1. Kotea ʼae neʼe fai e Sehova maʼa tatou takitokotahi?

NEʼE taki mai e Sehova ia tatou takitokotahi. (Soa. 6:44) Kotea tona fakaʼuhiga? Neʼe vakavakaʼi e Sehova ia te toko lauʼi miliale hahaʼi ʼae ʼi te kele, pea neʼe ina tokagaʼi ai koe, he ʼe ke maʼu he loto ʼe moʼoni pea ʼe ke ʼofa lahi anai kia te ia. ʼE ko he faʼahi ʼe maʼuhiga kia te ia. (1 Klk. 28:9) Ko Sehova ʼe ina iloʼi, mo mahino pea mo ʼofa ia koe. ʼE mahino ia, ʼe fakalotofimalie te manatu ʼaia.

2. Kotea te fakata ʼae neʼe fakaʼaogaʼi e Sesu moʼo fakaha mai ʼe tokaga ia Sehova ki ʼana ovi?

² Ko Sehova ʼe tokaga kia koe, pea ʼe toe tokaga foki ki ʼou tehina mo tuagaʼane. Ke tou mahino lelei ki te faʼahi ʼaia, neʼe fakata e Sesu ia Sehova ki he tagata tauhi ovi. Kapau ko hana ovi ʼe tahi ʼi ʼana ovi ʼae ʼe 100 kua puli, kotea ʼae ka fai e te tagata tauhi ovi? ʼE ina “tuku anai . . . te ʼu ovi ʼe 99 ʼi te ʼu moʼuga kaʼe alu ʼo kumi ia ia ʼae kua hehe.” Pea ʼi tana maʼu leva tana kiʼi ovi ʼae neʼe hehe, ʼe mole ita ki ai, kae ʼe fiafia. Kotea te ako ʼe tou taʼofi mai ai? ʼE maʼuhiga kia Sehova ʼana ovi fuli. Neʼe ui fenei e Sesu: “ ʼE mole loto e taku Tamai ʼae ʼe ʼi selo ke mate he tahi ia natou liliki ʼaeni.”—Mat. 18:12-14.

3. Kotea ʼae ka tou palalau anai ki ai ʼi te alatike ʼaeni?

³ ʼE mole tou loto anai ke lotovaivai hotatou tehina peʼe ko hotatou tuagaʼane ʼuhi ko tatou. Koia, kotea ʼae ʼe feala ke tou fai ke mole hoko te faʼahi ʼaia? Pea kotea ʼae ʼe feala ke tou fai moka ʼe ko tatou ʼae ʼe mamahi ʼuhi ko hotatou tehina peʼe tuagaʼane? ʼE tou tali anai ʼi te alatike ʼaeni ki te ʼu fehuʼi ʼaia. Kae tou vakaʼi muʼa pe ʼe ko ai “ia natou liliki” ʼae ʼe talanoa ki ai ia Mateo kapite 18.

4. Ko ai “ia natou liliki”?

⁴ Ko “natou liliki” ʼae neʼe palalau ki ai ia Sesu, ʼe ko ʼana tisipulo. Tatau aipe ʼonatou taʼu, kae ʼe natou hage ko ni “kiʼi tamaliki” he ʼe natou lotolelei ke akoʼi natou e Sesu. (Mat. 18:3) ʼE natou ʼomai mai ni fenua mo agaʼi fenua kehekehe. ʼE natou toe maʼu mo ni agaaga pea mo ni manatu kehekehe. Kae ʼe natou tui fuli kia Sesu. Pea ko Sesu ʼe ʼofa mamahi ia natou.—Mat. 18:6; Soa. 1:12.

5. Kotea ʼae ʼe logoʼi e Sehova moka fakamamahiʼi peʼe fakatukia he tahi ʼo ʼana kaugana?

⁵ ʼE maʼuhiga kia Sehova “ia natou liliki.” Koia, ʼe hage pe te meʼa ʼae ʼe logoʼi e Sehova ʼo ʼuhiga mo natou ʼaia, ko te ʼu meʼa ʼae ʼe tou logoʼi ʼo ʼuhiga mo he ʼu fanau. ʼE maʼuhiga kia tatou te ʼu fanau. ʼE tou fia puipui ia natou ʼuhi ʼae heʼeki natou malolohi, mo mahino pea mo popoto ohage ko natou ʼae kua lalahi. ʼE tou iita moka tou sisio ʼe fakamamahiʼi he tahi, kae ʼe tou ʼasili iita age tatou moka ʼe ko he fanau. ʼO toe feia pe mo Sehova. ʼE ina fia puipui tatou, pea ʼe ita kovi ʼosi ki ʼae ʼe ina fakamamahiʼi peʼe ina fakatukia hana kaugana.—Esa. 63:9; Mko. 9:42.

