1. Johova konganem alamb bol nalmal pisem?

 JOHOVA konganem ga ya mala meim nawal ende enjep bol min wonom, olom kansikerem. Kenem kapismen kunum mo wandil simen kunum, olom pilkane enem. (Sng. 37:18) Ala ombun ende min wondo kenem ombol ere kauwo Johova bol kameimen, olom kenem bol kawei pisem! Embe esmen bar, olom kapile kenem pakero kumbol amin ngonom.

2. Alamb ende kumbol keswei meim, Johova enjep bol nalenem? Ala embe enem bar, kenem nalmal pake simen?

² Buk Song 147:3 dom, alamb ende kumbol keswei meim, kumbol amin ngo ‘kisngamb bokironom.’ Ombun ende min wo erkelde kenem kumbol kes meim kunum, Johova kenem bol nalmal pisem mal, skripsa e nepenem kerem. Ba Johova kenem kantawol enda nepinjin dal, kenem nawal enamen? Yu ekin ende omukro kandpe. Dokta ende sape panda kesrom alamb wusngam kanem kanem ombol ere, olom pakeronal ne enda. Ba kesrom alamb pake sinal nepim dal, dokta ninda yu mane karkar enda. Yu duwom pi enamen bar, yipe ya mala meimen bar alamb kumbol ombun sim mem ombun kauwum mal Johova yu nekem Baibela paim kanamen, ala Johova kenem kanka kane bunuman ka ngonom nalmal karkar enamen mal, kanamen eri.

JOHOVA KENEM WAL KERMA MAL KANJ PADOM

3. Nalende alamb pende kin wal kisi mal meimen nepisim?

³ Yipe ya mala nomolpa esmen bar, alamb puli alamb ende  kanka nakanim. Ambanjen ende kangem Elen a embe nim: “Na yaumin wond bar pemili na kanka nakanjip. Na dana yu omblombol kunum kunum ne, nim konganem kanapam panine erim.” Elen bol wal min wom mal, alamb ende nim mambnem kes erngo, kunum kunum yu kes nengonjup dal na kanka kanam napadom nepisel.

4. Buk Song 34:18 dom mal, alamb ende kumbol kes meim Johova enjep bol nalmal pisem, ala yu dongal ne nawal enal padom?

⁴ Alamb nim bol mambnem kes erngonam ba nim pilkane endel, Johova nim wei pilngo, ala kankawei wei kanem. “Alamb ende kumbol keswei meim, olom enjep bol mand meim.” (Buk Song 34:18 gere.) Na “wal kisi mal” ende mei nepin dal, pilkane ende Johova nim mambnem ka pende kanem ala erkelde nim se olom bol mand pundol. (Jon 6:44) Olom nim kankawei wei kanem embe pile, nim pakeronal ne ernombro meim.

5. Alamb ende si wal kisi mal pakjip, Jises enjep bol mambnem erim bar, kenem nawal duwom esmen?

⁵ Jises mambnem pende erim bar Johova nal nepisem mal, kenem tane ngonom. Jises woya mala mom kunum, alamb ende si wal kisi mal pakjip, olom pilkane ere enjep bol mambnem ka erngom. (Mat. 9:​9-12) Amb ende ambra kes ombun kanan kaumom, pu Jises kondos ambilne kes aina porninda nepim. Embe erim bar Jises kumbol amin sinda yu ne nim pilgi dongal pam panim, yu nangom. (Mak 5:​25-34) E, olom Dam mambnem karkar erim. (Jon 14:9) Embe pile pilkane endel, nim mambnem ka pende paim ala Johova nim wal kerma mal kanem. Olom kin pilgi ne kanka mem tadon pilkane enem eri.

