YU DUWOM 18
Kongrikeisen Maka Ende Ende Er Dongal Enamen.
“Kenem ende ende wei pilngonamen,. . . , ala ende ende kumbol er dongal enamen.”—HIB. 10:24, 25.
GOLANG 88 Nim Mambnem Ainem Na Duwom Erngo
DUWOM ENAMEN YU KERMA a
1. Nalende kenem kongrikeisen make gar yu pundom nimen?
NALENDE kenem kongrikeisen make pumon? Mem kerma wei ende paim, Johova kangem min keramen ne pumon. (Sng. 26:12; 111:1) Ala wal ende yipe kunum kes sem kunum, make pumon bar ende ende er dongal esmen. (1 Tes. 5:11) Kenem make gar angel min kele yu pundom nimen kunum, wal talai e, esmen.
2. Nal kunum kenem kongrikeisen maka angel min kele yu pundom ninamen?
2 Wakan dingding ne tuwalto kenem embe enamen kol apis kerem. Ende embe mal Sande kunum Tawolgar Yu Duwom esmen bar. Wakan tuwal, makeromon kunum, Kongrikesen Baibel Yu Duwom esmen bar, na Baibel gerjin yu ende kenem pakerom mal na Yumem kerma Kurkanjin angel min kele, pra yu pundom nimen eri,
3. Nal ombun ende kenem bol min wonda, ala Hibru 10:24, 25 nalmal kenem pakeronda?
3 Kenem porpor Johova kangem min kele, ala pilgi ding ga er dongal enamen ne pismen. Ba, yu pundom ninamen ne pismen bar, ombun tal ende paim. (1) Kenem yu pundom ninamen ne enamen bar, bunuman puli keramen. (2) Kenem yu pudom ninamen ne, angel kunum puli min keramen ba, kangjen nadaram. Ombun embe mal panda kunum, kenem nal enamen? Aposol Pol pepe bolo Ibru ga ngom bar, yu ende paim kenem pakeronda. Olom nim kenem make tonamen wal kerma wei paim, nalenem, wusngam ele “ende ende” er dongal enamen panim. (Hibru 10:24, 25 gere.) Yu pil meim ga kenem yu pundom ninamen enjep, pakero dongal ngonda ne pinjin dal, kunum kunum erkun erwo kenem pilgi paim mal yu pundom ka ninamen. Ala kenem kunum angel min keramen, ba kangem nadajip dal, make meim ga pende yu pundom ninam eri ne kapisamen.—1 Pita 3:8.
4. Nal yu talende yipe yu duwom enamen bar, omukro kanamen?
4 Kenem yipe yu duwom enamen bar, kongrikeisen kerei sende, yu pundom ninam ga puli nameim bar, kenem nalmal yu pundom ne ende ende dongal ngonamen mal kanamen. Ala bulto kongrikeisen kerma sende, yu pundom ninam ga puli angel min kele yu nim bar, kenem nalmal ere ende ende dongal ngonamen mal kanamen eri. Bulto kenem yu pundom nimen bar, nimen yu ende dongal ngonda mal pra omukro kanamen eri.
KONGRIKEISEN KEREI SEM BAR ENDE ENDE ER DONGAL ENAMEN
5. Kongrikeisen maka apal eri monjip dal, ende ende nalmal er dongal enamen?
5 Kongrikeisen kerei mo gurup sem bar, yu pundom nimam gal puli molo, angela min kerambe make tawol enen ye kangem dara ninam napaim. Kunum pende ne, olom kui mold ende angil min kele yu pundom nim, embe esim kunum anj dunglom kerma sinem,—e mambnem ka ma. Embe pile nim nalende? Nim erken er molo angel kunum puli min kele yu pundom nindel. Embe endel bar ga pende pakeroi enjep yu pundom puli ninamen ne pisam eri.
6-7. Nim maka yu pundom nindel bar bunuman puli ken dal, nalmal tomene kerel?
