1, 2. (1) Kotea ʼae ʼe maʼuhiga ʼaupito ʼi tou maʼuli? (2) Kotea te ʼu moʼoni ʼae ʼe maʼuhiga kia tatou, pea kotea tona tupuʼaga? (Vakaʼi te ʼuluaki pāki.)

KOTEA ʼae ʼe maʼuhiga ʼaupito ʼi totatou maʼuli? Ko ʼatatou felogoi mo Sehova, mai tona aluʼaga ʼae ko tatou ko tana hahaʼi. ʼE mole tou fetogi anai te aluʼaga ʼaia ʼi he temi. Pea ʼe toe maʼuhiga kia tatou ia te ʼu moʼoni ʼo te Tohi-Tapu, koteʼuhi ʼe ina fakafealagia mai ke tou liliu ko he ʼu kaumeʼa ʼo Sehova.—Kolose 1:9, 10.

² Ko Sehova ʼe ko totatou Faiako Lahi. ʼE ina akoʼi mai te ʼu moʼoni ʼae ʼe maʼu ʼi tana Folafola, ia te Tohi-Tapu. ʼE ina akoʼi mai te maʼuhiga ʼo tona huafa pea mo ʼona kalitate fakaofoofo. Pea ʼe ina loto foki ke tou iloʼi ia tona ʼofa ʼae kia tatou ʼi tana foaki te maʼuli ʼo tona ʼAlo ʼofaina maʼa tatou. ʼE akoʼi mai e Sehova pe kotea ia te Puleʼaga Fakamesia. ʼE ina foaki mai tatatou ʼamanaki ki te ka haʼu, ko te maʼuli ʼi te lagi ki te kau fakanofo, peʼe ko te maʼuli ʼi te Palatiso ʼi te kele kia natou ʼae ʼe kau ki “ ʼihi atu ovi.” (Soane 10:16) ʼE toe akoʼi mai foki e Sehova pe tonu ke feafeaʼi totatou faʼahiga maʼuli. ʼE maʼuhiga kia tatou te ʼu moʼoni ʼaia koteʼuhi ʼe natou tokoni  mai ke tou fakaovi ki totatou Fakatupu pea ʼe tou maʼu ai he ʼuhiga ʼo totatou maʼuli.

3. ʼE kole mai koa e Sehova ke tou foaki falā age moʼo totogi te moʼoni?

³ Ko Sehova ʼe ko te ʼAtua lotofoaki. ʼI te lahi ʼo tona lotofoaki neʼe ina sakilifisioʼi ia tona ʼAlo maʼa tatou. Ka sio Sehova ki he tahi ʼe ina kumi ia te moʼoni, ʼe tokoni ki te kilisitiano ʼaia ke ina maʼu te moʼoni. ʼE mole ina kole mai anai ʼi he temi ke tou foaki falā age moʼo totogi te moʼoni. ʼI te tahi ʼaho, ko te tagata ʼe higoa ko Simone neʼe ina loto ke tuku age e Petelo te pule ʼae ke ina foaki te laumalie maʼoniʼoni ki ʼihi kae ina totogi. Neʼe fakatonutonuʼi ia ia e Petelo ʼo ina ui fenei: “Ke puli tau paʼaga mo koe, koteʼuhi neʼe ke manatu ʼe feala ke ke maʼu ʼaki te paʼaga ia te meʼa ʼofa ʼae ʼe foaki noa e te ʼAtua.” (Gaue 8:20) Koia, kotea te fakaʼuhiga ʼo te ‘totogi ʼo te moʼoni’?

