1, 2. Hili te hake ʼa Sesu ki selo, kotea ʼae neʼe lagi feʼekeʼaki ki ai te kau apositolo?

NEʼE tutuʼu te kau apositolo ʼa Sesu ʼi te Moʼuga ʼo Oliveto mo natou sisio ki te hake ki selo ʼo tonatou pule mo kaumeʼa, ia Sesu. Pea neʼe ʼaofi leva ia ia e he ʼao ʼo mole kei feala hanatou sisio kia te ia. (Gaue 1:9, 10) Lolotoga teitei taʼu ʼe lua, neʼe akoʼi, mo fakalotomalohiʼi pea mo takitaki natou e Sesu. Kaʼe ʼi te temi nei kua alu leva ia. Kotea anai ka natou fai?

² ʼI muʼa ʼo tana hake ki selo, neʼe ui fenei e Sesu ki ʼana tisipulo: “ ʼE kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:8) ʼE feafeaʼi anai hanatou lava fakahoko te gaue ʼaia? Neʼe fakapapauʼi e Sesu ʼe tokoni anai te laumalie maʼoniʼoni ʼo te ʼAtua kia natou. (Gaue 1:5) Kaʼe ko ai ʼae ka ina takitaki anai natou pea mo fakatuʼutuʼu ia te gaue faifakamafola fakamalamanei? Neʼe kua iloʼi e te kau apositolo neʼe fakaʼaogaʼi e Sehova he ʼu tagata moʼo takitaki te kau Iselaele ʼi te temi muʼa.  Koia, neʼe lagi natou feʼekeʼaki pe ʼe filifili anai e Sehova ʼi te temi nei he takitaki foʼou.

3. (1) Hili te hake ʼa Sesu ki selo, kotea te tonu maʼuhiga ʼae neʼe fai e te kau apositolo agatonu? (2) Kotea te ʼu fehuʼi ʼae ka tou tali anai ki ai ʼi te alatike ʼaeni?

³ ʼI te hili pe ʼo te hake ʼa Sesu ki selo, neʼe vakaʼi e te ʼu tisipulo ia te Tohi-Tapu mo kole te tokoni ʼa te ʼAtua. ʼO natou filifili ai ia Mateasi ke liliu ʼo fetogi ia Sutasi Isekaliote pea mo fakakatoa ai te toko 12 kau apositolo. (Gaue 1:15-26) He koʼe neʼe maʼuhiga ʼaupito ia te tonu ʼaia kia natou pea mo Sehova? He neʼe mahino te ʼu tisipulo neʼe tonu ke ʼi ai he toko 12 kau apositolo. * (Vakaʼi te kiʼi nota.) Neʼe filifili e Sesu te kau apositolo pea ina akoʼi natou ki he gaue ʼe maʼuhiga ʼaupito ʼi te lotolotoiga ʼo te hahaʼi ʼa te ʼAtua. Kotea te gaue ʼaia, pea neʼe teuteuʼi feafeaʼi natou e Sehova mo Sesu ki te gaue ʼaia? Ko te fakatuʼutuʼu fea ia ʼaho nei ʼe tatau mo te fakatuʼutuʼu ʼaia? Pea ʼe feafeaʼi hatatou “manatuʼi ia natou ʼae ʼe natou takitaki” tatou, tafito la ia “te tagata faifekau agatonu mo poto”?—Hepeleo 13:7; Mateo 24:45.

