1. Kotea te fakamau ʼae kua vave hoko mai?

 ʼE TOU maʼuʼuli ʼi he ʼu temi, ʼe hoko ai anai he ʼu fetogi lahi. Kua vave fakamauʼi pe e Sesu te hahaʼi ʼae ʼe maʼuʼuli ʼi te kele. Neʼe fakaha mai e Sesu te ʼu meʼa ʼae ʼe hoko ʼi te malamanei ia muʼa ʼo tana faifakamau. Neʼe ina foaki age ki ʼana tisipulo he “fakailoga.” Ko te fakailoga ʼaia ʼo tana ʼi heni fakapulipuli pea mo “te fakaʼosi ʼo te tuʼu ʼo te ʼu faʼahiga meʼa ʼaeni.” (Mat. 24:3) ʼE tou maʼu ia Mateo kapite 24 mo te kapite 25 pea ia Maleko kapite 13 pea mo Luka kapite 21.

2. Kotea ʼae ka tou vakaʼi anai ʼi te alatike ʼaeni? Pea he koʼe ʼe lelei ke tou fai te fahaʼi ʼaia?

² Neʼe tuku mai e Sesu he ʼu lea fakatata ʼe tolu moʼo fakatokaga ʼo tatou. Ko te lea fakatata ʼa te ʼu ovi mo te ʼu tao, mo ʼae ʼo te ʼu taʼahine taupoʼou popoto mo te ʼu taʼahine taupoʼou vavale pea mo ʼae leva ʼo te ʼu taleta. Ko te ʼu lea fakatata takitahi ʼaia, ʼe tokoni mai kia tatou ke tou mahino, ʼe fakamauʼi anai tatou e Sesu takitokotahi ʼo mulimuli ki ʼatatou gaue. ʼI te alatike ʼaeni, ʼe tou vakaʼi anai te ʼu lea fakatata ʼaia ʼe tolu pea ʼe tou toʼo mai ai anai he ʼu ako. Kae tou ʼuluaki vakaʼi muʼa te lea fakatata ʼo te ʼu ovi mo te ʼu tao.

TE ʼU OVI MO TE ʼU TAO

3. Ko ʼafea ʼae ka fakamauʼi ai e Sesu te hahaʼi?

³ Ko te fakamau ʼae ʼe palalau kia ai ia Sesu ʼi tana lea fakatata ʼae ʼo te ʼu ovi mo te ʼu tao ʼe fai ki te hahaʼi ʼae neʼe natou maʼu te faigamalie ke natou tali te logo lelei pea mo lagolago ki te ʼu tehina fakanofo ʼo Sesu. (Mat. 25:​31-46) ʼE fakamauʼi anai natou ʼi te fakaʼosi ʼo te “mamahi lahi,” ʼi muʼa pe ʼo Alamaketone. (Mat. 24:21) Ohage pe ko he tauhi ovi ʼe ina vaheʼi kehe te ʼu ovi mai  te ʼu tao, ʼe vahe keheʼi anai e Sesu ia natou ʼae neʼe natou lagolago agatonu ki ʼana tisipulo fakanofo mai ia natou ʼae neʼe mole natou fai.

4. ʼO mulimuli kia Esaia 11:​3, 4, he koʼe ʼe tou tui papau ʼe faitotonu anai te faifakamau ʼa Sesu? (Vakaʼi mo te pāki ʼo te takafi.)

⁴ ʼE fakaha e te ʼu lea fakapolofeta ʼo te Tohi-Tapu ko Sesu ʼae neʼe fakanofo e Sehova ko he Tuʼi Fakamau. ʼE faitotonu anai tana faifakamau. (Lau ia Esaia 11:​3, 4.) ʼE ina sivisivi anai te aga ʼa te hahaʼi, mo ʼanatou manatu, mo ʼanatou palalau, ʼo feia mo te aga ʼae neʼe natou fai ki ʼona tehina fakanofo. (Mat. 12:​36, 37; 25:40) ʼE iloʼi anai e Sesu pe neʼe natou lagolago ki ʼona tehina fakanofo pea mo te gaue ʼae neʼe tuku age ki ʼona tehina fakanofo. a Ko he tahi ʼe ui ko he ovi ʼe lagolago anai ki te ʼu tehina ʼo Kilisito ʼaki te faifakamafola. Ko te hahaʼi ʼae neʼe natou tokoni ki ʼona tehina ʼe tala anai e Sesu ʼe natou “faitotonu” pea ʼe natou maʼu anai te “maʼuli heʼe gata” ʼi te kele. (Mat. 25:46; Fkha. 7:​16, 17) Ko he fakapale taulekaleka ʼaia. Kapau ʼe natou nofo agatonu lolotoga te mamahi lahi pea hili ʼo te mamahi lahi, ʼe taupau pe anai ʼonatou higoa ʼi “te tohi ʼo te maʼuli.”—Fkha. 20:15.

