: Neʼe maʼuli toku famili ʼi te kolo ko Tellancourt, ʼi te potu noleto esite ʼi Falani. Ko taku tamai neʼe ko te Falani, kaʼe ko taku faʼe neʼe ko te Italia. ʼI toku taʼu valu, neʼe matou mavae ʼo olo ki te kolo ʼi Loma, ʼi Italia, ʼe gaue ai te hahaʼi masisiva. Kaʼe neʼe faigataʼa te maʼuli ʼi tomatou loto fale. Neʼe ke tuʼumaʼu pe ʼaku matuʼā ʼuhi ko te ʼu fihifihia fakapaʼaga.

ʼI toku taʼu 15, neʼe uga au e taku faʼe ke au alu ʼo kumi hoku ʼu kaumeʼa. Koia neʼe au kamata puli ai ʼi fale ʼi he ʼu temi loaloaga. Kaʼe ʼe mole tuai ki ai, neʼe au to mo te ʼu fakakaugā kovi. ʼI te tahi ʼaho, neʼe palalau mai te tagata neʼe hage mai ʼe agalelei. Neʼe ina foaki mai te toloke, pea neʼe au toʼo ke au fakaha ai ʼe mole kei au tamasiʼi. Neʼe au to ai ki te malama ʼo te toloke ʼae ʼe mafola ai te aga heʼe ʼaoga. Pea neʼe tuʼa lahi toku fakaʼalikiʼi. Koia neʼe mole kei maʼuhiga kia au toku maʼuli, tatau aipe pe ʼe au maʼuli peʼe au mate. Neʼe au lotomamahi ʼi taku nofo tokotahi. ʼI toku taʼu 16, neʼe au faiga ke au fakamate, ʼaki taku inu te foʼi whisky pea mo au fakato ki te vai. Neʼe au nofo ai ʼi te koma lolotoga ʼaho ʼe tolu.

Neʼe au kamata leleiʼia te maʼuli, kaʼe neʼe au toe liliu ʼo agamalohi pea mo agafakakakā. Neʼe au fakatau toku sino ki ʼihi ʼi ʼonatou ʼapi, mo au kakāʼi natou ʼaki te toloke pea neʼe au kaihaʼa ʼanatou meʼa maʼuhiga. Pea neʼe fakaʼaogaʼi au e te ʼu kautahi ʼo te ʼu agafakakakā kehekehe ke au fakatau te toloke ʼi Italia katoa. Koia neʼe au fihifihia tuʼumaʼu pe mo te kau polisi. Neʼe mole he ʼuhiga ʼo toku maʼuli pea neʼe au popula ki ʼaku aga ʼae ʼe kovi. Kaʼe ʼi toku loto neʼe au iloʼi pe neʼe ʼi ai te ʼuhiga ʼo toku maʼuli. Neʼe au faikole ai ki te ʼAtua, ke ina foaki mai te tokalelei mo te fiafia ʼi he taʼu katoa pe.

: ʼI toku taʼu 24, neʼe au fakatotonu ke au alu ʼo maʼuli ʼi Pilitania. Koteʼuhi neʼe tuʼutamakiʼia tuʼumaʼu toku maʼuli ʼuhi ko taku gaue fakatahi mo natou ʼae ʼe fakatau te toloke. Kaʼe neʼe au alu muʼa ki taku faʼe, pea neʼe au punamaʼuli ki taku sio ʼae ʼe faipalalau ia mo Annunziato Lugarà ʼo ʼuhiga mo te Tohi-Tapu. * Neʼe au mataku koteʼuhi neʼe au iloʼi tona maʼuli agafakakakā, pea neʼe au fehuʼi age pe koʼe neʼe haʼu ki taku faʼe. Neʼe ina fakamatala mai ai te ʼu fetogi maʼuhiga neʼe ina fai ʼi  tona maʼuli ke liliu ko he Fakamoʼoni ʼa Sehova. ʼOsi ʼaia, neʼe ina fakalotomalohiʼi au ke au faipalalau mo he Fakamoʼoni moka au tau anai ki Pilitania. Neʼe au ʼio ki ai. Kaʼe ʼi taku tau atu ki Pilitania, neʼe au toe to pe au ki toku maʼuli ʼafeā.

