1. Kotea ʼae ʼe ha ai ʼe mole kei feʼofaʼaki te hahaʼi?

NEʼE kua fakakikite ʼi te Tohi-Tapu, ʼi te ʼu ʼaho fakamuli ʼe liliu anai te hahaʼi, ʼo “heʼe ʼofa.” (2 Tim. 3:1, 3) ʼI te temi nei ʼe tou sisio ki te hoko ʼo te lea fakapolofeta ʼaia. Ohage la ko ʼihi famili kua natou tahi nofo ʼuhi ko te mavete ʼohoana. ʼI te fefihiʼaki tuʼumaʼu ʼa te ʼu matuʼā, ʼe mole logoʼi ai e te ʼu fanau honatou ʼofainaʼi pea kua hage pe tanatou nonofo ko ni matapule. ʼE ui e he tagata ʼe faitokoni ki te ʼu famili: “ Kua faigataʼa te felogoi ʼa te ʼu matuʼā mo te ʼu fanau he ʼe kua natou tahi nofo ʼo sioʼi tana masini toʼotoʼo peʼe ko te ʼu gaoʼi viteo. Logo la ʼe natou maʼuʼuli ʼi te ʼapi ʼe tahi, kae mole feʼauga tanatou feiloʼiʼaki.”

2-3. (1) Ia Loma 12:10, ʼe tou fakaha kia ʼai te ʼofa moʼoni? (2) Kotea ʼae ka tou vakaʼi anai ʼi te alatike ʼaeni?

² ʼE mole tou loto ke momoko totatou ʼofa ʼo hage ko te malama. (Loma 12:2) Kae ʼe tou loto ke tou haga ʼoʼofa ki ʼotatou famili ʼo feia ki ʼotatou tehina mo tuagaʼane ʼi te tui. (Lau ia Loma 12:10.) ʼE fakaʼuhiga te feʼofaʼaki moʼoni ki he ʼu felogoi ʼaki te ʼofa ʼi te lotolotoiga ʼo he famili. Ko te taʼi ʼofa ʼaia ʼe tonu ke tou fakaha ki totatou famili fakalaumalie. Ka tou fakaha kia natou te ʼofa ʼaia pea ʼe tou taupau ai te logo tahi ʼo te kokelekasio he ʼe maʼuhiga ki te tauhi moʼoni.—Mik. 2:12.

³ ʼE tokoni mai te faʼifaʼitaki ʼo Sehova mo ʼihi hahaʼi ʼo te Tohi-Tapu ke tou haga fakaha te ʼofa moʼoni ki ʼotatou tehina mo tuagaʼane.

4. ʼE tokoni feafeaʼi mai ia Sakopo 5:11 ke tou mahino pe ʼe feafeaʼi te ʼofa ʼo Sehova kia tatou?

⁴ ʼE fakaha mai ʼi te Tohi-Tapu ʼe maʼu e Sehova te ʼu kalitate fakaofoofo. Ohage la, ʼe ui ai “ko te ʼAtua ʼe ko te ʼofa.” (1 Soa. 4:8) Pea ko te tupuʼaga ʼaia ʼo tatatou fia fakaovi ki ai. Kae ʼe toe ui ʼi te Tohi Tapu “ko Sehova ʼe ʼofa mamahi.” (Lau ia Sakopo 5:11.) ʼE ha ai ʼe lahi te ʼofa ʼo Sehova ʼae ʼe ina fia fakaha mai kia tatou.

5. ʼE fakaha feafeaʼi mai e Sehova tona manavaʼofa kia tatou pea ʼe tou faʼifaʼitakiʼi feafeaʼi ia ia?

