1. Kotea te tokoni neʼe fai e te apositolo ko Petelo ki te kau Kilisitiano ʼo tona temi? Pea he koʼe ʼe faigataʼa te fakalogo ki te tokoni ʼaia?

NEʼE fai e te apositolo ko Petelo he tokoni ki te kau Kilisitiano fakanofo ʼo te ʼuluaki sekulo. Pea ʼe feala ke tou maʼu mai ai he ʼu ako, tatau aipe pe ʼe tou fakaʼamu ke tou maʼuli ʼo heʼe gata ʼi selo peʼe ʼi te kele. Neʼe ina tohi fenei: “Ke kotou liliu ʼo maʼoniʼoni ʼi takotou aga katoa, ohage ko te ʼAtua Maʼoniʼoni ʼae neʼe ina pauʼi koutou, he neʼe tohi fenei: ‘ʼE tonu ke kotou maʼoniʼoni, koteʼuhi ʼe au maʼoniʼoni.’” (1 Pet. 1:15, 16) ʼE ha mai ʼi te vaega ʼaeni, ʼe feala ke tou faʼifaʼitaki ia Sehova, ʼae ʼe maʼoniʼoni tokotahi. Koia, ʼe feala ke tou maʼoniʼoni ʼi tatatou aga pea ʼe tonu ke tou fakaha te faʼahi ʼaia. ʼE lagi feala ke mata faigataʼa kia tatou ʼuhi ko totatou ʼuhiga agahala. Kae tou manatuʼi, neʼe toe agahala pe la mo Petelo. Neʼe lahi te ʼu hala neʼe ina fai. Kae ʼe ha mai ʼi tana faʼifaʼitaki, ʼe feala ke tou toe ‘liliu mo tatou ʼo maʼoniʼoni.’

2. Kotea te ʼu fehuʼi ka tou vakaʼi ʼi te alatike ʼaeni?

² ʼI te alatike ʼaeni, ʼe tou tali anai ki te ʼu fehuʼi ʼaeni: Kotea te fakaʼuhiga ʼo te maʼoniʼoni? Kotea ʼe ui ʼi te Tohi-Tapu ʼo ʼuhiga mo te maʼoniʼoni ʼa Sehova? ʼE feafeaʼi hatatou liliu ʼo maʼoniʼoni ʼi tatatou aga katoa? Pea kotea te pikipikiga ʼo tatatou maʼoniʼoni mo ʼatatou felogoi mo Sehova?

3. Kotea te manatu ʼa te tokolahi ʼo ʼuhiga mo he tahi ʼe maʼoniʼoni? Kae ʼe tou maʼu ʼifea tona fakaʼuhiga moʼoni?

³ ʼE manatu te tokolahi ko he tahi ʼe maʼoniʼoni ʼe ina tui he ʼu teu fakalotu, ʼe mole malimali pea ʼe fakamalotoloto. Kae ʼe mole feia he tahi ʼe maʼoniʼoni he ʼe ui ko Sehova, ʼae ʼe maʼoniʼoni, ʼe ko “te ʼAtua fiafia.” (1 Tim. 1:11) ʼE ui ʼi te Tohi-Tapu ʼe “manuia” ia natou ʼae ʼe tauhi kia te ia. (Pes. 144:15)  Pea neʼe tauteaʼi e Sesu ia natou ʼae neʼe faiga ke natou kehe mai niʼihi, ʼo natou tui ni teu pea mo fai ni gaue lelei ke tokagaʼi e te tagata. (Mat. 6:1; Mko. 12:38) ʼE tou iloʼi ia te fakaʼuhiga ʼae ke tou maʼoniʼoni ʼuhi ko te manatu ʼe ui ʼi te Tohi-Tapu. ʼE maʼoniʼoni pea mo fonu ʼi te ʼofa totatou ʼAtua. Pea ʼe mole ina kole mai ke tou fai he meʼa ʼe mole tou lavaʼi. Koia, ka ui mai e Sehova “ʼe tonu ke kotou maʼoniʼoni,” pea ʼe tou iloʼi ʼe feala te faʼahi ʼaia. ʼE mahino ia, ʼe tonu muʼa ke tou mahino ki tona fakaʼuhiga ʼi muʼa ʼo hatatou liliu ʼo maʼoniʼoni ʼi tatatou aga.

