ʼE ko he takitaki peʼe ko he akoʼi. ʼI ʼihi temi, ʼe ko he fakatonutonuʼi ʼo he fanau neʼe ina fai he meʼa ʼe kovi. Pea ʼe toe fakaʼuhiga foki ki te akoʼi ʼo te fanau ki te ʼu aga ʼae ʼe tonu ke fai, ke tokoni ki hanatou toʼo he ʼu tonu ʼe fakapotopoto.

Ia taʼu ʼe hogofulu ʼae kua hili, neʼe mole kei fakatonutonuʼi leva e te ʼu matuʼā ʼanatou fanau. Koteʼuhi ʼe matataku te ʼu matuʼā naʼa fokifa te lotofalala ʼa te ʼu fanau kia natou totonu kua puli ai. Kae ko te ʼu matuʼā ʼae ʼe aga fakapotopoto ʼe natou fakatonutonuʼi ʼanatou fanau, ʼaki he ʼu lekula fakapotopoto pea mo akoʼi ke natou mulimuli ki ai.

ʼE ui fenei e Pamela: “ ʼE ʼaoga te fakatonutonuʼi ʼo te ʼu fanau ke natou liliu ko he ʼu hahaʼi kua fakapotopoto. Kapau ʼe mole he fakatonutonu, pea ʼe hage pe te ʼu fanau ko he vaka ʼe hehe pea ʼe mafuli ʼi te tai he ʼe mole hona foe taki.”

Ke alu tahi ʼakotou aga mo ʼakotou palalau. Kapau ʼe mole fia fakalogo tau fanau ki te ʼu lekula, fakamahino age ʼona nunuʼa kovi. Kae kapau e fakalogo vikiʼi ia ia.

ʼE ui fenei e Christine: “Logo la ʼe ko he malama uigataʼa ʼaeni ʼe tou maʼuʼuli ai, kae ʼe au fakamalo tuʼumaʼu pe ki ʼaku tamaliki moka natou fakalogo lelei. Ka fai age kia natou he ʼu fakamalo pea ʼe natou tali gafua ai te ʼu fakatonutonu.”

PELESEPETO FAKATOHI-TAPU: “ ʼE utu pe anai e te tagata te meʼa ʼae neʼe ina to.”—Kalate 6:7.

Ke ke fakapotopoto. Fakafuafua lelei te fakatonutonuʼi ʼo te tamasiʼi, mulimuli pe ki te lahi ʼo tona taʼu, ʼona fealagia pea mo te faʼahiga lakahala ʼae neʼe ina fai. Ohage la kapau ʼe mole ina fakaʼaogaʼi fakapotopoto te telefoni toʼotoʼo, ʼe feala ke ke toʼo peʼe ke tapuʼi lolotoga he temi. Pea tahi, ʼaua leva naʼa ke hoko ita ʼi he ʼu kiʼi meʼa noa pe neʼe ina fai.

ʼE ui fenei e Wendell: “ ʼE au faigaʼi ke au iloʼi pe neʼe talagataʼa moʼoni peʼe neʼe fai hala pe. ʼE kehekehe te fai tuʼumaʼu ʼo he lakahala, ʼe ha ai tona uluagaaga vaivai pea mo te fai ʼo he lakahala he neʼe fai hala pe.”

PELESEPETO FAKATOHI-TAPU: “ ʼAua naʼa kotou fakatupu ita ki ʼakotou fanau, naʼa natou lotovaivai ai.”—Kolose 3:21.

Ke ke maʼu te lotoʼofa. ʼE tali gafua anai e te ʼu fanau te fakatonutonu mai ʼanatou matuʼā he ʼe natou iloʼi neʼe fai ʼaki te ʼofa.

ʼE ui fenei e Daniel: “Ka fai e tamā kiʼi tama he ʼu lakahala, ʼe mā ui age ko te ʼu tonu lelei la ʼae neʼe ina toʼo ki muʼa atu, neʼe mā fiafia ai. Kae ʼe mā fakamahino age ko te lakahala ʼae neʼe ina fai, ʼe matagafuaʼi anai ia ia mo kapau ʼe mole fetogi. Pea ʼe mā tokoni age anai ke fetogi.”

PELESEPETO FAKATOHI-TAPU: “Ko he tahi ʼe ʼofa, ʼe kataki fualoa ia pea mo agalelei.”—1 Kolonito 13:4.