Ka tou lau te Tahi-Tapu ʼe feala ke tou lau he ʼu koloa fakalaumalie ʼaki tatatou fai ni fekumi. Kae kotea ʼae ʼe tonu ke tou fai ke fua lelei kia tatou?

Tokaga fakalelei ki te ʼu manatu maʼuhiga ʼae ʼe maʼu ʼi te ʼu fakamatala fakatohi-tapu. Ohage la kumi pe ko ai neʼe ina tohi, pe neʼe fai kia ai pea ʼi te temi fea. Neʼe feafeaʼi te aluʼaga ʼo te maʼuli, Kotea ʼae neʼe hoko ʼi muʼa ʼo te fakamatala pea mo ʼae leva neʼe hoko ki muli age?

Taʼofi he ʼu ako mai he ʼu faʼifaʼitaki fakatohi-tapu ʼo fai te ʼu fehuʼi ʼaeni: Kotea ʼae neʼe logoʼi e te hahaʼi ʼae ʼo te fakamatala? Kotea te ʼu kalitate neʼe natou fakaha? He koe ʼe tonu ke au maʼuliʼi te ʼu kalitate ʼaia?

Maʼuliʼi te ʼu ako ʼae neʼe ke maʼu ʼo fakaʼaogaʼi ʼi tau minisitelio pea ʼi tau felogoi ʼae mo te hahaʼi. ʼI tau fai te faʼahi ʼaia ʼe ke liliu anai ʼo poto ʼo hage ko tona ui ʼi te Tohi-Tapu: “Ko he tahi ʼe poto ʼe ina tokagaʼi anai te ʼu meʼa ʼaia.”—Pes. 107:43.

• Te tokoni: Tokagaʼi peʼe tokoni feafeaʼi mai te ʼu koloa ʼo te Tohi-Tapu ʼae tou vakaʼi ʼi te fono ʼo te vahaʼa. Ke tou fakakaukauʼi peʼe feafeaʼi hatatou maʼuliʼi te ʼu faʼahi ʼae neʼe tou ako. ʼI te koga ʼaia ʼe lahi ai te ʼu fehuʼi ʼe feala ke tou fai, mo he ʼu manatu ke tou metitasio ki ai pea mo he ʼu pāki ke tou vakaʼi.