6. ʼO mulimuli kia 1 Kolonito 1:26-29, kotea te manatu ʼa te malama ʼo ʼuhiga mo te ʼu tisipulo ʼa Sesu?

⁶ Kotea te tahi age tupuʼaga ʼo te fakatatau ʼa te ʼu tisipulo ʼa Sesu kia “natou liliki”? ʼI te malama ʼaeni, ko ai te kau lalahi? Ko natou ʼae ʼe maʼu koloa, mo iloa, pea mo te kau pule. Kae ko te ʼu tisipulo ʼa Sesu ʼe mole natou maʼu te ʼu meʼa ʼaia. Koia la ʼae, ki te hahaʼi ʼo te malama ʼe hage te ʼu tisipulo ʼa Sesu ko he kau “liliki,” he ʼe natou malalo pea ʼe mole natou maʼuhiga. (Lau ia 1 Kolonito 1:26-29.) Kae ʼe mole ko te manatu ʼaia ʼa Sehova ʼo ʼuhiga mo natou.

7. Kotea te manatu ʼae ʼe loto e Sehova ke tou maʼu ʼo ʼuhiga mo ʼotatou tehina mo tuagaʼane?

⁷ ʼE ʼofa ia Sehova ki ʼana kaugana fuli, pe ʼe kua fualoa peʼe kei foʼofoʼou tanatou ʼi te moʼoni. ʼE natou maʼuhiga fuli kia te ia. Koia, ʼe tonu ai ke natou toe maʼuhiga kia tatou. ʼE tou fia “ ʼoʼofa ki te fale tau tehina katoa” kae mole ki ʼihi pe ia natou. (1 Pet. 2:17) ʼE tou faiga anai ke tou puipui mo tokakaga lelei kia natou. Kapau ʼe tou iloʼi neʼe tou fakamamahiʼi he tahi, peʼe ita kia tatou, ʼe mole tou meʼa noaʼi anai te faʼahi ʼaia. ʼE mole tou ui anai ʼe hoko ita noa pe ia pea ʼe tonu pe ia ke fakamolemole. He koʼe ʼe lagi hoko iita ʼihi? Tupu ko te ʼu meʼa ʼae neʼe hoko ʼi tonatou maʼuli, ʼe lagi natou manatu ai ʼe mole honatou ʼaoga. Pea ko ʼihi ʼe kei natou foʼofoʼou ʼi te moʼoni, pea ʼe heʼeki natou lava faʼa katakiʼi te ʼu vaivaiʼaga ʼo ʼihi. Tatau aipe pe ʼe kotea tona tupuʼaga, kae ʼe tonu ke tou fai ia meʼa fuli ke toe maʼu te tokalelei. Pea ʼe mahino ia, ko he tahi ʼe hoko ita ʼe tonu foki ke ina fetogi tana aga ʼaia. Kapau ʼe ina fai te faʼahi ʼaia, ʼe fiafia anai pea ʼe felogoi lelei anai mo ʼona tehina mo tuagaʼane.

8. Kotea te manatu ʼa te hahaʼi ʼi te temi ʼo Sesu neʼe maʼu e ʼana tisipulo?

⁸ He koʼe neʼe palalau ia Sesu ʼo ʼuhiga mo ‘natou ʼae ʼe liliki.’ Koteʼuhi neʼe fakalavelave fenei age e ʼana tisipulo: “Ko ai ʼae ʼe lahi age ʼi te Puleʼaga ʼo selo?” (Mat. 18:1) ʼI te temi ʼaia, tokolahi te kau Sutea neʼe maʼuhiga kia natou te maʼu tuʼulaga. ʼE ui fenei e te tagata teolosia: “Neʼe maʼuhiga ʼaupito kia natou ke hikihiki natou e te hahaʼi pea ke natou iloa.”