⁵ Tou tokagaʼi ia Sakopo 5:11, ʼe ʼi ai te pikipikiga ʼo te ʼofa mamahi ʼo Sehova mo tona tahi kalitate ʼae ʼe tou fia fakaovi ai ki ai, ʼe ko te manavaʼofa. (Eke. 34:6) ʼE fakaha e Sehova tona manavaʼofa ʼaki tana fakamolemole mai kia tatou. (Pes. 51:3) Kae ʼi te Tohi-Tapu, ʼe mole ko te fakamolemole pe ʼae ʼe ha ai tona manavaʼofa. Kae ko he meʼa ia ʼe logo loto ʼi he tahi pea ʼe ina uga ai ke tokoni ki he tahi ʼe tau mo he mamahi. Koia ʼae ʼe ui ai e Sehova ʼe malohi age tona loto ʼae ke tokoni mai kia tatou, ʼi ʼae ʼo he faʼe ki tana kiʼi fanau. (Esa. 49:15) Pea ka tou tau mo he ʼu faigataʼaʼia pea ʼe tokoni mai ʼuhi ko tona manavaʼofa. (Pes. 37:39; 1 Ko. 10:13) ʼE tou faʼifaʼitakiʼi feafeaʼi? ʼE feala ke tou fakaha te manavaʼofa ki ʼotatou tehina mo tuagaʼane ʼaki tatatou fakamolemole kia natou kae mole tou taupau he loto ʼe kovi moka natou fakamamahiʼi tatou. (Efe. 4:32) Kae tou ʼuluaki fakaha te manavaʼofa ʼaia ʼo tokoni kia natou moka natou tau mo he ʼu ʼahiʼahi. Ka ʼekenaki tatou e te ʼofa ke tou fakaha ki ʼihi te manavaʼofa pea ʼe tou faʼifaʼitakiʼi ai ia Sehova, te faʼifaʼitakiʼaga lelei tukupau ʼo te ʼofa mamahi.—Efe. 5:1.

6. Neʼe fefakahaʼaki feafeaʼi e Sonatane mo Tavite te feʼofaʼaki moʼoni?

⁶ ʼE talanoa ʼi te Tohi-Tapu ki ni hahaʼi heʼe haohaoa neʼe natou fakaha te feʼofaʼaki moʼoni. Tou vakaʼi te faʼifaʼitaki ʼo Sonatane mo Tavite. ʼE ui ʼi te Tohi-Tapu: “Neʼe ʼofa mamahi ia Sonatane kia  Tavite.” (1 Sam. 18:1, MN) Neʼe filifili e te ʼAtua ia Tavite ke ina fetogi ia te hau ko Saulo. Pea ki muli age neʼe maheka leva ia Saulo kia ia ʼo faiga ke ina matehi. Kae neʼe mole kau Sonatane, tona foha, mo ia, ʼi tana faiga ʼae ke ina matehi ia Tavite. Neʼe fefakapapauʼaki ia Sonatane mo Tavite ke nā fakakaumeʼa tuʼumaʼu pea ke nā fetokoniʼaki.—1 Sam. 20:42.

7. Kotea ʼae neʼe feala ke ina taʼofi te fakakaumeʼa ʼa Sonatane mo Tavite?

⁷ Neʼe makehe te ʼofa ʼae neʼe fefakahaʼaki e Sonatane mo Tavite koteʼuhi neʼe lahi te ʼu aluʼaga neʼe feala ke veteki ai tana fakakaumeʼa. Ohage la, neʼe muʼa ia Sonatane ia Tavite ia tau ʼe tolugofulu. Neʼe feala pe ke ina ui ʼe mole felogoi tahi mo he tagata kei tupulaga pea heʼeki mahino feʼauga ki te maʼuli. Pea neʼe mole ina fakaʼuhiga ia ko he tahi ʼe malalo age ia ia.

8. He koʼe neʼe ko he kaumeʼa moʼoni ʼo Tavite ia Sonatane?

⁸ Neʼe feala pe ke maheka ia Sonatane kia Tavite. ʼI tona ʼuhiga ʼae ko te foha ʼo te Hau, neʼe feala pe ke faiga malohi ke ina maʼu te hekaʼaga fakahau. (1 Sam. 20:31) Kae neʼe fia malalo mo agatonu kia Sehova pea neʼe lagolago ai ki te filifili ʼae e Sehova ia Tavite ke hau. Pea neʼe toe agatonu kia Tavite logo la te ita ʼo tana tamai kia ia.—1 Sam. 20:32-34.