5. Kotea ʼae ʼe tou ako mai te lea fakatata ʼo te ʼu ovi mo te ʼu tao? Pea ʼe fakaʼuhiga kia ʼai?

⁵ Fakaha tau agatonu. Ko te lea fakatata ʼo te ʼu ovi mo te ʼu tao ʼe fakaʼuhiga tafito kia natou ʼae ka maʼuʼuli ʼi te kele. ʼE fakaha e natou ʼaia tanatou tui mo tanatou agatonu ʼaki tanatou tokoni ki te ʼu tehina ʼo Kilisito ʼi te gaue faifakamafola. Kae ʼe mole gata ai, ʼe natou toe fakalogo ki te ʼu tuʼutuʼuni ʼae ʼe tuku mai e te kiʼi kutuga ʼo te ʼu tehina fakanofo ʼae neʼe filifili e Sesu. (Mat. 24:45) Kae ko natou ʼae ʼe ʼamanaki maʼuʼuli ʼi selo, ʼe tonu mo natou ke natou tokagaʼi te fakatokaga ʼa Sesu. Kotea tona tupuʼaga? He ʼe sivisivi e Sesu ʼanatou aga, mo ʼanatou manatu pea mo ʼanatou palalau. ʼE tonu kia natou ʼaia ke natou fakaha tanatou agatonu. Koia, neʼe fakamatala e Sesu te tahi ʼu lea fakatata ʼe lua, ʼe maʼu ai he ʼu fakatokaga maʼa te ʼu tehina fakanofo. Ko te ʼu lea fakatata ʼaia, ʼe tou toe maʼu pe ia Mateo kapite 25. ʼE tou kamata ʼaki te lea fakatata ʼo te ʼu taʼahine taupoʼou popoto mo ʼae ʼe vavale.

TE ʼU TAʼAHINE TAUPOʼOU POPOTO MO ʼAE ʼE VAVALE

6. Neʼe fakaha feafeaʼi e te ʼu taʼahine taupoʼou ʼe toko nima ʼe natou popoto? (Mateo 25:​6-10)

⁶ ʼI te lea fakatata ʼo te ʼu taʼahine taupoʼou, neʼe palalau ia Sesu ki te toko hogofulu taʼahine taupoʼou, neʼe natou olo ʼo fakafetaulaki ki te tagata ʼohoana. (Mat. 25:​1-4) Neʼe natou fakaʼamu fuli ke natou hu fakatahi mo te tagata ʼohoana ki te kaitahi ʼo te faiʼohoana. Neʼe ui e Sesu ko te toko nima ia natou ʼe natou “popoto” pea ko te toko nima ʼae ʼe natou “vavale.” Ko te ʼu taʼahine taupoʼou popoto neʼe natou nonofo tokakaga. Neʼe kua natou ʼosi teuteu ki te haʼu ʼo te tagata ʼohoana tatau aipe pe tuai mai ʼi te poʼuli. Koia neʼe natou toʼo ai ʼanatou malama moʼo fakamalamaʼi te poʼuli. Neʼe natou toe toʼo ni hina lolo naʼa meʼa age ʼe tauhala mai te tagata ʼohoana. Koia, neʼe kua natou tokalelei. Neʼe kua natou teuteuʼi fakatomuʼa ke mu tuʼumaʼu ʼanatou malama. (Lau ia Mateo 25:​6-10.) ʼI te tau mai ʼa te tagata ʼohoana, neʼe natou hu fakatahi ki te kaitahi ʼo te faiʼohoana. ʼO toe feia ki te kau fakanofo, ʼe natou maʼu anai tonatou fakapale ʼae ko te fakatahi mo te tagata ʼohoana ia Sesu ʼi te Puleʼaga ʼae ʼi selo, mo kapau ʼe natou nofo teuteu ʼo tokaga pea mo agatonu ʼo aʼu ki te haʼu ʼa Kilisito. b (Fkha. 7:​1-3) Kae kotea ʼae ka hoko anai ki te kau taʼahine taupoʼou vavale?

