ʼE ʼaoga ki te ʼu fanau ni hahaʼi lalahi ke takitaki mo tokoni age kia natou. ʼI takotou ʼuhiga matuʼā, ko koutou totonu ʼae ʼe tonu ke kotou foaki te takitaki mo te tokoni ʼaia. Kae ʼe feala pe ki he ʼu hahaʼi kua fotufotuʼa ke natou toe tokoni ki te ʼu fanau.

ʼE lahi te ʼu fenua, ʼe mole fakatahi tuʼumaʼu ia te ʼu tupulaga mo te hahaʼi lalahi. Tou vakavakaʼi te ʼu aluʼaga ʼaeni:

• ʼE lahi te temi ʼo te ʼu fanau ʼi te ʼu fale ako pea ʼe hahaʼi age te kau ako ʼi te kau faiako.

• ʼI te hili ʼo te ako, ʼi tanatou liliu ki ʼonatou ʼapi ko ʼihi fanau ʼe kua pupuli ʼanatou matuʼā ʼi fale koteʼuhi, ʼe nā gaue tokolua.

• Neʼe fai te sivi ʼi Amelika, ʼe ui ai ko te ʼu fanau ʼe taʼu 8 ki te 12 ʼe natou fakaʼaogaʼi teitei hola ʼe ono ʼi te ʼaho fuli ʼo sioʼi te televisio, peʼe fakalogo musika pea gaoʼi mo te ʼu kiʼi masini. *

ʼE ui fenei ʼi te tohi Hold On to Your Kids: “Ia ʼaho nei, ʼe tou tokagaʼi kua kumi tokoni pe te kau tupulaga ki te tahi ʼu tupulaga, kae mole ki ʼanatou matuʼā peʼe ki ni faiako peʼe ki ni ʼihi atu hahaʼi fotufotuʼa.”

Ke maʼu hokotou temi mo natou.

PELESEPETO FAKATOHI-TAPU: “Ako te fanau o mulimuli ki te ala ae e tonu ke mulimuli ai; pea ka liliu anai ia o matua, e mole anai toe liliu ia mai ai.”—Taaga Lea 22:6.

ʼE mahani ʼe kumi tokoni te ʼu fanau ki ʼonatou matuʼā. Koia, ʼe ui e te kau poto maʼia ʼi tonatou temi tupulaga, ʼe loto te kau tupulaga ke tokoni age ʼanatou matuʼā kae mole ko he tahi age tupulaga. Neʼe talamanatu fenei te toketa ko Laurence Steinberg ʼi tona tohi You and Your Adolescent: “ ʼE mulimuli pe te ʼu fanau ki te ʼu aga ʼae ʼe fai e ʼanatou matuʼā. ʼE fia iloʼi e te ʼu fanau ʼakotou ʼu manatu pea mo fagono ki ai, tatau aipe pe ʼe mole natou manatu tahi mo kotou.”

Kapau ʼe loto lelei e ʼakotou fanau ke koutou takitaki ia natou, kotou faigaʼi ʼo foaki te tokoni ʼae ʼe ʼaoga kia natou. Kotou tuku he temi feʼauga ke kotou fakatahitahi ai mo ʼakotou fanau. Pea kotou ui age te ʼu meʼa ʼae ʼe kotou logoʼi ʼi ʼokotou loto pea mo ʼakotou manatu. Peʼe kotou fakaha age te ʼu meʼa ʼae ʼe maʼuhiga kia koutou pea mo te ʼu ako ʼae neʼe kotou taʼofi ʼi te ʼu aluʼaga ʼo tokotou maʼuli.

 Kumi tokoni ki he tahi kua fotufotuʼa ʼe feala ke tokoni kia natou.

PELESEPETO FAKATOHI-TAPU: “Ko ae e nofo tuumau mo te kau poto e liliu anai o poto.”—Taaga Lea 13:20.

ʼE kotou iloʼi la he kilisitiano kua fotufotuʼa ʼe feala ke faʼifaʼitakiʼi e ʼakotou fanau? ʼE feala la ke kotou fakatuʼutuʼu ke maʼu e te kilisitiano ʼaia he temi mo takotou fanau? ʼE moʼoni, ʼe mole fakaʼuhiga leva ʼe pule ia ki ʼakotou fanau. Kailoa ia. Ko he kilisitiano ʼe kotou falala moʼoni ki ai, ʼe mole ina fai anai he meʼa moʼo fakatupu tuʼutamaki ki ʼakotou fanau. Kae, ʼe lagolago anai ki takotou faʼahiga akoʼi ʼo natou. ʼE fakamatala ʼi te Tohi-Tapu, neʼe fua lelei kia Timoteo ia tana fakakaumeʼa mo te apositolo ko Paulo maʼia ʼi tana kua lahi ake. Pea neʼe toe feia pe kia Paulo mai ia Timoteo.—Filipe 2:20, 22.

Ia ʼaho nei, ʼe lahi te ʼu famili ʼe mole kei natou nonofo fakatahi pea mole kei natou kolo tahi. Pea ko te ʼu kui mo ʼihi atu ʼu kaiga kua maʼuʼuli natou ʼi te tahi ʼatu ʼu fenua. Kapau ko ia, kotou faigaʼi ki ʼakotou fanau ke natou fakakaumeʼa mo ni hahaʼi kua fotufotuʼa ʼe ʼi ai ʼonatou kalitate, ʼe kotou loto ke maʼu e ʼakotou fanau.