6 Nim yu pundom nindel bar bunuman puli kele kisal gondal, nalende? Weieri, ga puli embe pisim mal, nim pisen. Embe panda ba, nim angam ambanem man pakero er dongal enal ne pindal, wusngam pende kansi bunuman puli keren mem tomene kerel. Ba nalmal embe endel?
7 Kenem Tawolgar yero pende enjin bar, bunuman embe mal ambramen, nalmal tomene keramen mal yubol pende mom, ala yem pu omukro kanjel. Wastaua. b Ende embe mal, Redim Gut Ol Tok Bilong Miting, pane paim kanjel. (Snd. 21:5) Ende embe mal yu pundom nindel wal erkun ka ersi tundol, nim yu erkun kawei ere yumem pilpol tondal, yu pundom nindel onom panda bunuman puli nakerel. Ala wal ende, yu pundom tambem nindel. (Snd. 15:23; 17:27) Nim yu pundom tambem nindel bar, bunuman puli nakerel. Ala angam ambanem man, yumem pil au ninam. Ala nim yu pundom si tambem kele, nimnem yunoma nindal, yumem kerma penem a pa, pisam ga pakeronda.
8. Kenem yu pundom ka ninamen, ne ombol esmen bar, Johova nalne pisem?
8 Kenem wusngam pende bol tonjin, nim karkar endel bar, yu pundom tal mo talende nindel bar kisal gondal, nim weieri pilkane endel kumbol wei ngo wal enal ne enen bar, Johova kawei pisem. (Luk 21:1-4) Olom kenem enamen kaple nanem wal eya nadom. (Fili. 4:5) Nim yane ne kumbol amin si, endel kaple enem wal ere, kaple nanem wal pakeroi kikine erse min wona nindel. Embe endel pakerondo, yu pundom nindel kaple enda yu nindel.
KONGRIKEISEN KERMA SEM BAR ENDE ENDE ER DONGAL ENDEL
9. Nal ombun ende kongrikeisen kerma sem bar, min wonda?
9 Nim kongrikeisen a paplisa puli monjip dal, ombun ende jel mal min wonda. Angjen ambajen man puli angel min kele, yu pundom ninam ne esim pile, kunum pende ne nim angel min kerel kangem nadaram. Denyela kunum kunum make gar yu pundom ninda kapilpil erim. c Olom yu pundom nim bar, lotu ende erind, ende er dongal erind, ala nanam Baibel a yuwei meim pilgi er dongal erind ne, pilpil erim eri. Ba olom se kongrikeisen kerma ende pum kunum, angel min kem kunum kunum puli kangem nadaldal enjip, —ala kunum pende ne kangem wei nadaldal enjip. “Olom kes pile embe nim.” “Na wal ka ende enal wal narind ne pinj, kunum puli wal embe mal nim bol min wom dal, ga na kanse kangem nadasim mo ne pisel.”
10. Kenem nalmal ere, maka yu pundom puli ninamen?
10 Denyela nalmal pim, nim pisen mo? Wal embe mal nim bol min wom dal, yu pundom nane min wonda yu kisi pilmoral nepisel. Ba embe ne napisel, nim nalendel? Nim yu pundom dingeri ma, pende puli erkun endel. Embe erin dal, yero angel min keli mapam dal, bulto yu pundom nindel eri. Nim Tawolgar Yu Duwom enamen bar, pundom ngonal ne erkun erin dal, paragrap dingding ne, yu pengem kerma bol, nalmal yu ding mal nim kanpol tondol. Embe erin dal, nim yu pundom ka pende ne ende dongal ngo pakerondol kaple enda. Ala paragrap pende yu dongal pande pundom ninam amin napaim, erkun ermolo nindel eri. (1 Kor. 2:10) Nalenem, paragrap yu dongal meim bar, ga puli pundom ninam ne erkun er nameim. Nim wal pende nimen mal embe endel, ba, make pende tuwalto yu pundom nanin dal, nawal ende endel? Make pulnom nabora kunum yero, make tawol enda ye nengo paragrap mand e, ki pundom na ngonal nepis panindel.
