1. Kotea ʼae neʼe fakaha mai ʼi te 2023, ʼi te fakatahi ʼae ʼe fai ʼi te taʼu fuli?

 ʼI TE 2023, ʼi te fakatahi ʼae ʼe fai ʼi te taʼu fuli, a neʼe fakaha mai ni fakamahino foʼou ʼo ʼuhiga mo ʼatatou akonaki, feia mo ni logo ʼo ʼuhiga mo tatatou faifakamafola. Ohage la, neʼe fakaha mai ʼe feala pe anai ki ʼihi ke natou kau ki te hahaʼi ʼa Sehova hili te maumauʼi ʼo Papiloni Lahi. Neʼe toe fakaha mai, ʼo kamata ʼi Novepeli 2023, ʼe ʼi ai ni faʼahi ʼe mole kei fakamaʼua ki te kau faifakamafola ke natou tohi ʼi tanatou ʼu pepa gaue. Ko tona fakaʼuhiga koa, ʼe mole kei maʼuhiga tatatou gaue faifakamafola? Kailoa ia.

2. He koʼe kua liliu ʼo maʼuhiga ʼaupito age tatatou faifakamafola ʼaki te fakalaka ʼo te temi? (Maleko 13:10)

² Kua liliu ʼo maʼuhiga ʼaupito age tatatou faifakamafola ʼaki te fakalaka ʼo te temi. Kotea tona tupuʼaga? Koteʼuhi he ʼe mole kei lahi te temi ʼae kei toe ʼi muʼa ʼo te hoko mai ʼo te fakaʼosi. Tokagaʼi pe kotea ʼae neʼe fakakikite e Sesu ʼo ʼuhiga mo te faifakamafola ʼi te ʼu ʼaho fakamuli. (Lau ia Maleko 13:10.) ʼI te Evaselio ʼo Mateo, neʼe ui e Sesu ʼe tonu anai ke fakamafola te logo ʼi te kele katoa, pea hoki hoko mai anai “te fakaʼosi.” (Mat. 24:14) ʼE fakaʼuhiga ki te fakaʼosi ʼo te malama agakovi ʼo Satana. Kua ʼosi fakatuʼutuʼu e Sehova “te ʼaho mo te hola” ʼo te ʼu aluʼaga ʼaia kua vave hoko mai. (Mat. 24:36; 25:13; Gaue 1:7) Kua tou fakaovi ki te fakaʼosi. (Loma 13:11) Pea ʼe tonu pe ke hoko atu tatatou faifakamafola ʼo kaku ki te fakaʼosi.

3. Kotea ʼae ʼe ina uga tatou ke tou faifakamafola?

 ³ ʼE ʼi ai te fehuʼi ʼe tou fia fakakaukauʼi lelei fuli ki ai: Kotea ʼae ʼe ina uga tatou ke tou faifakamafola? ʼI tona fakanounou, ʼe ko totatou ʼofa ʼae ʼe ina uga ai tatou. Ko te meʼa ʼae ʼe tou fai ʼi te gaue faifakamafola ʼe ha ai totatou ʼofa, ʼei totatou ʼofa ki te logo lelei, totatou ʼofa ki te hahaʼi, pea tafito age totatou ʼofa kia Sehova mo tona huafa. Tou vakaʼi te ʼu faʼahi takitahi ʼaia.

ʼE TOU FAIFAKAMAFOLA HE ʼE TOU ʼOʼOFA KI TE LOGO LELEI

4. Neʼe ke logo feafeaʼi ʼi te temi ʼae neʼe fakaha atu ai he logo lelei?

⁴ ʼE ke manatuʼi koa pe neʼe ke logo feafeaʼi ʼi te temi ʼae neʼe fakaha atu ai he logo lelei, lagi neʼe fakaha atu te tupu ʼa he kiʼi toe peʼe foaki atu he gaue neʼe ʼaoga ʼaupito? ʼE mahino ia neʼe ke fia vaevae te logo lelei ʼaia mo tou famili pea mo ʼou kaumeʼa. Neʼe ke toe feia koa ʼi te temi ʼae neʼe ke logo ai ki te logo lelei tukupau, ia te logo lelei ʼo te Puleʼaga ʼo te ʼAtua?

5. Neʼe ke feafeaʼi ʼi te temi ʼae neʼe ke kamata ako ai te ʼu moʼoni ʼi te Folafola ʼa te ʼAtua? (Vakaʼi mo te ʼu pāki.)

