1. He koʼe ʼe ke lotofakafetaʼi ʼo ʼuhiga mo te Tohi-Tapu?

 ʼE LAHI tatatou lotofakafetaʼi kia Sehova ʼAtua ʼo ʼuhiga mo te Tohi-Tapu! ʼE tohi ai ni tokoni fakapotopoto ke tou lava tauʼi te ʼu faigataʼaʼia ʼe tou tau mo ia ia ʼaho nei. ʼE toe foaki mai ʼi te tohi ʼaia he ʼamanaki taulekaleka ki te ka haʼu. Kae ʼe toe maʼuhiga age te fakaʼaogaʼi e Sehova ia te Tohi-Tapu ke ina fakaha mai tona ʼuluagaaga. ʼE malave ki ʼotatou loto moka tou metitasio ki te ʼu kalitate taulekaleka ʼo Sehova pea ʼe uga ai tatou ke tou fakakaumeʼa lelei mo ia.—Pes. 25:14.

2. Kotea te ʼu faʼahi neʼe fai e Sehova ke iloʼi ia ia e te hahaʼi?

² ʼE loto ia Sehova ke iloʼi ia ia e te hahaʼi. Pea neʼe ina fai te faʼahi ʼaia ʼi te temi muʼa ʼaki he ʼu moemisi, mo te ʼu aluʼaga neʼe ha ki ʼihi pea mo ni ʼaselo. (Fka. 12:6; Gaue 10:3, 4) ʼE mole feala hatatou ako te ʼu moemisi, mo te ʼu aluʼaga ʼae neʼe fakaha ki ʼihi pea mo te ʼu logo ʼae neʼe fakahoko e te ʼu ʼaselo mo kapau neʼe mole tohi. Ko te tupuʼaga la ʼaia ʼo te fakaʼaogaʼi e Sehova ni tagata ke natou “tohi ʼi he tohi” te ʼu meʼa fuli ʼae ʼe ina loto ke tou iloʼi. (Sel. 30:2) ʼUhi ko te ʼu gaue ʼa Sehova ʼe haohaoa, ʼe feala ke tou tui papau ko te faʼahiga felogoi ʼaia ʼa te ʼAtua mo tatou ʼe lelei tukupau pea mo fua lelei.—Pes. 18:30.

3. Kotea ʼae neʼe fai e Sehova ke taupau tana Folafola ʼo kaku mai kia ʼaho nei? (Esaia 40:8)

³ Lau ia Esaia 40:8. Talu mai ni taʼu ʼe lauʼi afe mo te maʼu e te hahaʼi tagata mo fafine ni tokoni ʼe ʼaoga kia natou ʼi te Tohi-Tapu. Neʼe lava feafeaʼi te faʼahi ʼaia? Neʼe tohi te Folafola ʼa te ʼAtua ʼi te temi muʼa ʼi he ʼu takaiga tohi ʼe maumau gafua, koia neʼe mole he takaiga tohi neʼe kaku mai kia ʼaho nei.  Kae neʼe tokaga Sehova ke hiki te tohi taputapu. Logo la neʼe heʼe haohaoa te ʼu tagata hiki tohi ʼaia kae neʼe natou fakahoko fakalelei. Ohage la, ʼo ʼuhiga mo te ʼu Koga Tohi-Tapu Fakahepeleo, neʼe ui e te tagata sivi Tohi-Tapu: “ ʼE feala pe ke tou fakamoʼoni ʼe mole he tahi age tohi ʼi te temi muʼa neʼe totonu tona hiki.” Logo la tona kua fualoa mo te maumau vave ʼo te ʼu takaiga tohi, pea mo te ʼuhiga heʼe haohaoa ʼo te kau hiki tohi kae ʼe tou tui papau ko te ʼu kupu ʼae ʼe tou lau ia ʼaho nei ʼi te Tohi-Tapu ʼe ina fakaha te ʼu manatu ʼo tona Haʼuʼaga, ia Sehova.

