1-2. Sadok e namal? (1 Stori 12:​22, 26-28)

 WAL ende min wom mal buro pile. Ye 340,000-poro makero erkerambe Depit, Israil alamb porpor king aijep mora ne enjip. Kunum talende tuwalto, yira porpor wo kulu Ebron sembar yemro mand komngom ende ku mom bar makerojup, enjep yu ninjip, tuwol enjip ala kawei pile golang kele Johova kangem min kenjip. (1 Sto. 12:39) Monjup bar ele tuwal yegal ende kangem Sadok mom, alamb puli pilkane nanjip. Ba, Johova pilkane erim ala erkelde kenem pilkane enamen nepim eri. (1 Stori 12:​22, 26-28 gere.) Sadok e namal?

² Sadok e pris ende, olom Ai Pris molse ngimba pum Abiatar bol kongan ai ere ere enjil. Sadok, Got bunuman ka ngongo, Got bunuman pam mal kane karkar enda kaple erim. (2 Sml. 15:27) Alamb bunuman ka sinam ambsik pam kunum, Sadok mom bar pu pake sise enjip. Olom kumbol dongal wei pam. Yipe yu duwom enamen bar, olom kumbol dongal pam nalmal tanim omukro kanamen.

3. (a) Nalende Johova lotu erngom alamb kumbol dongal panda? (b) Yipe yu duwom enamen bar nawal omukro kanamen?

³ Yipe kunum pordom bar, Seten wal ende ye naere erim mal ombol keswei ere Got alambem man olom bol pilgi nim mem to kes moksal ne enem. (1 Pita 5:8) Kenem kumbol dongal wei pande, Seten na yipe mambnem kes paim Johova, to porninal padom kunum min wonda ne kui enamen. (Sng. 31:24) Pi kenem wusngam talende, Sadok kumbol dongal pam mem karkar enamen mal, omukro kanamen.

GOT GAPMAN KONGAN PAKERONDOL

4. Nalende Johova alambem man kumbol dongal pande, Got Gapman kongan pakeronam? (Piksa pra kane.)

⁴ Kenem Johova alambem man meimen kumbol pel ngo, Got  Gapman kongan pakeromon, ba kenem kumbol na bunuman dongal pande embe enamen paim. (Mat. 6:33) Ende embe mal, yipe mambnem keswei pikronom bar meimen, kenem kumbol dongal pande Johova lo karkar ere, Got Gapman yu ka neori kele alamb ngonamen eri. (1 Tes. 2:2) Ala wal ende mala kongan polotik erkelde, alamb pulikes kumbol ding naseim, embe pile kenem kumbol dongal pande polotik enam bar tuwal napunamen. (Jon 18:36) Johova, alambem man puli yipe meim, kumoni ombun paim, alamb enjep to erkes esim mo, kongan polotik na ami tuwal napunamen panim bar to sip karpos kesim eri.

5. Nalernge Sadok kumbol dongal pande, Depit pakeronda pam?

⁵ Sadok, Ebron pum Depit kongan king simbar, alamb makero kapile monjup bar tuwal ei moral ne napum. Olom erkun ere opnganmal enda wal si pum. (1 Sto. 12:38) Olom Depit kolngo Israil ga bol opyem enjip ga, nganmal ngo tonal nepum. Sadok, ami ende opnganmal enda mal kanpol tonom mal embe narom, ba olom kumbol dongal wei paim.

6. Depit kumbol dongal pam mem Sadok karkar enda nalmal tanim? (Buk Song 138:3)

⁶ Pris Sadok pu nanje bar duwom erkane kumbol dongal mem sim? Olom kumbol dongal pam yira monjup bar tuwal mom, embe pile olom kumbol dongal mem sim. Enjep mambnem enjip mal kane pake sim. Ende Depit kumbol dongal wei pange, “si ngimba pu Israil alamb nesi opnganmal pambar pu” alamb tororo erim erkelnge, Israil ga porpor kumbol weingo olom pakeronambe king aijep mora ne enjip. (1 Sto. 11:​1, 2) Depit kunum kunum Johova olom pakerondo, olom bol opyem enjip alamb tonal nepilpile erim. (Sng. 28:7; Buk Song 138:3 gere.) Ga pende Sadok mombar mand wei monjup ga, olom kumbol dongal sinda mal taninjip eri—ye pende embe mal, Jeoiada na olom ngangem opnganmal ere ere erim ye Benaia, na ye 22-poro Israil ga ye dulom pengem ere alamb tawol erere enjip ga, Depit bol  molo pakeronjup bar Sadok duwom ere dongal sim. (1 Sto. 11:​22-25; 12:​26-28) Ye porpor bu dongal pange, Depit kongan king sinda bar pakero kantawol enam ne enjip.

