1. Fakamatala te maʼuli ʼo te kau Sutea ʼae neʼe ʼave popula ki Papiloni.

 FAKAKAUKAUʼI age muʼa te fahaʼi ʼae neʼe logoʼi e te kau Sutea ʼi tonatou ʼave popula ki Papiloni. Neʼe natou sisio mata ki te maumauʼi ʼo tonatou fenua. Neʼe natou fai ni agahala ʼo feia mo ʼanatou kui, koia neʼe tonu ai ke natou mavae mai ʼonatou ʼapi ʼo olo ki he fenua matapule. (2 Klk. 36:15, 16, 20, 21) ʼE moʼoni, neʼe natou toe faʼu tonatou maʼuli ʼi Papiloni. (Sel. 29:4-7) Kae neʼe faigataʼa pea neʼe mole natou loto ke natou maʼuʼuli ʼi ai. Kotea ʼae neʼe natou logoʼi ʼuhi ko te aluʼaga ʼaia? Neʼe ui fenei e he tahi ia natou: “Neʼe matou nonofo ovi ki te ʼu vai tafe ʼo Papiloni. Neʼe matou fetagihi ʼi tamatou manatuʼi ia Sione.” (Pes. 137:1) Neʼe ʼaoga he fakafimalie ki te kau Sutea ʼaia kua lotomamahi. Kae ko ai ʼae ka ina fakafimalieʼi natou?

2-3. (1) Kotea ʼae neʼe fai e Sehova maʼa te kau Sutea ʼae neʼe ʼave popula? (2) Kotea ʼae ka tou vakaʼi anai ʼi te alatike ʼaeni?

² Ko Sehova ʼe ko “te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe.” (2 Ko. 1:3) ʼE ko te ʼAtua ʼofa, pea ʼe fiafia ʼi te fakafimalieʼi ia natou fuli ʼae ʼe fakaovi kia te ia. Neʼe ina iloʼi ko ʼihi ia natou ʼae neʼe ʼave popula ʼe natou tali anai tonatou fakatonutonuʼi pea mo toe liliu mai kia te ia. (Esa. 59:20) Koia, ia taʼu ʼe 100 tupu ʼi muʼa ʼo tonatou ʼave popula, neʼe takitaki e Sehova ia te polofeta ko Esaia ke ina tohi ia te tohi ʼae ʼe tuʼu ki tona higoa. Kotea tona tupuʼaga? ʼE ui fenei e Esaia: “ ʼE ui e tokotou ʼAtua: ‘Kotou fakafimalieʼi, kotou fakafimalieʼi taku hahaʼi.’ ” (Esa. 40:1) ʼEi ʼaki te tohi ʼo Esaia, neʼe foaki ai e Sehova he fakafimalie ki te kau Sutea ʼae ka ʼave popula ʼi Papiloni.

³ Ohage pe ko te kau Sutea ʼae neʼe ʼave popula, ʼe toe ʼaoga ʼi ʼihi temi kia tatou he fakafimalie. ʼI te alatike ʼaeni, ʼe tou vakaʼi anai aluʼaga ʼe tolu neʼe fakaʼaogaʼi e Sehova moʼo fakafimalieʼi te kau Sutea ʼae neʼe ʼave popula: (1) Neʼe ina fakapapau ʼe fakamolemole anai kia natou ʼae ʼe fakahemala, (2) neʼe ina foaki ki tana hahaʼi ia he ʼamanaki pea (3) neʼe tokoni kia natou ke mole natou matataku.  ʼE tou toe vakaʼi anai pe ʼe fakaʼaogaʼi feafeaʼi e Sehova te ʼu aluʼaga ʼaia moʼo fakafimalieʼi ʼo tatou ʼi te temi nei.

ʼE FAKAMOLEMOLE MAI IA SEHOVA

4. Neʼe fakaha feafeaʼi e Sehova ko ia ko he ʼAtua manavaʼofa? (Esaia 55:7)

⁴ Ko Sehova “te Tamai ʼo te ʼu manavaʼofa.” (2 Ko. 1:3) Neʼe ina fakaha tona manavaʼofa ki te kau Sutea ʼae neʼe ʼave popula, ʼi tana fakapapau ʼae ʼe fakamolemole anai kia natou ʼaia ʼe fakahemala. (Lau ia Esaia 55:7.) Neʼe ui e Sehova: “ ʼI te heʼe gata ʼo toku ʼofa agatonu, ʼe au ʼofa anai kia koe.” (Esa. 54:8) Kae neʼe fakaha feafeaʼi e Sehova ia tona manavaʼofa? Logo la te maʼuli mamahi ʼa te kau Sutea lolotoga ni lauʼi taʼu ʼuhi ko tanatou ʼu aga, kae neʼe fakapapauʼi age e Sehova ʼe mole natou nonofo anai ʼi Papiloni ʼo talu ai. ʼEi, ʼe fakatemi pe anai tanatou nofo popula ai. (Esa. 40:2) ʼE mahino ia, neʼe fakalotofimalie ia te ʼu palalau ʼaia ki te kau Sutea ʼae neʼe fakahemala.

