1. Pilgi dongal pam Got konganem ga komna monjup, Johova enjep nalmal dongal ngom?

 GOT YUWOM Baibel a meim kunum puli, pilgi dongal pam ga Got bol komna ka monjup dongal kerma sinjip padom. Ba dongal kerma pam ga, kunum kunum dongal namonjup. Ende embe mal, wal pende min wom bar King Depit dongal kerma kimbem mal embe pam. “Ba wal pende min wom bar olom kisal keswei gom.” (Sng. 30:7) Ala Samson, Got murmulom dongal olom bol mom kunum, dongal kerma pam ba oli spirit mo murmulom dongal olom bol namom kunum “dongal porninge alamb bol ding mal mom.” (Het. 14:​5, 6; 16:17) Johova mongse dongal ngongo, pilgi dongal pam ga dongal sinjip.

2. Nalerange aposol Pol dongal mond, ala dongal pornim eri panim? (2 Korin 12:​9, 10)

² Aposol Pol pilkane erim, olom Johova bol dongal sinda ambsik pam. (2 Korin 12:​9, 10 gere.) Kenem puli keswos tondo ombun kaumon mal, Pol ding mal kauwum. (Gal. 4:​13, 14) Kunum pende ne olom ombol ere, wal pam mal enda pam. (Rom 7:​18, 19) Kunum pende ne, na bol nawal min wondo ne pil kisal golo, bu puli kem eri. (2 Kor. 1:​8, 9) Embe pim ba, olom dongal pornim kunum dongal kerma wei sim. Nalmal dongal kerma sim? Johova, Pol dongal sinda ambsik pam dongal ngongo, si ombun wom kauwo akilgi nim.

3. Yipe yu duwom enamen bar, nal ki pende pundom sinamen?

³ Kenem pra, Johova dongal ngonal pane yu dongal nim. (1 Pita 5:10) Ba kenem dongal ngonda ne ei namoramen, wal pende ere dongal e sinamen. Yu ekin ende pisamen, kar enjin kongan ende kar punda. Ba kar ambrem ye, exselereta kambelde punal nepisem bar kar punda. Embe ding mal, Johova kenem dongal ngonal ne olom erkun er meim, ba kenem wal pende ere  dongal e sinamen. Johova nawal pende, kenem er dongal enda wal ngonom? Ala kenem nawal pende er dongal e sinamen? Kenem ki embe mal pundom sinamen, Johova nalmal ga talende dongal ngom, yu boljop Baibel a meim omukro kanamen—e propet Jona, Maria, Jisas mam na aposol Pol. Ala yipe kenem kunum, Johova nalmal olom alambem man anjngo pakero dongal ngonom mal omukro kanamen.   

4. Kenem Johova bol dongal nalmal er sinamen?

⁴ Wusngam ende kenem Johova bol dongal sinamen e, yane ninamen. Kenem yane ninamen bar, Johova kenem alamb dongal napam “mal dongal kerma ngo seminro punda.” (2 Kor. 4:7) Ala olom Yuwom Baibel a meim gere, mane buro yem kel pisamen bar dongal sinamen. (Sng. 86:11) Johova Yuwom kol pam ala “dongal kerma pam.” (Hib. 4:12) Nim Johova bol yane ne, Yuwom Baibel a meim gerin dal, nim sindel ambsik pam dongal e ngondo akilgi nindel, kapile morol, mo kongan endel kaple nanda kongan er kaple endel. Johova propet Jona, nalmal dongal ngom omukro kanamen.

5. Nalernge propet Jona dongal sinda ambsik pam?

⁵ Propet Jona dongal sinda ambsik pam. Olom Johova pesil pam kongan ende ngom bar, sikele ke pum. Olom embe erim bar, komb ipjinkapjin tongo apnol yu napim kunum, olom kolmem wak tonange, ala sip ai punjup ga pra. Olom sipa sikro ori kenjip kunum, komna ende na wanem kulu tuwal pum —pis kerma ende olom si ol kelnge kumblom tuwalto emil ersem bar pam. Jona olom nal nepim ne pisen? Na ele gor nepim mo? Johova na bul ngonom ne bu puli kera kem mo? Weieri, Jona bunuman puli wei kera kem.