7. (a) Yipe-kenem kunum namal bol kumbol dongal mem sinamen mal duwom enamen? (b) Angjen Nsilu kin wal min wom mal vidio a kanjin bar, kenem nawal duwom esmen?

⁷ Ga pende kumbol dongal pande, Johova na olom Gapman bol kamoram ne esim kenem kanmen erkelde kenem kumbol dongal mem simen eri. Kenem King aijen Krais Jises ya mala mom kunum, Seten alambem man bol erkerambe gapman polotik tuwal punda ne enjip kane tuirom. (Mat. 4:​8-11; Jon 6:​14, 15) Olom kunum kunum dongal Johova bol si mambnem dulto karkar erim. Yipe-kenem kunum angjen yegal walem puli, gapman polotik na ami tuwal napunamen mal tanim, kane karkar enamen. Ala ga pende kumbol dongal pam yu boljop jw.org apu meim kanjel eri. a

PILGI DING ANGNEM MAN PAKERONDOL

8. Nal kunum elda walem kumbol dongal pande, pilgi ding angjep ambajep man pakeronam?

⁸ Johova alambem man ende ende pakeronam kapisem. (2 Kor. 8:4) Ba, kunum pende ne kumbol dongal pande, embe enam paim. Ende embe mal, opnganmal min wonom kulu, elda walem pilkane esim yu ne pilgi ding angjep ambajep man kumbol er dongal enam pam, e Baibel yu ka ne enjep pakero nomolpa enam bar ambsik panda wal ngonam eri. Elda walem pilgi ding angjep ambajep man kanka kanim, erkelde enjep ombun sinam bar napisim pilgi ding angjep ambajep man ambsik paim wal ngo pakeronam ne esim. (Jon 15:​12, 13) Enjep embe esim, Sadok kumbol dongal mem tanim karkar esim.

9. 2 Samuel 15:​27-29 yu paim bar kanmen, Depit, yu ne Sadok ngo nal enda panim? (Piksa pra kane.)

⁹ Depit olom bol ombun min wonda pam. Olom ngangem Apsalom bu dongal pange, dam kongan king kunumb mal si enal nepim. (2 Sml. 15:​12, 13) Depit wamnam Jerusalem sikele seori punda pam! Olom kongan ga monjup bar  embe nim: “Kenem Jerusalem sikele ke punamen, mo mapamdal Apsalom wo kenem alamb porpor taun ele meimen bainat a to gora!” (2 Sml. 15:14) Kongan alamb seori punjup kunum, Depit ala buro pim ende tauna mol yem kele Apsalom wal nalmal enda ne olom ngonam pam. Embe pile, Sadok na pris pende wal min wonda mal ne olom ngonam panim. (2 Samuel 15:​27-29 gere.) Tauna mol yem keram ye kanpol weironam pam. Depit pris walem kongan ngo enam panim e, amin napam—kolmem-wakronam pam. Pile, Apsalom mambnem embe mal kannom—alamb bol resis erim, alla erngonjup bar erngo yem kem, ala kunum kunum mambnem gend enda kumbola kapim ye—embe pile Sadok na pris walem okul mal er molo, Depit pakeronam ne er monjup kansinange ne, enjep bol nalmal enange mal buro pile!

10. Sadok na ye pende olom bol monjup, nalmal Depit kantawol ernge buning mom?

¹⁰ Depit wal pende enal ne buro pimbar Sadok na Usai senom olom bol kamonjil ye si tuwal kem. (2 Sml. 15:​32-37) Yu nepakjip mal Usai gend gol Apsalom na ami aiyem man pakerom mal ermolo, pu Depit nalmal tonda mal bunuman gend ngondo weine er mora kunum, Depit opnganmal wal si erkun enda paninjip. Wal enam mal yu ne ollse pakjip bulto, Usai, Sadok na Abaitar nengom. (2 Sml. 17:​8-16) Yira pilpakle yu molom e ne Depit ngonjil. (2 Sml. 17:17) Johova enjep pakerongo Sadok na pris walem kongan kerma wei ere, Depit kolmem kantawol ermnge olom buning mom.—2 Sml. 17:​21, 22.