7. Kotea ʼae neʼe hoko ki te kau taʼahine taupoʼou vavale, pea kotea tona tupuʼaga?

⁷ ʼE mole hage ko te ʼu taʼahine taupoʼou popoto, ko te ʼu taʼahine taupoʼou ʼe toko nima vavale neʼe mole nonofo teuteu. ʼI tanatou iloʼi ʼae kua vave haʼu te tagata ʼohoana, ko ʼanatou malama neʼe kua vave ʼago. ʼUhi ʼae he neʼe mole natou toʼo he ʼu hina lolo, neʼe natou toe olo ai ʼo totogi mai. ʼI te tau mai ʼa te tagata ʼohoana, heʼeki natou toe liliu mai. ʼI te temi ʼaia, “ko te ʼu taʼahine taupoʼou ʼae neʼe nonofo teuteu, neʼe natou hu fakatahi mo ia ki te kaitahi ʼo te faiʼohoana, pea neʼe pupunu leva te matapa.” (Mat. 25:10) Ki muli age, ko te kau taʼahine taupoʼou vavale neʼe natou fia hu ki te kaitahi kae neʼe ui age e te tagata ʼohoana: “ʼE mole au iloʼi koutou.” (Mat. 25:​11, 12) Neʼe mole natou teuteu ke talitali fualoa ki te haʼu ʼo te tagata ʼohoana. Kotea te ako maʼa te kau Kilisitiano fakanofo?

8-9. Kotea te ako ʼe maʼu e te kau Kilisitiano fakanofo mai te lea fakatata ʼo te ʼu taʼahine taupoʼou? (Vakaʼi mo te pāki.)

⁸ Nofo teuteu pea mo tokaga. ʼAki te lea fakatata ʼo te ʼu taʼahine taupoʼou, neʼe mole fia ui e Sesu ʼe ʼi ai anai he ʼu kutuga ʼe lua ʼo te kau fakanofo. Ko te tahi kutuga ʼe nofo teuteu ʼo talitali ʼo kaku ki te fakaʼosi ʼo te malamanei pea mo te tahi kutuga mole nofo teuteu natou. Kae neʼe fakamahino ia Sesu kotea ʼae ka hoko ki te kau Kilisitiano fakanofo mo kapau ʼe mole natou nofo teuteu ke natou faʼa kataki agatonu ʼo kaku ki te fakaʼosi. Kapau ʼe mole natou nofo teuteu ʼe mole natou maʼu anai tonatou fakapale. (Soa. 14:​3, 4) Ko te fahaʼi ʼaia ʼe maʼuhiga ʼaupito. Pe ʼe tou ʼamanaki maʼuli ʼi selo peʼe ʼi te kele, ʼe tonu ke tou tokagaʼi te fakatokaga ʼae ʼe tou maʼu mai te lea fakatata ʼa Sesu. ʼE tonu kia tatou takitokotahi, ke hoko atu tatatou nofo tokaga pea mo nofo teuteu ʼo faʼa kataki ʼo kaku ki te fakaʼosi.—Mat. 24:13.

⁹ Hili tana fakamatala te lea fakatata ʼo te ʼu taʼahine taupoʼou moʼo fakaha te maʼuhiga ʼae ʼo te nofo teuteu mo nofo tokaga, ʼe fakamatala leva e Sesu te lea fakatata ʼo te ʼu taleta. Neʼe ina fakaha ai te ʼaoga ʼae ke tou faʼa gaue.