6. Na wal kisi-mal mei nepin dal, nal endel?

⁶ Nanam wal kisi mal mei ne anjngo buro pindal, nalendel? Baibel ende geri Johova nim wal  kawei wei mal kanim pamdal, mane buro pisel. b (Sng. 94:19) Nim mak pakin wal erse min napun, ala alamb ende wal esim mal nim enal ne enen kaple nanem, embe pamdal nenem bol popol kes nasindel. Endel kaple nanem wal Johova endel nenapisem. (Sng. 103:​13, 14) Alamb ende nim erkes erngonjup dal, min wonom wal nam alla paim nenapisel. E, nim alla napaim! Pilkane endel, mambnem embe esim Johova enjep topum ngonda, nim ma. (1 Pita 3:12) Sendra, ngal kerei mom kunum, alamb ende olom erkes erngonjup. Olom embe nim, “Na kunum kunum yane wusngama Johova ki si, na mambnem ka pende nim kanen mal, na pakeroi nanam pilkane enal panind.”

7. Wal pende kombe kenem bol min wom, nalmal pakerondo Johova konganem enamen?

⁷ Johova nim konganem ende alamb ende pakerondol, bunuman tal nasindel. Angjen ambanjen man bol Baibel yu neori keren, olom nim bol kapisem. (1 Kor. 3:9) Nim nomolpa erin bar wal pende nim bol min wom, pakerondo alamb ende nalmal pisim mal pilngo wandil gorol. Nim wal puli ere enjep pakerondol. Elen, yubol to sikenjin ambanjen, olom alamb ende bol pake sim, ala yipe alamb ende pakeronda ernombrom. Olom embe nim: “Komna, na ‘wal kisi’ mal mei nepilpile erind ba, Johova erkelde na kapile mei ala na konganem ere alamb ende pakerond.” Yipe Elen kapile kongan painia enem.

JOHOVA KENEM ALLA WAKRONOM NEPISAMEN NEPISEM

8. Aisaia 1:​18, Johova kenem nal eiya dom?

⁸ Johova konganem ga nol panjip mo napanjip kunum yero, sin pende enjip mal buroyem kel pisim kunum, kawei napisim. Ba Johova kenem kanka kane ngalem dingeri kem wo golo kenem sin wakrom bar, pilawur wei nanindel, olom kenem bol kapile embe erim. Weieri, Johova kenem alla wakronom nepisamen. Kenem sin ende ere “kumbol to akronjin dal,” c pilkane enamen Johova weieri kenem sin wakronom. (Aisaia 1:18 gere.) Kanka Danjen Johova kenem komna sin enjin buro napisem, nalerim, olom kenem kanka kanem! Ala kenem wal ka pende esmen, olom pilauwur nadom eri.—Sng. 103:​9, 12; Hib. 6:10.

9. Nalende kenem ombol ere yipe wal esmen na mibulto wal min wonda mal buro pile, kombe sin enjin wal buro napisamen?

⁹ Nim yero sin erin buro pile kumbol mul sindal, ombol ere yipe wal enen mal na, mibulto wal min wonda mal buro pile, kombe erin wal buro napisel. Aposol Pol bol wal pende min wom mal omukro kandpe. Olom komna Kristen monjup sikro to erkes erim mal buro pim kunum, nalernge embe erind ne keswei pim, ba olom pilkane erim Johova olom alla weieri wakro sikem. (1 Tim. 1:​12-15) Olom kombe erim wal anjngo buro pim mo? Ma, olom embe narim, ala komna Parasi mom kangem kerma pam mal, buro yemkel napim eri. (Fili. 3:​4-8, 13-15) Pol kumbol weingo Baibel yuka neori kel, mibulto wal min wonda mal buro pim. Aposol Pol erim mal, kombe nim bol wal min wom erkun endel kaple nanem. Ba yipe nomolpa enen bar Johova kangem ambil min kele, ala olom yu dongal ne wal ka mibulto min wonda padom mal buro pisel.

10. Nim kombe wal pende erin bar alamb ende kumbol tokes mokun pamdal, nalendel?

¹⁰ Nim komna wal pende ere alamb ende kumbol tokes mokun bar buro pisen kunum, keswei pisen. Nawal nim pakeronda? Endel panda wal ere ala kumbol tokes mokun alamb mora bar, wandil pane ngondol. (2 Kor. 7:11)  Ala kumbol tokes mokun alamb Johova ki si olom pakera nindel. Embe endel bar Johova elep ai pakero kelde akilgi ne kumbol amin morambel.

