1. Kotea te ʼu gaue ʼae ʼe fai e te ʼu tuagaʼane ʼi te kautahi ʼa Sehova? (Vakaʼi te pāki ʼo te takafi.) Kae kotea te ʼu faigataʼaʼia ʼe tau mo natou?

ʼE TOU fiafia ʼi te maʼu ʼi tatatou kokelekasio he ʼu tuagaʼane tokolahi ʼe natou gaue kinakina ʼi te tauhi kia Sehova. Ohage la, ʼe natou kau ki te ʼu fono mo faʼafai ʼi te faifakamafola, pea ʼe natou tokakaga lelei kia natou ʼo te kokelekasio. ʼE kau ʼihi ki te taupau lelei ʼo te Fale Fono. Kae ʼe ʼi ai pe la mo ʼonatou faigataʼaʼia. ʼE tokaga ʼihi ki ʼanatou matuʼā ʼae kua vaivai. Ko ʼihi atu ʼe natou tau mo te fakafeagai ʼo tanatou famili. Pea ko ʼihi leva ʼe natou taupau tokotahi ʼanatou fanau pea mo faʼa gaue ke maʼu ai te ʼu meʼa ʼae ʼe ʼaoga kia natou.

2. He koʼe ʼe maʼuhiga ke tou fakalotomalohiʼi ʼotatou tuagaʼane?

² He koʼe ʼe maʼuhiga ke tou fakalotomalohiʼi ʼotatou tuagaʼane? Koteʼuhi ʼe mole fakaʼapaʼapa tuʼumaʼu te hahaʼi ʼo te malama kia natou. Pea ʼe fakaha mai ʼi te Tohi-Tapu ʼe tonu ke tou fai te faʼahi ʼaia. Ohage la, neʼe kole e te apositolo ko Paulo ki te kokelekasio ʼo Loma ke natou fakatalitali lelei te tuagaʼane ko Fipe, pea mo “foaki age te tokoni ʼae ʼe ʼaoga ki ai.” (Loma 16:1, 2) ʼI muʼa atu, ko Paulo neʼe ko te Faliseo. Pea ko te kau Faliseo neʼe natou fakamalaloʼi te hahaʼi fafine. Kae ʼi tana kua liliu ko he Kilisitiano, neʼe ina faʼifaʼitakiʼi ia Sesu ʼo agalelei pea mo fakaʼapaʼapa ki te hahaʼi fafine.—1 Ko. 11:1.

3. Neʼe fakaha feafeaʼi e Sesu tana fakaʼapaʼapa ki te hahaʼi fafine, pea neʼe feafeaʼi kia ia te ʼu fafine ʼae neʼe natou fai te finegalo ʼo te ʼAtua?

³ Neʼe fakaha e Sesu tana fakaʼapaʼapa ki te hahaʼi fafine fuli. (Soa. 4:27) Neʼe mole tatau tana manatu mo ʼae ʼa te kau takitaki lotu Sutea ʼo tona temi. ʼE ui fenei ʼi te tikisionalio Fakatohi-tapu: “Neʼe mole he temi neʼe fai ai e Sesu he ʼu palalau neʼe fakamalaloʼi ai te ʼu fafine.” Kae neʼe fakaʼapaʼapa tafito ia Sesu ki te ʼu fafine ʼae neʼe natou fai te finegalo ʼo tana Tamai. Neʼe hage pe ia natou ʼaia ko ʼona tuagaʼane. Pea neʼe natou kau mo te ʼu tagata ki tona famili fakalaumalie.—Mat. 12:50.

4. Kotea ʼae ka tou vakaʼi anai ʼi te alatike ʼaeni?

 ⁴ Neʼe lotolelei tuʼumaʼu pe ia Sesu ke tokoni ki ʼona tuagaʼane fakalaumalie. Neʼe ʼofa kia natou, pea neʼe mole ina tuku he tahi ke ina valokiʼi natou. Tou vakaʼi pe ʼe lava feafeaʼi hatatou faʼifaʼitakiʼi ia ia.