⁵ Manatuʼi pe neʼe ke feafeaʼi ʼi te temi ʼae neʼe ke kamata ako ai te ʼu moʼoni ʼi te Folafola ʼa te ʼAtua. Neʼe ke mahino ai ko tau Tamai ʼae ʼi selo ʼi ʼofa ia koe, ko tona loto ke ke tauhi kia te ia fakatahi mo tona famili, ʼe ina fakapapau atu ʼe ina fakagata anai te ʼu mamahi, ʼe feala hau toe fesioʼaki mo natou ʼae neʼe ke ʼofa mamahi ai kae kua mamate, he ʼe ina fakatuʼuake anai natou ʼi te malama foʼou. Pea toe lahi age la te tahi ʼu faʼahi neʼe ke ako. (Mko. 10:​29, 30; Soa. 5:​28, 29; Loma 8:​38, 39; Fkha. 21:​3, 4) ʼE mahino ia neʼe ke fiafia ʼaupito ai. (Luka 24:32) Neʼe ke ʼofa ai ki te ʼu moʼoni ʼaia neʼe ke ako, pea neʼe mole feala ke ke taupau pe maʼa koe.—Vakaʼi mo Selemia 20:9.

6. Kotea ʼae ʼe ke ako mai te aluʼaga ʼae neʼe hoko kia Ernest mo Rose?

⁶ Tou vakaʼi te aluʼaga neʼe hoko ki te tehina ko Ernest ʼae neʼe taʼu hogofulu ʼi te temi ʼae neʼe mate ai tana tamai. ʼE ina ui: “Neʼe  au feʼekeʼaki pe neʼe kua alu koa ki selo, peʼe kua mate koa ʼo talu ai? Neʼe au maheka ʼi taku sio ʼae ki te ʼu fanau ʼae neʼe kei maʼuʼuli ʼanatou tamai.” Neʼe tau alu ia Ernest ki te tanuma, ʼo tuʼutuli ia muʼa ʼo te fale maka ʼo tana tamai, pea faikole fenei: “ ʼAtua e, ʼofa mai ʼe au fia iloʼi pe ʼifea taku tamai.” Hili taʼu ʼe 17 ʼi te kua ʼosi mate ʼo tana tamai, neʼe tali e Ernest ke fai hana ako Tohi-Tapu. Neʼe fiafia ai ʼi tana iloʼi ʼae ʼe mole iloʼi he meʼa e te kau mate, ʼe hage pe ʼe natou momoe. Pea ʼe palalau ʼi te Tohi-Tapu ki te fakatuʼuake. (Ekl. 9:​5, 10; Gaue 24:15) Neʼe maʼu ai leva e Ernest te ʼu tali ki te ʼu fehuʼi ʼae neʼe ina fai talu mai fualoa. Neʼe ina leleiʼia ʼaupito te ʼu moʼoni ʼae neʼe ina ako ʼi te Tohi-Tapu. Ko Rose tona ʼohoana, neʼe toe fai mo tana ako Tohi-Tapu pea neʼe toe ʼofa mo ia ki te ʼu meʼa ʼae neʼe ina ako. Neʼe nā papitema taumatuʼa ʼi te taʼu 1978. Neʼe nā palalau ki te ʼu moʼoni ʼaia ki tonā famili, mo ʼonā kaumeʼa pea mo he tahi pe neʼe fia logo. Neʼe tokoni ai ia Ernest mo Rose ki te toko 70 ke natou tuputupu ʼo kaku ki te papitema.

7. Kotea ʼae ʼe hoko moka tou ʼoʼofa mamahi ki te ʼu moʼoni ʼae ʼi te Tohi-Tapu? (Luka 6:45)

⁷ ʼE ha lelei mai ka tou ʼoʼofa mamahi ki te ʼu meʼa ʼae ʼe tou ako ʼi te Tohi-Tapu, ʼe mole feala ia ke tou nonofo fakalogologo. (Lau ia Luka 6:45.) ʼE tou hage ko te ʼu ʼuluaki tisipulo ʼa Sesu ʼae neʼe nā ui fenei: “ ʼE mole feala ke ma tuku tamā palalau ki te ʼu meʼa ʼae neʼe ma sisio mo logo ki ai.” (Gaue 4:20) ʼI totatou ʼoʼofa mamahi ʼae ki te moʼoni, ʼe tou fia palalau ai ki te hahaʼi tokolahi.

