1. Kotea ʼae ʼe sio ki ai ia Sehova ʼi ʼana kaugana?

“KO SEHOVA ʼe ʼofa ʼi tana hahaʼi.” (Pes. 149:4, NWT) ʼE ko he manatu fakalotofimalie kia tatou. ʼE tou mahino ai ʼe sio ia Sehova ki ʼotatou kalitate, mo ina iloʼi te ʼu fetogi ʼae ʼe feala ke tou fai, pea ʼe ina taki tatou kia te ia. Kapau ʼe tou nonofo agatonu kia te ia, pea ʼe nofo ovi tuʼumaʼu anai kia tatou.—Soa. 6:44.

2. He koʼe ʼe feala ke manatu ʼihi ʼe mole ʼofa Sehova ia natou?

² ʼE feala ke manatu fenei ʼihi: “ ʼE au iloʼi ʼe ʼofa ia Sehova ʼi tana hahaʼi fuli, kae ʼe mole feala ia ke ʼofa ki he tahi ohage ko au.” He koʼe ʼe natou manatu feia? Ko te tuagaʼane ko Oksana, * neʼe lotomamahi ʼaupito he neʼe gaohi koviʼi ia ia ʼi tana kei veliveli. ʼE ina ui fenei: “Neʼe au fiafia ʼosi ʼi taku papitema pea mo liliu ʼo pionie. Kae hili ki ai taʼu ʼe 15, neʼe au toe manatuʼi ai toku gaohi koviʼi ʼae ʼi taku kei veliveli. Neʼe au manatu ai neʼe mole feala kia Sehova ke ʼofa ia au.” Pea ko te tuagaʼane ko Yua, ʼae ʼe pionie, neʼe toe lotomamahi mo ia ʼuhi he neʼe gaohi koviʼi ʼi tana kei veliveli. ʼE ina ui fenei: “Neʼe au foaki toku maʼuli kia Sehova ke fiafia ai tona loto, kae ʼi taku ia manatu, neʼe mole feala ia ke ʼofa ia au.”

3. Kotea te ʼu fehuʼi ʼae ka tou tali anai ki ai?

³ Ohage ko te ʼu tuagaʼane ʼaeni neʼe tou palalau ki ai, ʼe ke ʼofa mamahi ia Sehova. Kae ʼe lagi ke manatu ʼe mole feala ia ke ʼofa ia koe. He koʼe ʼe tonu ke ke tui papau ʼe ʼofa Sehova ia koe? Kotea ʼae ʼe feala ke tokoni atu moka ke maʼu ni manatu fakalotovaivai? Tou tali ki te ʼu fehuʼi ʼaia.

4. He koʼe ʼe kovi te manatu ʼae ʼe mole ʼofa ia Sehova ia tatou?

⁴ Kapau ʼe tou tui papau ʼe ʼofa ia Sehova ia tatou, ʼe uga ai tatou ke tou fai ia meʼa fuli ʼe tou lavaʼi moʼo tauhi kia te ia logo la ʼotatou faigataʼaʼia. Kae kapau leva ʼe tou manatu ʼe mole ʼofa ia tatou, pea ʼe veliveli anai totatou malohi. (Taag. 24:10) Pea ka tou lotovaivai, ʼe mole kei feala anai hatatou tauʼi te ʼu ʼohofi ʼa Satana.—Efe. 6:16.