5. He koʼe ʼe feala ke faigataʼa ki ʼihi tuagaʼane hanatou fakatahitahi mo he ʼu kaumeʼa lelei?

⁵ ʼE ʼaoga kia tatou fuli, tehina mo tuagaʼane, ke tou fakatahitahi mo he ʼu kaumeʼa lelei. Kae ʼi ʼihi temi,ʼe feala ke faigataʼa te faʼahi ʼaia ki te ʼu tuagaʼane. Kotea tona tupuʼaga? Tou vakaʼi te ʼu tala manatu ʼaeni. ʼE ui fenei e te tuagaʼane ʼe higoa ko Jordan: * “ ʼI ʼihi temi, ʼe au manatu ʼe mole hoku ʼaoga ʼi te kokelekasio he ʼe au selipatea.” Pea ʼe ui fenei e te tuagaʼane ko Kristen, ʼae ʼe pionie pea neʼe mavae ʼo alu ki he tahi koga meʼa ke lahi age tana faifakamafola: “Ka ke kau ki he kokelekasio foʼou, pea ʼe hage kia koe ʼe ke nofo tokotahi.” Neʼe toe manatu feia pe la mo ʼihi tehina. Ko natou ʼae ʼe maʼuʼuli ʼi he famili ʼe mole ko he kau Fakamoʼoni ʼa Sehova, ʼe feala ke faigataʼa kia natou hanatou felogoi lelei mo tonatou famili totonu. Pea ʼe feala ke natou toe logoʼi tanatou nonofo tokotahi, he ʼe mole natou fakatahi mo te ʼu tehina mo tuagaʼane. ʼE logoʼi e ʼihi tuagaʼane te faʼahi ʼaia, koteʼuhi ʼe mole feala ke natou mavae mai tonatou ʼapi he ʼe natou mahahaki, peʼe natou taupau mahaki. ʼE ui fenei e Annette: “Neʼe au fakafisi ʼihi fakaafe he neʼe ko au pe ʼae neʼe tokaga ki taku faʼe.”

6. Neʼe tokoni feafeaʼi ia Sesu kia Malia mo Maleta, ʼo mulimuli kia Luka 10:38-42?

⁶ Neʼe toʼo e Sesu hona temi ke fakatahitahi ai mo ʼona tuagaʼane fakalaumalie, pea neʼe ko he kaumeʼa moʼoni maʼa natou. Ohage la, neʼe kaumeʼa mo Malia pea mo Maleta, ʼae neʼe lagi nā selipatea. (Lau ia Luka 10:38-42.) Ko te faʼahiga palalau ʼa Sesu kia naua pea mo tana aga, ʼae neʼe lagi tupu ai tanā faʼifaʼitaliha mo ia. Ohage la, ʼi te tahi ʼaho, neʼe nofo ia Sesu io naua. Pea neʼe haʼu fakahagatonu ia Malia ʼo nofo ʼi ʼona vaʼe, ohage ko tona fai mahani e te ʼu tisipulo ki ʼanatou faiako. * Pea neʼe palalau fakahagatonu age ia Maleta kia Sesu he neʼe ita ʼi te mole tokoni age ʼa Malia kia ia. Ko te fakatahitahi ʼaia ʼa Sesu mo ʼona kaumeʼa, neʼe feala ai hana tokoni kia naua ʼi te faʼahi fakalaumalie. Pea neʼe fakaha e Sesu neʼe tokaga kia naua pea mo tonā tokolua ko Lasalo, he neʼe tau alu ʼo ʼaʼahi natou. (Soa. 12:1-3) Koia, ʼi te temi ʼae neʼe mahaki kovi ai ia Lasalo, neʼe nā foimo kole age kia Sesu tana tokoni.—Soa. 11:3, 5.

7. ʼE feafeaʼi hatatou fakalotomalohiʼi ʼotatou tuagaʼane?