ʼE TOU FAIFAKAMAFOLA HE ʼE TOU ʼOʼOFA KI TE HAHAʼI

8. Kotea ʼae ʼe ina uga tatou ke tou fakaha te logo lelei ki te hahaʼi? (Vakaʼi te fakamatala ʼo te ʼa takai “  ʼOfa Ki Te Hahaʼi—Fai Ni Tisipulo.” ) (Vakaʼi mo te pāki.)

⁸ Ohage pe ko Sehova mo tona ʼAlo, ʼe tou ʼoʼofa ki te hahaʼi. (Taag. 8:31; Soa. 3:16) ʼE tou lotomanavaʼofa kia natou ʼae ‘ ʼe mole natou iloʼi ia te ʼAtua’ pea ‘ ʼe mole honatou ʼamanaki.’ (Efe. 2:12) ʼE hage ʼe natou ʼi he luo ʼuhi ko te lahi ʼaupito ʼo ʼonatou fihifihia. Pea ʼe tou maʼu te maea ʼae moʼo toho ake natou mai te luo ʼaia. Ko te maea ʼaia ko te logo lelei ʼo te Puleʼaga ʼo te ʼAtua. Ko totatou ʼofa mo lotomanavaʼofa kia natou ʼaia, ʼe ina uga tatou ke tou faiga lahi ʼo fakaha age kia natou te logo lelei. Ka natou tali te logo ʼaia, ʼe feala ke natou maʼu ai he ʼamanaki, mo natou fiafia ʼi te temi nei. Pea ʼe natou toe maʼu te fealagia ʼae ke natou kaku ki te maʼuli moʼoni, ʼae ko te maʼuli heʼe gata ʼi te malama foʼou ʼa te ʼAtua.—1 Tim. 6:19.

9. Kotea te fakatokaga ʼe tou tala ʼo ʼuhiga mo te ka haʼu, pea kotea tona tupuʼaga? (Esekiele 33:​7, 8)

⁹ Ko totatou ʼoʼofa ki te hahaʼi ʼe ina toe  uga tatou ke tou fakatokaga kia natou te ovi mai ʼo te fakaʼosi ʼo te malama agakovi ʼaeni. (Lau ia Esekiele 33:​7, 8.) ʼE tou lotomanavaʼofa ki te hahaʼi fuli ʼo kau ai mo totatou famili ʼae ʼe mole natou tauhi kia Sehova. ʼE hoko atu pe te maʼuli ʼo te tokolahi kae mole natou iloʼi te aluʼaga ʼae ka hoko mai, “he toe mamahi lahi neʼe heʼeki hoko talu mai te kamataʼaga ʼo te malamanei ʼo kaku mai ki te temi nei, kailoa ia, pea ʼe mole toe hoko anai ia.” (Mat. 24:21) ʼE tou loto ke natou iloʼi pe kotea ka hoko anai ʼi te temi ʼaia ʼo te fakamau: ʼE pulihi anai te ʼu lotu hala ʼo feia mo te malama agakovi katoa ʼi Alamaketone. (Fkha. 16:​14, 16; 17:​16, 17; 19:​11, 19, 20) ʼE tou faikole ke kauga malie natou ʼae ka natou fakalogo ki te fakatokaga ʼaia pea mo natou fakatahi mo tatou ʼi te temi nei ʼi te tauhi maʼa. Kae ʼe feafeaʼi kia natou ʼae ʼe mole natou tokagaʼi te fakatokaga ʼae ʼe tou tala, ʼo kau ai natou ʼo totatou famili ʼe tou ʼoʼofa ai?