4. Neʼe kotea te gaue ʼa te kau apositolo pea mo ʼihi tagata ʼafeā ʼi Selusalemi?

⁴ Neʼe kamata takitaki e te kau apositolo ia te kokelekasio Fakakilisitiano ʼi te Penikosite ʼo te taʼu 33 hili te temi ʼo Sesu. ʼE ui ʼi te Tohi-Tapu, “neʼe tuʼu ake ia Petelo mo te toko Hogofulu-ma-tahi” pea neʼe natou akoʼi ki te hahaʼi kaugā malie ia te ʼu moʼoni haofaki maʼuli. (Gaue 2:14, 15) Neʼe liliu ai te tokolahi ʼo natou ʼaia ko he kau Kilisitiano. Hili ia, ko te kau Kilisitiano foʼofoʼou ʼaia, neʼe natou “hoko atu tanatou tokakaga tafito ki te faiakonaki ʼa te kau apositolo.” (Gaue 2:42) Ko te kau apositolo ʼae neʼe tokakaga ki te falā ʼo te kokelekasio. (Gaue 4:34, 35) Pea neʼe natou toe akoʼi foki te hahaʼi ʼa te ʼAtua pea mo faikole maʼa natou. Neʼe ui fenei e te kau apositolo: “ ʼE matou tokakaga tafito pe anai ki te faikole pea mo te minisitelio ʼo te folafola ʼa te ʼAtua.” (Gaue 6:4) Pea neʼe natou fekauʼi he kau Kilisitiano faiva ke natou olo ʼo faifakamafola ʼi he ʼu telituale foʼou. (Gaue 8:14, 15) Ki muli age, ko ʼihi tagata ʼafeā fakanofo neʼe fakatahi mai ki te kau apositolo moʼo takitaki ia te kokelekasio. ʼI tonatou ʼuhiga kolesi pule, neʼe natou takitaki ai ia te ʼu kokelekasio fuli.—Gaue 15:2.

5, 6. (1) Neʼe fakamalohiʼi feafeaʼi e te laumalie maʼoniʼoni ia te kolesi pule? (Vakaʼi te ʼuluaki pāki.) (2) Neʼe tokoni feafeaʼi te kau ʼaselo ki te kolesi pule? (3) Neʼe takitaki feafeaʼi e te Folafola ʼa te ʼAtua ia te kolesi pule?

⁵ Neʼe mahino te kau Kilisitiano ʼo te ʼuluaki sekulo neʼe takitaki e Sehova ia te kolesi pule ʼaki ia Sesu. Neʼe feafeaʼi hanatou iloʼi papau te faʼahi ʼaia? ʼUluaki, ko te laumalie maʼoniʼoni ʼae neʼe ina fakamalohiʼi te kolesi pule. (Soane 16:13) Neʼe maʼu fuli e te kau Kilisitiano fakanofo ia te laumalie  maʼoniʼoni. Kaʼe neʼe fakamalohiʼi tafito e te laumalie maʼoniʼoni ia te kau apositolo mo te kau tagata ʼafeā ʼo Selusalemi ke natou fakahoko ʼonatou maʼua ʼi tonatou ʼuhiga tagata taupau. Ohage la ʼi te taʼu 49 hili te temi ʼo Sesu, neʼe takitaki e te laumalie maʼoniʼoni ia te kolesi pule ke ina toʼo he tonu ʼo ʼuhiga mo te silikosisio. Pea neʼe mulimuli fuli te ʼu kokelekasio ki te tonu ʼaia. Koia, neʼe natou “haga malolohi aipe ʼi te tui pea mo tuputupu ʼo kaugā malie ʼi te ʼaho fuli.” (Gaue 16:4, 5) ʼAki te tohi ʼae neʼe fai ki te ʼu kokelekasio ʼo ʼuhiga mo te silikosisio, ʼe tou mahino ai neʼe maʼu e te kolesi pule ia te laumalie maʼoniʼoni, mo te ʼofa pea mo te tui.—Gaue 15:11, 25-29; Kalate 5:22, 23.