⁷ Maʼa ʼihi tuagaʼane, ko tanatou kau ki te ʼu fono ʼe ko he ʼu faigamalie ʼaia ke natou fakatahitahi mo ʼonatou tehina mo tuagaʼane. Koia ʼae ʼe tou fia fakatalitali lelei natou ʼi ʼatatou fono, mo faipalalau mo natou, pea mo fakaha ʼe tou tokakaga kia natou. ʼE ui fenei e te tuagaʼane ko Jordan, ʼae kua tou ʼosi palalau ki ai: “ ʼE malave ʼosi kia au moka fakamalo mai he ʼu tehina mo tuagaʼane ʼi taku faitali, moka natou kole mai ke matou faifakamafola, pea mo tanatou fakaha mai ʼe natou tokakaga kia au.” ʼE tonu ke tou fakaha ki ʼotatou tuagaʼane ʼe natou maʼuhiga kia tatou. ʼE ui fenei e te tuagaʼane ko Kia: “Ka au to fono, ʼe au iloʼi ʼe faitohi mai anai he tahi ʼi taku telefoni moʼo iloʼi pe ʼe au feafeaʼi. ʼE ha ai tanatou tokakaga kia au.”

8. Kotea te tahi faʼahi ʼe feala ke tou faʼifaʼitakiʼi ai ia Sesu?

⁸ ʼE tou faʼifaʼitakiʼi ia Sesu moka ʼe tou fakatahitahi mo ʼotatou tuagaʼane. Ohage la, ʼe feala pe ke tou fakaafe natou ki he kiʼi kai, peʼe ke  tou fakafiafia fakatahi. Kae ka tou fakaafe natou, tou faiga ke tou palalau ki he ʼu manatu fakalotomalohi. (Loma 1:11, 12) ʼE tonu ke tatau te faʼahiga manatu ʼa te kau tagata ʼafea mo ʼae ʼa Sesu. Neʼe iloʼi e Sesu neʼe feala ke faigataʼa ki ʼihi tanatou nonofo selipatea. Kae neʼe ina fakaha lelei ʼe mole ko te nofo ʼohoana mo te maʼu fanau ʼae ʼe foaki te fiafia moʼoni. (Luka 11:27, 28) Ke tou maʼu te fiafia moʼoni, ʼe tonu ke tou fakamuʼamuʼa tatatou tauhi ʼae kia Sehova.—Mat. 19:12.

9. Kotea ʼae ʼe feala ke fai e te kau tagata ʼafea moʼo tokoni ki te ʼu tuagaʼane?

⁹ ʼE maʼua tafito ki te kau tagata ʼafea ke natou fakaʼuhiga te ʼu fafine Kilisitiano ohage ko honatou ʼu faʼe pea mo tokolua. (1 Tim. 5:1, 2) ʼE natou fia toʼo anai honatou temi ʼi muʼa peʼe ʼi te hili ʼo te ʼu fono ke natou faipalalau ai mo te ʼu tuagaʼane. ʼE ui fenei e te tuagaʼane ko Kristen: “Neʼe tokagaʼi e te tagata ʼafea neʼe au maʼumaʼua ʼaupito. Pea neʼe ina fia iloʼi ai taku polokalama. Neʼe au leleiʼia ʼosi tana tokaga moʼoni mai kia au.” Ka faiga te ʼu tagata ʼafea ke natou faipalalau mo ʼonatou tuagaʼane, ʼe natou fakaha ai tanatou fia tokoni kia natou. * ʼE fakaha e Annette te lelei ʼe ina maʼu ʼi tana faipalalau mo te ʼu tagata ʼafea. ʼE ina ui fenei: “ ʼE au iloʼi lelei age ai ia natou, pea ʼe natou iloʼi lelei ia au. Koia, moka ʼe au tau mo  ni faigataʼaʼia, ʼe faigafua kia au haku kole tokoni kia natou.”

10. ʼE feafeaʼi hatatou tokoni ki ʼotatou tuagaʼane ke natou fiafia?