6. Jona 2:​1, 2, 7 dom pilkane esmen, Jona pis kumbol tuwalto pam kunum, dongal sinal ne nawal erim?

⁶ Jona 2:​1, 2, 7, yu pam bar pilkane esmen, Jona alamb nawanjip kulu tuwal pu pam kunum, dongal sinal ne nawal pende erim? Wal ende erim, olom yane ne Johova ngom. (Jona 2:​1, 2, 7 gere.) Olom Johova yu tokem, ba kumbol toak weiro molmene kel yane nim, Johova pisa ne pilgi nim. Ala Jona Baibel wes pende, yero gerim mal mane buro yem kel pim eri. Nalende kenem embe nimen? Nalenem, olom pis kumbol tuwalto pa yane nim yu, Buk Jona sapta 2 a meim kanmen, ding yu Buk Song a pra meim eri. E tane penema kelde kenem pilkane esmen, Jona Baibel yu embe mal pilpol weirom. (Jona 2:​2, 5 na Buk Song 69:1; 86:7 yu meim omukro kanjel.) Olom ombun kes mal embe kauwum kunum, Baibel wes pende olom buro pim pake weirongo, Johova olom pakeronda ne pilgi nim. Bulto Johova, Jona pakerongo pis kumbloma seori wom kunum, nal kongan ende ngo era ninda, enal ne erkun ermom. —Jona 2:10–3:4.

7-8. Pilgi ding angjen ende Taiwan meim, ombun kerma wei kauwum kunum, nalmal dongal sim?

⁷ Jona bol wal min wom kenem pakerondo, ombun kanem kanem ende kenem bol min wonda, kauwo akilgi ninamen eri. Ende embe mal, angjen Jiming, Taiwan meim, olom kes kerma wei ende sim. b Ala wal ende, olom Johova lotu erngom bar maiyam ding ga olom bol opyem keswei enjip, ba olom yane ne Baibel yu duwom erim bar Johova bol dongal sim. Olom embe nim, “kunum pende ne ombun min wom kunum” na “bunuman puli kend. Ala nanam Baibel yu duwom enal kaple narim.” Embe pam ba, olom wimuk ne wak weinarom. “Olom embe nim, yero na yane ne Johova ngond.” “Bulto na etpon pakle Kingdom golang mom kel pinj. Kunum pende ne golang e kikine kelpu  kumbol amin sise erind. Bulto yu duwom ala pulnombol ere ere erind.”

⁸ Jiming olom olom Baibel yu duwom erim bar, pilkane na erim wusngam pende pakero dongal ngongo, ombun kauwo akilgi nim. Ende embe mal, olom kes tom kopisjip kunum bulto, amb nes ende wo nim maiyam pende kaple nameim pile maiyam ngonam panim. Jiming kinimba kopisnam kunum emilpal, pilgi ding ambajen ende olom bol ombun ding mal pam kopisjip, yu bolom pam ger kanim. Ambajen e maiyam apal wei pende molo, olom ngom. Ambajen e kopisjip kunum maiyam nasim, ba bulto kaple erim. Yubol embe mal pam ger kanim, Jiming pakero dongal ngongo pilgi ambilgi nim.

9. Ombun ende min wo nim tomene kemdal, nal endel? (Piksa meim pra kane.)

⁹ Ombun ende min wonom kunum, nim nalmal pisen yane wusngama ne Johova ngondol bar bunuman puli keren mo? Ala nim Baibel yu duwom endel bar, wimuk dom mo? Pilkane endel nawal nim bol min wonom, Johova kanpol weironom. Embe pile, nim yane tambem ende nindel, Johova pilkane enem, nim ambsik paim wal weieri ngonda (Efe. 3:20) Ombun ende nim bol min wonda erkelde, Baibel yu gere duwom endel kaple narim dal, Baibel yu mo Baibel buk na nus gere numun kel kenjip meim komol se pisel. Mo jw.org a pu, golang kel kenjip meim pisel mo vidio meim kanjel eri. Johova nim er dongal enda kapisem, embe pile nim yane ne olom ngo pundom sinal nepin dal, pilgi mokun ngonom Baibel buk na nus meim mane omukro kandal, nim yane pundom ngo er dongal enda.

10. Pilgi ding angjen ambajen man, kenem nalmal er dongal enam?

¹⁰ Johova pilgi ding angjen ambajen wusngama, kenem er dongal enda. Kenem ombun kerma ende kaunamen mo kongan ende si enamen kaple nanda kunum, “enjep kenem pakero dongal ngonam.” (Kol. 4:​10, 11) “Ombun min wonom kunum” senomon ga bol pake sinamen ambsik pam. (Prov. 17:17) Kenem dongal poro dom kunum, pilgi ding angjen ambajen man, kenem nganj wal, kumbola na numana pismen wal, na pilgi wal pakerom. Jises mam Maria, ga pende bol pake sim mal omukro kanamen.

