Logo la te ʼu meʼa fuli ʼaia, ʼe kole mai e Sehova ke tou talitali ʼaki he kataki fualoa ki te ʼaho ʼae kua ina fakatuʼutuʼu ki ai. He koe e ina kole mai te faʼahi ʼaia? Pea kotea ʼae ʼe tokoni mai ke tou talitali ʼaki he lotofiafia?

HE KOE ʼE KOLE MAI E SEHOVA KE TOU TALITALI ʼAKI HE KATAKI FUALOA?

ʼE ui ʼi te Tohi-Tapu: “ ʼE kataki fualoa pe ia Sehova ke manavaʼofa kia koutou, pea ʼe tuʼu ake anai ʼo fakaha atu tona manavaʼofa. Ko Sehova ʼe ko he ʼAtua ʼo te faitotonu. Manuʼia ia natou fuli ʼae ʼe haga talitali kia te ia.” (Esa. 30:18) ʼE fakahagahaga te ʼu palalau ʼa Esaia ki te kau Sutea uigataʼa. (Esa. 30:1) Kae neʼe foaki ʼi te ʼu palalau ʼaia ia he ʼamanaki ki te kau Sutea agatonu. Pea ʼe toe feia pe ki te ʼu kaugana agatonu ʼa Sehova ia ʼaho nei.

Koia ʼe tonu ke tou talitali ʼaki he kataki fualoa heʼe toe talitali ia Sehova ʼaki he kataki fualoa. Neʼe ina fakatuʼutuʼu he temi ke ina pulihi ai te tuʼu agakovi ʼaeni pea ʼe talitali ki te ʼaho mo te hola ʼaia. (Mat. 24:36) ʼE mahino papau anai ʼe mole ko he ʼu moʼoni te ʼu meʼa ʼae neʼe ui e Satana ʼo ʼuhiga mo Sehova mo ʼana kaugana. Pea ʼe pulihi anai e Sehova ia Satana mo natou ʼae ʼe lagolago kia ia, kae ʼe ‘manavaʼofa ia kia tatou.ʼ

ʼE mole fakagata anai ʼe Sehova ʼotatou ʼahiʼahi ʼi muʼa ʼo te hoko mai ʼo te ʼaho ʼaia. Kae e ina fakapapauʼi mai ʼe feala ke tou talitali ʼaki he lotofiafia. Ohage ko tona fakaha mai e Esaia ʼe feala pe ke tou fiafia logo la tatatou loto ʼae ke tou sisio la ki te fakahoko e Sehova ʼana fakapapau. (Esa. 30:18) a Tou vakaʼi ia manatu e fa ʼe tokoni mai anai ke tou talitali ʼaki he lotofiafia.

HE ʼU MANATU ʼE TOKONI MAI KE TOU TALITALI ʼAKI HE LOTOFIAFIA

Tokaga tafito ki te ʼu meʼa lelei ʼae ʼe hoko ʼi tou maʼuli. Lolotoga tona maʼuli neʼe sio te hau ko Tavite ki te lahi ʼo te agakovi. Kae logo la te faʼahi ʼaia neʼe ina fai te tokoni ʼaeni: “Ke ke fakalogologo ia muʼa ʼo Sehova pea mo haga talitali kia te ia. ʼAua naʼa ke ita ki te tagata ʼae ʼe ina fakahoko ʼana fakatuʼutuʼu kovi.” (Pes. 37:7) Neʼe maʼuliʼi e Tavite te tokoni ʼaia ʼi tana tokaga tafito ki te fakapapau ʼae neʼe fai age e Sehova ke ina haofaki ia ia. Pea neʼe lotofakafetaʼi  ai ki tona ʼAtua ʼi te ʼu tapuakina fuli ʼae neʼe ina foaki age. (Pes. 40:5) ʼO toe feia pe kapau ʼe tou tokaga tafito ki te ʼu meʼa lelei ʼae ʼe hoko ʼi totatou maʼuli kae mole ki ʼotatou fihifihia ʼe faigafua anai hatatou talitali kia Sehova.