9. Kotea ʼae neʼe tonu ke fai e te ʼu tisipulo ʼa Sesu?

⁹ Neʼe iloʼi e Sesu ko ʼana tisipulo ʼae neʼe lalahi ake mo te manatu fakataupiepie ʼaia ʼa te kau Sutea, neʼe tonu ke natou faiga malohi ke natou fetogi. Neʼe ina ui fenei age: “Ko ʼae ʼe lahi age ia koutou ke liliu ia ko he tahi ʼe veliveli age, pea ko ʼae ʼe takitaki ke liliu ia ko he  tahi ʼe faifekau.” (Luka 22:26) ʼE tou hage anai ko he tahi “ ʼe veliveli age” moka ʼe tou ‘fakaʼuhiga ia natou ʼae ʼe maʼoluga age ia tatou.’ (Flp. 2:3) Kapau ʼe tou faiga ke tou manatu feia, pea ʼe mole tou fakatukia anai he tahi.

10. Kotea te tokoni ʼa Paulo ʼae ʼe tonu ke tou maʼuliʼi?

¹⁰ ʼE faigafua anai hatatou fakaʼuhiga ʼotatou tehina mo tuagaʼane ʼe natou maʼoluga age ia tatou, mo kapau ʼe tou tokagaʼi ʼonatou kalitate. Pea ʼe tou fakakaukauʼi lelei anai te ʼu palalau ʼaeni neʼe fai e te apositolo ko Paulo ki te kau Kolonito: “Kotea ʼae ʼe ina fakakeheʼi koe mai he tahi age? Neʼe mole foaki atu koa la te ʼu meʼa ʼae ʼe ke maʼu? Pea kapau neʼe foaki atu, he koʼe ʼe ke fiameʼameʼa ohage neʼe mole foaki atu?” (1 Ko. 4:7) Koia, ʼe mole tou loto anai ke hikihiki tatou e te hahaʼi, peʼe tou manatu ʼe tou maʼoluga age ia natou. Kapau ko he tehina ʼe faiakonaki malie peʼe ko he tuagaʼane ʼe lahi ʼana ako Tohi-Tapu, ʼe tonu anai ke nā fakakololiaʼi ia Sehova.

11. Kotea te ako ʼe tou taʼofi mai te hisitolia ʼo te tagata kaugana ʼae neʼe mole manavaʼofa?

¹¹ ʼI te ʼosi fakatokaga age e Sesu ʼana tisipulo ke mole natou fakatukia he tahi, neʼe ina fakamatala age te hisitolia ʼo te tagata kaugana ʼae neʼe mole manavaʼofa. Neʼe molehi katoa e te hau tona maʼua, ʼae neʼe mole feala ke ina huʼi age. Kae ki muli age, ko te tagata kaugana pe ʼaia neʼe mole ina fia molehi te maʼua ʼae neʼe tonu ke huʼi age e he tahi tagata kaugana, ʼae neʼe veliveli age la ia ʼi tona maʼua. Koia, neʼe fakatotonu ai e te hau ke pilisoniʼi ia te tagata kaugana ʼaia neʼe mole manavaʼofa. Kotea te ako maʼa tatou? Neʼe ui fenei e Sesu: “ ʼE toe fai feia pe anai kia koutou e taku Tamai ʼae ʼe ʼi selo, mo kapau ʼe mole kotou tahi fakamolemole ki tona tehina ʼaki tokotou loto katoa.”—Mat. 18:21-35.

12. Kapau ʼe mole tou fia fakamolemole, ko ai ʼae ʼe tou fakamamahiʼi?

¹² Ko te aga ʼaia ʼa te tagata kaugana agakovi neʼe mole fua kovi pe kia ia totonu. Kae neʼe toe fua kovi ki ʼihi. ʼEi, ʼi tana mole manavaʼofa, neʼe ina fakamamahiʼi te tagata kaugana ʼae neʼe tuʼu maʼua kia ia, he neʼe ina “kole ke pilisoniʼi . . . ʼo kaku ki tana huʼi age tona maʼua.” Pea neʼe toe “lotomamahi ʼaupito” mo te ʼu kaugana ʼae neʼe natou sisio ki te meʼa ʼae neʼe hoko. ʼE toe feia pe mo tatou. Kapau neʼe fai mai e he tahi he meʼa ʼe kovi, kotea ʼae ʼe feala ke hoko moka ʼe mole tou fakamolemole ki ai? ʼE tou fakamamahiʼi anai ia ia he ʼe mole tou fia fakamolemole ki ai, ʼe mole kei tou fia tokagaʼi ia ia, pea ʼe mole kei tou fia ʼoʼofa kia ia. Pea tahi ʼae, ʼe mole fiafia te kokelekasio ʼi tanatou sisio ʼae ʼe tou tokakovi mo totatou tehina peʼe tuagaʼane ʼaia.