⁶ Lua, neʼe tokoni te kau ʼaselo ki te kolesi pule. Ohage la, neʼe fakatotonu e he ʼaselo kia Kolenelio ke ina kumi ia te apositolo ko Petelo. ʼI te ʼosi faifakamafola ʼa Petelo kia Kolenelio pea mo ʼona kaiga ʼae neʼe mole ko he kau Sutea, neʼe natou maʼu te laumalie maʼoniʼoni, logo la te heʼeki silikosisio ʼo te hahaʼi tagata. Koia neʼe liliu ai ia Kolenelio ko te ʼuluaki Kilisitiano kaʼe neʼe heʼeki silikosisio. ʼI te temi ʼae neʼe logo ai te kau apositolo mo ʼihi tehina ki te aluʼaga ʼaia, neʼe natou tali ia te finegalo ʼo te ʼAtua pea mo fakatalitali leleiʼi natou ʼae neʼe mole ko he kau Sutea ʼi te kokelekasio. (Gaue 11:13-18) Talu mai ai, ʼe tou sisio ki te lagolago malohi ʼa te kau ʼaselo ki te gaue faifakamafola ʼae neʼe takitaki e te kolesi pule. (Gaue 5:19, 20) Tolu, neʼe takitaki te kolesi pule e te Folafola ʼa te ʼAtua. Neʼe fakaʼaogaʼi e te ʼu tagata ʼaia ia te Tohi-Tapu ke feala ai hanatou toʼo te ʼu tonu maʼuhiga ʼo ʼuhiga mo te ʼu akonaki Fakakilisitiano pea mo te takitaki ʼo te ʼu kokelekasio.—Gaue 1:20-22; 15:15-20.

7. He koʼe ʼe feala ke tou ui neʼe takitaki e Sesu ia te ʼu ʼuluaki Kilisitiano?

⁷ Logo la neʼe takitaki e te kolesi pule ia te kokelekasio, kaʼe neʼe mahino ki te kokelekasio, neʼe ko Sesu Kilisito tonatou Pule. ʼE tou iloʼi feafeaʼi te faʼahi ʼaia? He neʼe ui e te apositolo ko Paulo neʼe fakanofo ʼihi e Kilisito “ko he kau apositolo.” Neʼe ina toe ui ko Kilisito neʼe ko “te ʼulu,” peʼe ko te Pule, ʼo te kokelekasio. (Efeso 4:11, 15) Pea ʼaki te takitaki ʼa te ʼAtua, neʼe fakahigoaʼi “te ʼu tisipulo ko te kau Kilisitiano.” (Gaue 11:26) Neʼe iloʼi e Paulo neʼe maʼuhiga te mulimuli ki te ʼu akonaki Fakatohi-tapu ʼo te kau apositolo pea mo ʼihi tagata ʼae neʼe takitaki ʼi te kokelekasio. Kaʼe neʼe tohi fenei e Paulo: “Kaʼe ʼe au loto ke kotou iloʼi ko te pule ʼo te tagata fuli ʼe ko Kilisito.” Neʼe fakahagahaga te ʼu palalau ʼaia ki te kolesi pule katoa. Neʼe toe ui fenei e Paulo: “Ko te pule ʼo Kilisito ʼe ko te ʼAtua.” (1 Kolonito 11:2, 3) ʼO ha lelei mai ai, neʼe fakanofo e Sehova ia tona ʼAlo ko Sesu Kilisito ke pule ʼi te kokelekasio.

8, 9. Kotea te gaue maʼuhiga ʼae neʼe fai e te Tehina ko Russell?

⁸ ʼI te taʼu 1870, ko Charles Taze Russell pea mo ʼona kaumeʼa, neʼe natou kamata tauhi ki te ʼAtua ʼo mulimuli ki te Tohi-Tapu pea mo tokoni ki ʼihi ke natou faʼifaʼitakiʼi. Neʼe natou fia tokoni ki te hahaʼi ʼae neʼe palalau ʼi te ʼu lea kehekehe. Koia ʼi te taʼu 1884, neʼe fakatuʼu ai te kautahi Zion’s Watch Tower Tract Society pea neʼe liliu ia te Tehina ko Russell ko te pelesita. * (Vakaʼi te kiʼi nota.) Neʼe ina ako lelei ia te Tohi-Tapu pea neʼe mole mataku ʼi te fakaha ki te hahaʼi ʼe mole  tuʼu ʼi te Tohi-Tapu ia te ʼu akonaki ʼo te ʼekelesia ʼae ko te Tahitolutapu pea mo te maʼuli tuputupua ʼo te laumalie. Neʼe ina ako ko te toe liliu mai ʼa Kilisito ʼe fakapulipuli anai pea ko “te temi ʼae kua fakatuʼutuʼu ki te ʼu puleʼaga” ʼe fakaʼosi anai ʼi te taʼu 1914. (Luka 21:24) Ko te Tehina ko Russell neʼe ina fakaʼaogaʼi ia tona temi, mo tona malohi pea mo tana falā moʼo akoʼi te moʼoni ki te hahaʼi. ʼE ha lelei mai, neʼe fakaʼaogaʼi e Sehova mo Sesu ia te Tehina ko Russell ko he takitaki ʼi he temi maʼuhiga ʼo te hisitolia.

