Neʼe faʼu e te ʼAtua te sino ʼo te tagata mo te fealagia ʼae ke ina lavaʼi pe te faitoʼo ʼo ia. Koia la ʼae ka lavea peʼe mahalu he faʼahi ʼo te sino, ʼe “fai atu aipe tana gaue ke papate te ʼu mataʼi lavea ʼae ʼe kovi peʼe ʼae ʼe veliveli pe.” (Johns Hopkins Medicine) ʼE ina foimo taʼofi te hali ʼo te toto mo faitoʼo te mataʼi lavea.

FAKAKAUKAUʼI AGE MUʼA: Kapau la neʼe faʼu e te Tupuʼaga totatou sino mo te fealagia ʼae ke ina faitoʼo te ʼu lavea, pea ʼe mahino ia ʼe ina toe faitoʼo anai mo te ʼu lavea ʼo te loto. Neʼe tohi fenei e te tagata faipesalemo: “ ’E ina fakamalolo te haha’i ʼae ’e loto mafasia, pea ’e ina haʼihaʼi ʼonatou lavea.” (Pesalemo 147:3, MN) ʼE lagi ʼe ke lotomamahi ʼi he aluʼaga neʼe hoki hoko pe ʼi tou maʼuli peʼe kua fualoa atu. Koia, ʼe ke iloʼi feafeaʼi ʼe haga anai ia Sehova ʼo faitoʼo ʼou lavea, ʼi te temi nei pea mo te temi ka haʼu?

Neʼe fakapapau fenei mai te ʼAtua: “Aua naa ke mataku ki he mea, koteuhi e au nofo mo koe. Aua naa ke feaveaki ni mata tuania, koteuhi ko au ko tou Atua. E au fakamalohii ia koe, e au hau o tokoni kia koe.” (Esaia 41:10) Ka iloʼi e he tahi ʼe tokaga ifo ia Sehova kia te ia, pea ʼe ina maʼu ai he tokalelei ʼi te loto mo he malohi feʼauga ki te ʼu ʼahiʼahi kehekehe. Neʼe fakahigoaʼi e te apositolo ko Paulo ia te tokalelei ʼaia ko te “tokalelei ʼo te ʼAtua ʼae ʼe maʼoluga age ʼi te ʼu ʼatamai fuli.” Neʼe ina toe ui fenei: “ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.”—Filipe 4:4-7, 9, 13.

ʼE tokoni mai te Tohi-Tapu ke tou tui ki te ʼu fakapapau ʼae ʼa Sehova ʼo ʼuhiga mo totatou ka haʼu. Ohage la ia Fakaha 21:4, 5 ʼe fakaha ai pe kotea anai ʼana fakatuʼutuʼu pea mo te tupuʼaga ʼae ʼo tatatou falala ʼe ina fakahoko moʼoni anai.

• “ ʼE ina holoholoʼi anai te ʼu loʼimata fuli” ʼo te hahaʼi. ʼE pulihi anai e Sehova te ʼu mamahi mo te ʼu tuʼania fuli, maʼia mo te ʼu faigataʼaʼia liliki.

• ʼE fakaʼaogaʼi anai e te Hau Mafimafi “ ʼae ʼe heka ʼi te hekaʼaga fakahau” ʼi selo, tona malohi moʼo fakagata te ʼu mamahi pea mo foaki te tokoni ʼae ʼe ʼaoga mai kia tatou.

• ʼE ui e Sehova “ ʼe agatonu pea mo moʼoni” ʼana fakapapau. Pea ʼe ina fakahoko tuʼumaʼu pe.

“ ʼE ina holoholoʼi anai te ʼu loʼimata fuli mai ʼonatou mata, ʼe mole toe ʼi ai anai te mate, mo te putu, mo te lauga pea mo te mamahi. Ko te ʼu meʼa ʼafeā kua puli ia. Pea neʼe ui fenei e Ia ʼae ʼe heka ʼi te hekaʼaga fakahau: ‘Koʼeni, ʼe au fakafoʼou ia meʼa fuli.’ Pea ʼe ina toe ui fenei: ‘Tohi, koteʼuhi ko te ʼu folafola ʼaia ʼe agatonu pea mo moʼoni.’ ”—Fakaha 21:4, 5.

ʼE ha ʼi te fakatupu pea mo te Tohi-Tapu ia te agaaga ʼo tatatou Tamai ʼae ʼe ʼi selo. Ka tou mamata ki te fakatupu ʼe tou fia kaumeʼa ai mo te ʼAtua. Pea ʼe ui fakahagatonu mai ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kia koutou.” (Sakopo 4:8) ʼE tuʼu fenei ia Gaue 17:27: “ ʼE mahino ia ʼe mole mamaʼo ia tatou takitokotahi.”

Kapau ʼe ke faiga ke ke mahino lelei age ki te ʼAtua, pea ʼe ke tui papau anai ‘ ʼe tokaga ia kia koe.’ (1 Petelo 5:7) Pea kotea anai ʼona fua lelei?

Koʼeni te hisitolia ʼo Toru, mai Saponia. Ko tana faʼe neʼe ko te Fakamoʼoni ʼa Sehova ʼae neʼe ina taupau ia ia. ʼI tana kua lahi, neʼe kau ki te kutuga agamalohi ʼe iloa ʼi Saponia. ʼI te manatu ʼa Toru, ko te ʼAtua ʼae neʼe ina matematehi ʼona kaiga mo ʼona feʼilo ʼuhi he neʼe fehiʼa te ʼAtua kia ia pea neʼe ko hona tautea ʼaia. Neʼe ko tana mamili tuʼumaʼu mo te hahaʼi agamalohi ʼae neʼe liliu ai ʼo agakovi mo lotofefeka. Pea neʼe ko tana fakaʼamu pe ʼe tahi, ke mate kei tupulaga kae kua ina ʼosi matehi he tahi ʼe iloa. Neʼe toe fia logologona foki mo ia.

Kae, ʼi te ako fakatahi ʼa Toru mo Hannah tona ʼohoana ia te Tohi-Tapu, neʼe fai e Toru te ʼu toe fetogi lahi ʼi tona maʼuli mo tana faʼahiga fakakaukau. Neʼe tokagaʼi e Hannah te kua fetogi leva ʼo tona ʼohoana. Pea ʼe ui fenei e Toru, ʼi te temi nei: “ ʼE ʼi  ai moʼoni te ʼAtua ʼe tokaga mai kia tatou takitokotahi. ʼE mole loto ia ke mate he tahi. Pea ka ʼe fakahemala he tahi, ʼe ina fakamolemole ʼana agahala. ʼE fagono mai kia meʼa fuli ʼe tou ui age, pea ʼe ko ia tokotahi pe ʼe mahino katoa kia tatou. Kua vave pulihi pe e Sehova ia te ʼu faigataʼaʼia mo te ʼu mamahi fuli. ʼE tokoni mai ʼi he ʼu temi ʼe mole tou ʼamanaki pe la ki ai. Pea ka ʼe tou vaivaiʼia, ʼe ina fakamalohiʼi tatou koteʼuhi ʼe ʼofa ia tatou.”—Pesalemo 136:23.

Ohage pe ko Toru, ʼe feala ʼi te temi nei, ke toe lelei age tou maʼuli he ʼe kua ʼamanaki pulihi pe e te ʼAtua ia te ʼu malaʼia mo ina holoholoʼi te ʼu loʼimata. Logo la ʼe kei tou maʼuʼuli ʼi he malama ʼe fonu ai te mamahi, kae ʼe feala ke ke maʼu he ʼu fua lelei mai te lototokaga ʼa te ʼAtua.