4. Kotea anai ka tou vakaʼi ʼo ʼuhiga mo te moʼoni ʼi te alatike ʼaeni?

⁴ Lau ia Taaga Lea 23:23. ʼE ʼaoga ke tou faiga ke tou ako ia te moʼoni ʼae ʼe maʼu ʼi te Tohi-Tapu. Koia ʼe ʼaoga ke tou liʼaki ʼihi faʼahi ke feala hatatou ako ia te moʼoni. Pea moka kua tou “totogi te mooni,” ko tona fakaʼuhiga, moka kua tou iloʼi ia te moʼoni, ʼe tonu ke tou tokakaga ke mole tou “fakatau” peʼe ke tou liʼaki ʼi he temi. ʼE feafeaʼi he “totogi” ʼo te moʼoni? ʼE fia te totogi ʼo te moʼoni? ʼE tokoni mai anai te ʼu tali ki te ʼu fehuʼi ʼaia ke toe maʼuhiga age te moʼoni kia tatou pea ke mole tou liʼaki ʼi he temi. ʼE tou mahino anai pe koʼe ʼe tuha te moʼoni ʼaia ʼe haʼu mai ia Sehova mo ʼatatou faiga fuli.

5, 6. (1) ʼE feafeaʼi hatatou totogi te moʼoni kae mole ʼaki he falā? Fakamahino. (2) Kotea te ʼu fua lelei ʼe tou maʼu ʼaki te moʼoni?

⁵ Ka toʼo noa ia he meʼa, ʼe mole fakaʼuhiga leva ʼe mole tou fai anai he ʼu faiga ke tou maʼu te meʼa ʼaia. Ko te kupu Fakahepeleo ʼae neʼe fakaliliu ʼaki te kupu “totogi” ia Taaga Lea 23:23, ʼe toe feala pe ke fakaʼuhiga “maʼu.” ʼE ha mai ʼaki te ʼu kupu ʼaia, ko he tahi ʼe faiga peʼe ina liʼaki he aluʼaga ke ina maʼu te meʼa ʼae ʼe maʼuhiga kia ia. Ke feala hatatou mahino pe ʼe feafeaʼi hatatou totogi te moʼoni, tou toʼo he faʼifaʼitaki. Ohage la, ko he fale koloa ʼe ina foaki noa he ʼu foʼi siaina. ʼI tatatou manatu la, ʼe hili fakamilakulo anai koa te ʼu foʼi siaina ʼi totatou laupapa? Kailoa. ʼE tonu ke tou olo ʼo ʼaumai mai te fale koloa. Koia, logo la ko te ʼu foʼi siaina ʼe foaki noa, kae ʼe ʼaoga ke tou fai he ʼu faiga ke tou maʼu te ʼu foʼi siaina ʼaia. ʼO toe feia pe, ʼe mole ʼaoga mai he foʼi falā ke tou ako ia te moʼoni, kae ʼe ʼaoga ki ai he ʼu faiga mo he ʼu sakilifisio.

⁶ Lau ia Esaia 55:1-3. * (Vakaʼi te kiʼi nota.) Ko te ʼu palalau ʼa Sehova ʼe tokoni mai ke tou mahino ki te fakaʼuhiga ʼo te totogi ʼo te moʼoni. Pea ʼe fakatatau e Sehova ʼana folafola ʼo te moʼoni ki te vai, mo te huʼa pipi pea mo te vino. Ohage pe ko he moʼi vai mokomoko, ko te moʼoni ʼe ina fakamokomoko tatou. Pea ohage pe ko te fakamalohiʼi e te huʼa pipi te tuputupu ʼa he kiʼi tamasiʼi, ko te moʼoni ʼe ina fakamalohiʼi ʼatatou felogoi mo Sehova. ʼE toe fakatatau e Sehova ʼana folafola ki te vino. Kotea tona tupuʼaga? ʼE ui mai ʼi te Tohi-Tapu, ko te vino ʼe ina fakafiafiaʼi te loto ʼo te hahaʼi. (Pesalemo 104:15) Koia, ka ui mai e Sehova ke tou “totogi te vino,” ʼe ina fakapapau mai ʼe tou fiafia anai moka tou mulimuli ki tana takitaki. (Pesalemo 19:9) Ko Sehova ʼe ina fakaʼaogaʼi  te ʼu faʼifaʼitaki ʼaeni ke tou mahino ki te ʼu fua lelei ʼae ʼe tou maʼu moka ʼe tou ako mo maʼuliʼi ia te moʼoni. Tou vakaʼi ʼi te temi nei ia faʼahi ʼe nima ʼe feala ke tou liʼaki ke tou totogi ai te moʼoni.