TE ʼU TALETA

10. Neʼe fakaha feafeaʼi e te ʼu tagata faifekau ʼe lua tanā agatonu ki tonā pule? (Mateo 25:​19-23)

¹⁰ ʼI tana lea fakatata ʼo ʼuhiga mo te ʼu taleta, ʼe palalau ai Sesu kia tagata faifekau ʼe lua neʼe agatonu ki tonā pule pea ko te tahi age tagata faifekau neʼe mole agatonu. (Mat. 25:​14-18) Ko te ʼu tagata faifekau ʼe lua neʼe nā agatonu ki tonā pule ʼo nā gaue kinakina ke maʼu te tupu ʼo te falā ʼo tonā pule. ʼI muʼa ʼo tana alu ki te tahi fenua, neʼe ina foaki age te ʼu taleta, ʼae neʼe ko he toe paʼaga lahi. Ko te ʼu tagata faifekau agatonu ʼaia ʼe lua, neʼe nā gaue lahi pea neʼe nā fakaʼaogaʼi fakapotopoto te falā ʼae neʼe tuku age. Kotea tona fua? ʼI te toe liliu mai ʼa te pule mai tana folau, ko te ʼu tagata kaugana ʼaia ʼe lua neʼe nā maʼu te tupu ʼo tuʼa lua age ʼi te falā ʼae neʼe tuku age. Pea neʼe vikiʼi naua e tonā pule. Pea neʼe nā ‘fiafia fakatahi mo tonā pule.’ (Lau ia Mateo 25:​19-23.) Kae neʼe feafeaʼi leva te tolu tagata faifekau? Kotea ʼae neʼe ina fai mo te paʼaga ʼae neʼe tuku age e tona pule?

11. Kotea ʼae neʼe hoko ki te tagata faifekau ‘pikoʼelo,’ pea kotea tona tupuʼaga?

¹¹ Ko te tolu tagata faifekau neʼe foaki age ki ai te taleta ʼe tahi. ʼE ʼamanaki e tona pule ʼe ina fakaʼaogaʼi fakapotopoto anai te taleta ʼaia. Kae ʼuhi ʼae neʼe ‘pikoʼelo’ neʼe ina tanu. ʼI te liliu mai ʼo tona pule, neʼe ina toe fakatoʼo age tana taleta. Ko te tagata faifekau ʼaia neʼe mole aga fakaʼapaʼapa, neʼe tonu pe ke fakalelei age ʼi tana mole maʼu he tupu ʼo te falā ʼo tona pule. Kae neʼe ina ui age ia ki tona pule ʼe ko he “tagata agafefeka” pea neʼe mole fiafia tona pule kia ia ʼo ina toʼo ai tana taleta kae li ia ki tuʼa mai te ʼapi ʼo tona pule.—Mat. 25:​24, 26-30.

12. Ko ai ʼae ʼe ina fakata te ʼu tagata faifekau agatonu ʼe lua?

¹² Ko te ʼu tagata faifekau agatonu ʼe lua, ʼe nā fakata te kau Kilisitiano fakanofo agatonu. Ko te Pule ia Sesu ʼe ina fakaafeʼi natou ‘ke natou fakafiafia mo ia’ pea mo foaki age tonatou fakapale ʼae ʼi selo, te ʼuluaki fakatuʼuake. (Mat. 25:​21, 23; Fkha. 20:​5, lua koga) Kae ko te faʼifaʼitaki kovi ʼa te tagata faifekau pikoʼelo ko he fakatokaga ia ki te kau Kilisitiano fakanofo. ʼO feafeaʼi?

13-14. Kotea te ako ʼe feala ke maʼu e te kau Kilisitiano fakanofo mai te lea fakatata ʼo te ʼu taleta? (Vakaʼi mo te pāki.)

¹³ Faʼa gaue pea mo faʼafai. Kapau neʼe fai e Sesu te ʼu lea fakatata ʼo te ʼu taleta mo te ʼu taʼahine taupoʼou, neʼe mole ina fia fakaha fakatomuʼa ʼe liliu anai te kau fakanofo ʼo pikoʼeʼelo.  Neʼe ina fia fakamahino pe ia te aluʼaga ka hoko moka ʼe mole kei natou faʼafai, ʼo mole feala anai ke natou taupau maʼu tonatou ‘pauʼi mo tonatou filifili.’ ʼE mole fakagafua anai ke natou hu ki te Puleʼaga ʼo selo.—2 Pet. 1:10.

¹⁴ Ko te ʼu lea fakatata ʼa te ʼu taʼahine taupoʼou pea mo te ʼu taleta, ʼe fakaha mai ai ʼe tonu ki te kau Kilisitiano fakanofo fuli ke natou nofo teuteu, mo tokakaga, mo faʼa gaue pea mo faʼafai. Kae neʼe fai age koa e Sesu kia natou he tahi fakatokaga? ʼEi, ko te meʼa ʼae ʼe ui e Sesu ia Mateo 24:​40, 41 pea ʼe toe ʼi ai tona pikipikiga mo tonatou fakamauʼi.

KO AI KA “TOʼO ANAI”?

