Jova mal ere alamb ngom. Mal e kenem kulu jen wei. Embe pile yeamb komna wei ersem Adam na Eva tal, ngal kulo mine kupula mol puli enambel pananim. Min kupula Got enjol yero erkem monjip. (Jop 38:4-7) Got ye komna erim ye sip kulu kawei wei ersem bar tuwal kem, kulu e Iden. (Stat 2:15-17) Jova wal ende Adam na ngalem man bulto mine wonam ngom e, mala kawei wei kolnga kunum kunum mol punam panim.​—Song 37:29; 115:16 gerdel.

Komna wei kulu Iden mongse paradise sem. Got komna ersem yeamb ngal kangle, mal yemyem molpu ninam panim. Apal apal ne erkerambe mal mundombol paradise senda panim. (Stat 1:28) Mal e kes wei namora, mal kenem alamb moramen ne ersem.​—Song 104:5 gerdel.

Adam na Eva, Got yu nim tokenjil pile, Jova enjel paradise a to orikem. Paradise se taipum pile alamb ende kulu ka e, ala er siyem keram kapil naenem. Baibel embe dom: “Got kankere mal yipe mambnem kes enjip alamb angela sende tawol esim.” Jop 9:24.​—Stat 3:23, 24 gerdel.

Jova wal ka alamb kin enal panim aurdom mo? Ma wei! Olom omblom dongal wei pam ye, olom yuwom pal mongom tonda. (Aisaia 45:18) Olom wal komna kapile alamb kin enal nepim wal, ala er siyem kera.​—Song 37:11, 34 gerdel.

Jises Got kem king meim, mal tawol enda kunum, paradise ala seyem wonda. Got nganmal kangem Amagedon a Jises yie sende, enjol kin alamb Got bol opyem esim alamb topor ninam. Jises Satan to karpos kelnde, kongar 1,000 pel panda. Got alambem man ombun wonda kunum tuiro kawei moram nalerim, Jises enjep kantawol enda. Ya mala paradise sende, alamb kawei pile kolnga kunum kunum moram.​—Revelesen 20:1-3; 21:3, 4 gerdel.

Nal kunum Got, mambnem kes ya mala paiyem topor ninda? Kunum poro ninal ne enda kunum, Jises yu ende nim mine wondo kanam e “jep” mal panda. Yipe ombun duwom ya mala alamb meim bar mine wondo kanmen e, tadom “kunum pornim bar” meimen.​—Matyu 24:3, 7-14, 21, 22 gerdel

Kongar 1,000 tuwalto Jises king molo mal tawol enda kunum, ombun duwom porpor topor wei ninda. (Aisaia 9:6,7; 11:9) Jises King kongan enda ba, Pris kongan pra ere alamb Got kanka kanim alamb sin wakronda. Embe pile, Jises wusngam a, Got keswos, tuawa na golmolo esmen mambnem topor ninda.​—Aisaia 25:8; 33:24 gerdel.

Alamb Got yu karkar enam alamb paradise a moram. (1 Jon 2:17) Jises karkar enjip ga nengo, enem pu mol mene keram alamb Got yuwom ne ngonambe karkar enjip dal, Got enjep siyem ninda panim. Yipe Jova alamb milien puli pakro kelde, ka molpu, Paradise akling mala senda bar moram ne enem. (Sefanaia 2:3) Jova Witnis ga Kingdom Gar se punom bar alamb pum pu, ye nalmal ambngal tawol ka enda, ala amb nal mal yengal kandume ninda mal duwom dumine esim. Ngal danjip manjip bol porpor yu mambnem aima ne, ala yu kawei Baibel a meim enjep nalmal pake tonda mal duwom esim.​—Maika 4:1-4 gredel.