¹⁰ Ko tatou fuli, tagata mo fafine, ʼe tou fiafia moka fakaha mai e ʼihi ʼe tou maʼuhiga, pea moka tokagaʼi ʼatatou fealagia. Pea ʼe tou toe fiafia foki moka fakamalo mai ki te ʼu gaue ʼae ʼe tou fai. Kae ʼi te tahi age faʼahi, ʼe tou lotovaivai moka ʼe mole fakamalo mai he tahi ki te ʼu gaue ʼae ʼe tou fai, peʼe moka ʼe mole tokagaʼi ʼatatou fealagia. Ko te tuagaʼane ko Abigail, ʼae ʼe pionie, ʼi ʼihi temi ʼe ina logoʼi ʼe mole tokagaʼi ia ia. ʼE ina ui fenei: “Ko ʼihi ʼe natou iloʼi lelei pe ʼoku tokolua mo tuagaʼane, peʼe ko ʼaku matuʼā, kae ʼe mole natou iloʼi lelei ia au.” ʼI te tahi age faʼahi, ko te tuagaʼane selipatea ko Pam, ʼae neʼe fualoa tana gaue misionea, neʼe toe liliu ki tona fenua moʼo taupau ʼana matuʼā. Ia ʼaho nei, kua taʼu 70 tupu pea ʼe kei pionie. ʼE ina ui fenei: “Ka fakamalo mai ʼihi ki te gaue ʼae ʼe au fai, ʼe ko he tokoni lahi ʼaia kia au.”

11. Neʼe fakaha feafeaʼi e Sesu tana lotofakafetaʼi ki te ʼu fafine ʼae neʼe kauga olo mo ia ʼi tana minisitelio?

¹¹ Neʼe fakaha e Sesu tana lotofakafetaʼi ki te ʼu fafine ʼae neʼe natou fakaʼaogaʼi “ ʼonatou koloa” moʼo tauhi kia te ia. (Luka 8:1-3) Neʼe ina tuku age kia natou te pilivilesio ʼaia, pea neʼe ina toe fakaha age mo he ʼu moʼoni maʼuhiga. Ohage la, neʼe ina fakaha age kia natou ʼe mate anai pea mo fakatuʼuake. (Luka 24:5-8) Pea ohage pe ko tana fai ki te kau apositolo, neʼe ina teuteuʼi te ʼu fafine ʼaia ki te ʼu ʼahiʼahi ʼae ka hoko anai. (Mko. 9:30-32; 10:32-34) ʼE feala hatatou tokagaʼi, ʼi te temi ʼae neʼe puke ai ia Sesu, neʼe feholaki te kau apositolo. Kae ko ʼihi fafine ʼae neʼe tokoni kia te ia, neʼe natou tutuʼu ʼi ʼona tafa ʼi tana lolotoga mate ʼi te pou.—Mat. 26:56; Mko. 15:40, 41.

12. Kotea te ʼu gaue maʼuhiga neʼe foaki e Sesu ki te ʼu fafine?

¹² Neʼe foaki e Sesu he ʼu gaue maʼuhiga ki te ʼu fafine. Ohage la, neʼe ko te ʼu fafine ʼae neʼe natou ʼuluaki sisio kia te ia ʼi tona kua ʼosi fakatuʼuake. Pea neʼe ina ui age ki te ʼu fafine ʼaia ke natou olo ʼo fakaha ki te ʼu apositolo kua ʼosi fakatuʼuake. (Mat. 28:5, 9, 10) ʼI te Penikosite ʼo te taʼu 33, neʼe folahi te laumalie maʼoniʼoni ki te ʼu tisipulo ʼae neʼe fakatahitahi ʼi he koga fale. ʼE mahino ia, neʼe toe kau ai mo he ʼu fafine. Pea ko te ʼu tuagaʼane ʼaia, ʼae neʼe kua fakanofo ʼaki te laumalie maʼoniʼoni, neʼe natou maʼu leva te fealagia ʼae ke natou palalau ʼi ni lea kehekehe ki “te ʼu gaue taulekaleka ʼa te ʼAtua.”—Gaue 1:14; 2:2-4, 11.

13. Kotea te ʼu gaue ʼae ʼe fai e te ʼu tuagaʼane ʼi tanatou tauhi kia Sehova, pea ʼe feafeaʼi hatatou fakaha tatatou lotofakafetaʼi kia natou?

