1. Kotea te ʼu moʼoni neʼe ke iloʼi ʼi tau kamata ako te Tohi-Tapu?

 KEI KE manatuʼi koa te temi ʼae neʼe ke kamata ako ai te Tohi-Tapu? Neʼe lagi ke punamaʼuli ʼi tau iloʼi ʼae te huafa ʼo te ʼAtua. Neʼe lagi ke lotofimalie ʼi tau iloʼi ʼae ʼe mole fakamamahiʼi e te ʼAtua te hahaʼi ʼi te ʼifeli. Pea neʼe lagi ke fiafia ʼi tau mahino ʼae ʼe ke toe fesioʼaki anai mo ʼou famili ʼae kua mamate pea mo ke maʼuli fakatahi anai mo natou ʼi te palatiso ʼi te kele.

2. Kotea ʼae neʼe ke fai ʼi te hoko atu ʼo tau ako te Tohi-Tapu? (Efeso 5:1, 2)

² ʼI te hoko atu ʼo tau ako te Tohi-Tapu, neʼe toe lahi age ai tou ʼofa kia Sehova. Neʼe uga koe e tou ʼofa ʼaia ke ke maʼuliʼi te ʼu meʼa ʼae neʼe ke ako. Neʼe ke toʼo leva he ʼu tonu ʼe lelei he neʼe fakatafito ki te ʼu pelesepeto ʼi te Tohi-Tapu. Neʼe ke fetogi tau faʼahiga manatu mo tau aga he neʼe ke fia fakafiafiaʼi ia Sehova. Ohage pe ko he fanau ʼe ina faʼifaʼitakiʼi ʼana matuʼā ʼofa, ʼe ke faʼifaʼitakiʼi tau Tamai ʼae ʼi selo.—Lau ia Efeso 5:1, 2.

3. Kotea te ʼu fehuʼi ʼe feala ke tou fai kia tatou?

³ ʼE feala ke tou fai te ʼu fehuʼi ʼaeni kia tatou: “Talu mai taku papitema, kua toe malohi age koa toku ʼofa kia Sehova? Kua hage koa taku faʼahiga manatu mo taku aga ko Sehova. Ohage la, kua lahi age koa toku ʼofa ki ʼoku tehina mo tuagaʼane?” Kapau ʼe ke tokagaʼi ʼe mole kei malohi tou ʼofa ohage ko te kamata, ʼaua naʼa ke lotovaivai. Neʼe hoko te faʼahi ʼaia ki te ʼu ʼuluaki Kilisitiano. Kae neʼe mole liʼakina natou e Sesu, pea ʼe mole ina liʼakina anai mo tatou. (Fkha. 2:4, 7) ʼE ina iloʼi ʼe feala pe ke toe malohi totatou ʼofa ʼae neʼe tou maʼu ʼi tatatou iloʼi ia te moʼoni.

4. Kotea ʼae ka tou vakaʼi anai ʼi te alatike ʼaeni?

 ⁴ ʼE tou vakaʼi anai ʼi te alatike ʼaeni pe ʼe feafeaʼi hatatou haga fakamalohi totatou ʼofa kia Sehova pea mo te hahaʼi. ʼE tou toe vakaʼi anai tona fua lelei kia tatou pea mo ʼotatou tehina mo tuagaʼane.

5-6. Kotea te ʼu faigataʼaʼia neʼe felaveʼi mo te apositolo ko Paulo ʼi tana minisitelio, kae kotea ʼae neʼe tokoni kia ia ke hoko atu tana tauhi kia Sehova?

⁵ Neʼe fiafia te apositolo ko Paulo ʼi tana tauhi kia Sehova. Kae neʼe lahi te ʼu faigataʼaʼia neʼe tau mo ia. ʼI ʼihi temi, neʼe loaloaga tana faifolau, pea neʼe feala ke tuʼutamaki ai. Ohage la, neʼe tau hoko kia ia “he ʼu tuʼutamaki ʼi te ʼu vai tafe, [pea] mai te hahaʼi kaihaʼa.” Pea neʼe toe ta ia ia e ʼona fili. (2 Ko. 11:23-27) Pea ko ʼihi Kilisitiano neʼe mole natou lotofakafetaʼi ki tana ʼu gaue ʼae neʼe ina fai moʼo tokoni kia natou.—2 Ko. 10:10; Flp. 4:15.