7, 8. (1) He koʼe ʼe ʼaoga he temi ke kita ako ai te moʼoni? (2) Kotea te ʼu sakilifisio ʼae neʼe fai e he taʼahine, pea neʼe kotea ʼona fua?

⁷ Te temi. ʼE ʼaoga he temi ke fagono ai he tahi ki te logo ʼo te Puleʼaga, mo lau te Tohi-Tapu mo te ʼu tohi Fakatohi-tapu, mo ako te Tohi-Tapu mo te Kau Fakamoʼoni ʼa Sehova, mo teuteuʼi pea mo kau ki ʼatatou fono. Ke feala hatatou fai te ʼu faʼahi fuli ʼaia, ʼe tonu ke tou fakaʼaogaʼi te temi ʼae neʼe tou fakaʼaogaʼi mahani ki he ʼu aluʼaga ʼe mole faʼa maʼuhiga. (Lau ia Efeso 5:15, 16 pea mo te kiʼi nota.) ʼE feafeaʼi te loaloaga ʼo takita ako te ʼu moʼoni tafito ʼo te Tohi-Tapu? ʼE fakalogo pe ki te aluʼaga ʼo te kilisitiano takitokotahi. Kae ʼe mole he tuʼakoi ʼo tatatou ako ia te poto ʼo Sehova, mo ʼona ala pea mo ʼana gaue. (Loma 11:33) ʼI te ʼuluaki Tule Leʼo, neʼe fakatatau te moʼoni ki “he kiʼi matalaʼi ʼakau” pea neʼe ui fenei ai: “ ʼAua naʼa kotou toli he matalaʼi ʼakau pe ʼe tahi ʼo te moʼoni. Ka na pau la neʼe feʼauga pe he matalaʼi ʼakau ʼe tahi, ka na ʼaua la neʼe mole lahi tona fakatupu e te ʼAtua. Kotou haga toli ke lahi pea kotou haga kumi ke lahi.” Koia ʼe lelei ke tou fai te fehuʼi ʼaeni: ‘ ʼE au iloʼi lelei koa ia Sehova?’ Maʼia pe ʼe tou maʼuʼuli ʼo heʼe gata, ʼe tou ako tuʼumaʼu pe anai ʼo ʼuhiga mo Sehova. Kae ia ʼaho nei, ʼe maʼuhiga ke tou fakaʼaogaʼi fakapotopoto totatou temi ke feala hatatou ako ke lahi ia te ʼu moʼoni. Tou vakaʼi te faʼifaʼitaki ʼo he tahi neʼe ina fai te faʼahi ʼaia.

⁸ Ko he taʼahine mai Saponia ʼe higoa ko Mariko, * (vakaʼi te kiʼi nota) neʼe alu ʼo maʼuli pea mo ako ʼi Amelika, ʼi New York. ʼI te tahi ʼaho, neʼe faifakamafola age te tuagaʼane ʼi tona muʼa matapa. Logo la neʼe kua ʼi ai tana lotu, kae neʼe tali e Mariko ke ina ako te Tohi-Tapu mo te tuagaʼane. ʼI te lahi ʼo tana leleiʼia ʼo tana ako, neʼe ina kole ai ke fai tuʼa lua tana ako ʼi te vahaʼa. Neʼe maʼumaʼua ʼaupito ia Mariko ʼuhi ko tana ako fakamalama mo tana gaue vaeluaʼi temi. Kae neʼe vave pe tana kau ki te ʼu fono. Neʼe ina fakasiʼisiʼi tona temi fakafiafia ke lahi ai tana ako ʼo ʼuhiga mo te moʼoni. ʼI tana fai te ʼu sakilifisio ʼaia, neʼe fakaovi ai ia Mariko kia Sehova pea neʼe papitema kae heʼeki pe la taʼu katoa tana ako. Pea ʼi ni mahina ʼe ono ki muli age, ʼi te taʼu 2006, neʼe pionie katoa ʼo kaku mai ki te temi nei.

