Ko te Kolesi Pule ʼe ko te kiʼi kutuga ʼo he ʼu Kilisitiano fakapotopoto pea ʼe natou takitaki te kau Fakamoʼoni ʼa Sehova ʼi te malamanei katoa. ʼE fakahoko e te Kolesi Pule te ʼu gaue ʼaeni ʼe lua:

• ʼE natou teuteuʼi te ʼu manatu Fakatohi-tapu ʼae ʼe maʼu ʼi te ʼu tohi, mo te ʼu fono, pea mo te ʼu fale ako ʼa te kau Fakamoʼoni ʼa Sehova.​—Luka 12:42.

• ʼE natou takitaki te gaue fakamalamanei ʼa te kau Fakamoʼoni ʼa Sehova ʼaki tanatou fakatuʼutuʼu te gaue faifakamafola pea mo te tokaga ki te fakaʼaogaʼi ʼo te ʼu meʼa ʼofa.

ʼI te ʼuluaki sekulo, neʼe toʼo e te “kau apositolo mo te kau matuatua” ʼi Selusalemi ni tonu maʼuhiga ʼo ʼuhiga mo te kau Kilisitiano fuli. (Gaue 15:2) ʼE toe mulimuli pe te Kolesi Pule ki te faʼahiga fai ʼaia. Ohage ko te ʼu tagata agatonu ʼaia ʼo te temi muʼa, ko natou ʼae ʼe kau ki te Kolesi Pule ʼe mole ko te ʼu pule ʼo tamatou kautahi. ʼE natou kumi te takitaki ʼae ʼe haʼu mai te Tohi-Tapu, he ʼe natou iloʼi neʼe hinoʼi e Sehova ia Sesu Kilisito ko he Pule ki te kokelekasio.​—1 Kolonito 11:3; Efeso 5:​23.

ʼI te mahina ʼo Sanualio 2018, ko natou ʼae ʼe kau ki te Kolesi Pule ʼe ko Kenneth Cook, Samuel Herd, Geoffrey Jackson, Stephen Lett, Gerrit Lösch, Anthony Morris, Mark Sanderson mo David Splane. ʼE natou gaue ʼi te ʼu pilo lalahi ʼa te kau Fakamoʼoni ʼa Sehova ʼi Warwick, ʼi New York, ʼi Amelika.

Neʼe fakatuʼu e te Kolesi Pule ia komite ʼe ono ke tokaga ki te ʼu gaue kehekehe ʼa te kau Fakamoʼoni ʼa Sehova. ʼI te ʼu komite ʼaia, ʼe kau ki ai he tahi ʼo te Kolesi Pule.

• Komite ʼo Te ’u Kootinatea: ʼE tokaga ia ki te ʼu fihi mo te lao pea mo te ʼu aluʼaga fuli ʼe hoko ki te kau Fakamoʼoni ʼa Sehova (tuʼutamaki fakanatula, fakataga ʼuhi ko tanatou tauhi, mo ʼihi atu.)

• Komite Ki Te Hahaʼi Gaue: ʼE tokaga ki te ʼu fakatuʼutuʼu ʼe fai ʼo ʼuhiga mo natou ʼe gaue ʼi te ʼu filiale.

• Komite Ta Tohi: ʼE tokaga ki te ta mo te tufa ʼo te ʼu tohi Fakatohi-tapu pea mo te laga ʼo te ʼu fale fono, mo te ʼu pilo faifakaliliu pea mo te ʼu filiale.

• Komite ʼo Te Gaue: ʼE tokaga ki te fakatuʼutuʼu ʼo te fakamafola ʼo te “logo lelei . . . ʼo te Puleʼaga.”​—Mateo 24:14.

• Komite ʼo Te ʼu Akonaki: ʼE tokaga ki te ako fakalaumalie ʼae ʼe foaki ʼi te ʼu fono, mo te ʼu fale ako, pea mo te ʼu polokalama audio mo viteo.

• Komite ʼo Te Faitohi: ʼE tokaga ki te teuteuʼi ʼo te ʼu ako fakalaumalie ʼae ʼe ta pea mo ʼae ʼe ʼi te tuʼasila ʼa te kau Fakamoʼoni ʼa Sehova. ʼE toe tokaga ki te gaue faifakaliliu.

ʼO mole gata pe tanatou gaue ki te ʼu komite ʼaia, kae ʼe toe fono te Kolesi Pule ʼi te vahaʼa fuli ʼo vakavakaʼi te ʼu aluʼaga ʼae ʼe ʼaoga ki te kautahi ʼa te kau Fakamoʼoni ʼa Sehova. ʼI te ʼu fono ʼaia, ʼe natou vakaʼi te manatu ʼae ʼi te Tohi-Tapu pea mo tuku ke takitaki natou e te laumalie maʼoniʼoni, ke natou tonu tahi ʼo ʼuhiga mo te ʼu tonu.​—Gaue 15:25.

ʼE ko te ʼu Kilisitiano ʼe tuha mo te falala ʼae ʼe tokoni ki te Kolesi Pule ʼi te ʼu komite. (1 Kolonito 4:2) ʼE ʼi ai ʼonatou fealagia mo tonatou faiva ʼi te ʼu gaue ʼae ʼe takitaki e te komite ʼae ʼe natou gaue ki ai. ʼI te vahaʼa fuli, ʼe natou kau ki te fono ʼo te komite ʼae ʼe natou gaue ki ai. Logo la ʼe mole ko natou ʼae ʼe toʼo he ʼu tonu, kae ʼe natou foaki ni tokoni mo ni manatu maʼuhiga. Tahi ʼae meʼa, ʼe natou faiga ke fakahoko te ʼu tonu ʼaia mo te komite pea mo vakaʼi ʼona fua. ʼE feala ke hinoʼi natou e te Kolesi Pule ke natou olo ʼo ʼaʼahi te kau Fakamoʼoni ʼa Sehova ʼae ʼi te ʼu fenua kehekehe ʼo te malamanei pea mo kau ki te ʼu fakatahi lalahi ʼae ʼe fai ʼi te taʼu fuli pea mo te foaki ʼo te ʼu pepa ʼo te Fale Ako ʼo Kileate.