KO NATOU ʼae neʼe natou tohi te Tohi-Tapu neʼe natou tohi liuliuga te ʼu falasisi ʼaki ni kupu ʼe tatau. Tou vakaʼi puani e tolu ʼae neʼe tupu ai tanatou faʼahiga faitohi ʼaia:

Te temi ʼae neʼe tohi ai te Tohi-Tapu. ʼI Iselaele ʼi te temi muʼa tokolahi te hahaʼi neʼe mole natou tahi maʼu te hiki ʼo te lao. Neʼe natou fakalogo pe te lau ʼo te lao moka fakatahi te kau Iselaele ʼi te Tapenakulo. (Tet. 31:10-12) ʼE mahino ia neʼe mole kei tokaga lelei he Iselaele ʼi tana fakalogo ʼaia pea mo tuʼu lolotoga ni hola ʼi te lotolotoiga ʼo te kaugamalie. (Nee. 8:2, 3, 7) ʼI te ʼu faigamalie ʼaia ko he lau liuliuga ʼo he falasisi maʼuhiga neʼe faigafua ai ke ina manatuʼi ia te ʼu tohi taputapu pea mo maʼuliʼi. ʼI te lau liuliuga ʼaia ʼo ʼihi kupu neʼe tokoni ai ke ina manatuʼi he ʼu fakamahino ohage la ko ʼae ʼo te ʼu lekula pea mo te ʼu lao.​—Lev. 18:4-22; Tet. 5:1.

Te faʼahiga fai tohi. ʼE lahi te ʼu hiva ʼe maʼu ʼi te Tohi-Tapu ohage la ʼi te ʼu tohi ʼo te ʼu Pesalemo, mo Te Hiva ʼa Salomone pea mo te ʼu Tagilaulau. Ko ʼihi hiva ʼe ʼi ai ʼona fakatauga. Ko te faʼahi ʼaia ʼe ina fakamaʼuhigaʼi te kupu tafito ʼo te hiva pea ʼe tokoni ke maʼu loto te ʼu kupu e te hahaʼi ʼae ʼe natou fakalogo. Tou tokagaʼi te ʼu kupu ʼae ʼi te Pesalemo 115:9-11: “Iselaele, kotou falala kia Sehova ​—ʼE ko tonatou haofakiʼaga mo tonatou meʼa tali tau. Fale ʼo Alone, kotou falala kia Sehova ​—ʼE ko tonatou haofakiʼaga mo tonatou meʼa tali tau. Ia koutou ʼae ʼe manavasiʼi kia Sehova, kotou falala kia Sehova ​—ʼE ko tonatou haofakiʼaga mo tonatou meʼa tali tau.” Ko te tohi liuliuga ʼo te ʼu kupu ʼaia neʼe tokoni ki te kau hiva ke natou maʼu loto te ʼu manatu maʼuhiga ʼaupito ʼaia.

Te tupu aga ʼo te tohi liuliuga ʼo te ʼu kupu maʼuhiga. Ko natou ʼae neʼe natou tohi te Tohi-Tapu neʼe natou tohi liuliuga he ʼu falasisi maʼuhiga. Ohage la ʼi te fakatotonu ʼae e Sehova ki te kau Iselaele ke ʼaua naʼa natou kai te toto neʼe ina kole kia Moisese ke ina ui liuliuga ia tona tupu aga. Neʼe fia fakaha e te ʼAtua ko te maʼuli ʼo te ʼu meʼa maʼuli fuli ʼe ʼi te toto, ko tona fakaʼuhiga ko te toto ʼe ko te maʼuli. (Lev. 17:11, 14) Ki muli age ʼi te tohi e te kau apositolo mo te ʼu tagata ʼafea ʼo Selusalemi ia te ʼu meʼa ʼae neʼe tonu ke liʼaki e te kau Kilisitiano neʼe natou toe lau liuliuga ai te tupu aga ʼo te mole kai ʼo te toto.​—Gaue 15:20, 29.

Logo la te tohi liuliuga ʼo he ʼu falasisi ʼi te Tohi-Tapu ʼe mole fakaʼuhiga leva ʼe loto e Sehova ke liliu ko he aga mahani ia te lau liuliuga ʼo te ʼu falasisi ʼaia. Ohage la neʼe ui e Sesu : “Ka kotou faikole, ʼaua naʼa kotou lau liuliuga ʼakotou palalau” (Mat. 6:7) Pea neʼe ina toe fakaha mai te ʼu alu aga ʼae ʼe feala ke tou kole ʼo mulimuli pe ki te finegalo ʼo ʼAtua. (Mat. 6:9-13) Koia kapau ʼe mole tou lau liuliuga ʼatatou palalau moka tou faikole kae ʼe feala pe ke tou faikole ki he ʼu alu aga ʼe tatau.​—Mat. 7:7-11.

Koia ʼe ʼi ai he ʼu tupu aga lelei ʼo te tohi liuliuga e te ʼAtua ʼihi kupu pea mo ʼihi falasisi. Ko te tahi faʼahiga akoʼi ʼaia ʼo tatou ʼe totatou Faiako Lahi ke fua lelei ai kia tatou.​—Esa. 48:17, 18.