⁹ Neʼe mole loto e te Tehina ko Russell ke tokagaʼi ia ia e te hahaʼi. He ʼi te taʼu 1896, neʼe ina tohi ko ia pea mo ʼihi atu tagata takitaki neʼe mole natou loto ke fakamaʼuhigaʼi natou. Neʼe mole natou loto ke foaki age kia natou he ʼu higoa fakatuʼulaga, peʼe ke fakahigoaʼi he kutuga ʼaki ʼonatou higoa. Pea neʼe ina ui fenei ki muli age: “ ʼE mole ko he gaue ʼa he tagata.”

10. (1) Ko ʼanafea ʼae neʼe fakanofo ai e Sesu ia “te tagata faifekau agatonu mo poto”? (2) Fakamahino pe ʼe kehekehe feafeaʼi ia te Kolesi Pule mo te Sosiete Watch Tower.

¹⁰ ʼI te taʼu 1919, hili taʼu ʼe tolu ki te mate ʼa te Tehina ko Russell, neʼe fakanofo e Sesu ia “te tagata faifekau agatonu mo poto.” Kotea tona tupuʼaga? Koteʼuhi ke ina foaki ki ʼana tisipulo ia tanatou “meʼa kai ʼi tona temi totonu.” (Mateo 24:45) Maʼia pe la ʼi muʼa ʼo te ʼu taʼu ʼaia, ko he kiʼi kutuga ʼo te ʼu tehina fakanofo ʼi ʼotatou pilo lalahi ʼi Brooklyn, ʼi New York, ʼae neʼe natou foaki ia te meʼa kai fakalaumalie ki te ʼu tisipulo ʼa Sesu. Neʼe kamata ha te kupusiga palalau “kolesi pule” ʼi ʼatatou tohi hili te taʼu 1940. ʼI te temi ʼaia, ko te kolesi pule neʼe gaue fakatahi mo te tagata takitaki ʼo te Watch Tower Bible and Tract Society. Kaʼe ʼi te taʼu 1971, neʼe ha lelei ai ko te Kolesi Pule neʼe kehekehe ia mo te Sosiete Watch Tower. He neʼe tokaga tafito pe te Sosiete ki te ʼu aluʼaga ʼo ʼuhiga mo te lao. Talu mai ai, neʼe feala ki te ʼu tehina fakanofo ke natou kau ki te Kolesi Pule kaʼe neʼe mole natou takitaki te Sosiete. ʼE mole faʼa fualoa ki ai, ko te kau tagata ʼafeā ʼae ʼe kau ki “ ʼihi atu ovi,” kua natou takitaki ia te Sosiete pea mo ʼihi kautahi neʼe fakaʼaogaʼi e te hahaʼi ʼa te ʼAtua. Koia ʼae ʼe feala ai ki te Kolesi Pule ke tokaga tafito pe la ki te foaki ʼo he ʼu fakatotonu Fakatohi-tapu. (Soane 10:16; Gaue 6:4) Neʼe fakamahino ʼi Te Tule Leʼo ʼo te ʼaho 15 ʼo Sulio 2013, ko “te tagata faifekau agatonu mo poto” ʼe ko he kiʼi kutuga ʼo te ʼu tehina fakanofo ʼe natou faʼufaʼu ia te Kolesi Pule.

11. ʼE toʼo feafeaʼi e te Kolesi Pule ʼana tonu?