11. Filipai 2:4 kenem nal eya dom?
11 Filipai 2:4 gere. Johova murmulom dongal aposol Pol bu ngongo, yu bom bar Kristen ga enem enem mongse kapisim wal ma, ende pisim wal pra pilkane enam eri panim. Olom nim yu kenem kongrikeisen maka nalmal konganem enamen? Pilkane enamen ga pende maka yu pundom ninamen ne, kapisim eri.
Kenem yu nimen bar, kankelpe ende yu nim mal, kongrikeisen maka kankelpe ga pende yu pundom ninam (Paragrap 12 kane)
12. Nal wusngam ka ende makeromon bar, angjen ambajen man er dongal enamen?
12 Pisel, nim senon ga bol yu don kunum, nim yu puli ni, enjep yu apal ende naninam mo? Kenem embe nasim ma! Yu ne yemyem ere, pisamen ne pismen. Embe najin dal, enjep yu ende nanimen ne pisam. Embe ding mal, kongrikeisen make tomon bar, kankelpe ga puli yu pundom ninam. Weieri, angjen ambajen man pilgi wal dongal moram, kankeli enjep pilgi paim mal neori keram. (1 Kor. 10:24) Pi kenem nalmal embe enamen omukro kanamen.
13. Kenem yu pundom nalmal nipe, kol apis kere ga pende yu pundom ninam eri? (Piksa paim prakane.)
13 Kenem yu pundom tambem ninjil dal, kol apis kere ga pende ninam eri. Elda mo paplisa yuwei a kanan meim ga, yu pundom tambem ninam bar ga pende kane karkar enam. Ala nim yu tambem nindel kunum, yu puli bol narondol. Nim paragraph yu pel nesiken dal, ga pende yu naninam. Paragrap e, omukromon bar, mambnem tal ende enamen mal kanmen —e, yu pundom tambem ne, yu puli bol narondol. Paragrap ende nim yu pundom ngimba na ninjip dal, yu pundom apal nindel, pel ne sikeral ne nandel.
Nal kunum maka kenem angel min nakeramen? (Paragrap 14 kane) f
14. Nawal kenem pakerondo angel kunum puli min keramen bar, kanpol tonamen? (Piksa paim prakane.)
14 Nim yu pundom nindel kaple enem, ba angel kunum nalnal min kel nindel omuka tondol. Kenem maka angel kunum kunum, min kenjin dal, make tawol enem ye kanapisa, nalenem, ga pende yu pundom nanjip, ninam ga meim eri. Nim embe endel bar, ga pende angel min kele yu pundom ninam kanapisam.—Ekl. 3:7.
15. (a) Kenem yu pundom ninamen ne, angel min keramen ba, kangem nadaram kunum nal enamen? (b) Make kantawol enda ye, nalmal ga porpor pilngonda? (Nim “ Make Ende Kantawol Endel Kunum,” pane boks a paim yu kane.)
15 Kongrikeisen maka paplisa puli angel min kele yu pundom ninam ne enamen kunum, kenem kapil yu pundom puli nainamen pismen kaple nanda. Kunum pende maka tawol enem ye kenem kangem wei nadara. Wal embe min wonda kunum kenem kumbol ombun nasinamen, ala kenem kenem mongse yu pundom eri ninamen ne napismen eri.—Ekl. 7:9.
16. Angjen ambajen man yu pundom ka ninam bar, kenem nal yu ne enjep dongal ngonamen?
16 Nim yu pundom puli ninal ne pisen mal naindal, angam ambanem man pende, bar komol kase pilmolo, make bulto yu pundom ka don pane ngondol. Yu ka embe mal ne enjep dongal ngonon, yu pundom ne dongal ngonage bol ding mal. (Snd. 10:21) Wal esim bar kane yu ka nimen, ende ende dongal ngomon eri.
