1-2. Nal ombun ende Lot kauwum mal yipe Kristen kauwum eri?

 YIPE kunum alamb mambnem kes karkar esim, kenem kanmen kunum mambnem dulto karkar erim ye Lot pim bol ding mal pismen. “Lo to kenjip alamb mambnem kes karkar ere, kisal wei nagonjip bar kumbol ombun kerma wei sim,” olom pilkane erim Danjen min epen meim, alamb mambnem kes esim olom kawei napisem. (2 Pita 2: 7, 8) Lot, Got kanka kane kisal gom mem er kelnge, alamb olom mom bar mand monjip alamb mambnem kes enjip mal karkar naere tuirom. Kenem pra Got bol kisal nagolo, lo aiem to kele, mambnem kes karkar esim alamb meim bar tuwal meimen. Ba, olom bol kanka kane kisal gosmon mem er kelde, alamb esim mal mambnem kes karkar nanamen.—Prov. 14:2.

² Buk Provep a Johova pilsinamen yu ka ne kem meim kenem pakero dongal ngondo, mambnem ka karkar enamen. Kristen porpor ye na amb, tuwa na gal, pilsiamen bunuman ka ngonda yu Buk Provep a meim karkar enamen bar kenem pakeronda.

3. Provep 17:3 dom mal, nalmem pande kenem kumbol na bunuman kantawol ka enamen? (Piksa pra kane.)

³ Mem kerma ende pande kenem kumbol kantawol ka enamen, kenem kumbol a bunumana seim wal Johova kanem. Alamb kenem omukro mal olom embe nanem, kenem alamb nalmal olom kanpol weironom. (Provep 17:3 gere.) Kenem koll-aimanj moramen ne bunuman ka yu ne ngonom, pilsi karkar enjin dal olom kenem kankawei wei kanja. (Jon 4:14) Embe enjin dal, Satan alambem man bol yu gend ne mambnem kes esim, kenem pilgi to kes namoksa. (1 Jon 5:18, 19) Embe enamen pakero kelde, Johova bol molmene kele kanka kanmen mem wo se dongal pundo, olom bol se mand punamen. Kenem Danjen kumbol to kes  moksamen kanapismen pile, sin enamen bunuman ende min wonda tuironamen. Ala kenem kenem ki embe ngonamen, ‘Nalende na kanse sin ene na kankawei kanem Alamb kumbol kes mora?’—1 Jon 4:9, 10.

4. Pilgi ding ambajen ende Johova bol kisal gom, nalmal pakerongo sin enda pam bar tuirom?

⁴ Mata, pilgi ding ambajen ende kulu Korotia meim, wal ende min wo olom pilgi er kanje sin enda pam, tuirom ambajen embe: “Na sin ere kunum apal eri kapisal bar bunuman kes e, tuironal amin napam. Ba Johova bol kisal gond mem na kantawol erim.” b Got bol kisal gom mem olom nalmal kantawol erim? Mata embe nim, na mambnem kes erine, bulto ombun min wonda mal buro pinj. Kenem embe ding mal pisamen. Kenem er kelpe Johova kes wei pilde, olom lotu er ngomon mem wakronamen e, wal kes wei.—Stt. 6:5, 6.

5. Pilgi ding angjen Leo bol wal ende min wom bar, kenem nawal duwom enamen?

⁵ Kenem Johova bol kisal gonjin dal, kanpol weiro alamb mambnem kes esim alamb bol tap naronamen. Pilgi ding angjen Leo kulu Kongo meim, wal embe olom bol min wom. Olom nol pam kongar 4-wo pungo bulto, mambnem kes enjip alamb bol taprom. Olom embe ne pim, nanam sin narind pile Johova dungola kamei ne pim. Ba kanan napungo olom taprom ga er sip kelnge nol bia nom, ala mambnem kes pende tuwal pum eri. Ba dam, mam Kristen yero yu ne ngojil buro yem kel pile, ala komna ka molmolo erim mal buro yem kel pim eri. Embe erim, er kelnge olom bunuman ka si mambnem dulto erim. Elda walem olom pakerongo ala seyem Johova bol wom. Yipe olom kawei wei pile, kongan elda ere painia salim ende meim eri.