4. Kotea ka tou palalau anai ki ai ʼi te alatike ʼaeni?

⁴ ʼE foaki mai e Sehova “te ʼu meʼa ʼofa lelei fuli mo haohaoa.” (Sakp. 1:17) ʼE kau te Tohi-Tapu ki te ʼu meʼa ʼofa maʼuhiga ʼae neʼe foaki mai e Sehova. Ka foaki mai e he tahi he meʼa ʼofa, ʼe ina iloʼi lelei tatou ʼo feia mo te ʼu meʼa ʼae ʼe ʼaoga kia tatou. ʼE toe feia pe mo ia ʼae neʼe ina foaki mai te Tohi-Tapu. Ka tou vakavakaʼi fakalelei te meʼa ʼofa ʼaia, pea ʼe lahi ai tatatou iloʼi ia Sehova, mo tana iloʼi lelei tatou pea mo te ʼu meʼa ʼae ʼe ʼaoga kia tatou. ʼE tou vakaʼi anai ʼi te alatike ʼaeni pe ʼe fakaha feafeaʼi ʼi te Tohi-Tapu te ʼu kalitate ʼaeni ʼe tolu ʼo Sehova: te poto, te faitotonu pea mo tona ʼofa. Tou vakaʼi muʼa pe ʼe fakaha feafeaʼi ʼi te Tohi-Tapu ia te poto ʼo te ʼAtua.

5. ʼE fakaha feafeaʼi ʼi te Tohi-Tapu te poto ʼo te ʼAtua?

⁵ ʼE iloʼi e Sehova ʼe ʼaoga kia tatou tana ʼu tokoni fakapotopoto. Pea ʼe fakaha ʼi tona meʼa ʼofa ʼae ko te Tohi-Tapu ia tona poto. ʼE ʼi ai te ʼu fua lelei ʼo te ʼu tokoni ʼa te Tohi-Tapu ki te hahaʼi. ʼE ina fetogi tonatou maʼuli. ʼI te temi ʼae neʼe tohi ai te ʼu ʼuluaki tohi ʼo te Tohi-Tapu, neʼe ui age e Moisese ki te kau Iselaele, te hahaʼi ʼa te ʼAtua: “ʼE mole ko he ʼu palalau fakafua noa ʼaeni, kae ʼe kotou maʼuʼuli anai.” (Teu. 32:47) Ko natou ʼae neʼe fakalogo ki te ʼu Tohi Taputapu, neʼe natou maʼu he maʼuli lelei mo fiafia. (Pes. 1:2, 3) Logo la kua fualoa te tohi ʼo te Tohi-Tapu kae ʼe kei maʼu aipe te malohi ʼae ke ina fetogi te maʼuli ʼo te hahaʼi. Ohage la, ʼi te jw.org ʼi te kupu tafito “Neʼe fetogi te ʼu maʼuli ʼuhi ko te moʼoni” ʼe kotou maʼu ai ni fakamatala ʼe 30 tupu ʼo ni tehina mo tuagaʼane neʼe “gaue” malohi te folafola kia natou ia ʼaho nei.—1 Tes. 2:13.

6. He koʼe ʼe tou ui ʼe mole he tahi age tohi ʼe tatau mo te Tohi-Tapu?

⁶ ʼE mole he tahi age tohi ʼe tatau mo te Tohi-Tapu. Kotea tona tupuʼaga? Heʼe ko Sehova, te Haʼuʼaga ʼo te tohi ʼaia, ʼe mafimafi, mo heʼe gata pea ʼe ina maʼu te poto makehe. ʼE lahi te ʼu tohi ʼe kei hoko atu tona lau logo la te kua mamate ʼo natou ʼae neʼe natou tohi. Pea ʼaki te temi ʼe mole kei ʼaoga te ʼu tokoni ʼae ʼe tuʼu ʼi te ʼu tohi ʼaia. Kae ko te ʼu pelesepeto fakapotopoto ʼi te Tohi-Tapu ʼe heʼe gata he neʼe fua lelei ki te ʼu maʼuli ʼo te hahaʼi ʼi te ʼu temi fuli pe. Ka tou lau te tohi taputapu ʼaia pea mo metitasio ki ai, ʼe fakaʼaogaʼi e Sehova tona laumalie maʼoniʼoni ʼae ʼe malohi moʼo tokoni mai ke tou mahino peʼe feafeaʼi tona maʼuliʼi. (Pes. 119:27; Mala. 3:16; Hep. 4:12) ʼEi, ko Sehova ʼae ʼe maʼuli pea ʼe haʼu mai ai te Tohi-Tapu, ʼe fia tokoni atu. ʼE uga ai tatou ke tou lau tuʼumaʼu te Tohi-Tapu!