11. Propet Jona bol wal pende min wombar, kenem nawal duwom esmen? ( oriro ngimba piksa pra kane.)

¹¹ Nim yero alla erin bar duwom ere, kapil kankeli Johova nim konganem enda. Propet Jona bol wal pende min wom mal omukro kandpe. Johova, Jona se Ninive panim, olom yu tokele kese jel pum. Olom embe erim ba, Johova yu ne olom erkun ernge alla erim bar duwom erim. (Jna. 1:​1-4, 15-17; 2:​7-10) Johova, Jona bol wimuk nane ala se Ninive pundol panim kunum, olom Johova yu nim pile karkar erim. Olom alla erim bar kankelnge Johova kongan ngom si, enda bar kolnarungum.—Jna. 3:​1-3.

JOHOVA MURMULOM DONGAL WUSNGAMA KENEM KUMBOL AMIN NGONOM

12. Kenem ombun ende kaumon mo alamb ende gosum kunum, Johova kenem kumbol amin nalmal ngonom? (Filipai 4:​6, 7)

¹² Kenem ombun ende kaumon mo alamb ende gosum kunum, Johova murmulom dongal wusngama kenem kumbol amin ngonom. Ron na Karol bol wal pende min wom mal omukro kandpe. Enjel ngaljel kongar 39-mom kunum, olom olom kil kambaning to gom. Enjel embe ninjil: “Kombe kil ombun puli wei kaujil, ba yipe e ombun keswei min wom. Emilpal kunum puli kil wur panambel kaple narim, embe pile kil Johova bol yane nine enjil, ala Filipai 4:​6, 7 yu pam weieri kil kumbol amin ngom.” (Gere.) Ombun ende nim bol min wo erkelde nim kumbol kes momdal, nalmal pisen mal yane wusngama Johova kun nengondol. (Sng. 86:3; 88:1) Johova murmulom dongal nga ne anjngo ki sindel. Embe endel bar Johova nim bulngo kannasikera, olom nim pakeronda.—Luk 11:​9-13.

13. Johova murmulom dongal kenem nalmal pakero kelde, olom anjngo lotu erngo kamoramen? (Efesus 3:16)

¹³ Ombun kerma ende min wo erkelnge nim dongal porninge wimuk nin mo? Ba Johova murmulom dongal nim dongal ngondo olom bol kamol anjngo lotu endel. (Efesus 3:16 gere.) Ambanjen Plora bol wal pende min wom mal omukro kandpe. Olom andam bol misinari kongan enjil, ba andam olom bol kanamom, embe pile bolsinjil mem kelipronjil. Olom embe nim: “Na kumbol ombun keswei sind nalerim, olom na bol kanamom. Ala e erkem na wal pende enal kaple narim. Na Johova bol yane ne ki si, nim murmulom dongal na ngoni akilgi ne ombun e kaunal panind. Johova na ambsik pam wal ngo pakerom erkelnge, komna enal kaple narim, ba yipe akilgi ne ombun e kaunal kaple enem.” Ala na pilkane erind Johova na pakerom, embe pile mibulto nal ombun ende min wonda olom na pakeronda ne pilgi nind. Olom yu pende embe nim: “Buk Song 119:32 yu na bol kun pam: ‘Nim yunom na karkar enal nalenem, nim na sape pende pra ngonon.’”

14. Kenem nalmal kankelpe Johova murmulom dongal kenem pakeronda?

¹⁴ Johova murmulom dongal nga ne ki si sinen kunum, nawal pende endel? Nim pakeronda wal pende erkankeli, Johova murmulom dongal nim bol anjngo konganem enda. E embe mal, kongrikeisen make panda bar pundol, ala Baibel yu neori kerel. Ala kunum kunum Johova Yuwom Baibela meim gerdel pakero kelde, olom bunuman paim mal pilkane endel. (Fili. 4:​8, 9) Nim Baibel gerdel kunum, kombe ga ombun enjep bol min wongo Johova enjep nalmal pakero kelnge, ombun kauwo akilgi ninjip mal buro pisel. Sandra, yero boltonjin, olom ombun puli kauwum erkelnge nomolpa erim bar pesil wei pam. Olom embe nim: “Josep yu bolom Baibela paim weieri  na pakerom. Ombun na wal pende olom erkanja min wom ba, Johova bol kamom mem waknarom.”—Stt. 39:​21-23.