9, 10. (1) Ka tou ako ia te moʼoni ʼe fetogi feafeaʼi anai tatatou faʼahiga manatu ʼo ʼuhiga mo te ʼu koloa? (2) Kotea ʼae neʼe liʼaki e he finemui, pea kotea tana manatu ʼo ʼuhiga mo tana tonu ʼaia?

⁹ Te ʼu koloa. Ke feala hatatou ako ia te moʼoni, ʼe lagi ʼaoga ke tou liʼaki he gaue ʼe totogi lelei peʼe ko he tuʼulaga lelei. Ohage la ko Petelo pea mo Atelea, neʼe ko he ʼu tagata tautai, kae ʼi te temi ʼae neʼe fakaafe ai naua e Sesu ke nā liliu ko ʼana tisipulo, neʼe nā tuku  atu aipe tanā gaue ʼae ko te gelu. (Mateo 4:18-20) ʼE mole fakaʼuhiga leva, ʼe tonu anai ke ke liʼaki tau gaue moka ʼe ke ako te moʼoni. Ko he tahi ʼe tokaga ki hona kiʼi famili, ʼe ʼaoga ke gaue. (1 Timoteo 5:8) Kae moka ʼe ke ako ia te moʼoni, ʼe fetogi ia tau faʼahiga manatu ʼo ʼuhiga mo te ʼu koloa. Koteʼuhi ʼe ke mahino pe kotea ʼae ʼe maʼuhiga moʼoni ʼi tou maʼuli. Neʼe ui fenei e Sesu: “Tuku takotou tanaki maʼa koutou he ʼu koloa ʼi te kele.” Kae neʼe ina fakalotomalohiʼi fenei tatou: “Kotou tanaki maʼa koutou he ʼu koloa ʼi selo.” (Mateo 6:19, 20) Neʼe fakahoko te aluʼaga ʼaia e he finemui ʼe higoa ko Maria.

¹⁰ Talu mai tana kei veliveli, neʼe leleiʼia e Maria ia te gaoʼi ʼae ko te golf. ʼI tana ako ʼi te lise, neʼe toe lelesili lelei age ia tana gaoʼi ʼi te golf pea koia ʼae neʼe foaki leva ki ai he tokoni fakapaʼaga ke hu ki te univelesite. Neʼe fakatuʼutuʼu e Maria ke liliu ko he tahi ʼe faiva ʼi te golf pea mo maʼu paʼaga. Pea neʼe ina ako leva ia te Tohi-Tapu. Neʼe ina leleiʼia te ʼu faʼahi ʼae neʼe ina ako pea neʼe ina kamata maʼuliʼi. Neʼe ina ui fenei: “Neʼe lahi toku fiafia ʼi taku fakaalu tahi ia taku faʼahiga manatu mo toku faʼahiga maʼuli mo te ʼu lekula ʼo te Tohi-Tapu.” Neʼe mahino kia Maria ʼe faigataʼa anai hana tokaga ki ʼana felogoi mo Sehova pea mo tana faigaoʼi. (Mateo 6:24) Koia neʼe ina fakatotonu leva ke ina liʼaki ia tana liliu ʼae ko he faigaoʼi faiva kae kau ki he gaue ʼe lelei ʼaupito age. Ia ʼaho nei, ʼe pionie pea ʼe ina ui “ ʼe mole he fakatatau ʼo tona maʼuli fiafia.”