¹³ ʼE tonu ke tou fakamalo ki ʼotatou tuagaʼane he ʼe lahi te ʼu gaue ʼe natou fai ʼi tanatou tauhi kia Sehova. ʼE natou kau ki te laga mo te taupau ke lelei te ʼu Fale Fono. ʼE natou lagolago ki he ʼu kiʼi kutuga peʼe ko he ʼu kokelekasio ʼe palalau ai ki he tahi lea. ʼE natou Petelite peʼe ʼomai ʼo tokoni ki te ʼu gaue ʼo te Petele. ʼE natou tokoni moka hoko he tuʼutamaki fakanatula. ʼE natou fakaliliu ʼatatou tohi, peʼe natou pionie peʼe misionea. Ohage pe ko te ʼu tehina, ʼe toe kau te ʼu tuagaʼane ki te Ako ʼo Te Kau Pionie, mo te Ako ʼo Te Kau Faifakamafola ʼo Te Puleʼaga, pea mo te Ako ʼo Kileate. Pea ʼe natou lagolago ki tonatou ʼohoana ke natou fakahoko ʼanatou gaue ʼae ʼe lahi ʼi te kokelekasio pea mo te kautahi. Ko te ʼu tehina ʼaia ʼe ko te ʼu “meʼa ʼofa” ʼae neʼe fakapapauʼi mai e te ʼAtua. Pea ʼe lahi te ʼu gaue ʼae ʼe natou fai moʼo tokoni ki ʼihi. Kae ʼe feala hanatou fakahoko te faʼahi ʼaia he ʼe lagolago tonatou ʼohoana kia natou. (Efe. 4:8) Neʼe kua ke fai koa te fehuʼi ʼaeni: “ ʼE feafeaʼi haku fakalotomalohiʼi te ʼu tuagaʼane ʼaia pea mo tokoni kia natou?”

14. Kotea ʼae ʼe fai e te ʼu tagata ʼafea ʼae ʼe fakasiosio poto, ʼo mulimuli kia Pesalemo 68:11?

 ¹⁴ ʼE mahino te ʼu tagata ʼafea ʼae ʼe fakasiosio poto, ko te ʼu tuagaʼane ʼe natou faʼafai pea mo popoto lelei ʼi te faifakamafola. (Lau ia Pesalemo 68:11, NWT.) * Koia, ʼe fia iloʼi ai e te ʼu tagata ʼafea tanatou manatu. Ko Abigail, ʼae neʼe kua tou ʼosi palalau ki ai, ʼe fiafia moka fehuʼi age e te ʼu tehina pe ʼe feafeaʼi la hana kamata he ʼu faipalalau ʼi te telituale. ʼE ina ui fenei: “ ʼE fakamanatuʼi mai ai neʼe foaki mai e Sehova kia au he gaue maʼuhiga ʼi tana kautahi.” ʼE toe iloʼi e te kau tagata ʼafea ko te ʼu tuagaʼane agatonu ʼae kua fotufotuʼa, ʼe natou popoto lelei ʼi te tokoni ki te ʼu tuagaʼane tupulaga ʼae ʼe tau mo ni faigataʼaʼia. (Tito 2:3-5) ʼE mahino papau ia, ʼe tou fia fakaha anai totatou ʼofa mo tatatou lotofakafetaʼi ki ʼotatou tuagaʼane.

15. Ko te ʼu aluʼaga fea ʼae ʼe ʼaoga ai ke tou tokoni ki ʼotatou tuagaʼane pea ke mole tou tuku ke valokiʼi natou?

¹⁵ ʼI ʼihi temi, ʼe ʼaoga ke tou tokoni ki ʼotatou tuagaʼane, pea ke mole tou tuku ke valokiʼi natou e ʼihi. (Esa. 1:17) Ohage la, ʼe lagi tonu anai ke tou tokoni ki he tuagaʼane kua vitua peʼe kua mavete, moʼo fai te ʼu gaue ʼae neʼe fai mahani e tona ʼohoana. Peʼe lagi tonu anai ke tou olo mo he tuagaʼane kua vaivai ki te toketa. Pea ʼe mahino ia, ʼe leleiʼia anai e te tuagaʼane pionie ʼae ʼe ina fai he tahi gaue maʼa te kautahi ʼa Sehova, ke mole tou tuku ke valokiʼi ia ia e ʼihi he ʼe tahitahiga tanatou sisio ki ai ʼi te faifakamafola. ʼO ʼuhiga la mo te faʼahi ʼaia, ʼe feafeaʼi hatatou tokoni ki ʼotatou tuagaʼane? Moʼo tali ki ai, tou toe vakaʼi te faʼifaʼitaki ʼa Sesu.