7. Neʼe fakatahiʼi feafeaʼi e te Folafola ʼa te ʼAtua tana hahaʼi ʼi te temi muʼa?

⁷ Ko te tahi faʼahi ʼe fakaha ai te poto ʼo te ʼAtua ʼi te Tohi-Tapu ʼe ko tana fakatahiʼi tana hahaʼi. ʼI te temi ʼae neʼe hu ai te kau Iselaele ki te kele ʼo te fakapapau, neʼe natou nonofo ʼi he ʼu koga meʼa kehekehe. Neʼe liliu ʼihi ko ni tautai, ko ʼihi neʼe fagai manu pea neʼe gaue kele ʼihi. Neʼe feala pe ke mole kei tokakaga ʼihi kau Iselaele ki  ʼonatou tehina ʼae neʼe maʼuʼuli ʼi te tahi age ʼu koga meʼa. Kae neʼe fakatuʼutuʼu e te ʼAtua ni lakaga ke fakatahitahi ai te kau Iselaele ke natou logo ki te lau pea mo te fakamahino ʼo tana Lao. (Teu. 31:10-13; Neh. 8:2, 8, 18) Fakakaukauʼi age muʼa te meʼa ʼae neʼe logoʼi e he Iselaele agatonu, ʼi tana tau atu ʼae ki Selusalemi pea sio ki te toko miliona ʼu kauga atolasio neʼe ʼomai mai te ʼu poto fuli ʼo te fenua. Neʼe tokoni ai ia Sehova ki tana hahaʼi ke natou logo tahi. Ki muli age ʼi te kua fakatuʼu ʼo te kokelekasio Fakakilisitiano, neʼe kau ai ni tagata mo ni fafine neʼe palalau ʼi ni lea kehekehe. Ko ʼihi neʼe iloa kae ko ʼihi neʼe puli noa. Pea ko ʼihi neʼe koloaʼia kae masisiva ʼihi. Kae ko tonatou ʼoʼofa ki te ʼu Tohi Taputapu neʼe natou logo tahi ai ʼi tanatou tauhi ʼae ki te ʼAtua moʼoni. Ko natou leva ʼae neʼe tui neʼe feala ke natou mahino ki te Folafola ʼa te ʼAtua ʼaki pe te tokoni ʼo ʼonatou tehina mo tuagaʼane pea mo fakatahi mo natou.—Gaue 2:42; 8:30, 31.

8. ʼE fakatahiʼi feafeaʼi e te Tohi-Tapu ia te hahaʼi ʼa Sehova ia ʼaho nei?

⁸ Neʼe hoko atu e totatou ʼAtua poto tana akoʼi pea mo tana fakatahiʼi tana hahaʼi ʼaki te Tohi-Tapu. ʼE tou maʼu ai te ʼu moʼoni fuli ʼo ʼuhiga mo Sehova ʼae ʼe ʼaoga ke tou iloʼi. ʼE tou fakatahitahi tuʼumaʼu ʼi te ʼu fono, mo te ʼu fakatahi, ʼae ʼe tou fakalogo ai ki te lau pea mo faipalalau ki te Tohi-Tapu, pea mo tona fakamahino. Koia ʼe maʼuhiga te Tohi-Tapu ki te fakahoko ʼo te fakatuʼutuʼu ʼa  Sehova ʼae ke tauhi fakatahi tana hahaʼi.—Sofo. 3:9.