⁶ Kotea ʼae neʼe tokoni kia Paulo ke hoko atu tana tauhi kia Sehova? Neʼe iloʼi lelei e Paulo ia Sehova ʼuhi he neʼe ina lau te ʼu Tohi Taputapu pea mo te ʼu aluʼaga ʼae neʼe hoko kia ia. Neʼe tui papau ai ʼe ʼofa Sehova ia ia. (Loma 8:38, 39; Efe. 2:4, 5) Pea neʼe toe lahi ʼaupito ai tona ʼofa kia Sehova. Neʼe ina fakaha tona ʼofa ʼaia ʼi ‘tana tokoni ki te kau maʼoniʼoni pea neʼe ina haga fai.’—Hep. 6:10.

7. Kotea ʼae ʼe feala ke tou fai ke toe malohi ai totatou ʼofa kia Sehova?

⁷ ʼE feala ke toe malohi totatou ʼofa kia Sehova moka tou ako fakamalotoloto tana Folafola. ʼI tau lau he koga Tohi-Tapu, faiga ke ke iloʼi lelei age ia Sehova. Fai te ʼu fehuʼi ʼaeni: “ ʼI te fakamatala ʼaeni, ʼe fakaha feafeaʼi mai e Sehova tona ʼofa ia au? Kotea ʼae ʼe ina uga ai au ke au ʼofa kia te ia?”

8. ʼE tokoni feafeaʼi mai te faikole ke toe malohi ai totatou ʼofa kia Sehova?

⁸ Ko te tahi faʼahi ʼe feala ke tou fai ke toe malohi ai totatou ʼofa kia Sehova, ʼe ko hatatou faikole ʼi te ʼaho fuli, ʼo fakaha kia te ia te ʼu meʼa fuli ʼi totatou loto. (Pes. 25:4, 5) Pea ʼe tali mai anai Sehova ki ʼatatou faikole. (1 Soa. 3:21, 22) ʼE ui fenei e te tuagaʼane ʼi Asia: “ ʼI te kamata, neʼe au ʼofa kia Sehova ʼuhi ko te ʼu meʼa ʼae neʼe au ako ʼo ʼuhiga mo ia. Kae ʼi taku tokagaʼi leva tana tali mai ki ʼaku faikole, neʼe toe malohi ai toku ʼofa kia te ia. Neʼe ʼekenaki ai au ke au fai te ʼu meʼa ʼae ʼe ina leleiʼia.”

9. Kotea ʼae ʼe ha mai ai neʼe fakamalohi e Timoteo tona ʼofa ki te ʼu tehina mo tuagaʼane?

⁹ Hili ni taʼu ʼi te kua liliu ʼa Paulo ko he Kilisitiano, neʼe feiloʼiʼaki mo te tupulaga ko Timoteo. Neʼe ʼofa ia Timoteo kia Sehova mo te hahaʼi. Pea ki muli age, neʼe tohi fenei e Paulo ki te kau Kilisitiano ʼo Filipe: “ ʼE mole au maʼu he tahi ʼe hage ko Timoteo ʼae ʼe tokaga moʼoni anai kia koutou.” (Flp. 2:20) ʼE ha mai ai, logo la neʼe poto Timoteo ʼi te fakatuʼutuʼu ʼo te ʼu gaue pea mo faiakonaki, kae neʼe malave lahi age kia Paulo tona ʼofa ki te ʼu tehina mo tuagaʼane. Koia, neʼe lagi fakaʼamu te kau Kilisitiano ʼaia ke toe liliu age Timoteo ʼo ʼaʼahi natou.—1 Ko. 4:17.

