1. Nim yuwei bol nal nepisen?

 JOHOVA alambem man Got Yuwom yuwei Baibel a meim kanka kanim. Kenem yuwei meim kane pilgi er dongal esmen. (Rom 10:17) Kenem pilgi wei nimen kongrikeisen Kristen seim Johova simin kem, e “ond kun mal pa yuwei pakeronom.” 1 Tim. 3:15) Kenem kapile molmene kele, “yira molse ngimba pum yu ninam karkar enamen,” enjep kenem pakero Baibel a yuwei neau ninambe Got kapisem mambnem karkar enamen ne esim.—Hib. 13:17.

2. Jems 5:19 dom mal, kenem yuwei duwom erkanmen kunum bulto, nal ombun pende min wonom?

² Weieri, kenem yuwei simen kunum bulto, Got okanaiseisen wusngama wal ende erkelde kenem yuwei sikele si kolbar punamen bar koltane kantawol enem. (Jems 5:19 gere.) Seten kawei pisem, Baibel na Got okanaiseisena yu wonom kenem pilgi nane to keramen nepisem.—Efe. 4:14.

3. Nalende kenem yuwei ambilgi ninamen wal kerma paim? (Efesus 6:​13, 14)

³ Efesus 6:​13, 14 gere. Mand wei enem, Kipkes Seten yu gend omblombol wei ne erkere, ya mala kantri porpor woseding pu Johova bol opyem enam. (Rev. 16:​13, 14) Ala wal ende kenem pilkane esmen, ombol keswei ere, Got alambem man er keswei enal ne enda. (Rev. 12:9) Embe pile, wal kerma wei paim kenem yuwei na gend nalmal paibel duwom mane er kanpolto, yuwei mongse karkar enamen. (Rom 6:17; 1 Pita 1:22) Embe enamen  pakero kelde, ombun kerma wei min wonda tuironamen!

4. Yu duwom pi enamen bar nawal omukro kanamen?

⁴ Yu duwom pi enamen bar mambnem tal ende omukro kanamen kenem pakero kelde, yuwei Baibel a meim kanpolto Got okanaiseisena wusngama wal enamen mal yu nengonom karkar kawei enamen. Ala wal ende, kenem wusngam talende karkar ere yuwei anjngo ambilgi ninamen mal, nengom pra omukro kanamen.

MAMBNEM PENDE KANNONAMEN ERKELDE YUWEI KANPOL TONAMEN

5. Johova bol kisal goramen nalmal pakerondo yuwei kanpol ronamen?

⁵ Johova bol kisal gorol. Memka pande kenem Johova bol kisal gonjin dal, olom kankawei wei kanamen ala wal pende erkelpe olom kespisa wal nanamen. Kenem wal duwom ka ere, kunpaim na kunapaim wal nalmal jeljel paibel kanpol tonamen ala yuwei na gend jeljel paibel kanpol tonamen erkelde Johova kenem bol kapisa. (Prov. 2:​3-6; Hib. 5:14) Kenem alamb bol kisal gosmon mem kankelpe wal kerma mal pa, Johova kanka kanmen mem nangonda, kunum puli kenem wal erkelpe alamb kapisam ne esmen wal Johova kanapisem.

6. Israil alamb kantawol enjip ye 10-poro, alamb bol kisal gonjup nalmal erkelnge yuwei ninam kun pammal nane yu gend ninjip?