15-16. ʼE fakaha feafeaʼi ia Mateo 24:​40, 41 te maʼuhiga ʼae ke nofo tokakaga te kau Kilisitiano fakanofo?

¹⁵ ʼI muʼa ʼo tana fakaha te ʼu lea fakatata ʼe tolu ʼae neʼe tou vakaʼi, neʼe palalau ia Sesu ʼo ʼuhiga mo te fakamauʼi ʼo te kau Kilisitiano fakanofo. Pea ʼi te fakamauʼi ʼaia, ʼe iloʼi ai anai pe ko ai ʼae ka ina maʼu ia tona fakapale. Neʼe fakamatala ai e Sesu te lea fakatata ʼo te ʼu tagata ʼe toko lua, ʼe nā gaue ʼi te gaueʼaga pea mo te ʼu fafine ʼe toko lua ʼe nā momosi te fulumeto. ʼE hage mai ʼi te lea fakatata ʼaeni ʼe tatau te gaue ʼa te ʼu tagata ʼe lua pea ʼe toe feia mo ʼae ʼe fai e te ʼu fafine ʼe lua. Kae neʼe ui e Sesu ʼe “toʼo anai te tahi kae tuku te tahi.” (Lau ia Mateo 24:​40, 41.) Pea neʼe ina fai age leva te fakatokaga ʼaeni ki ʼana tisipulo: “Ke kotou nonofo ʼalaʼala, koteʼuhi ʼe mole kotou iloʼi pe ko te ʼaho fea ʼae ka haʼu ai tokotou ʼAliki.” (Mat. 24:42) ʼE tou tokagaʼi neʼe toe fai e Sesu he fakatokaga ʼe tatau ʼi te fakaʼosi ʼo tana fakamatala te lea fakatata ʼo ʼuhiga mo te ʼu taʼahine taupoʼou. (Mat. 25:13) ʼE ʼi ai koa he pikipikiga ʼo te ʼu fakatokaga ʼaia? ʼE feala pe ke tou ui ʼei. ʼE gata pe anai kia natou ʼae neʼe fakanofo moʼoni ʼaki te laumalie maʼoniʼoni pea mo natou nonofo agatonu, ʼae ka “toʼo anai” natou, ko tona fakaʼuhiga ʼe fakatalitali anai natou e Sesu ʼi te Puleʼaga ʼi selo.—Soa. 14:3.

¹⁶ Ke ke nofo tokaga. Kapau ʼe mole nofo tokaga he Kilisitiano fakanofo ʼi te fahaʼi fakalaumalie, ʼe mole kau anai ki te tanaki ʼo ‘natou ʼae neʼe filifili.’ (Mat. 24:31) Pea ko natou fuli ʼae ʼe natou ʼamanaki maʼuʼuli ʼi te kele, ʼe tonu ke natou fakaʼuhiga te ʼu palalau ʼa Sesu ko he ʼu fakatokaga pea ke natou nonofo tokakaga mo agatonu.

17. Kapau neʼe fakanofo e Sehova ʼihi Kilisitiano ʼi totatou temi, he koʼe ʼe mole tonu ke tou tuʼania ki te fahaʼi ʼaia?

¹⁷ Kua tou iloʼi lelei ia Sehova, koia ʼae ʼe tou tui papau ai ʼe faitotonu ʼana gaue fuli. Kapau ʼe kei ina fakanofo ʼihi Kilisitiano ʼaki tona laumalie maʼoniʼoni ʼi totatou temi, ʼe mole tou tuʼania anai ki te fahaʼi ʼaia. c Tou manatuʼi te fahaʼi ʼae neʼe ui e Sesu ʼo ʼuhiga mo te kau gaue ʼae neʼe natou gaue ʼi te vaʼevaʼe hola nima afiafi ʼi tana lea fakatata ʼae ʼo ʼuhiga mo te gaueʼaga vite. (Mat. 20:​1-16) Ko te kau gaue ʼae neʼe fekauʼi ke olo ʼo gaue kae kua afiafi, neʼe tatau tonatou totogi mo natou ʼae neʼe kamata ʼi te uhuuhu. ʼO toe feia, tatau aipe te lakaga ʼae ʼe filifili ai natou, ʼe maʼu anai e te kau Kilisitiano fakanofo tonatou fakapale ʼae ke natou maʼuʼuli ʼi selo mo kapau ʼe natou nonofo agatonu.