11. Pilgi ding angjen ambanjen man pakeronamen kunum, Sadok kumbol dongal pam mem nalmal karkar enamen?

¹¹ Ombun kerma ende min wonda kunum, kenem wiro angjen ambanjen man pakeroiya ninjip dal, Sadok kumbol dongal pam mem kenem nalmal taninamen? (1) Wal endel mal yu nengonam karkar endel. Ombun kerma wei min wonda kunum, yu ninam karkar ere kumbol ding sende moramen kerma wei wal paim. Brens opis  yu ne wal ende eiya ninam molmene kele karkar enamen. (Hib. 13:17) Nolmal bo mo ombun kerma ende min wonda kunum, okanaiseisen wal enamen mal yu ne kesim, erkun ermolo wal pende enamen mal yu nengom, elda walem kunum kunum omukro kane karkar enam. (1 Kor. 14:​33, 40) (2) Kumbol dongal panda ba ombun tuirondol mal kanpol tondol. (Prov. 22:3) Bunuman ka karkar ere ombun tuirondol. (3) Johova bol sengse molo pake sindel. Pilkane endel Johova nim na, pilgi ding angnem ambanem-man bol ombun tuiro buning moram kapisem. Olom nim pakerondo pilgi ding angnem ambanem man kantawol eri buning moram eri.

12-13. Vikto na Vitali yuboljil paim bar nim nawal duwom enen? (Piksa pra kane.)

¹² Vikto na Vitali pilgi ding angjen tal ende, mokun na nol sip Yukren nganmal pambar angjel ambanjel man monjup ngonambel ne sipnjil mal omukro kanamen. Vikto embe nim, “Kil kulu porpor sembar mokun pende kansi punambel ne enjel.” “Kunum puli punjil bar mand nganmal enjip opgan bulbul nepam. Angjen ende olom stuwa mokun mom kil sipnambel pane ngom. Ngom mokun pablisa pulikes pakerongo, kunum pende tuwalto no kol monjup. Kil mokun si kara kel monjil kunum bom ende to kenjip wo, 20 mita kolbar mene wopam. Kunum pel tuwalto na Johova ki si pakero dongal ngoi, pablisa walem ambsik paim wal sipngo pakeronal panind.”

¹³ Ala angjen Vitali embe nim, “Kongan embe enamen kumbol dongal wei pande embe enamen pam.” “Na komna kunum wal si kara kele pund, anj dunglom 12 auwa pel sim. Na pundo bar yane ne Johova ngongo pund.” Vitali kumbol dongal wei pam, ba ombun sinda bar kanpol tom eri. Olom yu pende embe nim: “Na anjngo Johova ki si bunuman kangoi molmene keral panind. Molse ngimba pu alamb kantawol enjip alamb, wusngam pende karkar ere wanamen paninjip bar na mongse karkar erpund. Pilgi ding angjen ambanjen man kongan ai enjip na kanj kunum, na pilgi er dongal enjip. Enjep wal pende wusngam koltungam erkun enjip, ala ombun sinjip alamb wal ngonam ne situwal kele kara min kenjip, wusngam tambem punjin bar gar na mokun ngo kantawol enjip eri.”

JOHOVA BOL ANJNGO KAMOROL

14. Kanka kanmen alamb ende Johova bol kanamolo wakrojup dal, kenem bol nal enda?

¹⁴ Ombun kerma wei ende kenem kauwo kumbol ombun sinamen e, maiyam ding mo seno kakanmen alamb ende Johova bulngo wakronam kunum. (Sng. 78:40; Prov. 24:10) Nim alamb embe mal kankawei kanen pile, ombun embe mal min wonda kunum, kauwo akilgi nindel amin napanda. Nim ombun kauwo ngimbil sinen mal, Sadok na Depit bol ombun ding mal min wom eri.

