ʼE lahi te ʼu tokoni ʼe tou maʼu ʼo ʼuhiga mo te katakiʼi ʼo totatou lotomamahi. Kaʼe, ʼe mole lelei te ʼu tokoni fuli. Ohage la, ʼe ui atu anai e ʼihi ke tuku tau tagi peʼe ko te fakaha te ʼu meʼa ʼae ʼe ke logoʼi. Kaʼe, ko ʼihi ʼe natou fakalotomalohiʼi anai koe ke ke fakaha ki tuʼa te ʼu meʼa ʼae ʼi tou loto. ʼE fakaha ʼi te Tohi-Tapu he manatu fakapotopoto ʼe alu tahi mo te ʼu fekumi neʼe fai.

Ko ʼihi agaʼi fenua, ʼe natou ui ʼe mole tonu ke fetagihi te hahaʼi tagata. Kaʼe, ʼe tonu koa ke tou ufiufi ʼi te fetagihi, tafitō la moka ʼe hahaʼi? ʼE ui e te ʼu toketa faiva ʼi te mahaki ʼulu, ka tou lotomamahi, ʼe ko he agamahani hatatou fetagihi. Pea ʼe feala ke tokoni atu ke ke faʼa kataki, logo la te lahi fau ʼo tou lotomamahi. Kaʼe, ka tou fakamaʼumaʼu te fia tagi ʼe feala ke lahi age ʼona fua kovi. ʼE mole ui ʼi te Tohi-Tapu ʼe kovi te tagi peʼe ke mole fetagihi te hahaʼi tagata. Ohage la, ʼe feala ke ke manatuʼi ia te faʼifaʼitaki ʼa Sesu. ʼI te mate ʼo tona kaumeʼa ko Lasalo, neʼe tagi ʼi muʼa ʼo te hahaʼi fakatahi mo te famili ʼo tona kaumeʼa ʼofaina ʼaia. Logo la neʼe ina maʼu te malohi ʼae moʼo fakatuʼuake te kau mate.—Soane 11:33-35.

Ko te ita ʼe ko he koga ʼe kau ki te lotomamahi, tafitō la moka neʼe mate fakafokifa he tahi. ʼE lahi te ʼu tupuʼaga ʼe feala ke logoʼi ai e he tahi te ita, ohage la ko he ʼu palalau vale pea mo he ʼu palalau ʼe mole hona ʼuhiga, ʼe fai e he tahi ʼe fakaʼapaʼapaʼi. ʼE fakamahino fenei e Mike, mai Afelika Saute: “Neʼe kei au taʼu 14 pe ʼi te mate ʼo taku tamai. ʼI te ʼavaifo, neʼe ui e he patele Anglican ʼe pauʼi e te ʼAtua te hahaʼi agalelei moka ʼe ina fia fakaʼaoga natou. * Neʼe au ita ʼi te ʼu palalau ʼaia he neʼe kei matou loto ke maʼuli tamatou tamai. Ia ʼaho nei, hili ki ai taʼu ʼe 63, ʼe kei au lotomamahi pe ʼuhi ko te ʼu palalau ʼaia.”

Pea ʼe feafeaʼi ki tatatou tukugakoviʼi ia tatou? Ko he tahi ʼe lotomamahi ʼe ina tukugakoviʼi tuʼumaʼu ia ia, tafitō la moka neʼe mate fakafokifa he tahi. ʼE lagi ina ui tuʼumaʼu anai, ‘Ka na pau la neʼe au fai feia ʼe mole lagi hoko anai.’ Peʼe lagi lahi age tau tukugakoviʼi koe mo kapau la neʼe ke tokakovi mo ia ʼae neʼe mate ʼi takolua fesioʼaki fakaʼosi.

