Ko natou ʼae ʼe agavaivai ʼe natou aga fakaʼapaʼapa. ʼE mole natou fia tuʼu mo fakamaʼua ki ʼihi ke natou fakamaʼuhigaʼi ia natou. Kailoa. Kae ʼe natou tokakaga ki ʼihi mo ako mai ia natou ʼaia.

Ko ʼihi hahaʼi ʼe natou ui ko te agavaivai ʼe ko he vaivaiʼaga, kae ʼe mole moʼoni. ʼI tona fakahagatonu, ʼe ko he kalitate ʼe tokoni ki he tahi ke malama ki ʼana lakahala pea mo mahino ʼe ʼi ai ʼona tuʼakoi.

• ʼE fua lelei te agavaivai ki te ʼu felogoi mo te hahaʼi. ʼE ui fenei ʼi te tohi The Narcissism Epidemic: “Ko natou ʼae ʼe agavaivai ʼe faigafua hanatou fakakaumeʼa mo te hahaʼi pea ʼe lelei anai ʼanatou felogoi mo natou.”

• ʼE fua lelei te agavaivai ki te ka haʼu ʼo takotou fanau. ʼE fua lelei ki tona maʼuli ki te temi nei mo tona ka haʼu, ohage la, moka ʼe ina kumi anai hana gaue. Neʼe tohi fenei e te toketa ko Leonard Sax: “Ko he tupulaga ʼe fia lahi ʼe ina meʼa noaʼi ʼona vaivaiʼaga, pea ʼe mole fia fai anai te tagata kumi hahaʼi gaue kia ia. Kae kia ia ʼae ʼe tokaga ki te meʼa ʼae ʼe maʼuhiga ki te tagata ʼae ʼe kumi hahaʼi gaue, ʼe ina maʼu anai te gaue.” *

Tokoni age ke ʼaua naʼa ina fia fakamaʼuhigaʼi ia ia totonu.

PELESEPETO FAKATOHI-TAPU: “Kapau ʼe manatu he tahi ʼe maʼuhiga kaʼe ʼe ko he meʼa noa ia, ʼe ina kakaʼi pe ia ia totonu.”—Kalate 6:3.

• ʼAua naʼa kotou fai ni palalau laulaunoa. Ohage la, ko ia ʼaeni: “ ʼAi koe, ko meʼa fuli ʼae ʼe ke loto ki ai ʼe hoko moʼoni pe anai.” Lagi ko he ʼu palalau moʼo fakalotomalohi kae ʼe mole moʼoni ia. ʼE maʼuli lelei anai ʼakotou fanau mo kapau ʼe natou fai ni fakatuʼutuʼu fakapotopoto mo faʼa gaue.

• Kotou vikiʼi ia ia ʼi tana gaue lelei. ʼE tonu ki te ʼu matuʼā ke natou vikiʼi tana fanau ki tana gaue lelei ʼae neʼe ina fai, kae mole kotou laupisiʼi anai.

• Fakatuʼakoi tana fakaʼaogaʼi te ʼu fakatahiʼaga ʼi te Neti. Koteʼuhi ʼi te ʼu fakatahiʼaga ʼaia, ʼe lahi te hahaʼi ʼe natou fia fakahaha ai ʼe natou faiva ʼi ni gaue. Kae ko te faʼahiga aga ʼaia ʼe mole alu tahi mo te agavaivai.

• Fakalotomalohiʼi ia ia ke foimo faifakalelei. Kapau neʼe fai e takotou fanau he meʼa ʼe kovi, tokoni age ke mahino neʼe mole lelei te aga ʼae neʼe ina fai.

 Kotou fakalotomalohiʼi ia ia ke lotofakafetaʼi.

PELESEPETO FAKATOHI-TAPU: “Ke kotou fakaha tokotou lotofakafetaʼi.”—Kolose 3:15.

• Ke fakafetaʼi ki te fakatupu. ʼE tonu ke akoʼi te ʼu fanau ke natou fakafetaʼi ki te ʼu meʼa fuli ʼae neʼe fakatupu, pea ke natou mahino ʼe fakalogo totatou maʼuli ki te ʼu meʼa ʼaia. Fakaʼaogaʼi te ʼu faʼifaʼitaki ʼo te ʼaele ʼe ʼaoga ki te manava, te vai moʼo inu pea mo te meʼa kai ki te kai, ke tuputupu ai tana leleiʼia pea mo tana lotofakafetaʼi ki te taulekaleka ʼo te fakatupu.

• Ke ina fakamaʼuhigaʼi te hahaʼi. Fakamanatuʼi age ke ʼaua naʼa maheka ki ʼihi, ʼuhi he ʼe natou faiva peʼe natou maʼu ni fealagia. Kae fakaha age ʼe feala hana ako mai ia natou ʼaia.

• Ke ina fakaha tana lotofakafetaʼi. Akoʼi ki takotou tamasiʼi ke fakamalo fakamalotoloto, ʼe ha ai ʼe agavaivai.

Akoʼi age te maʼuhiga ʼo te tokoni ki ʼihi.

PELESEPETO FAKATOHI-TAPU: “ ʼAki he agavaivai kotou fakaʼuhiga te hahaʼi fuli ʼe maʼoluga age ia koutou. Pea ʼaua naʼa kotou kumi pe te ʼu meʼa ʼae ʼe lelei kia koutou totonu, kaʼe ke kotou toe kumi foki mo te ʼu meʼa ʼae ʼe lelei ki ʼihi.”—Filipe 2:3, 4.

• Ke ina fakahoko te ʼu gaue ʼo te loto fale. ʼE tonu ke kotou ui age ki takotou fanau ʼe ko hona maʼua ke ina fakahoko te ʼu gaue ʼi te loto fale, kae mole tonu ia ke ina fai te meʼa ʼae ʼe loto ki ai. ʼE tonu ke ina fakamuʼamuʼa te ʼu gaue ʼo te loto fale pea hoki feala leva ke alu ʼo gaoʼi. Fakamahino age te ʼu fua lelei ki ʼihi moka ʼe ina fakahoko te ʼu gaue ʼaia, he ʼe natou leleiʼia anai ia ia mo fakaʼapaʼapaʼi.

• Ke mahino ko te tokoni ki ʼihi ʼe ko he pilivilesio. ʼI tana fai te faʼahi ʼaia, ʼe liliu anai ʼo aga fakapotopoto mo fotufotuʼa. Koia, kotou fakalotomalohiʼi takotou tamasiʼi ke ina vakavakaʼi pe ko ai ʼae ʼe ʼaoga ki ai he tokoni. Faipalalau mo ia pe ʼe feafeaʼi anai hana tokoni age kia natou. Vikiʼi mo lagolago kia ia ʼi tana fia tokoni ki ni ʼihi.