11. Ka tou ako ia te moʼoni, kotea ʼae ʼe feala ke hoko ki ʼatatou felogoi mo ʼotatou kaumeʼa pea mo totatou famili?

¹¹ ʼAtatou felogoi mo ʼihi. Ka tou maʼuliʼi te ʼu faʼahi ʼae ʼe tou ako ʼi te Tohi-Tapu, ʼe feala ke fetogi ʼatatou felogoi mo ʼotatou kaumeʼa pea mo totatou famili. Neʼe tokoni mai ia Sesu ke tou mahino ki te tupuʼaga ʼo tana faikole fenei ʼo ʼuhiga mo ʼana tisipulo: “Fakamaʼoniʼoniʼi natou ʼaki ia te moʼoni, ko tau folafola ʼe ko te moʼoni.” (Soane 17:17; nota) ʼE feala ke toe fakaʼuhiga te kupu “fakamaʼoniʼoniʼi” ki te “tuku keheʼi.” Ka tou kamata maʼuliʼi te moʼoni, kua tuku keheʼi tatou mai te malama koteʼuhi ʼe tou mulimuli ki te ʼu lekula ʼo te Tohi-Tapu. Tatau aipe pe ʼe tou faigaʼi ke tou taupau he ʼu felogoi lelei mo ʼotatou kaumeʼa pea mo kaiga, kae ʼe lagi fakamamaʼo anai ʼihi ia tatou peʼe lagi natou fakafeagai ki te ʼu akonaki foʼou ʼae kua tou tui ki ai. ʼE mole tou punamaʼuli ki te aluʼaga ʼaia, koteʼuhi neʼe ui fenei e Sesu: “Ko te ʼu fili ʼo te tagata ʼe ko natou totonu anai ʼo tona loto fale.” (Mateo 10:36) Kae neʼe toe fakapapau mai e Sesu, tatau aipe pe kotea ʼae neʼe tou liʼaki maʼa te moʼoni, kae ʼe laka maumau age anai te ʼu faʼahi ka tou maʼu.—Lau ia Maleko 10:28-30.

12. Kotea te ʼu fetogi neʼe tali e he tagata Sutea ke feala ai hana ako te moʼoni?

¹² Ko he tagata Sutea ʼe higoa ko Aaron, ʼi tona maʼuli katoa, neʼe manatu ia ʼe kovi te toʼo ʼo te huafa ʼo te ʼAtua. Kae neʼe ina fia iloʼi ia te moʼoni ʼo ʼuhiga mo te ʼAtua. ʼI te tahi ʼaho, neʼe fakaha age e he Fakamoʼoni ʼa Sehova, kapau ʼe ina hilifaki he ʼu vuaiele ki te ʼu  mataʼi tohi Fakahepeleo ʼe fa ʼo te huafa ʼo te ʼAtua, neʼe feala ai ke toʼo “Sehova.” Neʼe lahi te fiafia ʼo Aaron ʼi tana iloʼi te faʼahi ʼaia, pea neʼe alu ai ki te sinakoka ʼo fakaha ki te kau takitaki lotu Sutea. ʼI tana manatu, ʼe natou fiafia anai ʼi tanatou iloʼi te moʼoni ʼo ʼuhiga mo te huafa ʼo te ʼAtua, kae neʼe natou ʼanuʼanuhi mo kapu ia ia. Neʼe toe fakafeagai mo te famili ʼo Aaron kia ia. Kae neʼe mole lotovaivai pea neʼe hoko atu pe ia tana ako ʼo ʼuhiga mo Sehova. Neʼe liliu leva ia Aaron ko te Fakamoʼoni ʼa Sehova pea neʼe tauhi agatonu kia Sehova ʼi tona maʼuli katoa. ʼO toe feia pe, ʼe feala ke fetogi ʼatatou felogoi mo ʼihi moka tou ako ia te moʼoni.

13, 14. Kotea te ʼu fetogi ʼe tonu ke tou fai ʼi tatatou faʼahiga manatu mo tatatou aga moka tou ako te moʼoni? Tuku mai he faʼifaʼitaki.