5. He koʼe ʼe tou tui papau ia ʼaho nei ʼe manavaʼofa ia Sehova?

⁵ Kotea ʼae ʼe tou ako mai ai? ʼE lotolelei ia Sehova ke fakamolemole katoa ki ʼana kaugana. Kapau la neʼe tui papau ia te kau Sutea ʼae neʼe ʼave popula ki Papiloni ki te fahaʼi ʼaia, pea ʼe toe moʼoni lahi age la ia ʼi te temi nei. Kotea tona tupuʼaga? Koteʼuhi ʼe tou iloʼi te fahaʼi ʼae neʼe fai e Sehova moʼo fakamolemole ʼatatou agahala. Hili ni sekulo ki te faifakakikite ʼa Esaia, neʼe fekauʼi ifo e Sehova ia tona ʼAlo ʼofaina ki te kele. Neʼe ina foaki he totogi maʼa te kau agahala ʼae ʼe fakahemala. ʼAki te sakilifisio ʼaia, ʼe feala ai ke “molehi” katoa ai ʼatatou agahala. (Gaue 3:19; Esa. 1:18; Efe. 1:7) ʼEi, ko Sehova ʼe ko he ʼAtua ʼe lotomanavaʼofa.

6. He koʼe ʼe fakalotofimalie moka ʼe tou fakakaukauʼi te manavaʼofa ʼo Sehova? (Vakaʼi mo te pāki.)

⁶ ʼE fakalotofimalie te ʼu palalau ʼa Sehova ʼae ia Esaia 55:7, mo kapau ʼe kei kita tukugakoviʼi pe ia kita totonu. Logo la neʼe kua tou fakahemala, kae ʼe kei tou tukugakoviʼi pe ia tatou totonu ʼuhi ko he agahala neʼe tou fai ʼi muʼa atu. ʼE lagi tou tukugakoviʼi feia ia tatou he ʼe tou lolotoga tau mo te ʼu mamahi mai te agahala ʼaia neʼe tou fai. Kae kapau kua tou fakaha tatatou ʼu agahala pea mo fetogi tatatou aga, ʼe feala ke tou tui papau kua fakamolemole mai ia Sehova. Pea ka fakamolemole mai, pea ʼe mole ina toe manatuʼi tatatou agahala. (Vakaʼi mo Selemia 31:34.) Koia kapau ʼe mole kei manatuʼi e Sehova ʼatatou agahala ʼae neʼe tou fai ki muʼa atu, ʼe mole tonu ke tou toe manatuʼi. ʼE maʼuhiga age kia Sehova  ia te ʼu meʼa ʼae ʼe tou fai ʼi te temi nei, ʼi te ʼu agahala ʼae neʼe tou fai ki muʼa atu. (Esk. 33:14-16) Pea tahi, kua vave fakaʼateaina tatou ʼo talu ai e tatatou Tamai manavaʼofa mai te ʼu nunuʼa ʼo ʼatatou agahala.