4. Kotea te fakaʼuhiga ʼo te maʼoniʼoni?

⁴ Kotea te fakaʼuhiga ʼo te maʼoniʼoni? ʼI te Tohi-Tapu, ko te kupu “maʼoniʼoni” ʼe fakaʼuhiga ki te ʼuhiga ʼo he tahi peʼe ko he meʼa ʼe maʼa ʼi te aga ʼe tonu ke fai, peʼe ʼi te faʼahi fakalotu peʼe taputapu. ʼE feala ke toe fakaʼuhiga ki te tuku keheʼi ʼo he tahi peʼe ko he meʼa maʼa te tauhi ki te ʼAtua. ʼE tou maʼoniʼoni mo kapau ʼe tou maʼa ʼi te aga ʼae ʼe tonu ke fai, mo fai te tauhi ʼae ʼe tali e Sehova pea mo maʼu ni felogoi lelei mo ia. ʼE ko he pilivilesio lahi tatatou maʼu ni felogoi lelei mo te ʼAtua, ʼae ʼe maʼoniʼoni. Pea kapau ʼe tou mahino ki te manatu ʼa te Tohi-Tapu ʼo ʼuhiga mo te maʼoniʼoni ʼo Sehova, ʼe tou mahino lelei age ai ki te pilivilesio lahi ʼaia.

5. Kotea ʼe tou ako mai te kau ʼaselo ʼo ʼuhiga mo Sehova?

⁵ ʼE maʼa ia Sehova ia aluʼaga fuli pe. Koia ʼae ʼe tutuʼu ovi ai te kau Selafimi, ia te ʼu ʼaselo ʼaia ʼi tona hekaʼaga fakahau, ʼo kalaga fenei: “ʼE maʼoniʼoni, maʼoniʼoni, maʼoniʼoni ia Sehova ʼo te ʼatu fua tau.” (Isa. 6:3, NWT) Neʼe tonu ke maʼoniʼoni te kau ʼaselo ʼaia mo kapau neʼe natou fia maʼu ni felogoi lelei mo tonatou ʼAtua, ʼae ʼe maʼoniʼoni. Ka tuʼu he ʼaselo ʼa Sehova ʼi he koga meʼa ʼo te kele, pea ʼe taputapu te koga meʼa ʼaia. ʼE ko te aluʼaga ʼaia neʼe hoko ʼi te sio ʼa Moisese ki te fuʼu ʼakau talatala ʼae neʼe ulo.—Eke. 3:2-5; Sos. 5:15.

6-7. (1) Kotea te ʼu palalau neʼe fai e Moisese ia Ekesote 15:1, 11? (2) Kotea ʼae neʼe tupu ai te manatuʼi e te kau Iselaele ko Sehova ʼe ko te ʼAtua maʼoniʼoni? (Vakaʼi te pāki ʼo te takafi.)

⁶ Neʼe fakalaka ia Moisese mo te kau Iselaele ʼi te Tai Kula. Hili ia, neʼe fakamanatuʼi age e Moisese kia natou ko tonatou ʼAtua ko Sehova ʼe maʼoniʼoni. (Lau ia Ekesote 15:1, 11.) ʼE mahino ia, neʼe mole maʼoniʼoni ia te kau Esipito ʼae neʼe natou tauhi ki te ʼu ʼatua hala. Pea neʼe toe feia pe mo te kau Kanaane. ʼI tanatou tauhi ʼaia ki ʼonatou ʼatua, neʼe natou sakilifisioʼi ʼanatou fanau pea mo fai ni aga heʼe ʼaoga mo fakalialia. (Lev. 18:3, 4, 21-24; Tet. 18:9, 10) Kae ʼe mole kole anai e Sehova ki ʼana kaugana ke natou fai te ʼu aga ʼaia. ʼE maʼoniʼoni ia. Pea ʼe ha te faʼahi ʼaia ʼi te meʼa ʼae neʼe tuʼu ʼi te lauʼi ukamea aulo neʼe haʼi ki te kie ʼae ʼe takai ʼaki te ʼulu ʼo te pelepitelo lahi. Neʼe ui ai ‘ko te maʼoniʼoni ʼe ʼa Sehova.’—Eke. 28:36-38.