TOKAGAʼI TE ʼU FAKATOKAGA

18-19. Kotea ʼae ʼe tou ako mai te ʼu lea fakatata ʼa Sesu ʼae neʼe tou vakaʼi?

¹⁸ Kotea ʼae neʼe tou ako? Ko te lea fakatata ʼo te ʼu ovi mo te ʼu tao, ʼe ha ai te maʼuhiga kia natou ʼae ʼe ʼamanaki maʼuʼuli ʼo heʼe gata ʼi te kele ke natou nonofo agatonu kia Sehova ʼi te temi nei pea lolotoga te mamahi lahi ʼae ka hoko mai. ʼI te fakamau ʼae ka fai e Sesu ʼi te fakaʼosi ʼo te mamahi lahi, ko natou ʼae neʼe nonofo agatonu ʼe natou maʼu anai “te maʼuli heʼe gata.”—Mat. 25:46.

¹⁹  Neʼe tou toe vakaʼi ia te ʼu lea fakatata ʼe lua, ʼe tou maʼu ai he ʼu fakatokaga ʼe fai ki te kau Kilisitiano fakanofo. ʼI te lea fakatata ʼo te ʼu taʼahine taupoʼou, neʼe fakaha ai e te toko nima ʼe natou popoto. Neʼe natou nofo teuteu mo tokakaga, neʼe natou tokalelei ʼo fakatalitali ki te tagata ʼohoana tatau aipe pe neʼe loaloaga. Pea ko te ʼu taʼahine taupoʼou vavale neʼe mole natou nonofo teuteu. Koia la ʼae neʼe mole tuku ai e te tagata ʼohoana ke natou kau ki te kaitahi ʼo tona ʼohoana. Koia ʼe tonu ai mo tatou ke tou nonofo teuteu ʼo fakatalitali te temi ʼae ka haga ai e Sesu ʼo fakaʼauha ia te malamanei tatau aipe pe ʼe tonu ke tou fakatalitali fualoa. ʼI te lea fakatata ʼo te ʼu taleta, neʼe fakaha e te ʼu tagata faifekau ʼe toko lua ʼe nā faʼa gaue mo faʼafai. Neʼe nā gaue kinakina moʼo fakatuputupu ia te ʼu koloa ʼo tona pule pea neʼe fiafia tona pule kia naua. Pea neʼe kapu te tagata faifekau ʼae neʼe pikoʼelo. Kotea te ako? ʼE tonu ke tou maʼumaʼua ʼi te fai ʼo te ʼu gaue ʼae maʼa Sehova ʼo kaku ki te fakaʼosi. Pea neʼe tou vakaʼi leva ʼe tonu ke nonofo tokakaga te kau Kilisitiano fakanofo mo kapau ʼe natou loto ke “toʼo” natou e Sesu pea ke natou maʼu tanatou fakapale ʼae ke natou maʼuʼuli ʼi selo. ʼE natou fakatalitali mo he fakaʼamu lahi ke natou “fakatahi mo ia” ʼi selo. Hili te tau ʼo Alamaketone, ʼe fai ai leva te faiʼohoana ʼo te Akeno pea ʼe ko natou ia tona ʼohoana.—2 Tes. 2:1; Fkha. 19:9.

20. Kotea ʼae ka fai anai e Sehova kia natou ʼae ʼe natou tokagaʼi ʼana fakatokaga?

²⁰ Logo la kua ovi mai te fakamauʼi e Sesu ia te hahaʼi fuli, kae ʼe mole tonu ke tou matataku. Kapau ʼe tou nonofo agatonu kia te ia, ʼe foaki mai anai e tatatou Tamai ʼae ʼe fonu ʼi te ʼofa te “malohi makehe” ke feala hatatou “tutuʼu ia muʼa ʼo te Foha ʼo te tagata.” (2 Ko. 4:7; Luka 21:36) Pe ʼe tou ʼamanaki maʼuli ʼi selo peʼe ʼi te kele, ʼe leleiʼia anai tatou e tatatou Tamai mo kapau ʼe tou tokagaʼi te ʼu fakatokaga ʼae ʼe tou maʼu ʼi te ʼu lea fakatata ʼae neʼe fai e Sesu. Pea ʼuhi ko te ʼofa makehe ʼae ʼo Sehova, ʼe tuʼu anai ʼotatou higoa “ʼi te tohi” ʼo te maʼuli.—Tan. 12:1; Fkha. 3:5.