10. Neʼe fakaha feafeaʼi e Anna mo tona ʼohoana tanā ʼoʼofa ki te ʼu tehina mo tuagaʼane?

¹⁰ ʼE toe feia mo tatou, ʼe tou kumi he ʼu aluʼaga ke tou tokoni ai ki ʼotatou tehina mo tuagaʼane. (Hep. 13:16) Tou vakaʼi pe kotea ʼae neʼe fai e Anna mo tona ʼohoana, ʼae neʼe tou palalau ki ai ʼi te alatike kua ʼosi. ʼI te ʼosi ʼo he afā, neʼe nā olo ʼo fakasiosio he kiʼi famili ʼe Fakamoʼoni kia Sehova. Neʼe nā sio ai kua maumau te ʼato ʼo tonatou ʼapi,  pea neʼe mole kei honatou ʼu mutuʼi meʼa maʼa. ʼE fakamatala fenei e Anna: “Neʼe ma ʼave ʼonatou mutuʼi meʼa ʼo fo, mo fakamolemole pea mo fetuʼi. Pea neʼe ma toe ʼave leva kia natou. Kia maua, neʼe ko he kiʼi tokoni veliveli pe ʼaia neʼe ma fai kia natou, kae neʼe tupu ai tomatou fakakaumeʼa lelei ʼo kaku mai ki te temi nei.” Ko te ʼofa ʼo Anna mo tona ʼohoana ki te ʼu tehina mo tuagaʼane neʼe uga ai naua ke nā fai he ʼu gaue moʼo tokoni kia natou.—1 Soa. 3:17, 18.

11. (1) ʼE malave feafeaʼi ki ʼihi tatatou faiga ʼae ke tou fakaha te ʼofa? (2) ʼO mulimuli kia Taʼaga Lea 19:17, kotea ʼae ka fai e Sehova moka tou fakaha totatou ʼofa ki te ʼu tehina mo tuagaʼane?

¹¹ Ka tou fakaha ki te ʼu tehina mo tuagaʼane tatatou agalelei mo totatou ʼofa, ʼe natou tokagaʼi ai tatatou faiga ʼae ke tou faʼifaʼitakiʼi ia Sehova. Pea lagi mole natou maʼu anai he faigamalie ke natou fakamalo mai. Ko te tuagaʼane ʼi Asia, ʼae kua tou ʼosi palalau ki ai, ʼe ina manatuʼi ia natou ʼae neʼe tokoni age kia ia ʼi tana kei veliveli. ʼE ina ui fenei: “ ʼE au lotofakafetaʼi lahi ki te ʼu kiʼi tehina ʼaia neʼe ʼomai ʼo kumi au ke matou olo ʼo faifakamafola. Neʼe au alu mo natou, neʼe natou fakaafe au ke matou kakai, pea natou toe ʼave au ki fale. Kua au mahino ʼi te temi nei neʼe mole faigafua kia natou. Kae neʼe natou tokoni lahi mai he neʼe natou ʼoʼofa ia au.” ʼE moʼoni, ʼe mole fakamalo mai anai te hahaʼi fuli ʼae neʼe tou tokoni kia natou. ʼE ui e te tuagaʼane ʼaia mai Asia: “ ʼE au fia fakamalo age kia natou ʼaia, kae mole au iloʼi pe kua natou nonofo ʼifea ʼi te temi nei. Kae ʼe iloʼi e Sehova, koia ʼe au kole ai ke ina fakapale natou.” ʼE moʼoni te ʼu palalau ʼaia ʼa te tuagaʼane. ʼE tokagaʼi e Sehova moka tou agalelei ki ʼihi, tatau aipe pe mole faʼa lahi te meʼa ʼae ʼe tou fai maʼa natou. Kae kia Sehova ʼe ko he sakilifisio maʼuhiga ʼaia pea ʼe hage kia ia ko he maʼua ʼe ina huʼi mai anai.—Lau ia Taʼaga Lea 19:17.

12. ʼE lava fakaha feafeaʼi e te ʼu tehina tanatou ʼoʼofa ki te kokelekasio? (Vakaʼi mo te ʼu pāki.)