11. Nalernge Maria dongal sinda wal kerma pam?

 ¹¹ Maria dongal sinda ambsik pam. Enjol Gebrel wo olom kongan kerma ende ngom kunum, olom bunuman puli wei kem. Olom ye napum, ba ngal moksa panim. Olom ngal ende kulo tawol ere sewan nakanim, ba yipe bulto Mesaia mora ngal kulo kantawol ka er sewanja pam. Olom ye ende bol wurding napam, embe pile Maria na ngal mokus pane, enjel bol sinabel panijip ye Josep ngonda amin napam.—Luk 1:​26-33.

12. Luk 1:​39-45 dom, Maria pake sinda ambsik pam nalmal sim?

¹² Maria dongal namal ersi, kongan kerma jelmal ende sim e er kaple erim? Olom ga pende bol pake sim. Ende embe mal, olom enjol Gebrel kisi, kongan sind nalmal er kaple enal yu pende eri nenga nim. (Luk 1:34) Ala kunum apal pende bulto, olom kol wusngam “kimbem puli mom bar” puse Juda, maiyam ding Elisabet mom bar pum. Mem kapange olom pum. Got murmulom dongal mi Elisabet bol molngo, Maria ngal ye ngal bulto kangra bar yu ka ne dongal ngom. (Luk 1:​39-45 gere.) Maria embe nim, Johova “olom anglema na bol kongan omblombol enem.” (Luk 1:​46-51) Weieri, enjol Gebrel na Elisabet wusngama, Johova, Maria dongal ngom.

13. Ambajen ende kulu Bolivia meim, pilgi ding angam ambam man kisi pakeroya nim bar nawal ka min wom?

¹³ Maria erim mal, nim lotu ding ga bol dongal sindel eri. Pilgi ding ambajen ende kulu Bolivia meim, kangem Dasuri. Pilgi ding ga bol dongal sinda ambsik pam. Olom dam kes kerma ende sim gora mand erim ausik pam kunum, Dasuri dam bol mand molo, olom kantawol enal nepim. (1 Tim. 5:4) Ba embe kunum kunum enda amin napam. Olom embe nim, “Kunum pende ne na pilkane erind, na kunum kunum olom tawol anjngo er sipnal napam.” Olom ga pende kisi pakeroya nim mo? Ma olom embe narim. Dasuri embe nim, “Na pilgi ding angna ambana man ombun ngonal kanapinj.” Olom embe “nepim, ‘Na ombun pam Jehova kanem, na pakeronda nepim.’ Ba, na ala buro pilkane erind, ombun pam alamb ende ne nangond bar nanam mongse kaunal ne erind mal embe pam.” (Prov. 18:1) Dasuri ala pepe bolo olom senom ga pende, ombun kauwum mal nengom. Olom embe nim, “Pilgi ding ga na pakero dongal ngojup mal, yu ende ninal kaple wei nanem.” “Na ausik pand bar enjep mokun tu ngojup, ala Baibel wes pende tu gere yu ne na kumbol amin ngojup. Ala wal kawei ende kenem pilkane enamen, kenem kenem opinj nameimen. Kenem Johova pemili kerma ende monjup—bar tuwalto meimen. Pilgi ding angjen ambajen man kenem ombun kaumon pake tonam kapisim. Ke ninamen kunum ke ai ninam, ombun kaunamen kunum ombun ai kauwo pakeronambe, Johova lotu anjngo ermol punamen.”

14. Nalende elda kenem pakeronam ne kapisamen?

¹⁴ Wusngam ende Johova kenem dongal ngonom e, elda wusngama. Enjep wusngama Johova nim pakero dongal kol ngonom. (Ais. 32:​1, 2) Embe pile, nim bunuman puli kendal, pisen wal pal ne elda ngondol. Nim pakeronam yu nengojup dal, kapile sangiyo nindel. Enjep wusngama, Johova nim er dongal wei enda.

15. Kristen porpor nawal ka ende sinam ne kui esim?

¹⁵ Baibel-wal kaka min wonda paninde, kenem kui esmen bar dongal kerma simen. (Rom 4:​3, 18-20) Kristen kolnga aimanj moramen ne kui esmen, ku ende ngo topro nasinamen —e, ya mala paradais senda bar moramen mo, semin epen Got Gapman senda bar moramen. Wal ka embe kui esmen pakerondo, ombun wonom akilgi nimen, Baibel yu ka neori kesmen,  ala kongrikeisen tuwalto kongan kanem kanem meim kumbol ngo esmen. (1 Tes. 1:3) Kenem pilgi ne kui esmen ding wal, aposol Pol dongal ngom eri.