¹¹ ʼE toʼo e te Kolesi Pule ia he ʼu tonu maʼuhiga ʼi tonatou ʼuhiga kutuga ʼi te temi ʼae ʼe natou fakatahitahi ai ʼi te vahaʼa fuli. Pea ʼaki tanatou fakatahitahi ʼaia, ʼe natou felogoʼi lelei mo logo tahi ai. (Taaga Lea 20:18) ʼE mole ʼi ai he tehina ʼi te ʼu tehina ʼo te Kolesi Pule ʼe maʼuhiga age, he fetogitogi pe te tehina ʼae ʼe ina takitaki ʼanatou fono ʼi te taʼu fuli. (1 Petelo 5:1) ʼO toe feia pe ki te ʼu  komite ʼe ono ʼo te Kolesi Pule. Pea ʼe mole ʼi ai he tehina ʼi te Kolesi Pule ʼe manatu ko ia ʼae ʼe ina takitaki ʼona tehina. Koteʼuhi ʼe natou toe kau fuli ki te hahaʼi gaue ʼae ʼe natou maʼu te meʼa kai fakalaumalie mai te tagata faifekau agatonu pea mo mulimuli ki tana takitaki.

12. Kotea te ʼu fehuʼi ʼae ka tou tali anai ki ai?

¹² ʼE mole haohaoa te Kolesi Pule pea ʼe mole fakaha age fakahagatonu e te laumalie maʼoniʼoni te ʼu aluʼaga fuli mai te ʼAtua. Koia ʼae ʼe feala ai pe ke natou faihala moka natou fakamahino ia te Tohi-Tapu peʼe ko tanatou takitaki ia te kautahi. Ohage la, ʼi te tohi Index des publications des Témoins de Jéhovah ʼe maʼu ai te kupu tafito “Compréhensions affinées.” ʼE tou maʼu ai he lisi ʼo te ʼu fetogi ʼo tatatou mahino ki te Tohi-Tapu talu mai te taʼu 1870. Neʼe mole ui mai e Sesu ʼe teuteuʼi anai e tana tagata faifekau agatonu ia he meʼa kai fakalaumalie ʼe lelei tukupau. Kaʼe ʼe  feafeaʼi anai hatatou tali ki te fehuʼi ʼaeni ʼa Sesu: “Ko ai moʼoni koa ia te tagata faifekau agatonu mo poto?” (Mateo 24:45) Kotea te fakamoʼoni ʼae ʼe ha ai ko te Kolesi Pule ʼe ko te tagata faifekau agatonu? Tou vakaʼi te ʼu faʼahi ʼe tolu ʼae neʼe tokoni ki te kolesi pule ʼi te temi ʼo te kau apositolo.

13. Neʼe tokoni feafeaʼi te laumalie maʼoniʼoni ki te Kolesi Pule?

¹³ ʼE tokoni te laumalie maʼoniʼoni ki te Kolesi Pule. Neʼe tokoni te laumalie maʼoniʼoni ki te Kolesi Pule ke mahino ki te ʼu moʼoni Fakatohi-tapu ʼae neʼe mole mahino ki ai te hahaʼi ʼi muʼa atu. Ohage la, ʼe lelei ke tou vakaʼi te lisi ʼo te ʼu fetogi ʼo tatatou mahino ʼae neʼe kua tou talanoa ki ai. Neʼe mole feala ki he tagata ke mahino tokotahi pea ke ina fakamahino ʻte ʼu meʼa loloto ʼaia ʼo ʼuhiga mo te ʼAtua.’ (Lau ia 1 Kolonito 2:10.) ʼE manatu tahi ia te Kolesi Pule mo te apositolo ko Paulo ʼae neʼe ina tohi fenei: “ ʼE tou toe palalau foki ʼo ʼuhiga mo te ʼu faʼahi ʼaia, mole ʼaki he ʼu kupu neʼe tou ako mai te poto fakatagata kaʼe ko he ʼu kupu neʼe akoʼi mai e te laumalie.” (1 Kolonito 2:13) Hili te ʼu taʼu ʼe lauʼi teau ʼae neʼe mafola ai te ʼu akonaki loi pea mo te nonofo ʼa te hahaʼi ʼi te fakapoʼuli fakalaumalie, he koʼe neʼe tuputupu leva te mahino ʼa te hahaʼi ki te Tohi-Tapu talu mai te taʼu 1919? Ko tona tupuʼaga ʼae, neʼe tokoni te ʼAtua ʼaki ia tona laumalie maʼoniʼoni.