 ¹² Kapau ko koe ko he tehina, ʼe feafeaʼi hau fakaha tou ʼofa ki ʼou tehina mo tuagaʼane pea mo ke tokoni kia natou? Ko te tehina tupulaga ko Jordan, neʼe ina fakalavelave age ki he tagata ʼafea pe kotea la he tahi ʼu gaue ʼe feala ke ina fai moʼo tokoni ki te kokelekasio. Neʼe fakamalo age te tagata ʼafea ki te ʼu gaue ʼae neʼe kua ina fai pea neʼe ina fakaha age leva te tahi ʼu gaue ke ina fai. Ohage la, neʼe ina ui age ke haʼu tautonu ki te ʼu fono ke feala hana ʼalofa ki te ʼu tehina mo tuagaʼane, mo fai hana ʼu tali ʼi te ʼu fono, mo faifakamafola tuʼumaʼu mo tana kiʼi kutuga faifakamafola, pea mo fakakaukauʼi he ʼu gaue ʼe feala ke ina fai moʼo tokoni ki ʼihi. Neʼe mulimuli ki ai ia Jordan. Hili ʼaia, neʼe kua poto ia Jordan ʼi te fai ʼo ʼihi gaue, pea neʼe toe malohi age tona ʼofa ki ʼona tehina mo tuagaʼane. Neʼe mahino kia ia ka faifekau fakaminisitelio he tehina, ʼe mole kamata ai tana tokoni ki te ʼu tehina mo tuagaʼane, kae ʼe hoko atu pe tana tokoni.—1 Tim. 3:8-10, 13.

13. Kotea ʼae neʼe ina uga ia te tehina ko Christian ke toe tagata ʼafea?

¹³ ʼE feafeaʼi moka neʼe ke tagata ʼafea peʼe faifekau fakaminisitelio ʼi te temi muʼa? ʼE kei manatuʼi pe e Sehova te ʼu gaue ʼae neʼe ke fai ʼuhi ko tou ʼofa. (1 Ko. 15:58) ʼE ina toe tokagaʼi tau haga fakaha tou ʼofa ʼi te temi nei. Ko te tehina ko Christian neʼe lotomamahi ʼi te temi ʼae neʼe toʼo ai tana pilivilesio ʼae ko te tagata ʼafea. Kae ʼe ina ui fenei: “Neʼe au fai te tonu ʼae ke au fai ia meʼa fuli ʼe au lavaʼi moʼo tauhi kia Sehova ʼuhi ko toku ʼofa ia ia, pe ʼe au tagata ʼafea peʼe kailoa.” Ki muli age, neʼe toe fakanofo tagata ʼafea ia Christian. ʼE ina ui: “Neʼe au tuʼania ʼi toku toe hinoʼi ʼae ke au tagata ʼafea. Kae kapau neʼe fakaha mai e Sehova tona manavaʼofa ʼo au toe liliu ai ko he  tagata ʼafea, ʼe au fakahoko anai toku maʼua ʼuhi ko toku ʼofa ia ia pea mo ʼoku tehina mo tuagaʼane.”

14. Kotea te ako ʼe ke maʼu mai te fakamatala ʼo te tuagaʼane ko Elena?

¹⁴ ʼE toe fakaha e te ʼu kaugana ʼa Sehova tonatou ʼofa ki tonatou tatau. (Mat. 22:37-39) ʼE fakamoʼoni ki ai te tuagaʼane ko Elena mai Géorgie. ʼE ina ui: “ ʼI te kamata, ko te meʼa pe ʼae neʼe ina uga ai ke au faifakamafola neʼe ko toku ʼofa kia Sehova. Kae ʼi te lahi age ʼo toku ʼofa ia Sehova, neʼe toe lahi ai mo toku ʼofa ki te hahaʼi. Neʼe au fakakaukauʼi pe kotea ʼape ʼonatou faigataʼaʼia pea mo te ʼu palalau ka au fai ke malave ai ki tonatou loto. ʼI taku fai feia, neʼe toe lahi age taku fia tokoni kia natou.”—Loma 10:13-15.

15-16. Ohage ko tona fakaha ʼi te ʼu pāki, kotea te ʼu fua lelei ʼe tou maʼu moka tou fakaha te ʼofa ki ʼihi?