6. Nal amb tal ende pane yu ekin paim, kenem yipe omukro kanamen?

⁶ Provep sapta 9, amb tal ende, ende bunuman  ka karkar erim, ende bunuman kes karkar erim pane paim yu omukro kanamen. (Rom 5:14; Galesia 4:24 omukro kane.) Omukro kanamen bar Satan yipe ya mala er kelde alamb piksa kes ponograpi kane, pasdia mem karkar esim buro pisamen. (Efe. 4:19) Embe pile, kenem bol wal kerma wei paim e, kunum kunum Got bol kisal golo mambnem kes enamen bar kanpolto tuironamen. (Prov. 16:6) Ala kenem porpor ye, mo amb moramen, sapta ele yu bol tonom bar pake kerma sinamen. Ala yu ele paim embe dom, amb talaima—“bunuman ka tambem enem alamb” wiro woya ninbel. Amb talaima embe ninbel, ‘Se na garna kol wo mokun no.’ (Prov. 9:1, 5, 6, 13, 16, 17) Ba, wironamble karkar er pum ga bol wal jel ende min wonom.

7. Provep 9:13-18, dom mal, bunuman ka napaim amb wironom karkar erim pum ga bol nawal min wom? (Piksa pra kane.)

⁷ “Bununam napaim amb” wiro woya dom yuwom gere omukro kanamen. (Provep 9:13-18 gere.) Olom bunuman ka tambem enem ga, “Wiro na garna” kol mokun nonamen padom. Wironom karkar er pum ga bol nawal min wonom? “Gosum alamb dongal napam meim dumam tuwal pum.” Yu ekin ding mal buk Provep paim yero kanjin, ala omukro kanamen. “Bunuman ka napande yu to kerem amb” “mambnem kes enem amb” kanpolto, tuironamen. Nalenem, ye ende olom “garem kol punda gora bar punom.” (Prov. 2:11-19) Provep 5:3-10, kenem kanpol tonamen yu ende paim, “amb ende bunuman ka napande yu to kerem amb,” olom “simbam alamb pu goram” wusngam kamble karkar er punom.

8. Bunuman kes panda amb wirom dal, kenem punamen mo sikeramen?

⁸ “Bunuman ka napaim amb” wironom pisim ga punam mo sikeram, enjep bol seim: Enjep weieri punam mo sikeram? Wal e mal kenem bol min wom dal, kenem kenem omukronamen. Intanet a mo nus a pasida esim mem na ponograpi piksa kes ende min wom dal, kenem nal enamen?

9-10. Nalmem pende pande mambnem kes pasdia esim mem tuironamen?

⁹ Mem ka puli paim pile, pasida esim mem kes tuironamen. “Bunuman ka napaim amb” panimen e: “Nol kunumb si nonambe dun” paim mal embe padom. “Kunumb si nom panimen e nal nol”? Kenem pisamen Baibel dom, bolsibel ye amb tal wurding paibel e, nol nopo kolnga kere kapismen mal embe padom. (Prov. 5:15-18) Gapman na alamb dungola lo paim mal karkar er, bolsibel ye, amb tal mongse wurding panabel padom. Ba “nol kunumb si nom”  panimen yu mem nalmal paim? E, bolnasim ga wurding pa pasida esim mem e, pile dom. Mambnem embe esim alamb kunumb ye ende okul er kunumb nonom mal, okul er esim. Enjep mambnem embe okul er enambe alamb kanasim kunum, “nol kunumb” si nonambe dun enem bol ding mal paim, ba sin kerma wei esim. Mambnem kes embe esim ga wandel wei! Nalenem, Johova esim wal porpor kanem. Kenem Johova bol ka meimen mem wakronjin dal, e, er kelde ngimbil kerma sinamen, Embe pile, kunumb si nom wal “dun” wei napaim. Nalenem, mambnem embe esim bar ombun puli min wonom eri.(1 Kor. 6:9, 10)

¹⁰ Pasida mem tuwal pu esim ga ombun embe mal pende sinam, kisal goram, enjep wal ei mal kanam, ambra komb ngal moksam, ala pemili to kes moksam eri. Embe pile, penema a wei paim bunuman ka karkar ere, bunuman ka napaim amb wiro “gara” wo mokun nonam woya dom tuironamen. Kenem embe enjin dal pilgi wal ka moramen, ala alamb puli kes pasida mem tuwal pu kes, kes si komb tangaling kuli gosum mem tuironamen eri. (Prov. 7:23, 26) Buk Provep Sapta 9  na wes 18 yu ne pornim bar embe dom: “ Amb e, wironom alamb se Kipku a tuwal pum.” Nalende, alamb puli olom wirom bar pu ombun sinam paim kanse pum?—Prov. 9:13-18.