13. Kotea te ako ʼe tou taʼofi mai te aluʼaga ʼae neʼe hoko kia Crystal?

¹³ Kapau ʼe tou fakamolemole ki ʼotatou tehina mo tuagaʼane, ʼe fua lelei kia tatou pea mo natou. Ko te meʼa ʼaia neʼe hoko ki te tuagaʼane pionie ko Crystal. * Neʼe mamahi ia Crystal ʼuhi ko te tuagaʼane ʼo tona kokelekasio. ʼE ina fakamatala fenei: “Neʼe au mamahi ʼosi ʼi te ʼu palalau neʼe ina fai mai. Neʼe hage ia neʼe ina hukiʼi au ʼaki he hele. Ka neʼe matou olo ʼo faifakamafola, neʼe mole kei au fia heka fakatahi mo ia ʼi he motoka. Pea neʼe mole kei au faʼafai leva ʼi te faifakamafola pea neʼe puli mo toku fiafia.” Neʼe matatonu kia Crystal tana ita ki te tuagaʼane ʼaia. Kae neʼe mole ina tuku ke hoko atu tana nofo ita ki te tuagaʼane peʼe ke ina haga manatuʼi tona mamahi ʼaia. ʼAki he agavaivai, neʼe ina maʼuliʼi te ʼu tokoni Fakatohi-tapu ʼi te alatike “Koutou Fakamolemole ʼAki He Loto Katoa” ʼo Te Tule Leʼo ʼo te ʼaho 15 ʼo  Oketopeli 1999. Koia neʼe ina fakamolemole ai ki tona tuagaʼane. ʼE ui fenei e Crystal: “ ʼE au mahino ʼi te temi nei, ʼe tou faiga fuli ke tou kofuʼi te ʼuluagaaga foʼou, pea ko Sehova ʼe fakamolemole mai ʼi te ʼaho fuli. Neʼe au logo fimalie ʼosi pea kua au toe fiafia.”

14. (1) ʼO mulimuli kia Mateo 18:21, 22, kotea ʼae neʼe lagi faigataʼa ki te apositolo ko Petelo? (2) Kotea ʼae ʼe tonu ke tou fai moka ʼe faigataʼa hatatou fakamolemole?

¹⁴ ʼE tou iloʼi ʼe tonu ke tou fakamolemole, pea ʼe ko te meʼa lelei ʼaia ʼe tonu ke tou fai. Kae ʼe lagi faigataʼa hatatou fakamolemole. Neʼe lagi toe faigataʼa te faʼahi ʼaia ki te apositolo ko Petelo. (Lau ia Mateo 18:21, 22.) Kotea ʼae ka tokoni mai ke tou fakamolemole? ʼUluaki, tou fakakaukauʼi ʼatatou agahala fuli ʼae ʼe fakamolemole mai e Sehova. (Mat. 18:32, 33) ʼE mole tou tuha mo tona fakamolemole, kae ʼe lotolelei pe ʼo fakamolemole mai. (Pes. 103:8-10) Pea “ ʼe toe maʼua foki ke tou feʼofaʼaki.” Koia, ʼe mole tou filifili anai pe ʼe tou fakamolemole peʼe kailoa ki ʼotatou tehina mo tuagaʼane. ʼE ko totatou maʼua ke tou fakamolemole. (1 Soa. 4:11) Lua, tou fakakaukauʼi te ʼu fua lelei moka ʼe tou fakamolemole. ʼE fua lelei anai kia ia ʼae neʼe ina fakamamahiʼi tatou, ʼe logo tahi anai te kokelekasio, ʼe tou taupau anai ʼatatou felogoi lelei mo Sehova, pea ʼe tou fimalie anai. (2 Ko. 2:7; Kol. 3:14) Pea tolu, ʼe faigafua anai hatatou fakamolemole moka tou faikole kia Sehova, ia Ia ʼae ʼe ina kole mai ke tou fakamolemole. ʼAua naʼa tou tuku ia Satana ke ina maumauʼi ʼatatou felogoi lelei mo ʼotatou tehina mo tuagaʼane. (Efe. 4:26, 27) Tou kole kia Sehova ke tokoni mai ke mole tou to ki te hele ʼa te Tevolo.

