1-2. Kenem yane ninamen kunum, nalende bu puli keramen?

 KUNUM pende ne, Johova nim yane pundom ngonda mo ma ne, bu puli kelkele erin mo? Nim embe pin dal nim ding ma. Pilgi ding angam ambanem man puli embe pisim eri, e, ombun kerma ende enjep bol min wonom kunum. Kenem pra ombun duwom ende kaujin dal, Johova yane pundom nalmal ngonom pilpol tonamen kaple nada.

² Ba, nalende Johova lotu er ngom ga yane nim, olom pundom weieri ngonom mal omukro kanamen. (1 Jon 5:15) Ala kenem ki tal e, omukro kanamen eri: 1. Nalende kunum pende ne, kenem yane nimen Johova pundom nangom ne pisamen? 2. Yipe kunum, nal wusngam pende Johova yane pundom ngonom?

3. Nalende Johova kenem yane ne, olom ngonamen ne pisem?

³ Baibel taninde pilkane esmen, Johova kenem kankawei wei kanem, ala olom dungola wal kawei ende meimen. (Hag. 2:7; 1 Jon 4:10) Mem e pande, olom kenem yane ne ki sinambe pakeronal padom. (1 Pita 5:6, 7) Kenem pakerondo ombun duwom wonda kauwo akilgi ne, se olom bol mand punamen ne pisem.

4. Kenem nalmal pilkane esmen, Johova olom lotu er ngom alamb yane nim pile, pundom ngonom? (Piksa pra kane.)

 ⁴ Kenem Baibel gere kanmen, Johova lotu er ngojip alamb yane ninjip pundom ngom mal yubol meim. Nim yubol ende pisen mo? Ende King  Depit, olom bol opyem enjip alamb puli monjip. Embe pile, kunum kunum yane ne Johova pakera nim. Kunum ende olom Johova ki si embe nim: “O Johova, na yane nind pile, na wirond nim komol se pile na pakero. Nim don yu karkar enen ala mambnem ainem dulto paim, embe pile na wirond nim pile.” (Sng. 143:1) Johova, Devit yane nim pile pakerom. (1 Sml. 19:10, 18-20; 2 Sml. 5:17-25) Depit pilgi wei ne embe nim: “Alamb ende Johova wirom, olom enjep bol mand bol pakeronom.” Kenem weieri pilgi ninamen, Johova mand meim pakeronda ne pisamen.—Sng. 145:18.

5. Komna Johova lotu er ngojip alamb, yane ninjip enjep pundom ngonda ne pinjip mal ngongo erim mo? Wal ende min wom mal yubol to. (Piksa pra kane.)

⁵ Johova kenem yane pundom ngonda ne pismen mal, nangonda. Aposol Pol bol wal embe min wom. Olom Got ki si, “nel ende na nganja mul bol paim sikela nim.” Kunum talende jeljel, Pol ombun kerma kauwum mal kun yane nim. Olom yane nim Johova pundom ngom mo? Weieri pundom ngom, ba Pol ngonda ne pim mal nangom. Johova olom ombun to pornanim ba, dongal ngongo olom ombun e kauwo, Got kin ka molo konganem anjngo erim.—2 Kor. 12:7-10.

6. Kunum pende ne kenem yane ninjin, nalende Johova pundom nangom ne pismen?

⁶ Kenem pra kunum pende ne, yane pundom sinamen ne pismen mal nasinamen. Ba, kenem weieri pilgi ninamen, Johova wusngam ka karkar ere kenem pakeronda mal pilkane enem. “Got mambnem ka er se minto pu, kenem pilkane ere ki simen wal ngonom.” (Efe. 3:20) Mem embe paim pile, kenem yane pundom Johova nangonda ne pismen wusngam ngonda.

7. Nalende kunum pende ne kenem yane nimen, wusngam ende karkar er ninamen? Wal ende min wom mal yubol to.

⁷ Kenem Johova ka pisem wal kanpol tonjin dal, yane nimen bar kenem kenem ka pismen wal sikele, olom ka pisem mal ninamen. Wal embe mal angjen Matin Potsinger bol wal min wom mal omukro kanamen. Angjen Matin Potsinger, amb kollnga sim kanan napungo, Nazi ga olom to sip karpos kenjip. Olom yero yane nim bar, Johova na keli seori pu Baibel yu neori kele ambina kantawol  enal panim. Ba wakan tal bulto, olom omukro kanim Johova kolto kere olom seori punda napam. Embe pile, ala yane nim bar embe nim: “Johova, kaple ende nim na enal ne ka pisen wal, tani kanal panim.” Yane embe ne pakle, bulto pilgi angam man karpos gar tuwalto nalmal monjip, buro pim. Angam man puli ambijen ngaljep man pile, bunuman puli kele wandil wei sinjip. Angjen Potsinger ala yane embe nim: “Johova, na kongan kollnga ngonon bar ka pis, na pakeroi kongan e ere pilgi ding angna man er dongal enal.” Olom kongar 9-poro enal panim kongan, karpos gar er kaple wei erim!