9. Neʼe hage koa ia Tavite ko he fili ʼo Sonatane? Fakamahino.

⁹ ʼUhi ko te ʼofa moʼoni ʼae neʼe fakaha e Sonatane kia Tavite koia ʼae neʼe mole hage ai kia ia ko hona fili. Neʼe faiva Sonatane ʼi te faʼu nahau mo lototoʼa ʼi te tau. Neʼe logona ia Sonatane mo tana tamai he neʼe nā ‘gaholo age ʼi te ʼu akuila’ pea mo ‘malolohi age ʼi te ʼu laione.’ (2 Sam. 1:22, 23) Koia neʼe feala ai ke fiameʼameʼa ʼi tona ʼu faiva ʼaia. Kae neʼe mole ina maʼu he loto fia fakataupiepie pea neʼe mole maheka ia kia Tavite. Neʼe ina leleiʼia ia tona lototoʼa mo tana falala ʼae kia Sehova. ʼI te ʼosi matehi e Tavite ia Koliate, neʼe kamata ʼofa ai ia Sonatane ʼo hage pe ko tana ʼofa kia ia totonu. ʼE feafeaʼi hatatou fakaha ki ʼotatou tehina mo tuagaʼane he ʼofa ʼe moʼoni, ʼe tatau mo ʼae neʼe fakaha e Sonatane kia Tavite?

10. Kotea ʼae tonu ke tou fai ke tou “feʼofamamahiʼaki mo he loto katoa”?

¹⁰ ʼE ui ʼi te Tohi-Tapu ʼe tonu ke tou “feʼofamamahiʼaki mo he loto katoa.” (1 Pet. 1:22) ʼE tuku mai e Sehova he faʼifaʼitaki ʼi te faʼahi ʼaia. Kapau ʼe tou nonofo agatonu kia te ia pea ʼe mole he meʼa ʼe ina motuhi te haʼi ʼae ʼe tou pipiki ai kia te ia ʼuhi ko tona ʼofa mamahi ʼae kia tatou. (Loma 8:38, 39) ʼI te Fakakeleka, ʼe fakaliliu te kupu “mamahi” ki he meʼa “ke fakalaulahi” pea ʼe ʼaoga ki ai he ʼu faiga malohi. ʼI ʼihi temi, ʼe tonu anai ke tou faiga malohi ke “fakalaulahi” totatou ʼofa ki hotatou tehina, ke tou ʼoʼofa moʼoni ai ki ai. ʼE feala pe ke fakamamahiʼi tatou e hotatou tehina. Koia ʼae ʼe tonu ai ke tou haga “fekatakiʼaki ʼi te ʼofa” pea mo tou faiga ke tou ‘taupau te logo tahi ʼi te tokalelei.’ (Efe. 4:1-3) Ka tou faiga fakamalotoloto ke tou taupau te tokalelei pea ʼe mole tou tokagaʼi anai te ʼu to hala ʼo ʼotatou tehina mo tuagaʼane. ʼE tou faiga anai ke tou sisio kia natou ʼo hage ko Sehova.—1 Sam. 16:7; Pes. 130:3.

11. He koʼe ʼe faigataʼa ʼi ʼihi temi te fakaha ʼo te ʼofa moʼoni ki ʼotatou tehina mo tuagaʼane?

¹¹ ʼE mole faigafua tuʼumaʼu tatatou fakaha te ʼofa moʼoni ki ʼotatou tehina mo tuagaʼane, tafito la moka ʼe tou iloʼi ʼonatou  vaivaiʼaga. Koia ʼae neʼe faigataʼa ai ki ʼihi Kilisitiano ʼo te ʼuluaki sekulo. Ohage la ko Evoti mo Sinitise, neʼe mole faigataʼa hanā gaue kinakina mo Paulo ʼi te fakamafola ʼo te logo lelei. Kae ʼe mole tou iloʼi te tupuʼaga ʼo tanā mole felogoi tahi. Koia neʼe fakalotomalohiʼi ai naua e Paulo ke nā “manatu tahi ʼi te ʼAliki.”—Flp. 4:2, 3.