¹⁵ Ka tou fakaha totatou ʼofa ki te ʼu tehina mo tuagaʼane, ʼe mole fua lelei pe kia natou. ʼI te kua mafola ʼo te taʼi mahaki COVID-19, ko te tehina ko Paolo mo tona ʼohoana neʼe nā tokoni ki te ʼu tuagaʼane kua vaivai matuʼa. Neʼe nā akoako age pe ʼe feafeaʼi hanatou fakaʼaogaʼi ʼanatou kiʼi masini toʼotoʼo moʼo faifakamafola. Neʼe faigataʼa ki he tuagaʼane te faʼahi ʼaia. Kae neʼe faiga fakamalotoloto, pea neʼe poto leva. Neʼe feala ai ke ina fakaafe ʼona kaiga ki te ʼAho Fakamanatu ʼo te mate ʼo Sesu. Ko te toko onogofulu neʼe natou mulimuli ki te toʼotoʼoga ʼi te zoom. Neʼe fua lelei te ʼu faiga ʼa  Paolo mo tona ʼohoana ki te tuagaʼane ʼo feia mo ʼona kaiga. Ki muli age, neʼe faitohi te tuagaʼane kia Paolo, o ina ui fenei: “ ʼE au fakamalo atu ʼi takolua tokoni mai kia matou ʼaeni kua finematuʼa. ʼE mole au galoʼi anai te tokaga ʼa Sehova kia matou pea mo takolua gaue kinakina moʼo tokoni mai.”

¹⁶ Neʼe ako e Paolo te faʼahi maʼuhiga mai te aluʼaga ʼaia: ʼE maʼuhiga age te ʼofa ʼi te ʼatamai malama peʼe ko he ʼu fealagia ʼe maʼu e he tahi. ʼE ina ui fenei: “Neʼe au taupau fakasiliko. Kae kua au mahino ʼi te temi nei, kapau kua galoʼi e te ʼu tehina mo tuagaʼane ʼaku akonaki, kae ʼe kei natou manatuʼi pe te ʼu gaue ʼae neʼe au fai moʼo tokoni kia natou.”

17. Ka tou fakaha te ʼofa ki ʼihi, ko ai ʼae ʼe toe fua lelei ki ai?

¹⁷ Ka tou fakaha te ʼofa ki ʼihi, ʼe toe fua lelei kia tatou. Pea ʼe feala ke tou punamaʼuli ai. ʼE fakamoʼoni ki ai ia Jonathan, ʼae ʼe maʼuli ʼi Niusila. ʼI te tahi Moeaki hili hoʼata, ʼae neʼe kovi ʼosi te vevela, neʼe sio ki he tehina pionie neʼe faifakamafola tokotahi. Neʼe fakatuʼutuʼu leva e Jonathan ke faifakamafola mo ia ʼi te ʼu Moeaki hili hoʼata fuli. Neʼe mole ina iloʼi ʼi te temi ʼaia, ʼe ina maʼu anai ni fua lelei mai tana agalelei ʼaia. ʼE ui e Jonathan: “Neʼe mole au faʼa leleiʼia te faifakamafola ʼi te temi ʼaia. Kae ʼi taku sio ʼae ki te faʼahiga faiako ʼa te tehina pea mo te ʼu fua lelei neʼe ina maʼu, neʼe au kamata leleiʼia ai te faifakamafola. Neʼe au toe kaumeʼa lelei mo te tehina, pea neʼe tokoni mai ke au tuputupu ʼi te faʼahi fakalaumalie, mo au leleiʼia te minisitelio pea ke au fakaovi kia Sehova.”

18. Kotea ʼae ʼe loto e Sehova ke tou fai?

¹⁸ ʼE loto e Sehova ke toe malohi age totatou ʼofa kia te ia pea mo ʼotatou tehina mo tuagaʼane. Neʼe tou ako ʼi te alatike ʼaeni, ʼe toe malohi age anai totatou ʼofa kia Sehova moka tou lau tana Folafola pea mo metitasio ki ai, pea mo faikole ʼi te ʼaho fuli. Pea ʼe toe malohi anai totatou ʼofa ki ʼotatou tehina mo tuagaʼane moka tou fai ni gaue moʼo tokoni kia natou. Ka tuputupu te malohi ʼo totatou ʼofa, ʼe tou felogoi lelei ai mo Sehova mo totatou famili fakalaumalie. Pea ʼe hoko atu anai ki te heʼe gata totatou fakakaumeʼa ʼaia!