14. Ohage pe ko tatatou lau ia Fakaha 14:6, 7, ʼe tokoni feafeaʼi te kau ʼaselo ki te Kolesi Pule pea mo te hahaʼi ʼa te ʼAtua ia ʼaho nei?

¹⁴ ʼE tokoni te kau ʼaselo ki te Kolesi Pule. ʼE fakahoko e te Kolesi Pule ia te toe gaue ʼae ko te takitaki ʼo te toko valu miliona tupu kau faifakamafola ʼi te gaue faifakamafola fakamalamanei. He koʼe ʼe lava lelei te gaue ʼaia? Koteʼuhi ʼe lagolago te kau ʼaselo ki ai. (Lau ia Fakaha 14:6, 7.) ʼI ʼihi lakaga, ʼe taki e te kau ʼaselo he kau faifakamafola ki he tahi neʼe hoki ina kole age pe te tokoni ʼa te ʼAtua. * (Vakaʼi te kiʼi nota.) Pea maʼia pe la mo te ʼu koga meʼa ʼae ʼe lahi ai te fakataga, ʼe haga tuputupu aipe ia te gaue faifakamafola mo te faiako. ʼE feala pe te aluʼaga ʼaia ʼuhi ko te tokoni ʼa te kau ʼaselo.

15. ʼE kehekehe feafeaʼi te Kolesi Pule mo te kau takitaki ʼo te ʼu lotu ʼae ʼe natou ui ko natou ko he kau Kilisitiano? Tuku mai he faʼifaʼitaki.

¹⁵ ʼE takitaki te Kolesi Pule e te Folafola ʼa te ʼAtua. (Lau ia Soane 17:17.) Tou vakaʼi te aluʼaga ʼae neʼe hoko ʼi te taʼu 1973. ʼI Te Tule Leʼo ʼo te ʼaho 1 ʼo Sepetepeli (Fakafalani), neʼe fai ai te fehuʼi ʼae pe ʼe ʻfeala koa ke papitema he tahi ʼe heʼeki ina tuku tana suluka.’ Neʼe mole feala, he neʼe fakatafito te tali ʼaia ki te ʼu pelesepeto Fakatohi-tapu. Neʼe talanoa ʼi Te Tule Leʼo ʼaia ki he ʼu vaega kehekehe pea neʼe fakamahino ai pe koʼe ʼe tonu ke fakamavae ia ia ʼae ʼe mole ina tuku tana suluka. (1 Kolonito 5:7; 2 Kolonito 7:1) Pea neʼe toe ui ʼi te nusipepa, ʼe mole haʼu te lekula ʼaia mai he tagata kaʼe “mai te ʼAtua, ʼae neʼe ina fakaha ʼi tana Folafola.” Neʼe mole ʼi ai he tahi age kautahi fakalotu neʼe falala katoa ki te Folafola ʼa te ʼAtua tatau aipe pe neʼe faigataʼa ʼaupito ki ʼihi ia natou te mulimuli ki ai. ʼI te tohi ʼo ʼuhiga mo te lotu ʼi Amelika, ʼe ui fenei ai: “Neʼe vakaʼi tuʼumaʼu e te kau takitaki Kilisitiano ʼanatou faiakonaki ke alu tahi mo te ʼu akonaki pea mo te ʼu manatu ʼae ʼe lagolago ki ai ʼanatou hahaʼi pea mo te tokolahi.” Kaʼe, ʼe mole mulimuli te Kolesi Pule  ki te ʼu faʼahi ʼae ʼe leleiʼia e te tokolahi, kaʼe ki te takitaki ʼa te Folafola ʼa te ʼAtua. ʼO ha mai ai, ko Sehova moʼoni ʼae ʼe ina takitaki ia tana hahaʼi ia ʼaho nei.

16. ʼE feala ke tou manatuʼi feafeaʼi ia te Kolesi Pule?