16. Neʼe tokoni feafeaʼi ia Sesu kia Malia, ʼo mulimuli kia Maleko 14:3-9?

¹⁶ Neʼe mole tuku e Sesu ke valokiʼi e ʼihi tona ʼu tuagaʼane fakalaumalie. Ohage la, neʼe ina fakatonutonuʼi ia Maleta ʼi tana haga ʼo valokiʼi ia Malia. (Luka 10:38-42) ʼI te tahi age lakaga, neʼe mole ina tuku ʼihi ke natou valokiʼi ia Malia ʼi tanatou manatu ʼae neʼe mole lelei te tonu ʼae neʼe ina fai. (Lau ia Maleko 14:3-9.) Neʼe iloʼi e Sesu ko Malia neʼe ko he fafine ʼe lelei pea neʼe ina vikiʼi ia ia. Neʼe ina ui fenei: “Neʼe ina fai he gaue ʼe lelei kia te au . . . Neʼe ina fai te meʼa ʼae neʼe ina lavaʼi.” Neʼe ina toe fakakikite ko te aga ʼaia neʼe fai e Malia ʼe fakamatala anai ʼi “he potu pe ʼe fakamafola ai te logo lelei ʼi te malamanei katoa.” Pea ʼe ko te faʼahi la ʼaia ʼe fai ʼi te alatike ʼaeni. ʼE ko he meʼa fakaofoofo he neʼe palalau ia Sesu ki te fakamafola ʼo te logo lelei ʼi te kele katoa ʼi te temi ʼae neʼe ina vikiʼi ai te aga ʼaia neʼe fai e Malia. ʼE mahino ia neʼe fakafimalieʼi ai te loto ʼo Malia ʼae neʼe hoki valokiʼi age pe!

17. Tuku mai he faʼifaʼitaki ʼo he aluʼaga ʼe tonu ai ke ke palalau moʼo fakagata te fatufatuʼi ʼo he tuagaʼane.

¹⁷ Ka valokiʼi e ʼihi ʼou tuagaʼane fakalaumalie, ʼe ke palalau koa ke gata ai tanatou valoki? Fakakaukauʼi muʼa ia te aluʼaga ʼaeni: ʼE tokagaʼi e ʼihi ʼe haʼu tauhala tuʼumaʼu pe ki te ʼu fono he tuagaʼane, ko tona ʼohoana ʼe mole ko he Fakamoʼoni ʼa Sehova. Pea ʼe foimo alu ʼi te ʼosi fono. ʼE natou toe tokagaʼi ʼe tahitahiga tana haʼu mo tana ʼu toe ki te ʼu fono. Pea ʼe natou feʼekeʼaki ai pe ʼe koe ʼe mole palalau fakahagatonu age te tuagaʼane ki tona ʼohoana. ʼE natou fatufatuʼi ai leva te tuagaʼane. Kae ʼe mole natou iloʼi tana ʼu faiga fakamalotoloto. ʼI ʼihi temi ʼe kole age e tona ʼohoana ke ina fai he ʼu meʼa neʼe mole fakatuʼutuʼu ki ai, pea ʼe mole ko ia ʼae ʼe ina toʼo te ʼu tonu fakamuli ʼo ʼuhiga mo te ʼu fanau. Kotea ʼae ʼe feala ke ke fai moka hoko he aluʼaga feia? Kapau ʼe ke fakamalo ki te tuagaʼane ʼo ʼuhiga mo ʼana faiga, pea mo ke fakamahino age kia natou ʼae tona aluʼaga moʼoni, ʼe feala ai anai hau fakagata tanatou faifatufatu.