10. He koʼe ʼe maʼuhiga ke hoko atu tatatou tala te fakatokaga?

¹⁰ Ohage ko te fakamahino mai ʼi te alatike ki muʼa atu, ʼe lagi loto e Sehova ke haofaki te hahaʼi ʼae ʼe natou tui anai kia te ia moka natou sisio ki te maumauʼi ʼo Papiloni Lahi. Kapau koia, pea ʼe maʼuhiga ʼaupito age ʼi te temi nei ke hoko atu tatatou tala te fakatokaga. Fakakaukauʼi ia te faʼahi ʼaeni: Ko te logo ʼae ʼe tou fakaha age kia natou ʼi te temi nei ʼe lagi natou manatuʼi anai ʼi te temi ʼaia. (Vakaʼi mo Esekiele 33:33.) ʼE lagi natou toe manatuʼi anai te fakatokaga ʼae neʼe tou tala age, pea uga ai natou ke natou fakatahi mai ki te tauhi maʼa naʼa tauhala. Ohage pe ko te tagata leʼo pilisoni ʼi te kolo ʼo Filipe, ʼae neʼe tui ki te ʼAtua ʼi te ʼosi hoko ʼo “te mafuike lahi,” ko ʼihi ʼae ʼe mole natou tali ʼi te temi nei ʼe lagi natou tui anai kia Sehova hili te maumauʼi ʼo Papiloni Lahi.—Gaue 16:​25-34.

ʼE TOU FAIFAKAMAFOLA HE ʼE TOU ʼOʼOFA IA SEHOVA MO TONA HUAFA

11. ʼE feafeaʼi hatatou foaki kia Sehova te kololia, mo te fakaʼapaʼapa pea mo te malohi? (Fakaha 4:11) (Vakaʼi mo te ʼu pāki.)

¹¹ Ko te tupuʼaga tafito ʼo tatatou fakamafola te logo lelei ʼuhi he ʼe tou ʼoʼofa ia Sehova mo tona huafa maʼoniʼoni. Kia tatou ʼe ko he faigamalie ʼaia ke tou fakavikiviki ki te ʼAtua ʼae ʼe tou ʼoʼofa ai. (Lau ia Fakaha 4:11.) ʼE tou manatu tahi mo te ʼu palalau ʼaeni: “ ʼE tuha mo koe, Sehova tomatou ʼAtua, ke ke maʼu te kololia, mo te fakaʼapaʼapa pea mo te malohi.” ʼE tou foaki kia Sehova te kololia mo te fakaʼapaʼapa moka tou fakaha ki te hahaʼi te ʼu fakamoʼoni ʼae ko ia neʼe ina “fakatupu ia meʼa fuli” pea ʼe ko ia ʼae ʼe ina foaki mai te maʼuli. Pea ʼe tou  foaki kia te ia totatou malohi moka tou fakaʼaogaʼi totatou temi, totatou maʼuli pea mo ʼatatou koloa ke tou kau lahi ai ki te faifakamafola ʼo mulimuli ki totatou aluʼaga. (Mat. 6:33; Luka 13:24; Kol. 3:23) Koia ʼe tou leleiʼia te palalau ki te ʼAtua ʼae ʼe tou ʼoʼofa ai. ʼE tou toe fia tala foki ki te hahaʼi tona huafa pea mo tona ʼuluagaaga. Kotea tona tupuʼaga?

12. ʼE feafeaʼi hatatou fakatapuha te huafa ʼo Sehova moka tou faifakamafola?

¹² Ko totatou ʼofa kia Sehova ʼe ina uga tatou ke tou fakatapuha tona huafa. (Mat. 6:9) ʼE tou fia fakaha ki te hahaʼi ko te ʼu meʼa ʼae neʼe lau e Satana ʼo ʼuhiga mo Sehova ʼe ko ni loi. (Sen. 3:​1-5; Sopo 2:4; Soa. 8:44) Ka tou faifakamafola, ʼe tou fia fakamahino ki te hahaʼi fuli pe ko ai moʼoni totatou ʼAtua. ʼE tou loto ke natou iloʼi, ko tona kalitate ʼae ʼe lahi tokotahi ʼe ko te ʼofa, ko tana pule ʼe faitotonu pea kua vave pulihi anai e tona Puleʼaga te ʼu mamahi fuli pea mo fakatuʼu ʼi te kele katoa te tokalelei mo te fimalie. (Pes. 37:​10, 11, 29; 1 Soa. 4:8) Ka tou fakaha ki te hahaʼi te ʼu faʼahi ʼaia ʼo ʼuhiga mo Sehova, pea ʼe tou fakatapuha ai tona huafa. Pea ʼe tou toe fiafia ai he ʼe ko te faʼahi ʼaia ʼae ʼe tonu ke tou fai ʼi totatou ʼuhiga Fakamoʼoni ʼa Sehova. Kotea tona fakaʼuhiga?