¹⁶ Lau ia Hepeleo 13:7. ʼE ui ʼi te Tohi-Tapu ke tou “manatuʼi ia natou ʼae ʼe natou takitaki” tatou. ʼE feala ke tou manatuʼi te Kolesi Pule ʼi ʼatatou faikole. (Efeso 6:18) ʼE lahi te ʼu gaue ʼae ʼe natou fakahoko. Ohage la, ʼe natou tufa te meʼa kai fakalaumalie, mo takitaki te gaue faifakamafola fakamalamanei pea ʼe natou tokakaga ki te ʼu meʼa ʼofa ʼae ʼe foaki ki te kautahi. Koia, ʼe ʼaoga moʼoni ke tou faikole tuʼumaʼu ʼo ʼuhiga mo natou.

17, 18. (1) ʼE tou mulimuli feafeaʼi ki te takitaki ʼa te Kolesi Pule? (2) ʼE tou lagolago feafeaʼi ʼi tatatou faifakamafola ki te Kolesi Pule pea mo Sesu?

¹⁷ ʼE toe feala foki ke tou manatuʼi te Kolesi Pule moka tou mulimuli ki ʼana fakatotonu pea mo tana takitaki. ʼE foaki mai e te Kolesi Pule ia he takitaki ʼaki te ʼu tohi, mo te ʼu fono pea mo te ʼu fakatahi lalahi. Pea ʼe ina toe fakanofo mo te ʼu taupau fakasiliko, ʼae ʼe natou toe fakanofo ia te kau tagata ʼafeā. ʼAki te mulimuli lelei ʼa te ʼu taupau fakasiliko pea mo te kau tagata ʼafeā ki te ʼu fakatotonu ʼae ʼe foaki age, ʼe natou manatuʼi ai ia te Kolesi Pule. Pea ʼaki tatatou fakalogo ki te ʼu tagata ʼae ʼe fakaʼaogaʼi e Sesu, ʼe tou fakaha ai ʼe tou fakaʼapaʼapa fuli kia te ia ʼae ko totatou Pule.—Hepeleo 13:17.

¹⁸ Ko he tahi faʼahi ʼe feala ke tou manatuʼi ai te Kolesi Pule, ko tatatou faiga malohi ʼae ʼi te faifakamafola. Ia Hepeleo 13:7, ʼe ʼekenaki ai te kau Kilisitiano ke natou faʼifaʼitakiʼi te tui ʼa natou ʼae ʼe takitaki. Ko te Kolesi Pule ʼe ina fakaha he tui ʼe malohi ʼaki tana faʼa fai ʼi te faifakamafola pea mo tana lagolago ki te logo lelei. ʼE tou lagolago koa ki te ʼu tehina ʼaia ʼi te gaue maʼuhiga ʼaia? Kapau koia, pea ʼe tou fiafia anai ʼi te ʼu palalau ʼaeni neʼe fai mai e Sesu: “Ko he meʼa pe neʼe kotou fai ki ʼae ʼe veliveli ʼi ʼoku tehina ʼaeni, neʼe kotou fai kia te au.”—Mateo 25:34-40.

19. He koʼe ʼe ke fakatotonu ke ke mulimuli ki totatou Pule ʼae ko Sesu?

¹⁹ ʼI te temi ʼae neʼe toe liliu ai ia Sesu ki selo, neʼe mole ina liakī ʼana tisipulo. (Mateo 28:20) ʼI tana kei nofo ʼi te kele, neʼe iloʼi e Sesu neʼe tokoni ia te laumalie maʼoniʼoni, mo te kau ʼaselo pea mo te Folafola ʼa te ʼAtua kia ia ke ina fakahoko ʼona maʼua. Pea ʼe toe tokoni feia pe ki te tagata faifekau agatonu. Ko te Kolesi Pule ʼe haga “mulimuli ʼi te Akeno,” ia Sesu, “ ʼi te ʼu potu fuli ʼae ʼe alu ki ai.” (Fakaha 14:4) Koia, ka tou mulimuli ki te takitaki ʼo te Kolesi Pule, ʼe tou mulimuli ki totatou Pule, ia Sesu. Kua ina vave taki pe anai tatou ki te maʼuli heʼe gata. (Fakaha 7:14-17) Pea ʼe mole feala ki he pule fakatagata ke ina fakapapauʼi mai he aluʼaga feia.