WUSNGAM PENDE PRA KARKAR ERE ENDE ENDE ER DONGAL ENAMEN ERI
17. (a) Ngal danjep manjep, ngaljep nalmal, pakeronambe yu pundom ninam mal erkun ka enam? (b) Vidio kanin bar, nal wusngam 4-poro karkar ere yu pundom erkun ka enam? (Futnot paim pra kane.)
17 Kongrikeisen maka ende nawal ere, ende ende er dongal enam? Nim ngal danjep manjep ende mondal, ngalnem kongar nalnal moram kane, pakero keli yu pundom kun ninam. (Mat. 21:16) Kunum pende yu duwom esmen bar yu kerma kerma pende omukro kanmen, e, bol sim ga ombun paim mal, mo mambnem kes na ka paim omukro kanmen, ngal yu pundom apal pende ninam kaple enem eri. Ala kunum pende ne olom angel min kera ba, kangem nadanjip dal, nalmem paim nengoi pilkane enda eri. Nim ngoi pilkane enjip dal, enjep angel min keram ba, kangem nadal ende daram kunum kumbol ombun nasinam.—1 Tim. 6:18. d
18. Kenem yu pundom ninamen kunum, kenem kenem kangem kerma sinamen ne nanamen? (Prov 27:2)
18 Kenem yu pundom erkun enamen kunum, Johova kangem keram sinde, Pilgi Ding angjen ambajen er dongal enamen mal pil ninamen. (Snd. 25:11) Ala kenem kenem bol wal min wom mal yubol tonjin dal, yu apal eri ninamen. (Provep 27:2 gere; 2 Kor. 10:18) Nalenem, Johova kangem min kele, olom Yuwom Baibel a meim, na alambem man pilngo yu pudom ninamen. (Rev. 4:11) Ala paragrap a ki ende enem enem kin wal min wom mal, pundom niya nim dal, embe ninamen kun paim. Embe enamen mal, paragrap pende yu duwom bulto, enamen mal omukro kanamen.
19. (a) Kenem ga porpor kongrikeisen maka meim, pilngo yu pundom ninjin dal, nawal ka min wonda? (Rom 1:11, 12) (b) Maka yu pundom nim bar, nem nalmal kapisen?
19 Lo ende pam kenem yu pundom embe embe ninamen pandom. Ba yu pundom ka ninamen bar ende pakero dongal ngonamen. Embe pile, nim yu pundom pende puli nindel kaple enem, mo kunum pende ne kankeli nim yu pundom ne kapisal ne pisen mal, ga pende ne kapisam eri. Embe pile, kongrikeisen a ende ende pilngonamen erkelde, yu pundom ninamen bar “ende ende dongal” ngo kapisamen.—Rom 1:11, 12 gere.
GOLANG 93 Kin Make Pakeroi Woka Pundo
a Kenem kongrikeisen maka yu pundom nim bar, ende ende er dongal esmen. Ba pende ki pundom ninam bar kisal gosum, ala pende ki pundom ninam bar kawei pisim. Ba kenem porpor nalmal ere,yu pundom ninam bar, ende ende er dongal enamen? Ala kenem yu pundom nalmal ninamen pakero angjen ambajen man, dongal ngondo, kapil kongan ka enam? Ki tal e, yu duwom pi enamen bar pundom sinamen.
b Yu pende kane pake sinal ne pindal, Jenwari 2019 Wastaua, p. 8-13; ala Septemba 1, 2003, Wastaua, p. 19-22 kanjel eri.
c Kangem wei ma jel.
d Vidio ende Kamap Pren Bilong Jehova pane jw.org a paim bar— kangem, Redim Ol Miting pane paim kanjel.
e Wastaua Julai 15, 2013, p. 32; na Septemba 1, 2003, Wastaua, p. 21-22 pra kanjel.
f PIKSA YU BOLOM: Kongrikeisen kerma ende sem bar, angjen ende yero yu pundom nim, kankere ga pende angel min kele yu pundom nim