5. Kotea ʼae neʼe hoko ki ʼihi tehina mo tuagaʼane, ʼae neʼe natou manatu ʼe mole ʼofa te ʼAtua ia natou?

⁵ Ko ʼihi Kilisitiano agatonu neʼe natou lotovaivai ʼi te faʼahi fakalaumalie, he neʼe natou manatu ʼe mole ʼofa ia te ʼAtua ia natou. ʼE ui fenei e te tagata ʼafeā ko James: “ ʼE au Petelite pea mo lagolago ki he kokelekasio ʼe palalau ʼi te tahi age lea. Kae neʼe au feʼekeʼaki pe pe ʼe leleiʼia koa e Sehova te ʼu gaue ʼae ʼe au fai maʼa ia. Neʼe au toe feʼekeʼaki pe la pe ʼe fagono mai koa ki ʼaku faikole.” ʼE ui fenei e Eva, ʼae ʼe Petelite: “Neʼe au mahino leva ʼe kovi ʼosi ia te manatu ʼae ʼe mole ʼofa ia Sehova ia tatou. ʼE mole tou toe fia fakahoko ai tatatou tauhi kia te ia pea ʼe puli ai mo totatou fiafia.” Pea neʼe ui fenei e Michael, ʼae ʼe pionie katoa mo tagata ʼafeā: “Kapau ʼe tou tui ʼe mole ʼofa ia Sehova ia tatou, pea ʼe tou fakamamaʼo ai mai ia te ia.”

6. Kotea ʼae ʼe tonu ke tou fai moka tou kamata manatu ʼe mole ʼofa te ʼAtua ia tatou?

⁶ ʼE fakaha ʼi te ʼu fakamatala ʼaia ʼe feala ke vaivai tatatou tui moka ʼe tou maʼu te taʼi manatu ʼaia. Kae kotea ʼae ʼe tonu ke tou fai moka ʼe tou kamata manatu ʼe mole ʼofa te ʼAtua ia tatou? Tou foimo fakagata moka tou manatu feia. Tou kole kia Sehova ke tokoni mai ke tou tekeʼi te ʼu manatu fakalotovaivai ʼaia, pea ke ina foaki mai tana tokalelei, ʼae ʼe ina taupau ʼotatou loto pea mo ʼotatou fealagia fakakaukau. (Pes. 139:23; Flp. 4:6, 7) Pea tou manatuʼi, ʼe toe ʼi ai pe la ʼihi tehina mo tuagaʼane ʼe natou toe tauʼi ʼanatou manatu fakalotovaivai. Pea neʼe toe feia pe la mo ʼihi kaugana ʼa Sehova ʼi te temi muʼa. Tou vakaʼi te faʼifaʼitaki ʼa te apositolo ko Paulo.

7. Kotea te ʼu faigataʼaʼia neʼe tau mo Paulo?

⁷ ʼE ke manatu koa ʼi ʼihi temi kua lahi fau ʼau gaue, pea ʼe mole kei feala hou  fakahoko fuli? Kapau ko ia, ʼe feala ke ke mahino ki te aluʼaga ʼa te apositolo ko Paulo. Neʼe mole tuʼania pe ʼo ʼuhiga mo he kokelekasio ʼe tahi, kae ʼo ʼuhiga mo te ʼu kokelekasio fuli. (2 Ko. 11:23-28) ʼE ke tau koa mo he mahaki faigataʼa ʼo puli ai tou fiafia? Neʼe mamahi ia Paulo ʼuhi ko tona fihifihia. Neʼe lagi ko hona mahaki pea neʼe loto ia ke puli. (2 Ko. 12:7-10) Peʼe ke lotovaivai koa ʼuhi ko ʼou vaivaiʼaga? Neʼe toe feia mo Paulo. Neʼe ina ui ʼe ko ia ko he “tagata fakaʼofaʼofa” he neʼe ina tauʼi tuʼumaʼu ʼona vaivaiʼaga.—Loma 7:21-24.

8. Kotea ʼae neʼe tokoni kia Paulo ke ina tauʼi ai ʼona faigataʼaʼia?

⁸ Logo la te ʼu faigataʼaʼia kehekehe ʼaia pea mo tana lotovaivai, kae neʼe hoko atu pe e Paulo tana tauhi kia Sehova. Neʼe ina maʼu te malohi he neʼe tui ki totogi ʼae neʼe foaki e Sesu. Neʼe iloʼi lelei e Paulo te fakapapau ʼaeni neʼe fai e Sesu: “Ko ʼae ʼe tui kia te au . . . ʼe ina maʼu anai te maʼuli heʼe gata.” (Soa. 3:16; Loma 6:23) ʼEi, neʼe tui papau ia Paulo ʼe lotofakamolemole ia Sehova, maʼia kia natou ʼae neʼe natou fai ni agahala mamafa kae neʼe natou fakahemala.—Pes. 86:5.