ʼI te tahi ʼaho ʼi Londres, neʼe au felaveʼi ai mo te Fakamoʼoni neʼe ina lolotoga tufa Te Tule Leʼo mo te Réveillez-vous ! ʼi te ala ʼe kaugā malie ai te hahaʼi. Pea neʼe au manatuʼi ia Annunziato, ʼo au kole ai ki te Fakamoʼoni pe ʼe feala ke fai e he tahi haku ako Fakatohi-tapu.

Neʼe au punamaʼuli ki te ʼu moʼoni ʼae neʼe au ako ʼi te Tohi-Tapu. Ohage la, neʼe malave kia au te vaega ʼo 1 Soane 1:9, ʼae ʼe ui fenei ai ʼo ʼuhiga mo te ʼAtua: “Kapau e tou kofesio atatou agahala, e mooni ia ia mo agatonu ke fakamolemole atatou agahala, pea mo fakamaa tatou.” Neʼe malave ʼaupito te vaega ʼaia kia au, koteʼuhi neʼe heʼe maʼa toku maʼuli. Pea neʼe au kamata kau atu aipe ki te ʼu fono ʼa te kau Fakamoʼoni ʼa Sehova. Ko te kau Fakamoʼoni neʼe natou fakatalitali leleiʼi au. Pea neʼe au sio ai ki he aluʼaga neʼe au fakaʼamu tuʼumaʼu ki ai, ko te fakamalotoloto ʼo ʼanatou felogoʼi. Koia neʼe au fia kau ai ki tonatou kokelekasio ʼae neʼe hage ko he kiʼi famili.

Logo la neʼe mole faigataʼa ia taku liakī te toloke mo toku maʼuli heʼe maʼa, kaʼe ko te fetogi ʼo toku ʼulugaaga ʼae neʼe faigataʼa ʼaupito. Neʼe au mahino ai ʼe tonu ke au fakaʼapaʼapaʼi pea mo fakamaʼuhigaʼi te hahaʼi. ʼI tona fakahagatonu, ʼe kei au tauʼi pe ʼaku aga ʼae ʼe kovi. Kaʼe ʼaki te tokoni ʼa Sehova, ʼe fakahaʼuhaʼu mamalie pe ʼaku faiga. Hili te ʼu ʼuluaki mahina ʼe ono ʼo taku ako te Tohi-Tapu, neʼe au papitema ʼo au liliu ai ko he Fakamoʼoni ʼa Sehova. Pea neʼe ko te taʼu 1997 ʼaia.

: Hili toku papitema, neʼe au ʼohoana mo te kiʼi fafine ʼe higoa ko Barbara, pea neʼe heʼeki faʼa fualoa tana kua liliu ko he Fakamoʼoni ʼa Sehova. ʼI te sio ʼae ʼo toku kaumeʼa ki te fetogi ʼo toku maʼuli, neʼe ina kamata ako ai te Tohi-Tapu. ʼAki te temi, neʼe liliu ai ko he Fakamoʼoni, ʼo toe feia mo tona kiʼi tokolua. Hili ia, neʼe kamata ako te kiʼi tehina ʼo taku kui fafine ʼae neʼe taʼu 80 tupu pea neʼe papitema ʼi muʼa ʼo tona mate.

Kua au liliu ʼo tagata ʼafeā ʼi toku kokelekasio, pea ko au mo toku ʼohoana ʼe ma pionie katoa. ʼE ma tokoni ki te hahaʼi ʼae ʼe palalau ʼi te lea Fakaitalia ʼi Londres ke natou ako te Tohi-Tapu. ʼI ʼihi temi, ʼe au lotomamahi ʼuhi ko toku faʼahiga maʼuli ʼafeā, kaʼe ʼe lagolago tuʼumaʼu mai pe ia Barbara. ʼI te temi nei, kua au maʼu ia te maʼuli fakafamili fiafia mo te Tamai ʼofa ʼae neʼe au fakaʼamu tuʼumaʼu ki ai. Koia neʼe au kole ki te ʼAtua ke ina foaki mai te tokalelei mo te fiafia ʼi he taʼu katoa pe, kaʼe neʼe laka age te ʼu meʼa ʼae neʼe ina foaki mai.