⁶ Kenem alamb bol kisal gosmon mem pase minro pu, Got bol kisal gosmon mem ngom dal, yuwei wakroninamen kanpol tonamen. Israil alamb kantawol enjip ye 12-poro, Johova yu dongal ne alambem man Israil ngonal nim mal, kanamen ne okul erpunjup mal omukro kanamen. Punjup ye 10-poro Kenen alamb kin kisal wei golo, Johova kin pilgi ne kanakanjip, enjep alambjep man Israil nengo embe ninjip: “Kenem alamb e bol nganmal enamen kaple nanem, nalenem, enjep dongal kerma wei pa kenem ngonom.” (Nam. 13:​27-31) Alamb dungola omukro pilkane enjip Kenen ga dongal  kerma wei pa Israil ga ngom—e weieri. Ba alamb ende Israil ga pu Kenen ga opnganmal ngo to, maljep sinam kaple nanem paninam alamb, Johova, Israil alamb pakeronda ne, pilkane nare yu embe ninam. Israil ye 10-poro mal nalmal seim kanam nepunjup ga, Johova, Israil ga nawal enam nepim bu sinam wal kerma pam. Johova enjep bol wal pende erim, kunum kanan napum buro yemkel pisam pam eri. Enjep wal omuk embe tonam bar pakero kere pilkane enam, Johova dongal kerma wei pase miro pu, Kenen ga ngom ne kanam. Mal Kenen nalmal sem kanam ne okul er punjup, pilgi dongal napam ga, Josua na Kelep tal Johova enjep pakeronda ne pinjil mal embe napinjip. Josua na Kelep, Israil ga nengo embe ninjil: “Johova kenem bol kapim dal, olom kenem nesip mal e si ngonda.”—Nam. 14:​6-9.

7. Kenem Johova bol kisal gosmon mem, nalmal er dongal enamen? (Piksa pra kane.)

⁷ Kenem Johova bol kisal gosmon mem er dongal enamen ne pinjin dal, wal porpor ende omukro enamen bar olom kapisem mal karkar enamen. (Sng. 16:8) Nim Baibel a yubol ende panda gerdel kunum, nem ki embe ngondol, ‘Wal embe mal na bol min wonange, yu ne omuk nalmal tonange?’ Ende embe mal, Israil alamb kantawol enjip ye 10-poro, mal Kenen nalmal sem okul erpu kane wonjup ga, yu napam mal ne Israil ga ngonjup, nim tuwal ele mol pisange nalenange? Nim ninjip yu pilgi ne alamb kin kisal gorange mo, Johova kanka kane wal erkelne olom kapisa nepisen mem, dongal pa kisal gon mem e ngonange mo? Israil ga ye dulom pel, Josua na Kelep tal yuwei ninjil pilgi nanjip. Embe enjip erkelnge Got yu dongal ne Ngonal panim Mal tuwal napunjup.—Nam. 14:​10, 22, 23.

8. Nal mambnem ende kenem ombol ere enamen?

⁸ Molmene mem. Johova erkere molmene mem seim alamb yuwei sim. (Mat. 11:25) Kenem molmene kenjin pakerongo yuwei duwom erkanjin. (Apo. 8:​30, 31) Embe pile, kenem weieri kanpolto molsinomon ne napisamen. Kenem molsinomon nepinjin dal, Baibel a kolta yu meim na Johova okanaiseisen wal ende enamen mal yu nengonom, molmene kele karkar nanamen.

9. Kenem nalmal ere molmene mem ambilgi ninamen?

⁹ Kenem molmene mem ambilgi ninamen nalenem, Johova molse miro wei pu kenem ngonom. (Sng. 8:​3, 4) Kenem yane ne Johova ki sipe duwom erngondo molmene mem sinamen. Johova kenem pakerondo olom bunuman paim mal sinamen, e Yuwom Baibel a meim bar na okanaiseisen aiyem wusngama pra. Nenem Baibel gerdel kunum, Johova molmene kesim alamb kanka kane, kangjep ambil min kesim alamb kanka nakanem mal yu pende meim omukro kanjel, ala molsino alamb ende ngomon nepisim mo biling mal esim mambnem e pra pildom eri. Nim okanaiseisen tuwal kongan ende endel, mo namba ende pamdal ombol wei ere molmene mem karkar endel.

