼu akonaki loi. Neʼe fēnei te fakatokaga ʼa te ʼapositolo ko Paulo: “Koutou tokakaga, heʼe lagi feala ke ʼi ai he tahi ʼe ina toho anai koutou ki he hele, ʼaki te filosofia pea mo te ʼu kākā ʼaē ʼe vaʼiganoa, ʼo mulimuli ki te talatuku fakatagata, ʼo mulimuli ki te ʼu meʼa tāfito ʼo te malamanei, kae mole mulimuli kia Kilisito.” (Kolose 2⁠:​8, MN ) ʼE ko he fakatokaga maʼuhiga ʼaē ʼe fai mai ʼi te koga tohi ʼaia! ʼE feala hakotou tuʼutāmaki moʼoni ʼi te hahaʼi faiakonaki loi, heʼe nātou hage ko he ʼu manu fekai ʼe nātou fia ʼohofiʼi koutou pea mo kai koutou.

ʼE moʼoni, neʼe ʼiloʼi e Paulo ia te ʼu meʼa ʼaē neʼe tui kiai te hahaʼi. Ohage la ʼi te tahi ʼaho, neʼe ina kamata tana akonaki, ʼo ʼui maʼana: “U tagata o Atena, e au mamata atu, ko koutou ko he hahai lotu aupito i te meafuape. Koteuhi i taku feʼaluʼaki nee au mamata ki autou malumaluga taputapu pea nee au mau he aletale e tohi ai: ‘Ki Te Atua Hee Ilo.’ ” (Gaue 17⁠:​22, 23) Kae neʼe mole fafaga tuʼumaʼu e Paulo tona ʼatamai ʼaki te ʼu akonaki ʼa te kau hahaʼi fai filosofia Keleka.

ʼE kehekehe hakita fia mahino ki te hauʼaga ʼo he ʼu akonaki ʼo he lotu hala, pea mo hakita fia fafaga totatou ʼatamai ʼaki te ʼu akonaki ʼaia. * Neʼe fakanofo e Sehova te “kaugana agatonu mo fakapotopoto” moʼo foaki mai te ʼu akonaki ʼaē ʼe fakatafito ki tana Folafola. (Mateo 4⁠:4; 24⁠:45) Neʼe tohi fēnei e Paulo: “ ʼE mole feala ke koutou kau ki te ‘laupapa ʼa Sehova’ pea mo te laupapa ʼa te kau temonio. Peʼe ‘tou fia lagaʼi koa te fuaʼā ʼa Sehova’?”​—⁠1 Kolonito 10⁠:​20-22, MN.

Ko ʼihi kau faiakonaki loi, lagi ʼi muʼa atu neʼe ko te kau Kilisitiano moʼoni, kae ʼaki te temi neʼe nātou līaki te moʼoni kae nātou mafuli ki te hala. (Suta 4, 11) ʼE ko he faʼahi ʼe mole tonu ke tou punamaʼuli kiai. ʼI tana ʼosi palalau ʼaē ki te “kaugana agatonu mo fakapotopoto” ʼaē ʼe ina fakatātā te kau Kilisitiano fakanofo, neʼe talanoa ia Sesu ʼo ʼuhiga mo te “kaugana agakovi,” ʼe ko te kalasi ʼo he ʼu hahaʼi ʼe nātou meo fēnei, “E tuai mai toku Aliki,” pea ʼe nātou kamata tā tonatou ʼu kaugā gāue kaugana. (Mateo 24⁠:​48, 49) ʼI te agamāhani, ko te hahaʼi ʼaia pea mo tanatou ʼu tisipulo ʼe mole nātou fakamahino lelei tanatou ʼu akonaki; ko te meʼa ʼaē ʼe maʼuhiga kia nātou ʼe ko te maumauʼi ʼo te tui ʼa niʼihi. ʼO ʼuhiga mo nātou ʼaia, neʼe tohi fēnei e te ʼapositolo ko Soane: “Kapau e alu atu he tahi kia koutou, pea e mole ina avatu te akonaki, aua tautou tali iaʼia i toutou api, pea e au tala atu, aua tautou fakaʼalofa ki ai.”​—⁠2 Soane 10; 2 Kolonito 11⁠:​3, 4, 13-15.

Ko te hahaʼi fakamalotoloto ʼaē ʼe nātou lolotoga kumi te moʼoni, ʼe tonu ke nātou tokakaga lelei ki te ʼu meʼa ʼaē ʼe nātou logo kiai mai te ʼu lotu kehekehe. ʼAki te temi, ʼe tapuakina anai e te ʼAtua te hahaʼi fakamalotoloto ʼaē ʼe nātou kumi te moʼoni. ʼO ʼuhiga mo te poto fakaʼatua, ʼe ʼui fēnei e te Tohi-Tapu: “Kapau ʼe ke haga kumi te meʼa ʼaia ohage ko te siliva pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, pea . . . ʼe ke maʼu ai anai te ʼatamai mālama ʼo ʼuhiga mo te ʼAtua.” (Tāʼaga Lea 2:4, 5) Ko te kau Kilisitiano ʼe mole nātou toe fakalogo ki te ʼu lotu hala, koteʼuhi kua nātou maʼu te ʼatamai mālama ʼo ʼuhiga mo te ʼAtua ʼaki te Tohi-Tapu pea mo te kokelekasio faka Kilisitiano, pea kua nātou sio peʼe tapuakina feafeaʼi e Sehova te hahaʼi ʼaē ʼe takitaki e te ʼatamai mālama ʼaia.​—⁠2 Timoteo 3⁠:⁠14.

[Kiʼi nota]