¹³ Te ʼu manatu pea mo te ʼu aga heʼe maʼa. Ka tou ako te moʼoni mo tou kamata maʼuliʼi te ʼu lekula Fakatohi-tapu, ʼe tonu ke tou tali ke tou fetogi ʼatatou faʼahiga manatu mo ʼatatou aga. Neʼe tohi fenei e te apositolo ko Petelo: “Ohage ko he ʼu fanau fakalogo, tuku takotou mulimuli ki te ʼu holi ʼae neʼe kotou maʼu ʼi te temi muʼa ʼi takotou kei ʼi te fakapoʼuli.” Pea neʼe ina toe ui fenei: “Ke kotou liliu ʼo maʼoniʼoni ʼi takotou aga katoa.” (1 Petelo 1:14, 15) ʼI te kolo ʼafeā ʼo Kolonito, ko te tokolahi neʼe natou fai he ʼu aga heʼe ʼaoga. Koia, ko natou ʼae neʼe natou fia liliu ʼo maʼa kia mata ʼo Sehova, neʼe tonu ke natou fai he ʼu toe fetogi. (1 Kolonito 6:9-11) ʼE toe feia pe ia ʼaho nei, ko te tokolahi ʼe natou fai he ʼu fetogi moka natou ako ia te moʼoni. Ko te apositolo ko Petelo neʼe talanoa ki te faʼahi ʼaia ʼi tana ui fenei: “Kua feʼauga takotou fai ʼi te temi muʼa te finegalo ʼo te hahaʼi ʼo te malama, ʼi takotou fakahoko he ʼu aga fakalialia, mo he ʼu holi heʼe ʼaoga, mo kotou inu kava fakavalevale, mo fai he ʼu fakafiafia fakavalevale, mo konahihia, pea mo te tauhi fakalialia ki te ʼu taula ʼatua.”—1 Petelo 4:3.

¹⁴ Ko Devynn pea mo Jasmine neʼe nā inu kava fakavalevale lolotoga ni taʼu. Logo la neʼe faiva ia Devynn ʼi te gaue ʼae ko te tokaga ki te paʼaga ʼi he sosiete, kae neʼe mole fualoa ia ʼi he gaue ʼuhi ko tana inu. Ko Jasmine, neʼe ko he fafine itaita mo agamalohi. ʼI te tahi ʼaho, neʼe felaveʼi mo te ʼu misionea ʼe toko lua ʼi te ala kae neʼe konahia. Neʼe nā kole age ki ai pe ʼe mole loto ke fai hana ako Tohi-Tapu. Kae ʼi tanā tau atu ki tonā ʼapi ʼi te vahaʼa ʼae neʼe hoa mai ki ai, neʼe konahihia ia Devynn pea mo Jasmine. ʼI tanā manatu, neʼe mole fakamalotoloto te ʼu misionea pea ʼe mole nā ʼomai anai ki tonā ʼapi. Pea ʼi te toe liliu mai ʼa te ʼu misionea, neʼe mole kei tatau leva. Neʼe kua fia iloʼi e Jasmine pea mo Devynn ia te ʼu moʼoni Fakatohi-tapu. Pea mole tuai, neʼe nā kamata maʼuliʼi te ʼu faʼahi ʼae neʼe nā ako. Neʼe mole fakalaka mahina ʼe tolu kae kua nā liʼaki te inu pea nā ʼohoana ki muli age. Ko te tokolahi ʼi tonā kolo neʼe natou tokagaʼi te ʼu fetogi ʼae neʼe fai e Jasmine mo Devynn, pea neʼe natou ako mo natou ia te Tohi-Tapu.

15. Kotea te ʼu fetogi ʼae ʼe feala ke faigataʼa tafito ke tou fai ke tou ako ai te moʼoni, pea kotea tona tupuʼaga?

¹⁵ Te ʼu agaʼi fenua mo te ʼu agamahani ʼae ʼe fehiʼa ki ai te ʼAtua. Ko te ʼu fetogi ʼae ʼe faigataʼa tafito ke tou fai, ʼe ko te liʼaki ʼo te ʼu agaʼi fenua mo te ʼu agamahani ʼae ʼe fehiʼa ki ai Sehova. Ohage la, ko ʼihi, logo la tanatou kua iloʼi te faʼahiga manatu ʼa Sehova ʼo ʼuhiga mo te ʼu aluʼaga ʼaia, kae ʼe kei faigataʼa aipe tanatou liʼaki te ʼu aluʼaga ʼaia. ʼE natou tuʼania pe kotea anai te manatu ʼo ʼonatou famili, ʼonatou kaugā gaue, peʼe ko ʼonatou kaumeʼa. ʼE natou iloʼi, ʼe kei pipiki malohi te hahaʼi ki ʼihi agaʼi fenua,  ohage la ko te fakamaʼuhigaʼi ʼo te ʼu kaiga ʼae kua mamate. (Tetelonome 14:1) Kae, kotea ʼae ʼe lava tokoni mai ke tou fai te ʼu fetogi ʼae ʼe ʼaoga? Ko te faʼifaʼitaki lelei ʼo natou ʼae neʼe natou fetogi ʼonatou maʼuli ʼi tanatou iloʼi ia te moʼoni, ohage la ko te kau ʼuluaki Kilisitiano ʼi te kolo ko Efeso.