9. Ke tou mahino ki te Tohi-Tapu, kotea te kalitate maʼuhiga ʼe tonu ke tou maʼu? (Luka 10:21)

⁹ Tou vakaʼi he tahi fakamoʼoni ʼe ha ai te poto ʼo Sehova. Neʼe lahi te ʼu koga ʼo te Tohi-Tapu neʼe ina fakatotonu ke tohi pea neʼe feala pe ke mahino ki ai te kau lautohi agavaivai. (Lau ia Luka 10:21.) Kua lau te Tohi-Tapu e te hahaʼi fuli ʼo te malamanei katoa. Ohage ko tona ui e te tagata poto sivi Tohi-Tapu “ ʼe lahi age te lau e te hahaʼi ia te Tohi-Tapu ʼi te tahi age ʼu tohi pea ʼe natou lau fakalelei age ʼi te ʼu tohi fuli ʼae.” Kae ʼe gata pe ki te kau agavaivai ʼae ʼe natou mahino mo maʼuliʼi moʼoni te ʼu faʼahi fuli ʼae ʼe tuʼu ʼi te Tohi-Tapu.—2 Ko. 3:15, 16.

10. Kotea te tahi faʼahi ʼi te Tohi-Tapu ʼe fakamoʼoni ai te poto ʼo Sehova?

¹⁰ ʼE tou iloʼi te poto ʼo Sehova ʼi te Tohi-Tapu ʼi te tahi age aluʼaga. ʼE mole fakaʼaogaʼi pe e Sehova te Tohi-Tapu moʼo akoʼi tana hahaʼi katoa kae ʼe ina toe fakaʼaogaʼi foki moʼo akoʼi pea mo fakalotofimalieʼi tatou takitokotahi. Ka tou lau te Tohi-Tapu ʼe tou logoʼi te tokaga ʼa Sehova kia tatou takitokotahi. (Esa. 30:21) Neʼe heʼeki ke lau koa la te Tohi-Tapu moka ke tau mo he fihifihia pea ke to tonu ki he vaega ʼe hage pe neʼe tohi maʼau? Kae neʼe tohi te Tohi-Tapu maʼa te toko lau miliona hahaʼi. He koʼe ʼe lava maʼu ai ni manatu ʼe totonu pea mo te ʼu faʼahi ʼe ʼaoga kia koe? Heʼe ko te Haʼuʼaga ʼo te Tohi-Tapu ʼe ko ia ʼae ʼe makehe age tona poto ʼi te ʼatulaulau.—2 Tim. 3:16, 17.

11. ʼI te tohi ʼo te Tohi-Tapu neʼe fakaha feafeaʼi e te ʼAtua tana mole fakapalatahi?

¹¹ Ko te faitotonu ko te tahi kalitate ʼo Sehova. (Teu. 32:4) ʼI te agamahani ko he tahi ʼe faitotonu ʼe mole fakapalatahi, pea ko Sehova ʼe mole fakapalatahi. (Gaue 10:34, 35; Loma 2:11) ʼE iloga tana mole fakapalatahi ʼi te ʼu lea ʼae neʼe tohi ai te Tohi-Tapu. Ko te ʼu ʼuluaki tohi ʼe 39 ʼo te Tohi-Tapu, neʼe tohi ʼateaina pe ia ʼi te Fakahepeleo, ko te lea ʼaia neʼe mahino gafua ki ai te hahaʼi ʼa te ʼAtua ʼi te temi ʼaia. Ko te ʼu tohi fakaʼosi ʼe 27 ʼo te Tohi-Tapu, neʼe tohi pe ia ʼi te lea Fakakeleka he neʼe ko te lea ʼaia neʼe lahi tona fakaʼaogaʼi e te ʼu ʼuluaki Kilisitiano. Neʼe mole loto e Sehova ke tohi tana Folafola ʼi he lea pe ʼe tahi. Ko te toko valu miliale ʼo te malamanei ia ʼaho nei ʼe natou palalau ia lea kehekehe. ʼE lava akoʼi feafeaʼi e te kaugamalie ʼaia ke natou iloʼi ia Sehova?

12. ʼE fakahoko feafeaʼi ia Taniela 12:4 ʼi te temi fakaʼosi ʼaeni?