18. Kotea te tahi tokoni ʼe feala ke tou foaki ki ʼotatou tuagaʼane?

¹⁸ ʼE feala ke tou fakaha ʼe tou tokakaga ki ʼotatou tuagaʼane ʼaki hatatou fai he ʼu gaue moʼo tokoni kia natou. (1 Soa. 3:18) ʼE ui fenei e Annette,  ʼae neʼe tokaga ki tana faʼe he neʼe mahaki: “Neʼe ʼomai ʼihi tehina mo tuagaʼane ʼo tokaga ki taku faʼe ke feala ai haku fai he tahi ʼu gaue. Pea neʼe ʼomai ʼihi mo tamā meʼa kai. Neʼe au logoʼi tanatou ʼoʼofa ia au. Pea neʼe au maʼuhiga kia natou.” Neʼe toe tokoni foki ʼihi ki te tuagaʼane ko Jordan. Neʼe fakamahinohino age e he tehina pe ʼe feafeaʼi hana tokaga lelei ki tana motoka. ʼE ui fenei e Jordan: “ ʼE malave kia au taku sio ʼae ʼe mole loto e te ʼu tehina mo tuagaʼane ke au tuʼutamakiʼia.”

19. Kotea he tahi ʼu tokoni ʼe feala ke foaki e te ʼu tagata ʼafea ki te ʼu tuagaʼane?

¹⁹ ʼE toe loto foki e te ʼu tagata ʼafea ke natou tokoni ki te ʼu tuagaʼane. ʼE natou iloʼi ʼe loto e Sehova ke tokaga lelei kia natou. (Sakp. 1:27) Koia, ʼe natou faʼifaʼitakiʼi ia Sesu pea mo aga fakapotopoto. ʼE natou fakaha te faʼahi ʼaia ʼi tanatou agalelei pea mo lotomahino ʼi ʼihi aluʼaga, kae mole natou fakatuʼu tuʼumaʼu ni lekula. (Mat. 15:22-28) Kapau ʼe faiga te kau tagata ʼafea ke natou tokoni ki te ʼu tuagaʼane, pea ʼe logoʼi e te ʼu tuagaʼane tonatou ʼofainaʼi e Sehova pea mo tana kautahi. Neʼe iloʼi e te tehina ʼae ʼe taupau ki te kutuga faifakamafola ʼae ʼe kau ai ia Kia, ʼe fetogi ʼapi anai. Neʼe ina foimo fai ai he ʼu fakatuʼutuʼu ke foaki he tokoni ki te tuagaʼane. ʼE ui fenei e Kia: “Neʼe mole kei au hoha fau leva. Neʼe fakaha lelei mai e te ʼu tagata ʼafea ʼe au maʼuhiga ki te kokelekasio, ʼaki ʼanatou fakalotomalohi pea mo tanatou tokoni mai. Pea ka hoko he aluʼaga faigataʼa, ʼe mole au tokotahi.”

20-21. ʼE feafeaʼi hatatou fakaha ʼe tou ʼoʼofa ki ʼotatou tuagaʼane?

²⁰ ʼI totatou kokelekasio, ʼe lahi ai ʼotatou tuagaʼane ʼe faʼa gaue pea ʼe tonu ke tou fakalotomalohiʼi ia natou. Ohage ko Sesu, tou toʼo he temi ke tou fakatahitahi mo natou, ke tou iloʼi lelei ai natou. Tou fakaha age kia natou tatatou lotofakafetaʼi ki te ʼu gaue ʼae ʼe natou fai ʼi tanatou tauhi ki te ʼAtua. Tou tokoni kia natou pea ʼaua naʼa tou tuku ke valokiʼi natou.

²¹ ʼI te fakaʼosi ʼo tana tohi ki te kau Loma, neʼe fakaha e Paulo te ʼu higoa ʼa te ʼu fafine Kilisitiano ʼe toko hiva. (Loma 16:1, 3, 6, 12, 13, 15) ʼE mahino papau ia, neʼe fakalotomalohiʼi te ʼu fafine ʼaia ʼi tanatou logo ki tona tala ʼofa age pea mo vikiʼi natou. ʼO toe feia mo tatou, tou fakalotomalohiʼi te ʼu tuagaʼane fuli ʼo totatou kokelekasio. ʼE tou fakaha ai ʼe tou ʼoʼofa ia natou, pea ʼe natou maʼuhiga ki totatou famili fakalaumalie.