7. Kotea ʼae ka ina uga anai tatou ke tou kole tokoni moka neʼe tou fai fakafufu he agahala?

⁷ Kotea ʼae ʼe tonu ke tou fai mo kapau ʼe tou tukugakoviʼi ia tatou totonu ʼuhi ko he agahala neʼe tou fai fakafufu? ʼE fakalotomalohiʼi tatou ʼi te Tohi-Tapu ke tou kole tokoni ki te ʼu tagata ʼafeā. (Sakp. 5:14, 15) ʼE moʼoni, ʼe faigataʼa te fakaha ʼo he agahala neʼe tou fai. Kae tou manatuʼi, ʼe fakaʼaogaʼi e Sehova ia te ʼu tagata ʼaia, ke natou tokoni mai pea ʼe natou ʼoʼofa mo manavaʼofa kia tatou ohage pe ko Sehova. Kapau ʼe tou manatuʼi te fahaʼi ʼaia pea mo tou fakahemala, ʼe tou lava palalau anai kia natou. Tou vakaʼi pe neʼe maʼu feafeaʼi e te tehina ko Arthur, a ia he fakafimalie ʼuhi ko te manavaʼofa ʼo Sehova. Neʼe ina tukugakoviʼi ia ia totonu pea neʼe gaue tona leʼo ʼo loto. ʼE ina ui fenei: “Neʼe teitei taʼu katoa taku sioʼi ia te ʼu ʼata kovi. Kae ʼi taku logo ki he akonaki ʼo ʼuhiga mo te leʼo ʼo loto, neʼe au fakaha ai taku agahala ki toku ʼohoana mo te ʼu tagata ʼafeā. Neʼe au lotofimalie ʼosi ai kae neʼe kei au lotovaivai pe ʼi te meʼa ʼae neʼe au fai. Neʼe fakamanatuʼi mai leva e te ʼu tagata ʼafeā neʼe mole liʼaki au e Sehova. ʼE ina fakatonutonuʼi tatou he ʼe ʼofa ia tatou. Neʼe malave ki toku loto ʼanatou ʼu palalau agalelei ʼaia. Pea neʼe au mahino ai, kua fakamolemole moʼoni mai ia Sehova.” ʼI te temi ʼaeni, kua pionie ia Arthur pea mo faifekau fakaminisitelio. ʼE fakalotofimalie tatatou iloʼi ʼae ko Sehova ʼe manavaʼofa kia tatou moka ʼe tou fakahemala.

ʼE FOAKI MAI E SEHOVA HE ʼAMANAKI

8. (1) Kotea te ʼamanaki ʼae neʼe foaki e Sehova ki te kau Sutea ʼae neʼe ʼave popula ki Papiloni? (2) Ka tou lau ia Esaia 40:29-31, neʼe malave feafeaʼi te ʼamanaki ʼaia ki te kau Sutea?

⁸ ʼI te sio fakatagata, neʼe mole feala ke fakaʼateainaʼi ia te kau Sutea ʼae neʼe ʼave popula ki Papiloni. Pea neʼe mole ko te agamahani ʼa te kau Papiloni te fakaʼateainaʼi ʼo tanatou kau pilisoni. (Esa. 14:17) Kae neʼe foaki e Sehova ki tana hahaʼi ia he ʼamanaki. Neʼe ina fakapapau ʼe ina fakaʼateainaʼi anai natou. Pea ʼe mole he meʼa ʼe feala ke ina taʼofi ia ia. (Esa. 44:26; 55:12) Neʼe hage kia Sehova ia Papiloni ʼe ko he efu. (Esa. 40:15) Ka puhiʼi te efu pea ʼe puli ia. ʼE toe feia pe neʼe faigafua pe kia Sehova hana fakaʼateainaʼi ia tana hahaʼi. Neʼe malave feafeaʼi te ʼamanaki ʼaia ki te kau Sutea? Neʼe fakalotofimalieʼi ai natou. Kae neʼe mole gata ai. Neʼe tohi fenei e Esaia: “Ko natou ʼae ʼe falala kia Sehova ʼe toe malolohi anai.” (Lau ia Esaia 40:29-31.) ʼEi, ʼe natou malolohi anai ʼuhi ko te ʼamanaki. ʼE natou malaga ake anai ohage ʼe “natou maʼu te ʼu pakakau ʼo ni akuila.”

9. He koʼe neʼe tui papau te kau Sutea ʼae neʼe ʼave popula ʼe fakahoko moʼoni anai e Sehova ʼana fakapapau?

⁹ Neʼe toe fakaha e Sehova ki te kau Sutea pe koʼe ʼe tonu ke natou falala ki ʼana fakapapau. Neʼe tonu ke natou manatuʼi te ʼu lea fakapolofeta ʼae neʼe kua ina fakahoko. Ohage la, neʼe iloʼi e te kau Sutea neʼe tonu ke tauʼi e te kau Asilia ia te puleʼaga ʼo te ʼu telepi ʼe hogofulu ʼo Iselaele pea mo ʼave popula ia te hahaʼi. (Esa. 8:4) Pea neʼe natou sisio ki te maumauʼi ʼo Selusalemi e te kau Papiloni pea mo ʼave popula te hahaʼi. (Esa. 39:5-7) Neʼe natou toe iloʼi foki neʼe kua fakakikite te haga ʼa te Hau ʼo Papiloni ʼo fakakiviʼi ia te Hau ko Setesiasi pea mo ʼave ki Papiloni. (Sel. 39:7; Esk. 12:12, 13) Neʼe iloʼi lelei ʼosi e te kau Sutea ʼae neʼe ʼave popula ia te ʼu faʼahi ʼaia. Pea ko te ʼu meʼa fuli ʼae neʼe fakakikite e Sehova neʼe hoko moʼoni ia. (Esa. 42:9; 46:10) Koia, ʼe mahino ia, neʼe tui papau te kau Sutea, ʼe toe hoko moʼoni anai tana fakapapau ʼae ke ina fakaʼateainaʼi natou.

