ʼI TE temi muʼa, ko he tagata tauhi ʼapi neʼe tokaga ki te ʼapi peʼe ki te ʼu koloa ʼa he tahi. Ko te ʼu kupu Hepeleo mo Fakakeleka ʼae neʼe fakaliliu ʼaki “te tagata tauhi ʼapi,” ʼe fakaʼuhiga ʼi ʼihi temi ki te tagata taupau peʼe ki te pule ʼo he ʼapi.

Ko Sosefo, te foha ʼo te pateliaka ko Sakopo neʼe ko he kaugana ʼi Esipito. ʼI te temi ʼaia, neʼe fakanofo ia ia e tona pule ko tana tagata tauhi ʼapi. ʼEi, neʼe ina tuku leva “ana mea fuli kia nima o Sosefo.” (Sen. 39:2-6) Ki muli age, neʼe liliu leva ia Sosefo ko he takitaki malohi ʼi Esipito. Pea neʼe toe maʼu mo ia tana tagata tauhi ʼapi.—Sen. 44:4.

ʼI te temi ʼo Sesu, ko te ʼu tagata maʼu kele neʼe tau maʼuli ʼi he ʼu kolo ʼe mamaʼo mai ʼanatou gaueʼaga. Koia ʼae neʼe natou tuku ke tokakaga he ʼu tagata tauhi ʼapi ki te gaue ʼo ʼanatou tagata gaue kele ʼi te ʼaho fuli.

Ko ai ʼae neʼe feala ke ina fakahoko te gaue ʼo he tagata tauhi ʼapi? Ko te tagata faitohi Loma ko Columelle neʼe ina ui, neʼe tonu ke fili he pule, peʼe ko he tagata tauhi ʼapi, peʼe ko he tagata kaugana kua ina “fakaha ʼona fealagia.” Neʼe tonu ko he tahi ʼe tokaga anai “ke fakahoko e te kau gaue ʼanatou gaue, kae ke mole agakovi.” Neʼe toe ui e Columelle, ko te faʼahi ʼae ʼe maʼuhiga tafito ki he tagata tauhi ʼapi, ʼe mole tonu ke manatu ʼe ina iloʼi ia meʼa fuli. Pea ʼe tonu ke ina fia ako tuʼumaʼu he ʼu aluʼaga foʼou.

ʼE fakatatau ʼi te Folafola ʼa te ʼAtua ʼihi gaue ʼe fakahoko ʼi te kokelekasio ki te ʼu gaue ʼa he tagata tauhi ʼapi. Ohage la, neʼe fakalotomalohiʼi e te apositolo ko Petelo ia te kau Kilisitiano ke natou fakaʼaogaʼi ʼonatou fealagia ʼae neʼe foaki age e te ʼAtua. Kotea tona tupuʼaga? Ke natou “fetokoniʼaki ohage ko he kau tagata tauhi lelei ʼo te ʼofa makehe ʼo te ʼAtua.”—1 Pet. 4:10.

Neʼe toe palalau mo Sesu ʼo ʼuhiga mo he tagata tauhi ʼapi ʼi tana faʼifaʼitaki ʼae ʼe tou maʼu ia Luka 16:1-8. Pea tahi, neʼe ina fakapapau ki ʼana tisipulo ʼe ina fakanofo anai he “tagata faifekau agatonu mo poto,” he “tagata tauhi ʼapi agatonu.” ʼE tou maʼu tana fakapapau ʼaia ʼi he taʼaga lea ʼo ʼuhiga mo te fakailoga ʼo tana ʼi heni ʼi tona ʼuhiga Hau. Ko te maʼua tafito ʼo te tagata tauhi ʼapi ʼaia, ko te tufaki ʼo te meʼa kai fakalaumalie ki te ʼu tisipulo ʼa Kilisito lolotoga te ʼu ʼaho fakamuli ʼaeni. (Mat. 24:45-47; Luka 12:42) ʼE tou lotofakafetaʼi lahi ki te tagata tauhi ʼapi agatonu ʼaia, ʼi tana foaki mai he ʼu tohi moʼo fakamalohiʼi tatatou tui. Pea ʼe feala tona maʼu ʼi he potu pe ʼe tou maʼuʼuli ai.