¹² ʼAki ia te polofeta ko Taniela neʼe fakapapau e Sehova, ʼi te temi fakaʼosi “ ʼe mahu anai te ʼatamai malama moʼoni” ʼae ʼi te Tohi-Tapu. Tokolahi ʼe natou mahino anai ki ai. (Lau ia Taniela 12:4.) Ko te tahi faʼahiga fai ke mahu ai te ʼatamai malama, ʼe ko te fakaliliu, mo te ta pea mo te tufa ʼo te ʼu Tohi-Tapu pea mo te ʼu tohi Fakatohi-tapu. ʼE lahi age te ta pea mo te tufa ʼo te Tohi-Tapu ʼi te malamanei katoa. Ko te ʼu fale gaue ʼae ʼe ta ai te Tohi-Tapu ʼe totogi kovi ʼaupito moka natou fakatau. ʼO kaku mai ki te temi nei kua fakaliliu e te hahaʼi ʼa te ʼAtua te Tohi-Tapu katoa peʼe fakakoga, ia lea ʼe 240 tupu, pea kua feala ke tahi maʼu noa tana Tohi-Tapu. Koia ʼe logo ai te hahaʼi fuli ʼo te malamanei katoa ki te tala ʼo te logo lelei ʼo te Puleʼaga ʼi muʼa ʼo te hoko mai ʼo te fakaʼosi. (Mat. 24:14) ʼE loto e totatou ʼAtua faitotonu ke maʼu e te kaugamalie te fealagia ʼae ke natou iloʼi ia ia ʼi tanatou lau tana Folafola, heʼe ʼofa mamahi kia tatou fuli.

13. He koʼe ʼe feala ke tou ui ʼe fakaha ʼi te Tohi-Tapu te ʼofa ʼo Sehova? (Soane 21:25)

¹³ ʼE fakaha ʼi te Tohi-Tapu te kalitate ʼae ʼe lahi age ʼo Sehova, ia te ʼofa. (1 Soa. 4:8) Fakakaukauʼi age muʼa te ʼu faʼahi ʼae neʼe tohi e Sehova ʼi te Tohi-Tapu mo ʼae neʼe mole ina tohi. Neʼe ina tohi pe te ʼu faʼahi ʼae ʼe ʼaoga kia tatou ke feala hatatou felogoi mo ia, ke tou maʼuli fiafia ʼi te temi nei pea ke tou maʼu te maʼuli heʼe gata. ʼUhi ko te ʼofa ʼo Sehova kia tatou, neʼe mole ina tohi te tahi atu ʼu faʼahi naʼa fakamafasia kia tatou.—Lau ia Soane 21:25.

14. ʼE toe fakaha feafeaʼi ʼi te Tohi-Tapu te ʼofa ʼo te ʼAtua kia tatou?

¹⁴ Ko te tahi faʼahi ʼe fakaha e Sehova tona ʼofa kia tatou ko tana faʼahiga felogoi mo tatou ʼaki he fakaʼapaʼapa. Neʼe mole fakatuʼu e Sehova ʼi te Tohi-Tapu he tuʼuga lekula mo te ʼu meʼa ʼae ʼe tonu ke tou fai peʼe mole tonu ke tou fai ʼi totatou maʼuli. Neʼe ina loto ke tou fakaʼaogaʼi ʼotatou fealagia fakakaukau ʼaki tana tohi he ʼu fakamatala, mo te ʼu lea fakapolofeta fakaofoofo pea mo te ʼu tokoni ʼaoga. ʼI tana faʼahiga fai ʼaia, ʼe uga ai tatou ke tou ʼoʼofa pea mo fakalogo kia te ia ʼaki totatou loto katoa.

15. (1) Neʼe fakaha feafeaʼi e Sehova tana tokaga kia natou ʼae ʼe natou lau tana Folafola? (2) ʼI te pāki, ko ai te hahaʼi ʼae ʼe metitasio ki ai te kiʼi taʼahine, te tehina tupulaga pea mo te tuagaʼane kua finematuʼa? (Sen. 39:1, 10-12; 2 Hau 5:1-3; Luka 2:25-38)

¹⁵ ʼE fakaha ʼi te Tohi-Tapu ʼe tokaga moʼoni ia Sehova kia tatou. ʼO feafeaʼi? ʼE lahi te ʼu fakamatala ʼi te Tohi-Tapu ʼo ni hahaʼi neʼe tatau pe “te ʼu meʼa ʼae neʼe [natou] logoʼi mo te ʼu meʼa ʼae ʼe tou logoʼi.” (Sakp.  5:17) Tahi ʼae, ʼi tatatou iloʼi tana faʼahiga felogoi mo ni hahaʼi ʼe hage ko tatou, ʼe tou mahino lelei ai ko “Sehova ʼe ʼofa mamahi pea mo manavaʼofa.”—Sakp. 5:11.