8. Kenem yane ninamen kunum, nawal kerma ende buro pisamen?

⁸ Kenem pilkane esmen Johova enal ne ka pisem wal, enge er kem seim kunum kun min wondo enda. Olom enal ne ka pisem, ombun duwom yipe pande kauwo nganj ngimbil simen, anjanj toporo ne sikera—pende embe mal nolmal bo na ombun pende, keswos na gosmon mem, ombun porpor olom Gapman wusngama toporo ne sikera. (Dan. 2:44; Rev. 21:3, 4) Embe enda ba, yipe kunum Johova kankere Satan mal tawol er meim. b (Jon 12:31; Rev. 12:9) Alamb bol ombun yipe paim Johova to sikera kere, enjep Satan mal tawol ka enem ne pisam. Embe pile, Johova enal padom wal enda ne kui moramen kunum, olom kenem bul ngo sikerem ne napisamen. Pi wusngam pende, Johova kenem pakeronom mal omukro kanpe.

9. Kenem wal kerma ende enamen pisamen bar, Johova kenem nalmal pakeronda? Yubol to.

⁹ Olom kenem bunuman ka ngonom. Johova yu dongal ne, enem enam ambsik paim wal, bunuman ka ngonon, omuk karonam padom. Kenem Got bol bunuman ka si wal omuk karojin dal, nomolpa enamen bar woka punda, ende embe mal komjil moram mo ende bol, bolsinamen. (Jems 1:5) Ambajen amb gal Maria bol wal min wo mal, buro pisamen. c Olom kongan painia kapil ere molo, angjen ende bol senom. Olom embe nim: “Kil seno molo ende ende kankawei kanjil. Na nalmal enal omuk karonal pam. Embe pile, na yane omblombol nine, Johova na pakero bunuman ka ngondo, wal omuk karonal ne erind. Johova na pakeronda ne pinj, ba pilkane erind olom na wal embe embe era, ninda napam.” Ambajen yane nim Johova pile bunuman ka ngom. Ba nalmal embe erim? Olom ki pende pange pundom sinal ne pim, kenem buk na nus mom bar kun tuwal pu, kannge olom pakerom. Ala olom mam pilgi dongal pam amb yu nim, pilsi karkar erim eri. Maria embe erim pakerongo wal omuk karom.

10. Filipai 4:13 dom, Johova olom lotu er ngom alamb, nawal pende ere pakeronom? Wal ende min wom mal yubol to. (Piksa pra kane.)

¹⁰ Olom dongal ngondo, kenem ombun kauwo  akilgi nimen. Johova aposol Pol dongal ngom mal, kenem pra pakero dongal ngondo, ombun wonda kauwo akilgi ninamen. (Filipai 4:13 gere.) Angjen ende kangem Benjamen, olom bol ombun kerma pende min wongo, Johova nalmal pakero dongal ngongo, akilgi nim mal omukro kanamen. Angjen Benjamen ngal mom min wom kunum, olom pemili ainem bol kunum puli Aprika tuwalto, alamb wandlem wo gar tau molmolo enjip bar monjip. Olom embe nim: “Na kunum kunum yane ne Johova ngo ki si, pakeroi nim ka pisen wal enal panind. Johova na yane nind pundom ngo er kelnge, bunuman amin senge kumbol dongal pange, Baibel yu kunum kunum neori kend, ala buk na nus ngom bar er kelnge pilgi wal dongal mond.” Olom yu pende embe nim: “Johova Witnis lotu ding ga pende, Johova pakerongo akilgi ninjip mal, yu boljop mom ger kanj nam pakerongo pilgi wal dongal mond.”

11-12. Johova nalmal kenem pilgi ding angjen ambajen man wusngama, yane nimen pundom ngonda?

¹¹ Olom kenem pilgi ding angjen ambajen man konganem ere yane, pundom ngonom. Jises to goram kunum mand erim bar emilpal, olom yane omblombol wei nim. Olom yane nim bar Johova ki si, nim er keli alamb na nim kangem tokes mokuj ye ne napisam panim. Olom yane embe nim kunum, Johova enjol ende kelnge wo, Jises pakero dongal ngom. (Luk 22:42, 43) Johova kenem pra pilgi ding angjen mo ambajen ende, wusngama yu ne kenem pakero dongal ngonda. Kenem porpor wusngam ende apis kem dal, pilgi ding ga bol “yu ka ninamen.”—Snd. 12:25.

¹² Ambajen ende kangem Meriyem bol wal min wom mal, omukro kanamen. Olom andam gom wakan pende wopum kunum bulto, olom gara opinj mom wandil si bunuman puli kem eri. Olom ke puli nim ala alamb ende bol yu ninal ne pim eri. Ambajen embe nim: “Na dongal napam ring kele ende bol yu ninal napam pile, yane ne Johova ngond. Na ke ne yane ne mond kunum, elda ende na ring kem.” Meriyem elda e, ambiyem bol yu ninjil bar kumbol amin sim. Olom weieri pilgi nim, Johova er kelnge angjen e olom ring erim.