JOHOVA ANGJEN AMBANJEN MAN KONGANEM ERKELDE KENEM KUMBOL AMIN NGONAM

15. Kolosi 4:11 dom mal, pilgi ding angjen ambanjen nalmal kenem kumbol amin ngonam? (Piksa pra kane.)

¹⁵ Kenem ombun kaumon kunum, pilgi ding angjen ambanjen man kenem “pakero kumbol amin ngom.” (Kol. 4:11) Embe esim bar, Johova kenem nalmal kanka kanem tadom. Enjep kunum kele kenem nalmal pismen mal yu nimen komol kase pisim kunum, kenem kumbol amin simen. Ala ende, kenem pakeronda Baibel wes ende nim, mo kenem bol yane ai nim kunum kumbol amin simen eri. d (Rom 15:4) Kunum pende ne angjen ambanjen man, Johova kenem bol nalmal pisem mal nengonam kunum, kenem dongal ngondo ombun ende min wonda kauwo akilgi ninamen. Pilgi ding angjen ambanjen man wusngam jeljel karkar ere kenem pakerom, ende mokun ngom erkelde kenem kawei pismen eri.

16. Alamb ende bol pake sinamen nepinjin dal, kenem kenem nawal enamen?

¹⁶ Pilgi ding angjen ambanjen kenem pakeronam nepinjin dal, enjep kisinamen. Enjep kenem kakane pakeronamen nepisam. (Prov. 17:17) Ba kenem nalmal pismen na  nawal ambsik paim, enjep pilkane nasim. (Prov. 14:10) Embe pile nim kumbol mo bunuman ende kes momdal, tapka ga bol nalmal pisen ne enjep ngondol. Ala nalmal nim pakeronam mal nengondol eri. Elda ding mo tal ende nim nalmal pisen mal pra ne enjep ngondol. Ambanjen man pende pu ambanjep ende kongar seminro pum mombar, yu nepake sinjip.

17. Nawal pende erkelde alamb ende bol pake sinamen ne enamen pesil panda? Ala nalmal ere bunuman embe tomene keramen?

¹⁷ Kunum kele angnem ambanem man bol tapkaro, nem opinj moral nenandel. Nalenem, nim kumbol na bunuman keswei mora kunum, alamb ende bol tapro yu nindel kanapisel. Embe endel bar erkelde, angnem ambanem man nim nalmal pisen mal buro napile yu napam mal ninam. (Jems 3:2) Wal embe mal kankeli nim pake sindel ambsik paim kolnarungda. Elda ende kangem Gavin, olom bunuman puli kesim kes sim angjen embe nim: “Kunum puli tapding ga bol yu ninal kanapilpile erind.” Embe pamba, Gavin ombol ere pilgi ding angam man bol taprom bar, olom pake sim. Ambanjen ende kangem Ami, embe nim: “Komna nanam bol wal pende min wom erkelnge, alamb ende bol pilgi ninal pesil pam. Ba na ombol ere Johova pilgi ding angna ambana man nalmal kanka kane enjep bol pilgi dom mal, duwom ere embe ding mal erind. Embe erind bar pilkane erind, Johova kapim, e erkelnge nanam kapinj eri.”

JOHOVA YU DONGAL NE WALKA MIBULTO NGONAL PADOM KUMBOL AMIN NGONOM

18. Yipe nawal ere wal ka mibulto min wonda bar, kui enamen?

¹⁸ Kenem yipe wal min wo erkelde kumbol na bunuman kes meim, mibulto Johova ombun porpor toporne sikera nepilgi wei ninamen. (Rev. 21:​3, 4) Kunum ele kombe wal min wom bar, ala “buro yemkel napisamen.” (Ais. 65:17) Ba pilkane esmen, ‘yipe ombun pende kaumon, Johova kenem pakero kantawol enem.’Johova kenem wal puli ngo pakero kumbol amin ngonom. Wal embe enem bar nim pilkane endel, “Johova weieri nim pilngonom.”—1 Pita 5:7.