9. Kotea ʼae ʼe tou mahino ki ai ʼi te vaega ʼo Kalate 2:20?

⁹ Neʼe toe tui papau ia Paulo ʼe ʼofa Sehova ia ia he neʼe ina foaki ia tona ʼAlo ke mate maʼa ia. (Lau ia Kalate 2:20.) ʼE fakalotomalohi te ʼu palalau fakaʼosi ʼae neʼe tohi e Paulo ʼi te vaega ʼaia. Neʼe ina ui fenei: “[Ko] te ʼAlo ʼo te ʼAtua . . . neʼe ʼofa ia au pea neʼe ina foaki ia ia totonu maʼaku.” Neʼe mole ui e Paulo ʼe ʼofa pe te ʼAtua ki ʼona tehina mo tuagaʼane kae ʼe mole feala ke ʼofa ia ia ʼuhi ko te ʼu meʼa kovi ʼae neʼe ina fai. Neʼe fakamanatuʼi e Paulo ki te kau Loma neʼe mate ia Kilisito “maʼa tatou ʼi tatatou kei agahala.” (Loma 5:8) ʼE mahino ia, ʼe ʼofa te ʼAtua ia tatou fuli!

10. Kotea te ako ʼe tou maʼu ia Loma 8:38, 39?

¹⁰ Lau ia Loma 8:38, 39. Neʼe tui papau ia Paulo ʼe ʼofa tuʼumaʼu pe te ʼAtua ia tatou. Neʼe ina tohi ‘ ʼe mole he meʼa ʼe feala anai ke ina fakamavae tatou mai te ʼofa ʼo te ʼAtua.’ Neʼe ina iloʼi neʼe faʼa kataki pe ia Sehova mo te kau Iselaele. Pea neʼe toe iloʼi e Paulo neʼe fakamolemole ia Sehova kia ia. Koia, neʼe hage pe neʼe ui fenei e Paulo: “Kapau neʼe fekauʼi mai e te ʼAtua tona ʼAlo ke haʼu ʼo mate maʼaku, ʼe mahino ia ʼe ʼofa moʼoni ia au!”—Loma 8:32.

11. He koʼe neʼe tui papau ia Paulo ʼe ʼofa Sehova ia ia, logo la te ʼu agakovi ʼae neʼe ina fai, ʼae ʼe fakamatala ia 1 Timoteo 1:12-15?

 ¹¹ Lau ia 1 Timoteo 1:12-15. Neʼe lagi manatu ia Paulo ʼe “kovi age” ia ʼi te hahaʼi agahala fuli, ʼuhi ko te ʼu agakovi ʼae neʼe ina fai ʼi te temi muʼa. ʼI muʼa ʼo tana maʼu ia te moʼoni, neʼe alu ki te ʼu kolo ʼo fakatagaʼi ai te kau Kilisitiano, mo pilisoniʼi natou pea mo lagolago ki tonatou matehi. (Gaue 26:10, 11) Ki muli age, neʼe lagi feala pe ke felaveʼi ia Paulo mo he tupulaga kua mamate ʼana matuʼā he neʼe ina fakatotonu ke fakapogi naua. ʼE mahino ia neʼe lotomamahi ia Paulo pea mo fakahemala. Kae neʼe ina iloʼi lelei neʼe mole feala ke ina fetogi te ʼu meʼa ʼae neʼe ina fai ʼi te temi muʼa. Neʼe tui papau neʼe mate ia Sesu maʼa ia, koia neʼe ina ui fenei ai: “Kaʼe ʼaki te ʼofa makehe ʼo te ʼAtua, ko au ko he apositolo.” (1 Ko. 15:3, 10) Kotea te ako ʼe feala ke ke taʼofi mai ai? ʼE tonu ke ke tui papau neʼe mate ia Sesu maʼa koe, pea kua feala hau felogoi lelei mo Sehova. (Gaue 3:19) ʼE maʼuhiga kia Sehova te ʼu meʼa ʼae ʼe ke fai ʼi te temi nei pea mo te ka haʼu, kae mole ko te ʼu hala ʼae neʼe ke fai ʼi te temi muʼa, pe neʼe kua ke tauhi kia Sehova peʼe kailoa.—Esa. 1:18.