KENEM NALMAL ERE YUWEI AMBILGI NINAMEN

10. Alamb namal wusngama, Johova alambem man wal enam mal yu nengo kol tadom?

¹⁰ Johova okanaiseisen wal enaman mal yu nengonom kunum kunum pilgi nindel. Komna Israil kunum, Johova, Mosis na Josua wusngama alambem man Israil ga wal enam mal yu nengongo erim. (Jos. 1:​16, 17) Israil ye tal e, Got Johova gupsi wal enda mal esbel nepinjip kunum, enjep bol wal kaka puli min wom. Kongar andet puli bulto kongrikeisen Kristen pulnombol min wom kunum, aposol 12-poro molo yu ne wal enam mal kol taninjip. (Apo. 8:​14, 15) Ala yu ne kantawol enjip ga namba wose kerma pum, elda walem Jerusalem monjup pra tuwal wonjup eri. Pilgi dongal pam yira yu ninjip,  Kristen ele monjup pilsi karkar enjip kunum, “kongrikeisen jeljel monjup pilgi wose dongal pungo, ala kunum dingding ne namba aijep wose kerma pum eri.” (Apo. 16:​4, 5) Yipe kenem kunum, Johova okanaiseisen wusngama tiokretik mambnem karkar ere wal enamen mal yu ne kesim, pilsi karkar esmen kunum wal kaka puli min wonom. Ba Johova makrom alamb, yu nengom kenem pilsi karkar nanjin dal, olom kenem bol nal nepisa? Kenem ki e, pundom sinamen nepinjin dal, Got Yu Dongal Ne Ngonal Panim Mal, Israil ga sinam nepunjup kunum nawal pende enjep bol min wom omukro kanamen.

11. Got kongan pengem Mosis ngom ere Israil ga kantawol erim bar, Mosis bol molmene kenjip alamb nawal enjep bol min wom? (Piksa pra kane.)

¹¹ Johova yu dongal ne Israil ga Ngonal Panim Mal sinam nepunjup bar kunum ende, yira pende kangem pam ga, Johova, Mosis kongan pengem ngom erim bar opyem ere embe ninjip: “Kenem alamb porpor kuru meimen, [Mosis mongse ma] Johova kenem porpor bol meim.” (Nam. 16:​1-3) E weieri, “Israil ga porpor” Johova dungola kuru monjup, ba Johova, Mosis mongse Olom alambem man kantawol er sipnda panim. (Nam. 16:28) Embe pile, Mosis bol opyem enjip ga, Johova bol opyem enjip. Enjep Johova wusngam erkun erim karkar enam ne napinjip; enjep enjep kapinjip mal ere—kangjep ambil min keram ne enjip. Got, enjep enjep kongan pengem enam ne enjip ga na, yu ninjip karkar enjip ga tausen puli to gom. (Nam. 16:​30-35, 41, 49) Yipe kunum kenem pra pilkane esmen, Johova okanaiseisena yu ne ngonom molmene kele karkar nasim ga bol kanapisem.

12. Nalende Johova okanaiseisen kin pilgi nimen mem ambilgi ninamen?

¹² Kenem Johova okanaiseisen kin pilgi nimen mem ambilgi ninamen kaple enem. Baibel a yuwei pende pilgi ne meimen mal sikele yu kol ende ninam kunum, mo Got Gapman kongan esmen bar wusngam kol ende karkar  enam paninam, yu embe nim kunum angjen man molse ngimba pu kenem kantawol esim ga, nim yu karkar ere erkelpe Johova kapisa nepisim. (Prov. 4:18) Enjep ombol wei ere, Got Yuwom Baibel a meim omuk karo kane, wal enamen mal yu neori kesim, ala neori kesim yu Got alambem man ombol wei ere karkar enam.

13. Baibel a nal “yu mem kerma ka meim” kenem pilgi nimen, ala pilgi nimen yu nalmal pakerondo yuwei ambilgi ninamen?

¹³ “Yu mem kerma ka meim kanpolto anjngo karkar endel.” (2 Tim. 1:13) “Yu ka mem kerma meim” kanpol tomon panimen e, Kristen Baibel a yu meim duwom er kanpol tonom e pildom. (Jon 17:17) Kenem Baibel yu porpor duwom er kanmen bar pilgi nimen. Johova okanaiseisen erkelde Baibel yu duwom erkanmen pilgi ne ambilgi ninamen ne enem. Kenem embe enamen bar topum kawei sinamen.