11. Nalende piksa kes ponograpi kanim e, kes wei paim?

¹¹ Kenem pasdia mem tuironamen ne pinjin dal, piksa kes ponograpi alamb puli kes alla napaim ne pilkane esim ba, kenem tuironamen. Ba, weieri paim piksa kes ponograpi kenem er kes enda, piksa kes embe mal kanjel bunuman a kanan panda, pilaur ne sikerel ne endel kaple nanda. Piksa kes ponograpi kanam bar pakero kelde, mambnem kes waknaronam ba, er kelde mambnem kes dop mal do gurr ninda. (Kol. 3:5; Jems 1:14, 15) Ponograpi piksa kes kanim alamb er kelde tuwal pu mambnem kes puli kes esim.

12. Kenem nalmal ere pasdia enamen bunuman ngonda, piksa ende mora kanpolto tuironamen?

¹² Kenem Kristen ende moramen pon mo teblet aijen a, piksa kes ponograpi wanam olom olom min wom dal, nal enamen? Kenem wamnam kanjel kele tuironamen. Kenem Johova bol senomon mem wal kerma paim ne pinjin dal, embe enamen onom panda. Piksa pende meim pasdia esim piksa ponograpi ma, ba kenem kanamen bar bunuman si akilde mem kes enamen ne pisamen. Nalende piksa embe nakanamen? Nalenem, kenem piksa embe mal apal wei ende kane pasida mem, kumbol tuwalto enamen kanapismen. (Mat. 5:28, 29) Elda ende kulu Tailend meim kangem Depit embe nim: “Nanam ki embe ngondo ponograpi piksa kes ma, ba na anjngo kanal bar Johova kapisa mo? Na wal omuk embe tondo er kelnge bunuman ka karkar erind.”

13. Nawal kenem pakerondo bunuman ka karkar esmen?

¹³ Wal ende er kelpe Johova kumbol ombun sinde ne kisal gonjin dal, bunuman ka karkar enamen. Kenem “pulnombol” Got bol kisal gosmon kunum “bunuman ka” karkar esmen. (Prov. 9:10) Kenem buk Provep sapta 9 pulnombol gerjin bar yu ekin ere, amb ende “bunuman ka weieri” pam amb paninjin.   

14. Provep 9:1-6 a gere kanmen, woya ne wirom jel nalmal paim?

¹⁴ Provep 9:1-6 gere. Yu ele paim germen e, Johova bunuman ka weieri olom Mem na bunuman ka pa-tuluk tom, ala kenem Ersem Ye wironom. (Prov. 2:6; Rom 16:27) Yu ele paim gar kerma ende ond pos dongal 7-poro bol taujip pandom. Yu e taninde pilkane esmen, Johova bunuman ka alamb nomolpa esim bar duwom er karkar enam ne pisim, olom kapile wiro woya dom.

15. Got kenem wiro nawal eiya dom?

 ¹⁵ Johova mambnem ka paim kenem wal puli Ngonom Ye. Kenem yero amb ende “bunuman ka weieri” bol tonjin, bar duwom er kanmen Johova mambnem ka pam, kenem wal ka puli ngonom. Sapta ele wes pende meim gere kanmen, amb e, garem kol mokun na nol wain kawei er kun er tepol a se, alamb wo nonam woya dom. (Prov. 9:2, ftn.) Ala wes 4 and 5 a: “Bunuman ka weieri pam amb [bunuman ka weieri] wiro embe dom: bunuman ka tambem enem alamb wo: ‘Na bret aina wonam.’” Nalende bunuman ka weieri pam amb wiro garna kol wo, mokun noya dom bar punamen? Johova ngalem man bunuman ka karkar ere ka moram ne pisem. Olom kenem alla ere—ombun kaunamen bar kanapisem. Embe pile, “bunuman ka makero moklo mambnem dulto karkar esim alamb ngo pakeronal ne enem.” (Prov. 2:7) Kenem Johova bol kisal wei gonjin dal, wal er kelpe olom kapisa mambnem e enamen. Olom bunuman ka yu ne ngonom pilsi konganem enamen bar kapisamen.—Jems 1:25.