10. Kotea ʼae ʼe feala ke tokoni mai ke tou taupau maʼu ke malohi tatatou ʼamanaki ʼi te ʼu ʼaho fakamuli ʼaeni?

¹⁰ Kotea ʼae ʼe tou ako mai ai? Ka tou lotovaivai,  ʼe feala ke tou maʼu he fakafimalie pea mo toe maʼu te malohi ʼuhi ko tatatou ʼamanaki. Loga la te kua ʼasili kovi ʼo te ʼu aluʼaga ʼo te malamanei mo te fakafeagai mai ʼa he ʼu fili malohi, kae ʼe mole tou lotovaivai. Koia, ʼe foaki mai e Sehova ia te ʼamanaki taulekaleka ʼaeni: ke tou maʼuʼuli ʼo heʼe gata ʼi te tokalelei mo te fimalie. Kae ʼe tonu ke tou taupau maʼu ia te ʼamanaki ʼaia ʼi totatou loto mo ʼatamai pea ke moʼoni kia tatou. Kapau ʼe mole tou fai te fahaʼi ʼaia, ʼe hage tpe ʼe tou sioʼi he koga meʼa matalelei ʼi he matapa fakamalama ʼe ʼuli, ʼo feala ai ke nenefu tatatou sio ki te ʼamanaki ʼaia. Koia, ʼe feafeaʼi hatatou “fakamaʼa ia te matapa fakamalama” ʼaia? Pea ʼe feafeaʼi hatatou taupau ke malohi pea ke moʼoni kia tatou te ʼamanaki ʼaia? Tou toʼo he temi ke tou fakakaukauʼi ia te maʼuli fiafia ka tou maʼu anai ʼi te malama foʼou. Tou lau ni alatike, mo sioʼi ni ʼata viteo, pea mo tou fakalogo he ʼu hiva ʼo ʼuhiga mo tatatou ʼamanaki ʼaia. Pea ʼe toe feala foki ke tou palalau kia Sehova ʼi te faikole ʼo ʼuhiga mo te ʼu fakapapau ʼae ʼe tou fakaʼamu la ke hoko.

11. Kotea ʼae ʼe tokoni ki he tuagaʼane ʼe tau mo he ʼu mahaki faigataʼa ke ina toe maʼu te malohi?

¹¹ Ko te tuagaʼane ko Joy ʼe tau mo ni mahaki faigataʼa. Tou vakaʼi pe ʼe ina maʼu feafeaʼi he fakafimalie pea mo toe maʼu te malohi ʼuhi ko te ʼamanaki. ʼE ina ui fenei: “Ka au lotovaivai ʼuhi ko toku ʼu mahaki, ʼe au fakaha kia Sehova ia te ʼu meʼa fuli ʼae ʼe au logoʼi. Pea ʼe au iloʼi ʼe lotomahino mai. ʼI te ʼu temi ʼaia, ʼe foaki mai e Sehova te ‘malohi makehe.’ ” (2 Ko. 4:7) ʼE toe fakakaukauʼi e Joy kua maʼuli ʼi te malama foʼou, ʼae ʼe “mole ui anai e he tahi: ‘ ʼE au mahaki.’ ” (Esa. 33:24) Kapau ʼe tou toe fakaha kia Sehova ia te ʼu meʼa fuli ʼae ʼe tou logoʼi, pea mo taupau maʼu ʼi ʼotatou ʼatamai ia tatatou ʼamanaki, ʼe tou toe maʼu anai ia te malohi moʼo katakiʼi ʼotatou fihifihia.