12. ʼE feafeaʼi hatatou taupau te ʼofa moʼoni ki ʼotatou tehina mo tuagaʼane?

¹² ʼE feafeaʼi hatatou taupau te ʼofa moʼoni ki ʼotatou tehina mo tuagaʼane? Tou faiga ke tou iloʼi lelei ia natou, ke tupu ai hatatou mahino lelei kia natou. Pea ke ʼaua naʼa taʼofi tatou ʼuhi ko te kehekehe ʼo te ʼu taʼu mo te agaʼi fenua. Tou manatuʼi ia Sonatane neʼe muʼa ia Tavite ia taʼu ʼe 30, kae neʼe nā kaumeʼa lelei. ʼE feala koa ke ke fakakaumeʼa mo he tahi ʼe muʼa peʼe veliveli age ia koe ʼi te kokelekasio? ʼE ke fakaha ai anai ʼe ke ʼofa ki te fale tau tehina katoa.—1 Pet. 2:17.

13. He koʼe ʼe mole kovi takita kaumeʼa lelei mo ʼihi ʼo te kokelekasio?

¹³ ʼE feala koa ke tou maʼu he ʼofa makehe ki hotatou tehina mo tuagaʼane moka tou fakaha kia natou te ʼofa moʼoni? Kailoa ia. ʼE mole feala ia. ʼE mole kovi tatatou fakakaumeʼa lelei mo natou ʼae ʼe tatau ʼatatou fakatuʼutuʼu. Neʼe fakahigoaʼi e Sesu ʼana apositolo fuli ko ʼona “kaumeʼa” kae neʼe makehe age tona ʼofa kia Soane. (Soa. 13:23; 15:15; 20:2) Kae neʼe mole fakaʼuhiga leva neʼe fakapulepule. Ohage la, ʼi te kole age e Soane mo tona tehina ko Sakopo ke ina foaki age hona ʼu hekaʼaga ʼi te Puleʼaga ʼo te ʼAtua, neʼe ina tali age: “Ki te heka ʼi toku toʼomataʼu peʼe ko toku toʼohema ʼe mole fakalogo ia kia te au.” (Mko. 10:35-40) Koia, tou faʼifaʼitakiʼi ia Sesu ʼo mole tou fakaha ʼe tou fakapulepule ki ʼotatou kaumeʼa. (Sakp. 2:3, 4) Ko te tupuʼaga la ʼaia ʼo te femaveteveteʼaki ʼi te ʼu kokelekasio kae ʼe mole tonu ke feia.—Suta 17-19.

14. Ka tou lau ia Filipe 2:3, kotea ʼae ka tokoni mai ke tou siʼaki ia te manatu fakataupiepie?

¹⁴ Ka tou feʼofaʼaki mo ʼotatou tehina mo tuagaʼane, ʼe tou puipui ai te kokelekasio  mai te manatu fakataupiepie. Tou manatuʼi ia Sonatane neʼe mole maheka kia Tavite, ʼuhi ko tona filifili e Sehova ke hau ki Iselaele. Neʼe mole ko hona fili. ʼE feafeaʼi hatatou faʼifaʼitakiʼi ia ia? ʼAua naʼa tou fakataupiepie ki ʼotatou tehina mo tuagaʼane. ʼAua naʼa tou maheheka ʼuhi ko ʼonatou fealagia. Kae tou fia malalo, ʼo tou fakaʼuhiga natou ʼe natou maʼoluga age ia tatou. (Lau ia Filipe 2:3.) Tou manatuʼi ʼe tou ʼaoga fuli ki te kokelekasio. Kapau ʼe tou agavaivai ʼe tou tokagaʼi anai te ʼu kalitate ʼo ʼotatou tehina mo tuagaʼane, pea ʼe ko he ʼu faʼifaʼitakiʼaga lelei ʼo te nofo agatonu.—1 Ko. 12:21-25.