Kapau ʼe ke ita peʼe ke tukugakoviʼi ia koe, ʼaua naʼa ke nofo mo te ʼu manatu ʼaia. Kaʼe, fakaha te meʼa ʼae ʼe ke logoʼi ki hou kaumeʼa ʼe fagono atu anai pea ʼe ina fakamanatuʼi atu anai ko te tokolahi ʼe natou fakalaka ʼi te ʼu aluʼaga ʼaia. ʼE ui fenei ʼi te Tohi-Tapu: “E ofa te kaumea i te temi fuli, pea i te malaia e hage ia ia ko he tehina.”—Taaga Lea 17:17.

Ko Sehova ʼAtua, totatou Tupuʼaga, ʼe ko te Kaumeʼa lelei ʼaia ʼe feala ke maʼu e he tahi ʼe lotomamahi. Fakaha ki ai te ʼu meʼa fuli ʼae ʼi tou loto koteʼuhi “e tokaga ia kia koutou.” (1 Petelo 5:7) Pea tahi, ʼe ina fakapapauʼi mai ʼe ina fakafimalieʼi te ʼu fakakaukau pea mo te loto ʼo natou ʼae ʼe fakaovi kia te ia ʼaki tona “tokalelei . . . , ae e fakalaka age i te u atamai fuli.” (Filipe 4:6, 7) ʼE feala ke toe fakafimalieʼi koe e te ʼAtua ʼaki tana Folafola, te Tohi-Tapu. ʼE feala ke ke fai he lisi ʼo te ʼu vaega Tohi-Tapu fakalotofimalie. (Vakaʼi te fakamatala ʼae ʼi te ʼa takai.) ʼE feala ke ke ako fakaʼatamai ʼihi vaega Tohi-Tapu. Ka ke fakakaukauʼi te ʼu manatu ʼae ʼe maʼu ai, ʼe feala ke ke logoʼi ai hou fimalie, tafitō la ʼi te poʼuli moka ke nofo tokotahi pea ʼe mole ke mamoe.—Esaia 57:15.

Heʼeki faʼa fualoa ki ai, ko te tagata ʼe tou fakahigoa anai ko Jack ʼe taʼu 40 tupu, neʼe mate tona ʼohoana ʼi te kosea. ʼE ui e Jack, ʼi ʼihi temi ʼe ina logoʼi tana nofo  tokotahi. Kaʼe, neʼe tokoni lahi age kia ia te faikole. ʼE ina fakamahino fenei: “Ka au faikole kia Sehova, ʼe mole au nofo tokotahi ʼi he temi. ʼE au tau ʼala ʼi te poʼuli pea ʼe faigataʼa taku toe moe. Kaʼe, hili taku lau mo metitasio ki he ʼu vaega Tohi-Tapu fakalotofimalie pea mo au fakaha ki te ʼAtua te ʼu meʼa ʼae ʼi toku loto ʼi te faikole, ʼe au logoʼi ai he tokalelei ia au. ʼE au logoʼi he fimalie ʼi taku fakakaukau mo toku loto pea kua au lava moe lelei.”

Ko he fafine ʼe higoa ko Vanessa, neʼe mate tana faʼe ʼuhi ko te mahaki. Neʼe ina toe fakatokagaʼi te malohi ʼo te faikole. ʼE ina ui fenei: “ ʼI te ʼu temi faigataʼa, ko te faʼahi pe ʼae neʼe au lava fai, neʼe ko te faikole pea neʼe au tagi mamahi. Neʼe fagono ia Sehova ki ʼaku faikole pea neʼe ina foaki tuʼumaʼu mai te malohi ʼae neʼe ʼaoga kia au.”

Ko ʼihi tagata popoto, ʼe natou fakalotomalohiʼi ia natou ʼae ʼe lotomamahi ke natou tokoni ki niʼihi, peʼe ke natou foaki tonatou temi ʼaki he lotolelei moʼo fai ia he gaue. Ko te tokoni ki niʼihi ʼe feala ke malū ifo ai te lotomamahi mo maʼu te fiafia. (Gaue 20:35) Tokolahi te kau Kilisitiano ʼe lotomamahi, ʼe natou fakatokagaʼi ka natou tokoni ki niʼihi ʼe natou maʼu ai he fakalotofimalie.—2 Kolinito 1:3, 4.