16. Kotea ʼae tou akoʼi ʼi te Tohi-Tapu ʼo ʼuhiga mo Sehova moka tou lau te ʼu fakamatala ʼo ni hahaʼi neʼe natou fai ni hala? (Esaia 55:7)

¹⁶ ʼE fakaha ʼi te Tohi-Tapu ia te ʼofa ʼo Sehova kia tatou ʼi te tahi age aluʼaga. ʼE ui lelei mai ʼi te Tohi-Tapu ʼe mole liʼakina anai tatou e Sehova moka tou fai ni hala. Neʼe tuʼa lahi te agahala ʼa te kau Iselaele kia Sehova. Pea ka natou fakahemala moʼoni pea neʼe fakamolemole ia Sehova kia natou. (Lau ia Esaia 55:7.) Neʼe toe iloʼi e te ʼu ʼuluaki Kilisitiano neʼe ʼofa mamahi te ʼAtua kia natou. ʼAki te takitaki ʼa te laumalie, neʼe tohi e te apositolo ko Paulo ki ʼona tehina mo tuagaʼane ke natou ‘fakamolemole pea mo fakafimalieʼi’ ia he tagata neʼe agahala mamafa pea kua fakahemala. (2 Ko. 2:6, 7; 1 Ko. 5:1-5) ʼE malave loto te iloʼi ʼae ʼe mole lituʼa ia Sehova ki ʼana kaugana ʼuhi pe he neʼe natou fai ni hala. Kae neʼe tokoni age kia natou ʼaki te ʼofa pea mo fakatonutonuʼi mo fakaafe natou ke natou toe fakakaumeʼa mo ia. Pea neʼe ina fakapapau ʼe ina toe fai feia pe anai kia natou ʼae ʼe agahala ʼi te temi nei pea neʼe kua fakahemala.—Sakp. 4:8-10.

17. He koe ko te Tohi-Tapu ʼe ko he meʼa ʼofa taulekaleka?

¹⁷ Neʼe foaki mai e Sehova he meʼa ʼofa taulekaleka. He koe ʼe makehe tana Folafola? Ohage pe ko te meʼa ʼae neʼe tou vakaʼi, ʼe fakaha ʼi te Tohi-Tapu ia te poto, mo te faitotonu pea mo te ʼofa ʼo te ʼAtua. ʼE fakamoʼoni te tohi ʼaia ki ai. ʼE loto e Sehova ke tou akoʼi pea mo tou iloʼi ia ia, pea ke tou liliu ko ʼona kaumeʼa.

18. ʼE tou fakaha feafeaʼi tatatou lotofakafetaʼi ki te meʼa ʼofa taulekaleka ʼo Sehova, ia te Tohi-Tapu?

¹⁸ ʼAua naʼa galo kia tatou ko te Folafola ʼa te ʼAtua ʼe ko he “meʼa ʼofa lelei.” (Sakp. 1:17) Koia la ʼae ʼe tonu ai ke hoko atu tatatou fakaha tatatou lotofakafetaʼi ki te meʼa ʼofa ʼaia. ʼE tou fai te faʼahi ʼaia ʼaki tatatou lau te ʼu folafola taputapu pea mo metitasio ki ai. Ka tou fai feia, ʼe tou tui papau ʼe tapuakinaʼi anai ʼatatou faiga e Sehova te Haʼuʼaga ʼo te Tohi-Tapu, pea ʼe tou “maʼu ai anai te ʼatamai malama ʼo ʼuhiga mo te ʼAtua.”—Taag. 2:5.