13. Kenem yane nimen kunum, Johova olom lotu er nangom alamb wusngama kenem nalmal pakeronom?

¹³ Olom lotu er nangom alamb er kelnde  kenem pakerom. (Snd. 21:1) Kunum pende yane nimen Johova lotu er nangom wusngama, yane pundom ngonom. Ende embe, Nemaia yane ne Johova ngo, pakero keli seyem Jerusalem pu, tawun kes mol sem ala tauwo er kun enal panim kunum, Johova King  Artaserksis bunuman ngongo Nemaia panim. (Neh. 2:3-6) Yipe kenem kunum pra Johova lotu er nangom alamb, bunuman ngo er kelde kenem pake sinamen, ambsik panda pakeronam eri.

14. Ambajen So Ing bol wal min wom, nim nalmal dongal ngonom? (Piksa pra kane.)

¹⁴ Ambajen So Ing pilkane erim, Johova dokta ende wusngama olom pakerom. Ombun kerma kes mal ende enjel ngangjel bol min wom. E, er kelnge bunumana kes pende sim, embe pile, olom andam bol kongan sikele ngangjel kantawol enambel paninjil. Embe enjel bar, enjep ku ombun pam. Ambajen So Ing nim, ombun e kauwo akilgi ninal kaple wei narim panim. Olom kumbola sem wal pel ne Johova ngo na pakera nim. Ala enjep pu kanjip dokta wusngam ende kansi enjep pemili pakeronal ne pim. Embe er sip kelnge gapman enjep pakerojip, ala gar ka ende si ngomngo panjip eri. Ala bulto So Ing embe nim: “Johova kin nalmal pakerom pilkane enjin. Weieri olom ‘yane Pile pundom ngonom ye.’”—Sng. 65:2.

15. Nawal ambajen ende pakerongo pilkane erim, olom yane nim Johova pundom ngom pam?

¹⁵ Kenem yane nimen Johova pundom ngonda ne pismen mal nangonom, wusngam jel mal karkar er ngonom. Yane pundom simen bar ambsik paim wal ngondo, Danjen min epen meim bol, kameimen. Nim yane pundom nalmal ngonom omukro kanpol tondol. Ambajen ende kangem Yoko, olom yane nind Johova pundom nangonom ne pim, ba olom yane ne Johova ki sim wal kangem bol mene kel mokum. Kunum puli wo pungo bulto, olom bol mokum wal ala omukro kanim, Johova olom yane nim pundom puli ngom pam, wal pende olom auro nim wal pra. Embe pile, kunum pende ne kenem yane nimen Johova pundom ngonom mo nangonom, omuk manero kanamen.—Sng. 66:19, 20.

16. Kenem yane nimen kunum, pilgi nimen mem nalmal taninamen? (Hib 11:6)

¹⁶ Kenem yane nimen bar mongse pilgi nanimen, Johova yane pundom wusngam jeljel karkar er ngonom bar pilgi nimen eri. (Hibru 11:6 gere.) Mik ambiyem Kirsi bol wal min wom mal omukro kanpe. Enjel Betel kongan enambel ka  pinjil. “Kil pepe kel pakle kongar puli tuwalto, kongan enambel ka pinjil mal yane kunum kunum ne Johova ngojil.” Mik embe nim, “ ba kil wiro woyala nanijip.” Mik na Krisi pilgi ninjil, enjel nal kongan ka ende enambel, Johova pilkane enem ne pinjil. Enjel enambel kaple erim kongan painia ere, kongan alamb tambem erim bar pakero, ala konstraksen kongan enjip bar pakerojil eri. Yipe enjel seket tawol kongan esbel. “Mik embe nim, Johova kil yane pundom ngonda ne pinjil mal nangom, ba olom wusngam jel mal kawei ende karkar ere, kil yane pundom ngom.”

17-18. Buk Song 86:6, 7, dom kenem nawal bol pilgi ninamen?

¹⁷ Buk Song 86:6, 7 gere. Buk Song bom ye Depit olom yane porpor nim Johova pile pundom ngom panim. Kenem pra pilgi embe ninam kaple enem eri. Yu duwom pi enjin bar omukro pilkane esmen, Johova kenem bunuman ka na dongal ngondo, ombun wonda kauwo akilgi ninamen. Kenem pilgi ding ga wusngama mo olom yipe lotu er nangom alamb wusngama, kenem pakeronda eri.

¹⁸ Ba, kunum kunum Johova kenem yane pundom ngonda ne pismen, wusngam nangonda, ba pilkane esmen yane pundom ngonda. Kenem sinamen ambsik paim wal na nal kunum sinamen, kunum kun ngonda. Embe pile, pilgi ne yane kunum kunum nindel, ala pilkane endel Johova nim yipe kantawol ere, kunum koll senda kunum “koll meim wal porpor ka pisim wal” Johova ngo kaple enda.—Buk Song 145:16.