15. ʼO mulimuli kia Kolose 3:13, kotea ʼae ʼe feala ke tou fai moka ʼe tou mamahi ʼuhi ko te aga ʼa he tehina peʼe ko he tuagaʼane?

¹⁵ Kotea ʼae ʼe tonu ke ke fai moka ʼe ke mamahi ʼuhi ko te aga ʼa he tehina peʼe ko he tuagaʼane? Faiga malohi ke ke taupau te tokalelei.  Fakaha kia Sehova te meʼa ʼae ʼe ke logoʼi. Kole kia Sehova ke ina tapuakiʼi ia ia ʼae neʼe ina fakamamahiʼi koe, pea ke tokoni atu ke ke sio ki ʼona kalitate ʼae ʼe tupu ai tona ʼofaina e Sehova. (Luka 6:28) Kapau ʼe mole feala hau galoʼi te mamahi ʼae neʼe fai atu e tou tehina peʼe ko tou tuagaʼane, pea ke ke fakakaukauʼi pe ʼe feafeaʼi anai hau faʼahiga palalau ki ai. ʼE lelei ke ke manatu ko tou tehina neʼe mole ina loto ke ina fakamamahiʼi koe. (Mat. 5:23, 24; 1 Ko. 13:7) Pea ka ke palalau ki ai, ʼaua naʼa ke manatu ʼe ina fia fai atu he meʼa ʼe kovi. Kae kapau ʼe mole fia fakatokatoka mo koe, ke ke haga faʼa kataki. (Lau ia Kolose 3:13.) Kae tafito, ʼaua naʼa ke nofo ita kia ia he ʼe fua kovi anai ki ʼau felogoi mo Sehova. ʼAua naʼa ke tuku he meʼa peʼe ko he tahi ke ina fakatukia koe. ʼE ke fakaha ai ʼe lahi age tou ʼofa ʼae ia Sehova.—Pes. 119:165.

16. Kotea totatou maʼua ʼo tatou takitokotahi?

¹⁶ ʼE ko he pilivilesio ia tatatou tauhi ʼae kia Sehova ʼi te logo tahi, ohage ko “he faga ovi ʼe tahi” ʼe takitaki e “he tagata tauhi ovi ʼe tahi.” (Soa. 10:16) ʼE ui fenei ʼi te tohi Te Kautahi ʼAe ʼe Ina Fai Te Finegalo ʼo Sehova, ʼi te pasina 153: “ ʼI tau maʼu te ʼu lelei ʼo te logo tahi ʼaia, ʼe ko tou maʼua ke ke tokoni ki tona taupau maʼu.” Koia la ʼae, ʼe tonu “ke tou faiga tuʼumaʼu ke tou sisio ki ʼotatou tehina mo tuagaʼane ohage ko te sio ʼa Sehova kia natou.” Kia mata ʼo Sehova, ko tatou ko ni hahaʼi liliki ʼe tou maʼuhiga fuli kia te ia. ʼE feia koa tau manatu ʼo ʼuhiga mo ʼou tehina mo tuagaʼane? ʼE tokagaʼi e Sehova mo ina leleiʼia te ʼu meʼa fuli ʼae ʼe ke fai moʼo tokoni kia natou, ke natou fiafia ai.—Mat. 10:42.

17. Kotea ʼae ʼe tou fakatotonu ke tou fai?

¹⁷ ʼE tou ʼoʼofa ʼi ʼotatou tehina mo tuagaʼane. Koia, ʼe mole tou loto anai ke tou “fakatupu tukia peʼe fakatupu higa ki hokotou tehina.” (Loma 14:13). Kae ʼe tou fakaʼuhiga anai ʼotatou tehina mo tuagaʼane ʼe natou maʼoluga age ia tatou, pea ʼe tou fakamolemole anai kia natou ʼaki totatou loto katoa. ʼAua naʼa tou tuku he tahi ke ina fakatukia tatou, kae ke tou “haga kumi te ʼu meʼa ʼae ʼe ʼaoga ki te tokalelei pea mo ʼae ʼe tou fefakalotomalohiʼaki ai.”—Loma 14:19.