16. Kotea te sakilifisio ʼae neʼe fai e ʼihi ʼi Efeso?

¹⁶ ʼI te kolo ʼafeā ko Efeso, neʼe ko he agamahani ʼa te tokolahi ko te gaohi meʼa fakamanamana. Kae kotea leva ʼae neʼe fai e te hahaʼi ʼaia ʼi te temi ʼae neʼe natou liliu ai ko he kau Kilisitiano? ʼE fakamahino fenei mai ʼi te Tohi-Tapu: “Tokolahi ia natou ʼae neʼe gaohi meʼa fakamanamana, neʼe natou ʼaumai ʼanatou tohi ʼo tutu ia muʼa ʼo te hahaʼi fuli. Pea neʼe natou fakafuafua te totogi ʼo te ʼu tohi ʼaia, ʼo natou maʼu neʼe ko foʼi piesi siliva ʼe 50 000. Koia, ʼi hona aluʼaga fakaofoofo, neʼe haga mafola aipe te folafola ʼa Sehova pea mo malohi age.” (Gaue 19:19, 20) Neʼe tapuakinaʼi e Sehova ia te kau Kilisitiano agatonu ʼaia he neʼe natou tali ke natou tutu ʼanatou tohi totogi kovi.

17. (1) Kotea he ʼu faʼahi ʼe ʼaoga ke tou liʼaki ke feala ai hatatou ako ia te moʼoni? (2) Kotea te ʼu fehuʼi ʼae ka tou tali anai ki ai ʼi te alatike ka hoa mai?

¹⁷ Kotea te ʼu sakilifisio neʼe ke fai ke feala ai hau ako ia te moʼoni? Ko tatou fuli neʼe tou fakaʼaogaʼi totatou temi moʼo ako ia te moʼoni. Ko ʼihi neʼe natou liʼaki ʼanatou gaue lelei ʼae neʼe feala ke natou maʼu paʼaga ai. Pea ko ʼihi, kua lagi fetogi ʼanatou felogoi mo ʼonatou famili pea mo ʼonatou kaumeʼa. Ko te tokolahi ia tatou kua tou fetogi ʼatatou faʼahiga manatu mo ʼatatou aga, pea kua tou liʼaki te ʼu agaʼi fenua pea mo te ʼu agamahani ʼae ʼe fehiʼa ai Sehova. Kae ʼe tou tui papau, ko te ʼu moʼoni Fakatohi-tapu ʼe tuha ia mo te ʼu sakilifisio fuli ʼae ʼe feala ke tou fai. ʼAki te ʼu moʼoni Fakatohi-tapu, ʼe feala ke tou maʼu he ʼu felogoi lelei mo Sehova, pea ʼe ko te faʼahi maʼuhiga tokotahi ʼaia ʼi totatou maʼuli. Ka tou fakakaukauʼi te ʼu tapuakina ʼae ʼe tou maʼu ʼuhi ko te moʼoni, ʼe faigataʼa hatatou mahino pe koʼe ʼe “fakatau” e ʼihi ia te moʼoni. Kae ʼe feala ke hoko feafeaʼi te aluʼaga ʼaia? Pea kotea ʼae ʼe tonu ke tou fai ke mole hoko te aluʼaga ʼaia ʼi he temi? ʼE tou tali anai ki te ʼu fehuʼi ʼaia ʼi te alatike ka hoa mai.