ʼE kei ke manatuʼi koa te temi ʼae neʼe ke toka ai kaʼe kei ke veliveli? ʼE lagi neʼe lavea tou nima peʼe neʼe mahaluhalu tou tuli. ʼE kei ke manatuʼi koa pe neʼe fakalotofimalieʼi feafeaʼi koe e tau faʼe? ʼE lagi neʼe ina fakamaʼa pea neʼe ina haʼi tou lavea. ʼE lagi neʼe ke tagi kaʼe ko ʼana palalau fakalotofimalie pea mo tana faʼufua kia koe ʼe ke logoʼi ai tou fimalie. ʼI te temi ʼaia ʼo tou maʼuli, neʼe ke maʼu ai hou fakalotofimalie.

Kaʼe, ʼi tatatou lalahi ake kua faigataʼa te maʼuli. ʼE lahi te ʼu fihifihia pea ʼe faigataʼa tatatou maʼu ia he fakalotofimalie. Meʼa fakaʼofaʼofa foki, ko te ʼu fihifihia ʼa te hahaʼi lalahi ʼe tahitahiga tona fakatokatoka ʼaki he meʼa haʼi lavea pea mo tatatou faʼufua mo tatatou faʼe. Tou vakaʼi age muʼa ia he ʼu faʼifaʼitaki.

• ʼE ke lotomamahi koa ʼuhi he ʼe mole kei ke gaue? ʼE ui e Julian ʼi te temi ʼae neʼe fakamavae ai ʼi tana gaue, neʼe lotomamahi. Neʼe ina feʼekeʼaki fenei: “ ʼE feafeaʼi anai haku tokaga ki toku kiʼi famili? Hili taku gaue kinakina lolotoga ni taʼu, he koʼe ʼe manatu te sosiete ʼe mole hoku ʼuhiga?”

• ʼE lagi ke lotomamahi ʼuhi he neʼe ke mavete mo tou ʼohoana. ʼE ui fenei e Raquel: “Fokifa pe kua liaki au e toku ʼohoana kua hili nei ki ai taʼu katoa vaelua. Neʼe au lotomamahi ʼaupito pea neʼe ko he kafo mamahi ʼaia. Neʼe ko he mamahi ʼi te faʼahi fakasino ʼo toe feia pe ʼi te faʼahi ʼo te loto. Pea neʼe au mataku ʼosi.”

• ʼE lagi ke tau mo he mahaki ʼe kovi. ʼE mole fakaalu ia ke lelei. ʼE feala ʼi ʼihi temi ke ke manatu ohage ko te pateliaka ko Sopo ʼae neʼe tagi fenei: “E au fakalialia kia natou!. . . E mole au mauli anai o heegata!” (Sopo 7:16) ʼE lagi ke lotomahino ki te ʼu faʼahi ʼae ʼe logoʼi e Luis. Ko he tagata ʼe taʼu 80, neʼe ina ui fenei: “ ʼI ʼihi temi, ʼe au manatu ʼe lelei age pe ke au fakatalitali ki te mate.”

• Peʼe lagi ko te mate ʼo he tahi neʼe ke ʼofa mamahi ai, ʼo tupu ai tau kumi ia he fakalotofimalie. ʼE ui fenei e Robert: “ ʼI te ʼaumai ʼae ʼo te logo kua mate toku foha ʼi te tuʼutamaki neʼe hoko ʼi te vakalele, neʼe mole au fia tui. Kaʼe, neʼe au lotomamahi. Ko te lotomamahi ʼaia ʼae ʼe fakatatau ʼi te Tohi-Tapu ki he heleta ʼe ina hukiʼi tou loto.”—Luka 2:35.

Logo la te ʼu aluʼaga fakalotomamahi ʼae neʼe maʼu e Robert, mo Luis, mo Raquel pea mo Julian kaʼe neʼe natou maʼu ia he fakalotofimalie. Neʼe natou maʼu Ia Ia ʼae ʼe ina foaki te faʼahi ʼaia, ʼe ko te ʼAtua Mafimafi. ʼE ina foaki feafeaʼi ia te fakalotofimalie? ʼE feala koa ke ina foaki mai te fakalotofimalie ʼae ʼe ʼaoga kia koe?