12. Kapau ʼe tou manatu ʼe mole hotatou ʼaoga peʼe mole feala ke ʼofainaʼi tatou, ʼe fakalotofimalieʼi feafeaʼi tatou e te koga tohi ʼo 1 Soane 3:19, 20?

¹² Tatau aipe pe ʼe ke iloʼi neʼe mate ia Sesu moʼo fakamolemole ʼau agahala, kae ʼe lagi ke ui pe koe ʼe mole ke tuha mo te meʼa ʼofa maʼuhiga ʼaia. He koʼe ʼe ke lagi manatu feia? Koteʼuhi ko totatou loto ʼe agahala pea ʼe feala ke ina kakaʼi tatou, ke tou manatu ai ʼe mole hotatou ʼaoga, peʼe mole feala ke ʼofainaʼi tatou. (Lau ia 1 Soane 3:19, 20.) Kapau ʼe tou maʼu te taʼi  manatu ʼaia, tou manatuʼi “ ʼe maʼoluga age te ʼAtua ʼi ʼotatou loto.” ʼE tonu ke tou tui papau ko tatatou Tamai ʼae ʼi selo ʼe ʼofa mamahi ia tatou pea mo lotofakamolemole. Ke tou mahino lelei pe ʼe sio feafeaʼi ia Sehova kia tatou, ʼe tonu ke tou ako tuʼumaʼu tana Folafola, mo faikole tuʼumaʼu, pea mo fakatahi tuʼumaʼu mo ʼotatou tehina mo tuagaʼane. He koʼe ʼe maʼuhiga?

13. ʼE lava tokoni feafeaʼi atu ia te Folafola ʼa te ʼAtua? (Vaka’i mo te fakamatala ʼae ʼi te ’a takai “ Neʼe Fua Lelei Kia Natou Tanatou Ako Te Tohi-Tapu.”)

¹³ Ako te Folafola ʼa te ʼAtua ʼi te ʼaho fuli. ʼE ke iloʼi lelei ai anai ia Sehova mo ʼona kalitate. Pea ʼe ke logoʼi ai anai tona ʼofa ia koe. Kapau ʼe ke metitasio ki he vaega Tohi-Tapu ʼi te ʼaho fuli, ʼe tokoni atu anai ke ke maʼu te ʼu manatu ʼae ʼe lelei, pea ʼe pulihi ai ʼau manatu fakatupu lotovaivai. (2 Tim. 3:16) ʼE ui fenei e te tagata ʼafeā ko Kevin, ʼae neʼe manatu ʼe mole hona ʼaoga: “ ʼI taku lau te Pesalemo 103 pea mo metitasio ki ai, neʼe tokoni mai ke au fetogi taku faʼahiga fakakaukau. Pea neʼe au iloʼi ai te faʼahiga sio ʼa Sehova kia au.” ʼE toe ui fenei e Eva, ʼae neʼe kua tou ʼosi palalau ki ai: “ ʼI te ʼosi ʼo he ʼaho katoa, ʼe au toʼo he temi ke au manatuʼi ai te meʼa ʼae ʼe maʼuhiga kia Sehova. ʼE au fimalie ai pea ʼe malohi ai taku tui.”

14. ʼE tokoni feafeaʼi atu te faikole?

¹⁴ Faikole tuʼumaʼu. (1 Tes. 5:17) Kapau ʼe ke fia kaumeʼa lelei mo he tahi, ʼe tonu ke kolua faipalalau tuʼumaʼu pea mo ke fakaha age te ʼu meʼa ʼae ʼi tou loto. ʼE toe feia mo kapau ʼe ke fia kaumeʼa lelei mo Sehova. Ka tou faikole, tou fakaha age kia te ia ʼatatou manatu, mo te ʼu meʼa ʼae ʼi ʼotatou loto, pea mo te ʼu meʼa ʼae ʼe tou hoha ki ai. ʼE tou fakaha ai ʼe tou falala kia te ia pea mo tou iloʼi ai ʼe ʼofa ia tatou. (Pes. 94:17-19; 1 Soa. 5:14, 15) ʼE ui fenei e Yua ʼae neʼe kua tou ʼosi palalau ki ai: “Ka au faikole kia Sehova, ʼe mole au fakamatala age pe toku ʼaho katoa. Kae ʼe au fakaha age ʼaku manatu fuli pea mo te ʼu meʼa fuli ʼae ʼi toku loto. ʼAki te temi, neʼe liliu ai ia Sehova kia au ko he Tamai ʼe ʼofa ia ki ʼana fanau kae mole ko he patolo.”—Vaka’i te fakamatala ʼae ʼi te ’a takai “ Neʼe Kua Ke Lau Koa?”