12. He koʼe ʼe tonu ke tou falala ki te ʼu fakapapau ʼa Sehova? (Vakaʼi mo te pāki.)

¹² ʼE toe fakaha mai e Sehova pe koʼe ʼe tonu ke tou falala ki ʼana fakapapau, ohage pe ko tana fai ʼi muʼa atu ki te kau Sutea ʼae neʼe ʼave popula ki Papiloni. Koia, tou fakakaukauʼi ʼihi lea fakapolofeta ʼe tou sisio kua ʼosi hoko. Ohage la, ʼe tou sio ʼe puleʼi ia te malamanei e te malohi fakamalamanei ʼo Pilitania mo Amelika, ʼae ʼe ‘malohi te tahi faʼahi kae ʼe vaivai tona tahi faʼahi.’ (Tan. 2:42, 43) ʼE toe hoko foki ni “mafuike mai he potu ki he tahi age potu,” pea ʼe tou faifakamafola ki te hahaʼi ʼo “te ʼatu puleʼaga.” (Mat. 24: 7, 14) ʼEi, ʼe tou sisio mata ki te hoko moʼoni ʼo te ʼu lea fakapolofeta ʼaia pea mo ʼihi atu. Koia, ʼe fakamalohiʼi ai tatatou tui ki te ʼu fakapapau taulekaleka mo fakalotofimalie ʼa Sehova ʼae kei toe ke ina fakahoko anai.

ʼE TOKONI MAI IA SEHOVA KE MOLE TOU TUʼANIA MO MATATAKU

13. (1) Kotea te ʼu faigataʼaʼia neʼe tau mo te kau Sutea ʼi te kua ovi mai ʼo tonatou fakaʼateaina? (2) Ka tou lau ia Esaia 41:10-13, neʼe fakafimalieʼi feafeaʼi e Sehova ia te kau Sutea ʼae neʼe ʼave popula?

¹³ Neʼe foaki e Sehova he ʼamanaki taulekaleka ki te kau Sutea ʼae neʼe ʼave popula. Kae neʼe ina iloʼi ʼe natou tau anai mo ni faigataʼaʼia ʼi te kua ovi mai ʼo tonatou fakaʼateaina. Neʼe fakakikite e Sehova ʼe tauʼi anai e he hau malohi ia te ʼu puleʼaga ʼae ʼe tuʼu ovi ki Papiloni pea mo malo ai. Pea ʼe tauʼi anai leva e te hau ʼaia ia Papiloni. (Esa. 41:2-5) Neʼe tonu koa ke matataku te kau Sutea? Kailoa. ʼI ni taʼu ʼi muʼa ʼo te hoko ʼo te fahaʼi ʼaia, neʼe fakafimalieʼi e Sehova ia tana hahaʼi. Neʼe ina ui fenei: “ ʼAua naʼa ke mataku he ʼe au nofo mo koe. ʼAua naʼa ke tuʼania he ʼe ko au tou ʼAtua.” (Lau ia Esaia 41:10-13.) Kotea te fakaʼuhiga ʼo te ui ʼae e Sehova “Ko au tou ʼAtua”? Neʼe mole ina fia fakamanatuʼi age ki te kau Sutea ʼe ko ia ʼae ʼe tonu ke natou atolasio ki ai, he neʼe kua ʼosi natou iloʼi pe. Kae neʼe ina fakamanatuʼi age ko ia tonatou ʼAtua, pea ʼe nofo tuʼumaʼu pe anai mo natou.—Pes. 118:6.

14. Kotea te tahi fahaʼi neʼe fai e Sehova moʼo tokoni ki te kau Sutea ke ʼaua naʼa natou matataku?

¹⁴ Neʼe tokoni ia Sehova ki te kau Sutea ʼae neʼe ʼave popula ke mole natou matataku. Neʼe ina toe fakamanatuʼi age ʼe mole he tuakoi ʼo tona malohi pea mo tona ʼatamai malama. Neʼe ina kole age ke natou hiki ake ʼonatou mata ʼo sisio ki te lagi fetuʼuʼia. Neʼe ina ui age, neʼe mole gata pe ki tana fakatupu ia te ʼu fetuʼu kae ʼe ina toe iloʼi ʼonatou higoa takitahi. (Esa. 40:25-28) Kapau la ʼe ina iloʼi te fahaʼi ʼaia pea ʼe feafeaʼi age la ia ki te ʼu higoa ʼo ʼana kaugana takitokotahi. ʼEi, kapau ʼe maʼu e Sehova te malohi moʼo fakatupu ia te ʼu fetuʼu, pea ʼe mahino papau ia ʼe ina maʼu te malohi moʼo tokoni ki tana hahaʼi. Koia la ʼae neʼe mole tonu ai ke matataku mo tuʼania ia te kau Sutea ʼae neʼe ʼave popula.