13. He koʼe ʼe tou fiameʼameʼa ʼi te fakahigoaʼi ʼo tatou ko he ʼu Fakamoʼoni ʼa Sehova? (Esaia 43:​10-12)

¹³ Neʼe filifili tatou e Sehova ke tou liliu ko tana ʼu “fakamoʼoni.” (Lau ia Esaia 43:​10-12.) ʼI ni taʼu ki muʼa atu, neʼe ui ʼi te tohi neʼe fai e te Kolesi Pule: “ ʼE fakamaʼuhigaʼi lahi tatou ʼi te fakahigoaʼi ʼo tatou ko he ʼu Fakamoʼoni ʼa Sehova.” ʼO feafeaʼi? Ohage la, kapau ʼe tukugakoviʼi koe e he tahi neʼe ke fai he meʼa ʼe kovi. ʼE ke filifili anai he tahi ke alu ki te telepinale ʼo palalau maʼa  koe. ʼE ke filifili anai he tahi ʼe ke iloʼi lelei pea mo ke falala ki ai. Pea ʼe feala ke falala ki te ʼu meʼa ʼae ʼe ina ui he ʼe iloga ʼi tona faʼahiga maʼuli ʼe tuha mo te falala. Neʼe filifili tatou e Sehova ke tou liliu ko ʼana fakamoʼoni, ʼo ha ai ʼe falala kia tatou pea ʼe ina iloʼi lelei tatou. Pea ʼe falala ʼe tou tala anai ki te hahaʼi ko ia te ʼAtua moʼoni pe ʼe tahi. ʼE tou fiameʼameʼa ai pea ʼe tou fakaha tona huafa ʼi te ʼu faigamalie fuli pea mo tala te ʼu loi ʼae neʼe lau ʼo ʼuhiga mo ia. ʼE tuha ai te fakahigoaʼi ʼo tatou ko he ʼu Fakamoʼoni ʼa Sehova.—Pes. 83:18; Loma 10:​13-15.

TOU HAGA FAIFAKAMAFOLA ʼO KAKU KI TE FAKAʼOSI

14. Kotea ni aluʼaga ʼe tou fakaʼamu ke tou sisio ki ai?

¹⁴ ʼE tou fakaʼamu lahi ke tou sisio ki te ʼu alu aga ʼae ka vave hoko mai. ʼAki te tapuakina ʼa Sehova, ʼe tou sisio anai ki te tali e he toe hahaʼi ʼe kauga malie age ia te moʼoni ʼi muʼa ʼo te kamata ʼo te mamahi lahi. ʼE tou toe fiafia, heʼe maʼia ʼi te lolotoga ʼo te mamahi lahi, te temi faigataʼa ʼaupito ʼaia, ʼe feala pe anai ke tou sisio ki te mavae ʼa ni hahaʼi mai te malama ʼa Satana pea ke natou ʼomai ʼo fakavikiviki kia Sehova mo tatou.—Gaue 13:48.

15-16. Kotea te gaue ʼae ʼe tou hoko atu tona fai, pea ʼo kaku ki ʼafea?

¹⁵ Kae ʼi te temi nei, ʼe kei toe te gaue ʼe tonu ke tou fai. ʼE tou maʼu te pilivilesio ʼae ke tou kau ki he gaue ʼe mole toe fakahoko anai ʼi he temi: Te fakamafola ʼo te logo lelei ʼo te Puleʼaga ʼo te ʼAtua ʼi te kele katoa. ʼE tou haga tala ai foki mo te fakatokaga ʼo ʼuhiga mo te ʼu aluʼaga ʼae kua vave hoko mai. ʼE tonu ke iloʼi e te hahaʼi kua vave hoko mai pe te pulihi ʼo te malama agakovi ʼaeni. Feia la, ka hoko mai te temi ʼaia ʼo te fakamau, ʼe natou iloʼi anai ko te logo ʼae neʼe tou fakamafola neʼe haʼu mai ia Sehova ʼAtua.—Esk. 38:23.

¹⁶ Koia kotea ʼae ʼe tou fakatotonu ke tou fai? ʼUhi ko totatou ʼoʼofa ki te logo lelei, mo te hahaʼi pea tafito age ʼe tou ʼoʼofa kia Sehova ʼAtua mo tona huafa, ʼe hoko atu pe anai tatatou fai fakamalotoloto te gaue faifakamafola pea mo tou faʼafai ʼo kaku ki te temi ʼae ka ui ai e Sehova: “Kua feʼauga.”