15. Nalende Sadok kumbol dongal pande Johova bol anjngo kamora pam? (1 King 1:​5-8)

¹⁵ Abaitar, Sadok na Johova bol kanamom kunum, Sadok anjngo Johova bol kamom. Wal embe Depit king mom pornim kunum min wom. Depit tuwa sem gora mand erim kunum, ngangem Adoniya Johova yu dongal ne Solomon king mora panim dumam si olom olom king moral ne erim. (1 Sto. 22:​9, 10) Abiatar, Adoniya pakerom. (1 King 1:​5-8 gere.) Abiatar, mambnem kes erim Depit bol mongse narim, Johova bol pra erim eri! Sadok kumbol ombun si keswei pisapim mal pile. Abiatar na Sadok kongar 40 mal tapkaro kongan pris ai enjil. (2 Sml. 8:17) Enjel “Got wei Boks Kontrak” ai kantawol enjil. (2 Sml. 15:29) Enjel aima Depit kongan king erim pakero—Johova konganem pende enjil eri.—2 Sml. 19:​11-14.

16. Nawal Sadok pakerongo Johova bol anjngo kamom?

¹⁶ Abaitar, Johova bulngom ba Sadok, Johova bol anjngo kamom. Depit kunum kunum Sadok bol pilgi wei nim. Adoniya mambnem gend  mal ere kongan king sinal ne erim penem wom kunum, Depit, Sadok, Neten na Benaia bol pilgi ne Solomon makromambe king mora panim. (1 Kin. 1:​32-34) Johova lotu erngo olom bol ka monjup—Neten na ga pende King Depit pakerojup ga—mambnem enjip mal kane Sadok kumbol dongal mem sinda sim. (1 Kin. 1:​38, 39) Solomon kongan king sim kunum, “Sadok makro Abaitar dumam si kongan pris endel panim.”—1 Kin. 2:35.

17. Ende nim bol mand wei meim alamb Johova bulngom dal, Sadok mambnem erim nim nalmal karkar endel?

¹⁷ Sadok erim mambnem nim nalmal karkar endel? Ende kanka kanen alamb Johova bol kanamolo bulngom dal, nim Johova bol kameim men ambilgi nindel. (Jos. 24:15) Pilkane endel Johova nim pakero dongal ngondo, kumbol dongal panda. Yane ne Johova ngo, ala olom bol seno kameim alamb bol mand morol. Johova bol kamen olom kapisem embe pile nim topum ka ngonda.—2 Sml. 22:26.

18. Mako na Sise bol wal min wom mal yubol paim bar, kenem nawal duwom esmen?

¹⁸ Mako ambiyem Sise bol wal pende min wom mal omukro kandpe. Enjel ambjel dongal tal yuwei wakro sikele seori punjil. Mako embe nim: “Nim ngal ende kangrin kunum olom kankawei kanen, endel kaple enem wal porpor ere buning mora ne kantawol ka enen. Ba, enjep enjep kapisem mal, Johova bulngo sikele seori pum kunum, nim mundmong balninde kumbola keswei pisen.” Olom yu pende embe nim: “Ba Johova kil pakero erdongal erim. Na dongal pornim kunum, erkelnge ambina dongal pam, ala ambina dongal pornim kunum, erkelnge na dongal pam.” Sise yu pende ne embe nim: “Johova kil pakero dongal ngom nangonange ne, kil akilgi naninambilnge, na keswei pile na alla pande ambilna tal Johova bulngo seori pumbol nepinj. Embe pile na nalmal pinj yane wusngama ne Johova ngondo. Kanan napungo pilgi ding ambanjen ende kongar puli nakanj na mond bar wo, na nungj kangle dungola kane embe nim, ‘Sise pisel ambel tal seori pumbol e nim alla napaim!’ Yu embe nim na kapinj, Johova na pakerongo olom konganem kapile kumbol ngo erind.”

19. Nim nal enal ne bunuman dongal panda?

¹⁹ Johova kapisem olom lotu erngom ga porpor, Sadok erim mal kumbol dongal pande moram nepisem. (2 Tim. 1:7) Embe paim ba, Olom kenem kenem dongal a akilgi ne moramen nenapisem, olom bol sengse molo pake sinamen nepisem. Embe pile, wal ende min wo erkelde nim kumbol dongal mem sindel pamdal, yane wusngama Johova ki si kumbol dongal mem ngonda. Nim weieri pilgi nindel olom nim kumbol dongal mem ngondo, Sadok kumbol dongal pam mal embe panda!—1 Pita 5:10.