15. Kotea ʼae neʼe ui e Sehova ke fai e tana hahaʼi?

¹⁵ Neʼe toe fakaha age e Sehova ki tana hahaʼi te meʼa ʼae ʼe tonu ke natou fai ʼi te temi ʼae ka fakaʼateainaʼi ai natou. ʼI te kamataʼaga ʼo te tohi ʼo Esaia, neʼe ui ai e Sehova ki tana hahaʼi: “Ulu ki  ʼou koga fale taupotu pea ke pupunu te ʼu matapa ʼi ʼou tuʼa. Ke ke nono ʼi he kiʼi temi, ʼo kaku ki te ʼosi ʼo toku hauhau.” (Esa. 26:20) Neʼe ʼuluaki hoko te lea fakapolofeta ʼaia ʼi te temi ʼae neʼe ʼohofi ai e te Hau ko Siliusi ia Papiloni. Neʼe ui e he tagata faihisitolia Keleka, ʼi te temi ʼae neʼe hu ai ia Siliusi ki Papiloni, neʼe ‘ina fakatotonu ki tana kau solia ke natou matehi he tahi pe ʼe natou maʼu atu ʼi tuʼa.’ Fakakaukauʼi age muʼa, neʼe lagi matataku te kau Papiloni. Kae neʼe hao te kau Sutea ʼae neʼe nonofo popula ai he neʼe natou fakalogo ki te ʼu fakatotonu ʼa Sehova.

16. He koʼe ʼe mole tonu ke tou matataku ʼi te ʼu aluʼaga ʼae ka hoko ʼi te mamahi lahi? (Vakaʼi mo te pāki.)

¹⁶ Kotea ʼae ʼe tou ako mai ai? Kua vave pe te hoko mai ʼo te mamahi lahi. Pea ka kamata anai, ʼe manavahe anai te hahaʼi pea mo matataku. Kae ʼe mole feia anai te hahaʼi ʼa Sehova. ʼE tou iloʼi ko Sehova ʼe ko totatou ʼAtua. ʼE tou lotomalohi anai he ʼe tou iloʼi ‘kua ovi mai totatou haofaki.’ (Luka 21:28) Pea ʼe tou toe lotomalohi anai moka ʼohofi tatou e te ʼu puleʼaga kua fakatahitahi. ʼEi, ʼe hoko atu pe anai tatatou falala ʼae kia Sehova. ʼE ina fakaʼaogaʼi anai te kau ʼaselo moʼo puipui ʼo tatou, pea ʼe ina foaki mai anai he ʼu fakatotonu ke haofaki ai tatou. ʼE tou maʼu feafeaʼi anai te ʼu fakatotonu ʼaia? ʼE hoki tou iloʼi anai ʼi tona temi totonu. Kae ʼe lagi tou maʼu anai te ʼu fakatotonu ʼaia ʼi ʼotatou kokelekasio. ʼE fakata e te ʼu kokelekasio ʼaia ia te ʼu “koga fale taupotu” ʼae ʼe puipui ai tatou. ʼE feafeaʼi hatatou teuteu nei ki te ʼu aluʼaga ʼae ka hoko mai? Tou fakatahi tuʼumaʼu mo ʼotatou tehina mo tuagaʼane, mo fakalogo ʼaki he lotolelei ki te ʼu fakatotonu ʼae ʼe foaki mai e te kautahi ʼa Sehova, pea mo tou tui papau ʼe ko Sehova ʼae ʼe ina taki tatatou kautahi.—Hep. 10:24, 25; 13:17.

17. ʼE feafeaʼi hatatou maʼu ia te fakalotofimalie ʼa Sehova?

¹⁷ Logo la neʼe mole faigafua te maʼuli ʼa te kau Sutea ʼae neʼe ʼave popula ki Papiloni, kae neʼe fakalotofimalieʼi pe natou e Sehova. ʼE toe fai feia pe anai e Sehova kia tatou. Kotea pe he aluʼaga ka hoko ʼi te ka haʼu, ke ke haga kumi tuʼumaʼu ia te fakalotofimalie ʼa Sehova. Pea ke ke manatuʼi ia tona manavaʼofa lahi, mo taupau maʼu tau ʼamanaki pea ke moʼoni tuʼumaʼu kia koe. ʼEi, manatuʼi ko Sehova ʼe ko tou ʼAtua. Koia ʼe mole tonu anai ke ke mataku.