⁷ Ko te kau Iselaele fuli ʼae neʼe sisio ki te meʼa ʼaia neʼe tuʼu ʼi te lauʼi ukamea aulo, neʼe natou manatuʼi ai ko Sehova ʼe maʼoniʼoni. Kae ʼe feafeaʼi ki te kau Iselaele ʼae neʼe mole sisio ki ai he neʼe heʼeki natou felaveʼi mo te pelepitelo lahi? Neʼe feala koa ke natou ui neʼe mole natou iloʼi te manatu maʼuhiga ʼaia? Kailoa. Neʼe fuhifuhiga tona lau ki te kau Iselaele fuli moka lau te Lao ia muʼa ʼo te hahaʼi tagata mo fafine ʼo feia mo te ʼu fanau. (Tet. 31:9-12) Kapau neʼe ke kau ai, neʼe lagi ke logo ki te ʼu palalau ʼaeni: “Ko au [“Sehova,” NWT], ko tokotou Atua; e kotou maonioni anai, koteuhi e au maonioni.” “E kotou maonioni anai kia au, koteuhi e au maonioni, ia au, ko [“Sehova,” NWT].”—Lev. 11:44, 45; 20:7, 26.

8. Kotea ʼe tou ako mai ia Levitiko 19:2 mo 1 Petelo 1:14-16?

 ⁸ ʼI te ʼu folafola ʼae neʼe lau ki te kau Iselaele fuli, neʼe ʼi ai te vaega ʼo Levitiko 19:2. Neʼe ui fenei e Sehova kia Moisese: “Palalau ki te hahai katoa o Iselaele, o ui kia natou: ke kotou maonioni, koteuhi e au maonioni, ia au, ko [“Sehova,” NWT], ko tokotou Atua.” Pea neʼe ko te vaega ʼaia neʼe fakaʼaogaʼi e Petelo ʼi tana fakatotonu ki te kau Kilisitiano ke ‘natou maʼoniʼoni.’ (Lau ia 1 Petelo 1:14-16.) Ia ʼaho nei, ʼe mole kei tou fakalogo ki te Lao ʼa Moisese. Kae ko te meʼa ʼae neʼe tohi e Petelo ʼe fakamoʼoni ai te faʼahi ʼae ʼe tou ako mai ia Levitiko 19:2. ʼE maʼoniʼoni ia Sehova pea ʼe tonu ke faiga ia natou ʼae ʼe ʼoʼofa ia te ia ke natou maʼoniʼoni. ʼE tonu ke natou fai te faʼahi ʼaia maʼia pe ʼe natou maʼu te ʼamanaki ʼae ke natou maʼuʼuli ʼi selo peʼe ʼi te kele.—1 Pet. 1:4; 2 Pet. 3:13.

9. He koʼe ʼe tou talanoa anai ki te kapite 19 ʼo Levitiko?

⁹ ʼE tou fia fakafiafiaʼi totatou ʼAtua, ʼae ʼe maʼoniʼoni koia ʼe tou fia ako ai pe ʼe feafeaʼi hatatou liliu ʼo maoniʼoni. ʼE foaki mai e Sehova he ʼu tokoni ʼe mahino gafua ʼo ʼuhiga mo te faʼahi ʼaia. Pea ʼe tou maʼu ʼi te kapite 19 ʼo Levitiko. Neʼe tohi fenei e Marcus Kalisch, ʼae ko he tagata ʼe poto ʼi te Fakahepeleo: “ʼE lagi ko te kapite ʼaia ʼe maʼuhiga ʼaupito ʼi te tohi ʼo Levitiko pea mo te ʼu ʼuluaki tohi ʼe nima ʼo te Tohi-Tapu.” ʼE tou vakaʼi anai ʼihi vaega ʼo te kapite ʼaia pea ʼe tou taʼofi ai anai he ʼu ako ki totatou maʼuli. Ka tou fai te faʼahi ʼaia, manatuʼi ʼe kamata te ʼu vaega ʼaia ʼaki te ʼu palalau ʼaeni: “Ke kotou maonioni.”

