Te tokoni ʼi te Tohi-Tapu: “ ʼAua naʼa kotou manako ki te paʼaga, kaʼe ke kotou fakafeʼauga pe ʼi te ʼu meʼa ʼae ʼe kotou maʼu.” —Hepeleo 13:5.

Ia ʼaho nei ʼe ui e te hahaʼi ʼe tonu ke lahi te ʼu koloa ʼae ʼe tonu ke natou maʼu. Kae ʼe ui ʼi te Tohi-Tapu ke tou maʼuli fakafeʼauga. ʼO feafeaʼi?

Tuku “te manako ki te paʼaga.” ʼE takina e te paʼaga ia te hahaʼi. ʼE mole kei natou tokakaga ki tonatou malolo fakasino mo ʼonatou famili mo kaumeʼa pea ʼe mole kei natou fakapotopoto. (1 Timoteo 6:10) Kae ʼe mole feala kia ia ʼae manumanū koloa ke “makona i te paaga.”—Ekelesiasi 5:9.

Fakamaʼuhigaʼi te hahaʼi kae mole ko te ʼu koloa. ʼE moʼoni ʼe ʼaoga mai pe te ʼu koloa kia tatou. Kae ʼe mole tatau ia mo he kaumeʼa ʼe feala ke ʼofa mai. Koia kapau ʼe tou maʼu ia he “kaumea” moʼoni, ʼe feala ke tokoni mai ke tou fakafeʼauga totatou maʼuli.—Taaga Lea 17:17.

Te tokoni ʼi te Tohi-Tapu: “Ko te loto ae e fiafia ko he faitoo lelei.”—Taaga Lea 17:22.

ʼE hage te lotofiafia ko he faitoʼo ki tou mahaki. Kae ʼe feafeaʼi hau fiafia kae ke mahamahaki?

Fakaha te lotofakafetaʼi. Kapau ʼe manatu he tahi ki tona mahaki ʼi te “aho fuli” pe, ʼe mole toe lelei anai he meʼa ki ai. (Taaga Lea 15:15) Kae ʼe maʼu te tokoni ʼaeni ʼi te Tohi-Tapu: “Kotou fakaha tokotou lotofakafetaʼi.” (Kolose 3:15) ʼE tonu ke tou maʼu ia te lotofakafetaʼi ʼo ʼuhiga mo meʼa fuli logo pe la ʼe lagi ko he ʼu kiʼi meʼa liliki. ʼE mole ke fiafia koa la moka ʼe ke sio ki te to ʼo te laʼa, moka malimali atu hou kaumeʼa pea moka agi te matagi?

Tokoni ki ni ʼihi. “ ʼE lahi age te fiafia moka kita foaki, ʼi takita tali.” (Gaue 20:35) ʼE moʼoni ʼe ke mahamahaki kae kapau ʼe ke lotofoaki ʼe tokagaʼi anai ʼau faiga pea ʼe ke logo fimalie ai. ʼE mole kei ke manatu anai ki tou mahaki. ʼE ke iloʼi neʼe ke fakafiafiaʼi te loto ʼo ni ʼihi pea ʼe ke toe fiafia ai pe mo koe.

Te tokoni ʼi te Tohi-Tapu: “Ke kotou iloʼi papau te ʼu meʼa ʼae ʼe maʼuhiga ʼaupito.” —Filipe 1:10.

ʼE mole lelei moka ʼe tahitahiga te fakatahi ʼa he taumatuʼa. ʼE tonu ke nā tahi manatuʼi ʼe takimuʼa tanā nofo ʼohoana ʼi tonā maʼuli.

Kolua fakatahi tuʼumaʼu. ʼE lagi lelei ke kolua fakakaukauʼi he ʼu meʼa ʼe feala ke kolua fai fakatahi. ʼE ui ʼi te Tohi-Tapu: “E lelei age te toko lua i te toko tahi.” (Ekelesiasi 4:9) ʼE feala ke kolua gaohi meʼa kai fakatahi peʼe kolua olo ʼo hahaʼele.

Kolua tahi fakaha tokolua ʼofa. ʼI te Tohi-Tapu ʼe fakalotomalohiʼi ai ia te taumatuʼa ke nā feʼofaʼofani mo fefakaʼapaʼapaʼaki. (Efeso 5:28, 33) ʼE feala ke nā fiafia moʼoni moka ʼe nā femalimaliʼaki mo nā fefaʼufuaʼaki pea moka ʼe nā fefoakiʼaki he kiʼi meʼa ʼofa. Pea ʼe tonu pe ke nā fefakahaʼaki tanā feʼofaʼaki fakataumatuʼa.—Hepeleo 13:4.