15. Kotea te ʼu ako ʼe tou maʼu mai te aluʼaga ʼae neʼe hoko kia Tanya mo ʼana fanau?

¹⁵ Ka tou tau mo he ʼahiʼahi, ʼe fakafimalieʼi e Sehova ʼotatou loto, ʼo ina fekauʼi he ʼu tehina mo tuagaʼane ke natou ʼomai ʼo fakalotomalohiʼi tatou pea mo tokoni mai. Koʼeni te aluʼaga neʼe hoko ʼi te taʼu 2019, ʼi Amelika. Neʼe ko he tuagaʼane mo ʼana fanau ʼe toko tolu neʼe kau ki te fakatahi lahi ʼae ko tona kupu tafito “Ko Te ʼofa ʼe Mole Puli Anai ʼi He Temi.” ʼI te Moeaki hili hoʼata, ʼi te hili ʼo te fakatahi, neʼe hoko he tuʼutamaki, neʼe fakaʼi tanatou motoka. ʼE fakamatala fenei e Tanya te faʼe: “Ko tamatou toe liliu ʼaia ki te otele. Pea fokifa pe, neʼe haʼu ia te motoka ki tomatou faʼahi ʼo fakaʼi ki tamatou motoka. Meʼa lelei he neʼe mole he tahi neʼe lavea. Neʼe matou hu fuli ki tuʼa ʼo tutuʼu ʼi te ala lahi. Neʼe matou hoha ʼaupito. Pea neʼe ʼi ai te tahi neʼe tuʼu ʼi te kauala, ʼo taukalo mai ke matou olo age ʼo nonofo ʼi tana motoka. Neʼe ko he tuagaʼane neʼe hoki mavae age pe mai te fakatahi. Neʼe mole ko ia tokotahi pe ʼae neʼe fia tokoni mai.  Neʼe ʼi ai mo te tahi ʼu tehina mo tuagaʼane Suédois ʼe toko nima neʼe tutuʼu. Neʼe ʼomai te ʼu tehina ʼo faʼufua mai kia au mo taku kiʼi taʼahine. Neʼe ʼaoga ʼosi kia matou tonatou ʼofa. Neʼe kua au ui age pe kia natou ʼe matou lelei fuli pe, kae neʼe mole natou fia tuku feiaʼi matou. Neʼe natou nonofo mo matou ʼo kaku ki te ʼomai ʼo te kau polisi pea mo te toketa. Neʼe natou faiga ke matou maʼu ia meʼa fuli neʼe ʼaoga kia matou. Neʼe matou logoʼi ai te ʼofa ʼo Sehova kia matou. Neʼe toe malohi age tomatou ʼofa ʼae ki ʼomatou tehina mo tuagaʼane, ʼo toe feia mo tomatou ʼofa mo lotofakafetaʼi kia Sehova.” Neʼe kua hoko koa he aluʼaga feia kia koe? Neʼe kua ʼofa feia la hou tehina kia koe ʼi te temi ʼae neʼe ke tau ai mo he faigataʼaʼia?

16. Kotea te ʼu fua lelei moka tou ʼoʼofa mamahi ki ʼotatou tehina mo tuagaʼane?

¹⁶ Kotea te ʼu fua lelei moka tou ʼoʼofa mamahi ki ʼotatou tehina mo tuagaʼane? ʼE tou fakalotomalohiʼi natou moka natou tau mo ni faigataʼaʼia. ʼE tou taupau ia te logo tahi ʼi te loto kokelekasio. ʼE tou fakaha ai ko tatou ko te ʼu tisipulo moʼoni ʼa Sesu, ʼo tupu ai te fia ʼomai ʼa te hahaʼi ki te tauhi moʼoni. Kae ko te maʼuhiga, ko tatatou fakakololiaʼi ia Sehova, “te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe.” (2 Ko. 1:3) Koia, tou haga fakaha ki ʼotatou tehina mo tuagaʼane ia te ʼofa moʼoni!