Ohage la, ʼi Amelika neʼe to te afā pea neʼe lahi te puli ʼo te ʼu koloa ʼo Sally. * ʼE ina ui fenei: “Neʼe au feʼekeʼaki pe ʼe au lava katakiʼi anai te aluʼaga ʼaia. Kia au neʼe mole kei lelei he meʼa.”

Pea ʼe feafeaʼi la mo kapau ʼe mate he tahi neʼe tou ʼofa mamahi ai? ʼE ui fenei e Janice ʼe maʼuli ʼi ʼOsitalalia: “ ʼI te mate ʼo ʼaku tama ʼe lua, neʼe mole kei ʼi ai he ʼuhiga ʼo toku maʼuli. Neʼe au faikole ki te ʼAtua ʼo ui kua gata taku faʼa kataki pea ʼe lelei pe ke au mate ʼo talu ai.”

Ko Daniel ia neʼe kovi ʼaupito tona lotomamahi koteʼuhi neʼe tono tona ʼohoana. ʼE ina fakamahino fenei: “ ʼI te ui mai e toku ʼohoana tana tono, neʼe hage pe neʼe hukiʼi au pea ko te lavea ʼaia neʼe au logoʼi ʼi toku sino lolotoga ni mahina.”

ʼI te nusipepa ʼaeni ʼe fakamahino mai ʼe ʼi ai he ʼuhiga ʼo tou maʼuli

• Moka hoko he tuʼutamaki fakanatula

• Moka mate he tahi neʼe ke ʼofa ai

• Moka tono tou ʼohoana

• Moka ke mahaki kovi

• Moka mole kei ke lava katakiʼi te maʼuli

Koia, tou vakaʼi muʼa pe ʼe feafeaʼi te maʼu ʼo te faʼa kataki moka hoko he tuʼutamaki fakanatula.