14. Kristen pende nalere Baibel “yu mem kerma ka meim” duwom ere pilkane enjip wakronjup?

¹⁴ Baibel “yu mem ka kerma” duwom er pilkane esmen wakronjin dal, kenem bol nawal min wonda? Wal ende min wom mal omukro kanamen. Komna Kristen kunum ga pende yu gend newai ne, Johova kunum kerma min wonom paninjip. Alamb pende—aposol Pol pepe bombar—yu e nim nepinjip. Kristen Tesalonaika monjup anj dunglom kele yu e omukro nakanjip pile, yu gend pilgi ne newai ninjip. Pol yero enjep kin mom kunum nengom yu pilyem kel pisange, alamb enjep bol yu gend ne nangonange. (2 Tes. 2:​1-5) Ala Pol angam man nengo yu porpor ninam komol sepile, pilgi naniya nim. Wal bulto pende enjep pakeronda mal Pol pepe namba tu boll porne, Tesalonaika ngombar ngo embe nim: “Na Pol, yu e nam angelna boll enem bol kunum kapanind, na pepe poro bond bar e na mak mal; na pepe borbar embe bolbol erind.”—2 Tes. 3:17.

15. Ende kenem yu gend nengonal ne erim dal, nalmal kanpol tonamen? Wal ende min wom mal yubol to. (Piksa meim pra kane.)

¹⁵ Pol pepe bollo Tesalonaika ga ngom bar kenem nawal duwom esmen? Kenem yu ende ninambe pilpe Baibel dom bol woseding napum dal, bunuman ka karkar ere ninam yu pilgi naninamen. Komna Sowet Yunien kunum, kenem bol opyem enjip ga, pepe ende wol etkota wom  pane yu gend nesip angjen man ngonjup. Pepe boll ngonjup erkelnge angjen man pende, se jel pu okanaiseisen kolnga ende simin kenjip. Pepe weieri wol etkota wom mal pam. Ba pilgi dongal pam angjen man yu gend ninjip bar pilgi nanijip. Enjep omuk karo pilkane enjip, pepa yu boll mokjup enjep duwom ere pilkane enjip yu bol woding napum. Yipe kenem kunum pra, yuwei kin opyem esim ga kunum pende ne, intanet wusngama erkerambe kenem bunuman tal si, oiro se jeljel punamen ne esim. Yu embe ninambe bar kankerambe “wamnam enem bunuman to karo kes namoksa [kenem] omuk manero,” yero yuwei duwom erkanjin bol woding punom moma kanpol tonamen, embe enamen bar kenem kenem kantawol ka enamen.—2 Tes. 2:2; 1 Jon 4:1.

16. Rom 16:​17, 18 dom, ga pende yuwei wakro sikele sepjip dal, kenem nal enamen?

¹⁶ Johova bol ka meim alamb bol tap anjngo tondol. Got kapisem kenem kumbol ding sende olom lotu erngonamen nepisem. Kenem yuwei ambilgi ninamen bar erkelde kumbol ding sende moramen. Ende yuwei wakronda alamb yu gend ninda bar erkelde kongrikeisen kumbol ding nasenda. Embe pile Got kanpol tonamen yu embe dom, “alamb embe mal bol kolbar moiya dom.” Alamb embe mal erkerambe yuwei wakro se kolbar punamen eri.—Rom 16:​17, 18 gere.

17. Kenem yuwei pilkane ere ambilgi nimen bar pake nalmal simen?

¹⁷ Kenem yuwei paim pilkane ere ambilgi ninamen bar, erkelde Johova bol semand pupo pilgi dongal panda. (Efe. 4:​15, 16) Embe enamen pakerondo, Seten yu gend porpor alamb duwom erngom tuironamen. Ala ombun kerma wei min wonda kunum Johova kenem kantawol ende, buning moramen. Kunum kunum yuwei ambilgi ninamen “kumbol amin Got enem kin mora.”—Fili. 4:​8, 9.