Ma. Ba olom nim yu weieri paim.

Olom nim yu ding mal, wes pende meim omukro kanamen. E embe: “Na golang kele, nim kangnem kunum kunum, min keral. Ala kunum kunum, na nim bol yu dongal nind karkar enal.” “ O Johova na Got na, na kumbol pel ngo nim kangem min keral.” “Na nim kangnem kunum kunum ambil min keral.”—Buk Song 61:8; 86:12; 145:1, 2.

Depit yu nim, kolnga aimanj moral ne pilnanim. Johova kenem sin nganj paim alamb goramen panim, olom  sin ye pilkane erim. (Stt. 3:3, 17-19; Sng. 51:4, 5) Ala pilgi dongal pam ga Abram, Isak, na Jekop gonjip, Depit pilkane erim. Olom pra gora eri. (Buk Song 37:25; 39:4) Ba olom nim yu Buk Song 61:8 a pande kanmen, olom kol mora kunum, kunum kunum Got kangem ambil min kera e pilnim.—2 Sml. 7:12.

Buk Song 18, 51 na 52, olom nomolpa erim bar, wal pende min wom mal pile bom. Buk Song 23 a, Depit Johova sipsip tawol ye mal molo, kol tane, kantawol ere ala erkelde kumbol amin sende meimen panim. Depit olom sipsip tawol ye ka mom eri. Olom ‘kol moral kunum pel’ Johova konganem enal panim.—Buk Song 23:6.

Pilkane esmen Depit yu porpor bom, Johova bu ngongo bom. Olom yu propet pende bom, mi bulto wei min wonda wal bom. Yu ende bom Buk Song 110 a paim, olom  Ye kerma aiem min, epen dongal kerma pande “[Got] angle weiro ami nemora”  e pil bom. Molo nalenda? Got opyem esim alamb porpor tomene kele, “mal a alamb porpor kot ere ngonda.” Depit, Masaia min epen kongan king ere “pris kunum kunum” mora, ye kopam ende mom. (Sng. 110:1-6) Jises nim, Buk Song 110 a yu propet pam, olom bol pam, bulto mongom tonda panim.—Mat. 22:41-45.

Weieri, Depit Johova murmulom dongal bu ngongo yu bom, olom kunum na mi bulto olom akil yem wo, Johova kangem kunum kunum kapil ambil min kera e, pile bom. Buk Song 37:10, 11, 29 yu meim, pakeronda pilkane esmen, komna Israil ga bol min wom, ala mi bulto Got yu dongal ne mal pel wal min wonda padom, weieri min wonda.—Tawolgar e tuwalto, yu pengem “Nim Na Kin Paradisa Morol” pane paim kane.

Buk Song 61:8 na wes pende ding mal meim taninde kanmen, Israil ga komna monjip bar, Depit Got kangem ambil min kelmol pu gom. Bulto Johova Depit si akse ,wo kol mora kunum Johova kangem, weieri ambil min kera mal tadom.