10-11. Ka tou lau ia Levitiko 19:3, kotea ʼe tonu ke tou fai ke tou maʼoniʼoni ʼi tatatou aga? Pea he koʼe ʼe maʼuhiga ʼaupito?

¹⁰ Neʼe ui e Sehova ki te kau Iselaele ʼe tonu ke natou maʼoniʼoni. Hili ia, neʼe ina toe ui fenei: “E kotou tahi fakaapaapa anai ki tana tamai mo tana fae * . . . Ko au [“Sehova,” NWT], ko tokotou Atua.”—Lev. 19:2, 3.

¹¹ ʼE kole mai e Sehova ke tou fakaʼapaʼapa ki ʼatatou matuʼā pea ʼe tonu ke tou fakalogo ki ai. Ke ke manatuʼi te tali neʼe fai e Sesu  ki he tagata neʼe ina fehuʼi age pe ‘kotea te ʼu gaue lelei ʼae ʼe tonu ke ina fai ke ina maʼu te maʼuli heʼe gata.’ Neʼe ina ui age ʼe tonu ke ke fakaʼapaʼapa ki tau tamai mo tau faʼe. (Mat. 19:16-19) Neʼe toe fakaha e Sesu te fai fakatuʼutuʼu ʼa te kau Faliseo mo te kau sekelipa ke mole natou tokakaga ki ʼanatou matuʼā. ʼI tanatou fai te faʼahi ʼaia, neʼe natou “meʼa noaʼi ai te folafola ʼa te ʼAtua.” (Mat. 15:3-6) ʼE maʼu ʼi te “folafola ʼa te ʼAtua” ia te nima folafola ʼo te ʼu folafola ʼe hogofulu ʼo feia mo te ʼu palalau ʼae ia Levitiko 19:3. (Eke. 20:12) Koia, ke ke manatuʼi ʼi muʼa ʼo te fai ʼo te fakatotonu ʼae ia Levitiko 19:3, neʼe fai te ʼu palalau ʼaeni: “Ke kotou maonioni, koteuhi e au maonioni, ia au, ko [“Sehova,” NWT], ko tokotou Atua.”

12. ʼE tou fakalogo feafeaʼi ki te fakatotonu ʼae ia Levitiko 19:3?

¹² ʼE lelei ke tou fai te fehuʼi ʼaeni: ‘ʼE au fakaʼapaʼapa koa ki ʼaku matuʼā, ohage ko tona kole mai e Sehova?’ Kapau ʼe ke manatu neʼe mole ke tokaga lelei ki ʼau matuʼā ʼo kaku mai ki te ʼaho nei, pea ʼe tonu ke ke fai he puleʼaki ki ai. ʼE mole feala hau toe liliu ki muli, kae ʼe feala tau fai ia meʼa fuli ke lahi age tou temi ʼe ke fakatahi ai mo ʼau matuʼā pea mo tau tokoni kia naua. Ohage la, ʼe feala ke ke alu muʼa ʼo nofo mo naua ʼi he ʼaho, peʼe ke tokoni kia naua ʼi te faʼahi fakasino mo fakalaumalie, peʼe fakalotomalohiʼi mo fakalotofimalieʼi naua. Kapau ʼe ke fai feia, ʼe ke fakalogo anai ki te fakatotonu ʼae ia Levitiko 19:3.

13. (1) Kotea te tahi fakatotonu ʼe tou maʼu ia Levitiko 19:3? (2) Ka tou lau ia Luka 4:16-18, neʼe kotea te agamahani ʼa Sesu neʼe ina fai ʼi te ʼaho ʼo te Sapato? Pea ʼe tou lava faʼifaʼitakiʼi feafeaʼi ia ia?

