“Sii koe, ae e fakalogo ki te kole, e omai anai te tagata fuli kia koe.”—Pesalemo 65:3.

Ko ʼihi ʼe natou faikole he ʼe natou logo fimalie ai logo la ʼe mole natou tui, ʼe mole fagono moʼoni mai he tahi. Kae ko te faikole ʼe mole ko he meʼa pe ke tou logo fimalie ai ke feala ai hatatou tauʼi ʼotatou fihifihia. ʼE ui fenei mai ʼi te Tohi-Tapu, “ ʼe ovi ia Sehova a kia natou fuli ʼae ʼe fetapa kia te ia, ia natou fuli ʼae ʼe fetapa kia te ia ʼi te moʼoni. . . . Pea ʼe logo ki ʼanatou tagi.”—Pesalemo 145:18, 19, MN.

ʼE mahino ia, ʼe fagono ia Sehova ʼAtua ki te ʼu faikole ʼo tana ʼu kaugana. ʼAki he lotoʼofa, ʼe ina ui fenei: “E koutou kalaga mai anai kia au, pea e koutou olo anai; e koutou faikole mai anai kia au, pea e au fakalogo atu anai kia koutou.”—Selemia 29:12.

“Kotou kataki ʼi te faikole.”—Loma 12:12.

ʼE fakalotomalohiʼi tatou ʼi te Tohi-Tapu ke tou “faikole tuʼumaʼu” pea ke tou “faikole ʼi te ʼu aluʼaga fuli.” ʼEi, ʼe loto moʼoni ia Sehova ʼAtua ke tou faikole age kia te ia.—Mateo 26:41; Efeso 6:18.

He koʼe ʼe loto e te ʼAtua ke tou faikole age kia te ia? Fakakaukauʼi age muʼa te aluʼaga ʼaeni: ʼE fiafia he tamai moka kole tokoni age hana fanau pea ʼe ina iloʼi te ʼu meʼa ʼae ʼe ʼaoga ki tana fanau peʼe ko te ʼu meʼa ʼae ʼe ina logoʼi. Koia, ka kole tokoni age tana fanau, ʼe ha ai ʼe falala kia ia pea ʼe nā felogoi lelei. ʼO toe feia pe, ka tou faikole kia Sehova ʼAtua, ʼe tou fakaha kia te ia, ʼe tou falala pea mo fia fakaovi kia te ia.—Taaga Lea 15:8; Sakopo 4:8.

“Kotou tuku kia te ia ʼakotou tuʼania fuli, he ʼe tokaga ia kia koutou.”—1 Petelo 5:7.

ʼE loto e te ʼAtua ke tou faikole age kia te ia he ʼe ʼofa mo tokaga kia tatou. ʼE ina iloʼi lelei ʼotatou faigataʼaʼia mo ʼotatou tuʼania pea ʼe fia tokoni moʼoni mai kia tatou.

ʼI te maʼuli katoa ʼo te Hau ko Tavite, neʼe faikole kia Sehova ʼAtua. Neʼe ina kole tana tokoni pea mo fakaha kia te ia ʼana manatu mo te ʼu meʼa ʼae ʼe ina logoʼi. (Pesalemo 23:1-6) Kotea ʼae neʼe logoʼi e te ʼAtua ʼo ʼuhiga mo Tavite? Neʼe ʼofa ki ai pea neʼe fagono ki ʼana tuʼuga faikole. (Gaue 13:22) ʼO toe feia pe, ʼe fagono te ʼAtua ki ʼatatou faikole he ʼe tokaga ia kia tatou.

Neʼe fai te ʼu palalau ʼaeni e he tagata faipesalemo. Neʼe ina iloʼi ʼe fagono te ʼAtua ki ʼana faikole. Pea neʼe tokoni lahi kia ia mo nofo ovi ai ki te ʼAtua. Neʼe ina maʼu ai te malohi ke ina tauʼi te ʼu mamahi.—Pesalemo 116:1-9.

Kapau ʼe tou tui papau ʼe fagono te ʼAtua ki ʼatatou faikole, ʼe tou kataki anai ʼi te faikole. Tou vakaʼi te faʼifaʼitaki ʼa Pedro ʼae ʼe maʼuli ʼi te potu noleto ʼo Sepania. Neʼe mate tona foha ʼe taʼu 19 ʼi he tuʼutamaki ʼi te ala. Neʼe lotomamahi ʼaupito pea neʼe haga leva ki te ʼAtua. Neʼe faikole tuʼa lahi ki ai ke ina maʼu he fakalotofimalie pea mo tana tokoni. Kotea ʼae neʼe hoko? Neʼe ui fenei e Pedro: “Neʼe tali mai ia Sehova ki ʼaku faikole. Neʼe tokoni mai kia maua taumatuʼa ke ma maʼu he fakalotofimalie ʼaki te ʼu tehina mo tuagaʼane.”

Logo la neʼe mole feala ke toe fakamaʼuli mai te foha ʼo Pedro kae neʼe tokoni lahi kia ia mo tona kiʼi famili ia te faikole. ʼE ui fenei e tona ʼohoana ko María Carmen: “Neʼe tokoni mai te faikole ke au katakiʼi toku lotomamahi. Neʼe au iloʼi ʼe lotomahino mai ia Sehova kia au koteʼuhi neʼe au logoʼi he tokalelei lahi moka au faikole kia te ia.”

ʼE fakaha lelei mai ʼi te Tohi-Tapu mo te ʼu aluʼaga ʼae ʼe hoko ki te tokolahi ʼi tonatou maʼuli. ʼE fagono te ʼAtua ki ʼatatou faikole. Kae ʼe toe mahino lelei mai ai, ʼe mole tali e te ʼAtua ia te ʼu faikole fuli. He koʼe ʼe tali e te ʼAtua ʼihi faikole kae ʼe mole ina tali ʼihi kole?