16. Nalernge aposol Pol dongal sinda ambsik pam?

¹⁶ Pol dongal sinda ambsik pam. Olom pepe bol Korin Kristen ngom bar, mal si ambil dange wal enjip, onom mal tukurda mal embe mei panim. Ombun “kanem kanem na bol min wom,” “Na nalwal enal kanpol narond,” “na to erkes enjip,” “ala to kenjip mi mala pand eri.” Olom kolmem kantawol enda amin napam. (2 Kor. 4:​8-10) Pol misinari kongan namba 3 erpum kunum, yu e porpor bom. Pol yu e bol sikem kunum bulto, ombun puli pende kauwum eri. Alamb puli wo olom tonjup, to kantonjup, sip pumbar kes molngo ombun sim, ala to karpos kenjip eri.

17. 2 Korin 4:​16-18 dom, nawal Pol dongal ngongo ombun ngojup kauwo akilgi nim?

¹⁷ Pol wal ka mibulto min wondo, sinal ne pilgi ne kui erim wal erkelnge, ombun min wom kauwo akilgi nim. (2 Korin 4:​16-18 gere.) Olom Korin ga nengom, na “nangj kes mora” ba, e erkelde na dongal pornaninda panim. Pol mibulto wal ka min wonda mal, buro pim. Olom kolmem min epen sinal ne kui erim “si wal kerma wei pakim.” Olom ombun na duwom kauwum bar, topom ka ende sinda e, kerma wei pam, kunum kunum senda. Pol mibulto wal kaka, sinda bar buro pim erkelnge, “kunum dingding ne dongal kol sim.”

18. Tiyoma pemili aiyem bol, mibulto wal ka min wonda ne kui enjip bar, nalmal enjep dongal ngom?

¹⁸ Pilgi ding angjen Tiyoma, kulu Bulgaria meim mibulto wal ka min wonda ne pilgi ne kui erim bar, olom dongal ngom. Olom angam akling Strako, kar tongo gom kongar pende wopunom. Wal embe min wom erkelnge, olom kumbol ombun kerma sim. Olom ombun e tomene keral ne pemili aiyem bol, gonjup alamb akil wonambe kansinam mal buro pinjip. Tiyoma embe nim: “Kin pemili bol ne pinjin, Strako akil wonda kunum jebar kanse tapronamen, nal mokun nonda ne erkun enamen, namal wiropo olom akil wondo make ronamen bar  wonda, ala kunum pordom bar meimen, nawal min wonom mal ne olom ngonamen eri.” Tiyoma yu pende embe nim, wal mibulto min wonda ne pilgi ne kui enjin erkelnge pemili pal, ombun min wom kau akilgi nijin. Ala kunum ende sende Johova na angna, si aksa ne kui esmen.   

19. Johova mibulto wal kaka enal pane yu dongal ninde pilgi don, nalmal er dongal endel? (Piksa pra kane)

¹⁹ Nim pilgi ne kui enen wal nalmal er dongal endel? Ende embe mal, nim ya mala Paradais senda bar kunum kunum moral nepin dal, Baibel Paradais senda padom yu meim gere buro pisel. (Ais. 25:8; 32:​16-18) Kunum kol senda kunum, nalmal nomolpa endel mal buro pisel. Nenem tuwal morol mal pisel? Alamb namal kanjel? Nalwal pende yu rangde pisel? Ala nemnem nalmal pisel? Ala pakerondo nim Paradais senda mal kanal ne pindal, Baibel buk na nus meim bar Paradais piksa meim omukro kanjel, mo misik vidio embe mal, The New World to Come, Just Around the Corner, mo Imagine the Time, pane vidio meim kele pilkane endel. Kenem kunum kunum, kunum kolnga senda moramen mal bu dongal to pinjin dal, ombun nal ombun min wonda “kunum apal eri kaumon ne pisamen e, ombun kerma ma.” (2 Kor. 4:17) Johova wal kaka mi bulto min wonda paninde, kui enen erkelde nim dongal morol.

20. Kenem dongal porninde wimuk dom kunum, nalmal dongal kol sinamen?

²⁰ Kenem dongal porninde wimuk dom kunum, “Got kenem dongal ngonda.” (Sng. 108:13) Nim dongal ngonda wal, Johova olom ernombro se nim ngonom. Embe pile, nim kongan ende sinen er kaple enal ne pisel, ombun ende kauwo akilgi ninal nepisel, mo kapile men mem ambilgi ninal nepin dal, yane kumbol ngo ne Johova ngo, nenem Baibel yu duwom ere, se Johova bol mand pu pake sindel. Pilgi ding angnem ambanem man, yu ne dongal ngonam bar pake sindel eri. Ala kunum kunum mibulto min wonda ne pilgi ne kui enen, wal buro pisel. Nim embe erin dal, “Got dongal kerma nim Dongal ngondo, akilgi ne wimuk wamnam nanindel, ala kapile embe endel.”—Kol. 1:11.