¹³ ʼE tou maʼu he tahi fakatotonu ia Levitiko 19:3 ke tou mulimuli ki ai mo kapau ʼe tou fia maʼoniʼoni. ʼE ui fenei ai: “E kotou . . . tauhi [anai] aku sapato.” ʼE moʼoni, ʼe mole kei fakalogo te kau Kilisitiano ki te Lao, koia ʼe mole tou fakaʼapaʼapa ai ki te Sapato. Kae ʼe ʼi ai te ʼu ako ʼe tou taʼofi mai te faʼahiga taupau e te kau Iselaele ia te Sapato pea mo te ʼu lelei neʼe natou maʼu mai ai. Neʼe ui ʼi te Lao ʼe mole tonu ke fai e te kau Iselaele he gaue ʼi te Sapato kae ke natou fakaʼaogaʼi tonatou temi ki te ʼu gaue fakalaumalie. * Koia ʼae neʼe ko he agamahani ʼa Sesu te alu ʼi te ʼaho ʼaia ki te sinakoka ʼi te kolo ʼae neʼe nofo ai ʼo lau ai te Folafola ʼa te ʼAtua. (Eke. 31:12-15; lau ia Luka 4:16-18.) Koia, ka tou lau te fakatotonu ʼaeni ‘kotou tauhi ʼaku sapato,’ ʼe tonu ke ina uga tatou ke tou tuku tuʼumaʼu he temi ki te ʼu gaue fakalaumalie. ʼE ke manatu koa ʼe tonu ke ke fai ni fetogi ke ke fakalogo ai ki te fakatotonu ʼaia? Kapau ʼe ke tuku tuʼumaʼu he temi ki te tauhi kia Sehova, ʼe ke maʼu anai he ʼu felogoi lelei mo ia he ʼe maʼuhiga te faʼahi ʼaia ke ke liliu ai ʼo maʼoniʼoni.

14. Kotea te manatu maʼuhiga ʼe talanoa tuʼa lahi ki ai te kapite 19 ʼo Levitiko?

¹⁴ ʼI te kapite 19 ʼo Levitiko ʼe talanoa tuʼa lahi ai ki he manatu maʼuhiga. Pea ʼe tokoni mai te manatu ʼaia ke tou maʼoniʼoni. ʼI te fakaʼosi ʼo te vaega 4, ʼe ui ai ‘ko au Sehova tokotou ʼAtua.’ Pea ʼe ha tuʼa 16 ʼi te kapite ʼaia. ʼE tou manatuʼi ai te ʼuluaki folafola ʼo te ʼu Folafola ʼe Hogofulu, ʼae ʼe ui ai ‘ko au Sehova tou ʼAtua. ʼE mole tonu ke ke tauhi ki he tahi age ʼu ʼatua.’ (Eke. 20:2, 3) Kapau ʼe tou fia liliu ʼo maʼoniʼoni, ʼe mole tonu ke maʼuhiga age kia tatou he tahi peʼe ko he meʼa pe ʼi tatatou ʼu felogoi mo Sehova. Pea tahi, ko tatou ko te ʼu Fakamoʼoni ʼa Sehova, koia ʼe tou fakatotonu ke mole tou fai  he meʼa ʼe ʼulihi ai tona huafa maʼoniʼoni.—Lev. 19:12; Esa. 57:15.

15. Ka tou lau te ʼu vaega ʼo te kapite 19 ʼo Levitiko ʼo ʼuhiga mo te ʼu sakilifisio manu, kotea ʼe ina uga ai tatou ke tou fai?

