Bolsim mem si wal kerma paksim ga, bolsim mem anjanj sepunda nepisim. E erkelde bolsim bar kapil meim. Enjel ende ende bol pilgi ne, ombun mine wonda kunum dongal morambel nepisbel.

Bolsim ga pende ai meim nalenem, maiyam ding na senom ga bolsim mem kelip naronam nepisim. Ba wal kerma wei paim, ende ende bol molmene kele kanka kanim erkelde tapkarom.

BAIBEL KOLTA YU: “Ye ambiyem nasikera.”—1 Korin 7:11.

“Nim bolsinen bar ka mon dal, kumbol ombun wamnam nasindel. Ende nim alla erngonda wamnam wakro, nim alla endel bar wamnam wandil sind panindel. Ombun wonom, bolsimbel mem tokes moksa nepisel. Kankeli kanan pa bolsimbel mem tokelip naronda.”—Maika.

Bol simbel bar ombun ende mine wonom kunum, ende bol ka nameim alamb embe ninda, ‘Kelep bol sinambel kaple naenem’ pane wusngam ende kansi pusepda bar pisem.

“Alamb puli, bolsinamen bar ombun pamdal, ‘kelipro sikeramen’—nepile bolsim. Alamb bunuman embe pande bolsim ga, bolsim kunum pulnom bol ende bol ka nameim.”—Jein.

NEM KI EMBE NGONDOL

Ombun min wonda kunum . . .

• Nim nal ernge bolsind nepisen mo?

• Nim kunum pende ne ye mo amb ende bol bolsinange ba erind ne bu keren mo?

• Nim kunum pende ne “Na nim sikele” o “ende na kanka kanja alamb kansinal” padon mo?

Nim ki meim ding ende embe pispanin dal, yipe bolsimbel mem erdongal endel kunum seim.

BOLSINEN ALAMB BOL YU NINAMBEL

• Ende ende bol ka monjil mem kikine pordom mo? Embe pamdal, nalende embe enem?

• Kelep yipe nawal pende ere, ende ende bol ka meimbel mem erdongal enambel?

ENAMBEL WAL

• Kunum pende ne, na nim kanka kanj pane ngondol.

• Elep image aijel kongan dumam keli panda.

• Kulu ende pundol mo kongan dumam mon dal, andanem mo ambinem kunum kunum ring kerel.

BAIBEL KOLTA YU: “Embe pile Got ersiding kem wal, alamb kelip naronam.”—Matyu 19:6.