16. Alen Got bol kisal gom er kelnge nal bunuman ka karkar erim, ala embe erim bar nawal ka min wom?

¹⁶ Got bol kisal gom mem pakero kelnge, Alen bunuman ka karkar erim mal omukro kanamen. Pilgi ding angjen Alen sukul tisa ende molo kongrikeisen elda ende meim, embe nim, “Na kongan ding ga puli piksa ponograpi pasdia enjip kele, ngal sukul ne ngonamen paninjip.” Ba Alen pilkane erim e, mambnem ka ma. Olom embe nim, “Got bol kisal gom mem er kelnge piksa embe mal nakanal panind. Ala nalmem pange na embe nind kongan ding ga ne ngond eri.” Olom “bunuman ka weieri” yu karkar ere, “wal omuk karo kanpol tom wusngam e, karkar erim.” (Prov. 9:6) Alen mambnem ka ere akilgi nim bar, olom kongan ding ga tisa pende kane, pi Baibel yu duwom ere Kongrikeisen make wom.

17-18. (a) Bunuman ka weieri” karkar esim ga nalwal pende si ka pisam? (b) Ala mibulto nawal ka pende sinam? (Piksa pra kane.)

¹⁷ Johova amb tal e, pane yu ekin erim bar, kenem nalmal ere bulto kapil moramen mal duwom er ngonom. “Bunuman ka napande yu to kerem amb” wirondo karkar er pum ga, mambnem kes pende okul er ere, mokun no “dun”sim mal enamen ne esim. Kenem pilkane esmen, enjep pi mand mambnem kes ere kapisam mal pisim, mibulto napisim. Embe esim bar, enjep se “Kipku a tuwal kun pum.”—Prov. 9:13, 17, 18.

¹⁸ Ba “bunuman ka weieri” pande amb wirondo karkar er pum ga, bulto wal ka jel mal sinam! Olom wirondo ga karkar er pum ga, pisim nalenem, pilgi-mokun porpor sim pakero kelde Johova bol mand moram wal sim. (Ais. 65:13) Propet Aisaia wusngam a Johova embe  nim: “Na yu nind komol kase pile, mokun ka no wal kawei si kapil moram.”(Ais. 55:1, 2) Kenem Johova ka kanem wal kakane, kanapisem wal tuironamen mal duwom pilkane esmen. (Sng. 97:10) Kenem ka pismen nalenem, alamb ende wiropo, “bunuman ka weieri” ngonom yu duwom er kanam eri. E, “tawun a kulu ende min enem bar molo, alamb wiro embe nimen: ‘Alamb namal ende bunuman ka tambem enem ya tuwal ele wonda.’” Kenem wiromon wom ga na kenem kenem pake yipe mongse nasinamen. E, er kelde akilgi ne molo mibulto “kolnga mem aimanj” sinamen eri. Embe pile, wal “kanpol tom mambnem na wusngam anjngo karkar er punamen.”—Prov. 9:3, 4, 6.

19. Eklisiastis 12:13, 14 dom mal, kenem nalwal enamen ne bunuman dongal panda? (“ Got Kin Kisal Gosmon Mem Kenem Pakerondo” yu boks a paim pra kane. )

¹⁹ Eklisiastis 12:13, 14 gere. Yipe kunum pordom bar ya mala mambnem kes wose kes wei punom kunum, Got bol kisal gosmon mem kenem pakerondo kumbol kantawol ka ere, akilgi ne pilgi wal dongal moramen. Kenem Got kankawei kane kisal gosmon mem, pakero kelde kunum kunum alamb puli wiro kelpe wo, “bunuman ka weieri” pakeronda yu duwom er kane pake sinam ne esmen.