¹⁵ Neʼe fakaha e te kau Iselaele ko tonatou ʼAtua neʼe ko Sehova. ʼO feafeaʼi? ʼAki tanatou fakalogo ki ʼana lao. ʼE ui fenei ia Levitiko 18:4: “E kotou fai anai aku fakatotonu, pea e kotou tauhi anai aku lao, pea e kotou mulimuli anai ia natou. Ko au ko [“Sehova,” NWT] tokotou Atua.” ʼE talanoa te kapite 19 ki ʼihi lao ʼo te ʼu “lao” ʼaia. Ohage la, ʼe talanoa ʼi te ʼu vaega 5-8, 21, 22 ki te ʼu sakilifisio manu. Neʼe tonu ke momoli e te kau Iselaele te ʼu sakilifisio ʼaia ohage pe ko tona fakatuʼutuʼu ki ai ke mole ‘ulihi ai te meʼa taputapu ʼa Sehova.’ Koia, ka tou lau te ʼu vaega ʼaia, ʼe uga ai tatou ke tou fakafiafiaʼi te loto ʼo Sehova. Kae ʼe mole gata ai, ʼe fakalotomalohiʼi tatou ia Hepeleo 13:15 ke tou toe momoli kia te ia ni sakilifisio fakavikiviki ʼe ina leleiʼia.

16. Kotea te pelesepeto ʼe tou maʼu ia Levitiko 19? Pea kotea ʼae ʼe fakamanatuʼi mai ai?

¹⁶ Kapau ʼe tou fia liliu ʼo maʼoniʼoni, ʼe mole tonu ke tou hage ko ʼihi. Kae ʼe mole faigafua tuʼumaʼu. ʼI ʼihi temi, ʼe uga tatou e ʼotatou kaugā ako, mo kaugā gaue, mo natou ʼo totatou famili peʼe ko ʼihi atu ke tou fai ni meʼa ʼe mole alu tahi mo te ʼu pelesepeto ʼa te ʼAtua. Koia ʼe tonu ai ke tou toʼo he tonu maʼuhiga. Kotea ʼe tokoni mai ke tou toʼo he tonu ʼe lelei? ʼE ko te pelesepeto ʼae ia Levitiko 19:19. ʼE ui fenei ʼi te vaega ʼaia: “E mole pe ke tui anai ni kofu aki ni faahiga filo e lua.” Neʼe tokoni te lao ʼaia ke mole hage te kau Iselaele ko te ʼu puleʼaga ʼae ʼi ʼonatou tafaʼaki. Ia ʼaho nei, ʼe mole he meʼa ʼe kovi moka tui e he tehina hona ʼu teu ʼe fai ʼaki ni faʼahiga filo peʼe kie, ohage la pe ʼe matolu peʼe nilo peʼe ko ʼihi atu meʼa. Kae ʼe mole tou hage anai ko te hahaʼi ʼae ʼe tui ki ni akonaki pea mo fai ni aga ʼe fakafeagai ki te Tohi-Tapu, maʼia pe ko hotatou ʼu kaugā ako, mo kaugā gaue peʼe ko totatou famili. ʼE mahino ia, ʼe tou ʼoʼofa ʼi totatou famili ʼo feia mo totatou tatau. Kae ka tou toʼo ni tonu maʼuhiga, ʼe tou tokagaʼi tuʼumaʼu te manatu ʼa Sehova, tatau aipe pe ʼe tonu ke mole tou hage ko natou ʼae ʼe mole tauhi ki te ʼAtua. Ke ke manatuʼi ka liliu he tahi ʼo maʼoniʼoni ʼe toe fakaʼuhiga ʼe tuku keheʼi maʼa te ʼAtua. Koia, kapau ʼe tou fia fakafiafiaʼi ia te ʼAtua, ʼe mole tonu ke tou hage ko ʼihi.—2 Ko. 6:14-16; 1 Pet. 4:3, 4.

17-18. Kotea te ʼu ako maʼuhiga ʼe tou maʼu ia Levitiko 19:23-25?