15. ʼE fakaha feafeaʼi mai e Sehova ʼe tokaga kia tatou?

¹⁵ Fakatahi mo ʼou tehina mo tuagaʼane. ʼE ko he meʼa ʼofa ia mai ia Sehova. (Sakp. 1:17) ʼE tokaga tatatou Tamai ʼae ʼi selo kia tatou. Pea ʼe ina fakaha tana tokaga ʼaia ʼaki tana foaki mai he foʼi famili fakalaumalie, ia te ʼu tehina mo tuagaʼane, ʼae ʼe natou fakaha mai tonatou ʼofa kia tatou “i te temi fuli.” (Taag. 17:17) Neʼe tohi e Paulo  ki te kau Kolose ko ʼihi Kilisitiano neʼe ko hona ʼu kauga gaue, pea neʼe natou liliu “ko he tokoni malohi” kia ia. (Kol. 4:10, 11) Maʼia pe la mo Sesu, neʼe toe ʼaoga ke tokoni ki ai ʼona kaumeʼa, pe neʼe ko he ʼu ʼaselo peʼe ko ni hahaʼi.—Luka 22:28, 43.

16. ʼE lava tokoni feafeaʼi mai ʼotatou kaumeʼa agatonu ke tou nonofo ovi ai kia Sehova?

¹⁶ ʼE faigataʼa koa hau tali ke tokoni atu ʼihi ʼi tau kokelekasio? Kapau ʼe ke fakaha ʼou tuʼania ki hou kaumeʼa ʼe felogoi lelei mo Sehova, ʼe mole fakaʼuhiga leva kua vaivai tau tui. ʼE feala ia ke puipui ai koe. Ke ke tokagaʼi te talamanatu ʼa James, ʼae neʼe kua tou ʼosi palalau ki ai. ʼE ina ui fenei: “Ko taku fakakaumeʼa mo he ʼu Kilisitiano ʼe natou felogoi lelei mo Sehova, neʼe tokoni lahi mai ai kia au. Ka au maʼu ni manatu fakalotovaivai, ko ʼoku kaumeʼa ʼaia ʼe natou fagono lelei mai, pea mo ui mai ʼe natou ʼoʼofa ia au. ʼE au iloʼi ai ʼe ʼofa Sehova ia au pea mo tokaga kia au.” Koia la ʼae ʼe tonu ai ke tou kaumeʼa lelei mo ʼotatou tehina mo tuagaʼane.

17-18. Ko ai ʼae ʼe tonu ke tou tui ki ai, pea kotea tona tupuʼaga?

¹⁷ ʼE faiga ia Satana ke ina fakalotovaivaiʼi tatou, ke mole kei tou fai te meʼa ʼae ʼe lelei. ʼE ina loto ke tou tui ʼe mole ʼofa ia Sehova kia tatou, pea ʼe mole ina fia haofaki tatou he ʼe tou agakovi. Kae ʼe ko tana ia loi.

¹⁸ Ko Sehova ʼe ʼofa ia koe pea ʼe ke maʼuhiga kia te ia. Kapau ʼe ke fakalogo kia te ia, ʼe ke ‘nofo anai ʼi tona ʼofa’ ʼo talu ai, ohage ko Sesu. (Soa. 15:10) Koia, ʼaua naʼa ke tui kia Satana, peʼe moka tukugakoviʼi koe e tou loto. Kae ke ke tui kia Sehova, ʼae ʼe ina tokagaʼi te ʼu meʼa lelei ʼae ʼi ʼotatou loto takitokotahi. Pea ke ke tui papau ʼe ʼofa Sehova ʼi tana hahaʼi, pea ʼe toe ʼofa ia koe!