Fakaʼaogaʼi ia faigamalie fuli moʼo vikiʼi ia Sehova. Neʼe lagi ko Tavite ʼae neʼe ina tohi te Pesalemo 71 pea neʼe ina ui kia Sehova: “Kae ko au, ʼe au haga talitali anai. ʼe toe lahi age anai taku fakavikiviki kia te koe.” (Pes. 71:14) Neʼe feafeaʼi te vikiʼi ʼo Sehova ʼe ia ʼae neʼe ina tohi te Pesalemo? ʼI tana palalau ki ʼihi ʼo ʼuhiga mo Sehova pea mo hiva fakavikiviki kia te ia. (Pes. 71:16, 23) Ohage ko Tavite ʼe feala ke tou maʼu te fiafia ʼi tatatou talitali kia Sehova ʼo tou fakavikiviki kia te ia. ʼE tou vikiʼi ia Sehova moka tou faifakamafola, moka tou palalau ʼo ʼuhiga mo ia ki ʼotatou kaumeʼa mo ʼotatou famili pea moka tou hiva he ʼu katiko. Ka ke hiva anai he katiko he koe mole ke fakakaukauʼi lelei te ʼu palalau pea mo te fiafia ʼae ʼe ke maʼu ai?

Toʼo he temi fakatahi mo ʼou tehina mo tuagaʼane ke ke maʼu ai te lotomalohi. ʼI te ʼahiʼahiʼi ʼo Tavite, neʼe ina ui fenei kia Sehova: “I muʼa ʼo tau hahaʼi agatonu, ʼe au falala anai ki tou huafa.” (Pes. 52:9) Pea ʼe toe feia pe, ʼe fakalotomalohiʼi anai tatou ʼe ʼotatou tehina mo tuagaʼane moka tou fakatahi mo natou ʼi te ʼu fono peʼe ʼi te faifakamafola ʼo feia mo te ʼu temi malolo.​—Loma 1:11, 12.

Fakamalohi tau ʼamanaki. ʼE ui ia Pesalemo 62:5 “ ʼE au atalitali fakalogologo ki te ʼAtua he ʼe ko ia toku falalaʼaga.” Ke malohi tatatou ʼamanaki ʼe tonu ke tou tui papau ʼe hoko anai ia. ʼE maʼuhiga ʼaupito ke tou taupau tatatou ʼamanaki maʼia te mole hoko vave mai ʼo te ʼaho fakaʼosi ohage ko tatatou loto ki ai. Tatau ai pe te temi ʼae ʼe tou talitali ai ke hoko mai te ʼu fakapapau ʼa Sehova ʼe tonu ke tou tui papau ʼe hoko moʼoni anai. ʼE feala ke tou fakamalohi tatatou ʼamanaki ʼaki tatatou ako te Tohi-Tapu. Ohage la ke ke manatuʼi te kua ʼosi fakahoko ʼo te ʼu aluʼaga ʼae neʼe fakakikite ʼi te Tohi-Tapu peʼe ko te faʼahiga logo tahi ʼa natou ʼae neʼe natou tohi te Tohi-Tapu. (Pes. 1:2, 3) Koia tou haga “tuku te laumalie maʼoniʼoni ke ina takitaki [ʼatatou] faikole,” ke tou taupau ai tatatou felogoi lelei ʼae mo Sehova ʼi tatatou talitali ki tana fakahoko tana fakapapau ʼae ko te maʼuli heʼe gata.​—Suta 20, 21.

Ohage ko Tavite ke ke tui papau ʼe tokaga ia Sehova kia natou ʼae ʼe talitali kia te Ia pea ʼe Ina fakaha kia natou tona ʼofa agatonu. (Pes. 33:18, 22) Koia ke ke haga talitali kia Sehova ʼaki he kataki fualoa ʼo tokaga tafito ki te ʼu meʼa lelei ʼae ʼe hoko ʼi tou maʼuli, mo fakaʼaogaʼi ia faigamalie fuli moʼo vikiʼi ia Sehova, mo toʼo he temi fakatahi mo ʼou tehina mo tuagaʼane ke ke maʼu ai te lotomalohi pea mo fakamalohi tau ʼamanaki taulekaleka.