¹⁷ Neʼe tonu ke maʼuhiga ki te kau Iselaele ʼanatou felogoi mo Sehova moka natou lau  peʼe logo ki te ʼu palalau ʼaeni ‘ko au Sehova tokotou ʼAtua.’ ʼO feafeaʼi? Tou vakaʼi te meʼa ʼae ʼe ui ia Levitiko 19:23-25 ʼo ʼuhiga mo te aluʼaga ʼaia. (Lau.) Kotea ʼae ʼe ha ʼi te lao ʼae ʼe talanoa ki ai te ʼu vaega moka hu he Iselaele ki te Kele ʼo Te Fakapapau? Kapau neʼe ina to ni fuʼu ʼakau moʼo kai, neʼe mole tonu ke ina kai ʼona fua ʼi te ʼu ʼuluaki taʼu ʼe tolu. ʼI te fa taʼu leva, neʼe tonu ke ʼave te ʼu fua fuli ki te tapenakulo ko he molaga, ko tona fakaʼuhiga ke tuku keheʼi maʼa te tauhi ki te ʼAtua. ʼE hoki feala ke ina kai te ʼu fua ʼo te ʼu fuʼu ʼakau ʼae neʼe ina to ʼi te nima taʼu. Neʼe tokoni te lao ʼaia ke mahino te kau Iselaele ʼe mole tonu ke natou fakamuʼamuʼa te ʼu meʼa ʼae ʼe ʼaoga kia natou. Neʼe tonu ke natou falala ʼe tokaga moʼoni anai ia Sehova kia natou pea mo fakamuʼamuʼa tanatou tauhi kia te ia. ʼE tokaga anai ia Sehova ke feʼauga tanatou meʼa kai. Pea neʼe fakalotomalohiʼi natou e te ʼAtua ke natou foaki ʼaki he lotolelei ni molaga ki te tapenakulo, ʼae neʼe fai ai te tauhi kia te ia.

¹⁸ Ka tou lau te lao ʼae ia Levitiko 19:23-25, ʼe tou manatuʼi ai ʼihi palalau neʼe fai e Sesu ʼi tana Akonaki ʼi Te Moʼuga. Neʼe ina ui fenei: “Tuku takotou tuʼania . . . pe kotea ʼae ka kotou kai anai, mo inu anai.” Neʼe toe hoko fenei e Sesu: “ʼE iloʼi e takotou Tamai ʼae ʼe ʼi selo ʼe ʼaoga kia koutou te ʼu meʼa ʼaia.” ʼE foaki mai anai e Sehova te ʼu meʼa ʼae ʼe ʼaoga kia tatou, ohage ko tana tokaga ki te ʼu manulele. (Mat. 6:25, 26, 32) ʼE tou falala ʼe tokaga moʼoni anai kia tatou. Koia ʼae ʼe tou tokoni ai ki te kau masisiva. Pea ʼe tou foaki ʼaki he lotolelei ni meʼa ʼofa ke huʼi ʼaki te ʼu maʼua ʼae ʼe totogi e te kokelekasio. ʼE sio ia Sehova ki tatatou lotofoaki pea ʼe ina tapukinaʼi anai tatou. (Mat. 6:2-4) Koia, ka tou lotofoaki ʼe tou fakaha kua tou mahino ki te ʼu ako ʼae ia Levitiko 19:23-25.

19. Kotea te ʼu ako neʼe ke maʼu mai te ʼu vaega ʼo te tohi ʼo Levitiko?

¹⁹ Neʼe tou vakaʼi he ʼu vaega ʼo te kapite 19 ʼo Levitiko pea neʼe tou ako pe ʼe feafeaʼi hatatou liliu ʼo maʼoniʼoni. ʼE maʼoniʼoni totatou ʼAtua pea ʼe tou fia faʼifaʼitakiʼi ia ia. ʼO feafeaʼi? ʼO tou faiga ke tou ‘maʼoniʼoni ʼi tatatou aga katoa.’ (1 Pet. 1:15) Tokolahi ia natou ʼae ʼe mole tauhi kia Sehova, ʼe natou tokagaʼi te lelei ʼo tatatou aga. Koia ʼae neʼe ʼi ai ʼihi ia natou neʼe natou fakakololiaʼi ia Sehova. (1 Pet. 2:12) Kae ʼe lahi te ʼu ako ke tou taʼofi mai te kapite 19 ʼo Levitiko. ʼI te alatike ka hoa mai, ʼe tou vakaʼi anai ʼihi vaega ʼo te kapite pe ʼaia pea mo ʼihi aluʼaga ʼe tonu ke tou fai ke tou ‘liliu ʼo maʼoniʼoni,’ ohage ko tona ui e Petelo.